http://www.panorama.com.al/

Faqe 6 - Politikë
8Shkurt 2004

Parlamenti do të miratojë për dy javët e ardhshme projektligjin për
ligjërimin e ngulimeve të reja

Legalizimi i banesave, brenda shkurtit
Lekët e legalizimeve, shkojnë për kompensimin e ish-pronarëve


Elisabeta Ilnica

Të shpërngulurit nga zonat e thella dhe të përqendruar kryesisht në
rrethinat e qyteteve, për dy javë mund të kenë në dorë lejen e shtëpisë.
Parlamenti do t'u hapë dritë jeshile ligjërimit të banesave, brenda
shkurtit.

Ngulimet e reja komunitare do të legalizohen pranë bashkive përkatëse, duke
respektuar planin e ri të urbanistikës. Menjëherë pas marrjes së "Ok"-it në
seancë plenare, të projektligjit për kthimin dhe kompensimin e pronës, e
kanë radhën legalizimet. Në fakt, "këmbanës" për të miratuar këtë
projektligj, i ranë anëtarët e Komisionit të Ekonomisë, nisur nga fakti i
dëmshpërblimit për tokën e zënë forcërisht. Pikat më të dobëta do të jenë
Bathorja dhe Kamza, ku lekët e mbledhura nga legalizimet do të shkojnë për
kompensimin financiar të ish-pronarëve. Drafti i pregatitur nga një grup
deputetëtsh opozitarë, pretendon legalizimin e ndërtimeve për strehim dhe
biznes privat të ndërtuara brenda territoreve specifike në rrethinat
Bathore-Kamëz, Kënetë-Durrës dhe në rrethinat e qyteteve të krijuara për
shkak të migracionit të brendshëm të popullsisë. Legalizimet do të bëhen
vetëm pas nënshkrimit të kontratave për shitblerjen e trojeve, midis
pronarëve të ligjshëm të tyre dhe pronarëve të ndërtesave. I gjithë
dokumentacioni duhet të depozitohet në zyrën e urbanistikës së Bashkisë.
Trojet që nuk figurojnë në pronësi të personave privatë, kontratat do të
lidhen mes Bashkisë dhe pronarëve të ndërtimeve. Ndërsa, për shlyerjen nga
ana e pronarëve të ndërtimeve të vlerës së kontratës së shitblerjes së
truallit, do të ngarkohet Këshilli i Ministrave.

Asistenca dhe kreditë
Deputetët opozitarë kanë theksuar si domosdoshmëri në projektligj për të
zgjidhur çështjen e të shpërngulurve, një asistencë nga ana e shtetit për
mbulimin e kostove individuale të kontratave të shit-blerjes. Kjo asistencë,
do t'i ngarkohet Këshillit të Ministrave, i cili do ta japë atë në formën e
kredive afatgjata dhe me normë të ulët interesi, sipas kërkesës së tyre dhe
deri në masën e plotë të vleftës specifike të kontratës. Kushtet dhe
garancitë e tjera për kreditë, do të zbatohen në përputhje me kushtet e
kreditimit bankar në fuqi. Në mënyrë të veçantë, sipas demokratëve, brenda
dy javëve që ky ligj do të hyjë në fuqi, Këshilli i Ministrave duhet të
përcaktojë, si dhe të publikojë hartën e territoreve për çdo qytet, të cilat
do të përfshihen në procesin e legalizimit. Por, ky proces është i
domosdoshëm që të nisë njëkohësisht në të gjitha ngulmimet e përfshira në
hartë. Projektligji i paraqitur propozon një rregullim specifik për shkak të
faktit se, rrethanat e rastit kërkojnë një ndërhyrje të shpejtë dhe
specifike. Ai është hartuar në kuadër të protestave të nisura nga komuniteti
i qytetarëve Bathore-Kamëz, të vijuara edhe nga komunitetet e tjera qytetare
në Laprakë dhe Kënetë-Durrës, për legalizimin e ndërtesave të tyre.



Si mund të legalizosh një shtëpi

Pjesë e legalizimeve do të jenë ato shtëpi që nuk prekin planin e ri të
urbanistikës
Legalizimi do të bëhet pas nënshkrimit të kontratave për shit-blerjen e
trojeve midis pronarëve të ligjshëm dhe pronarëve të ndërtesave
Kërkesat për legalizim duhet të depozitohen në zyrën e urbanistikës së
Bashkisë
Trojet që nuk figurojnë në pronësi të personave privatë, kontratat do të
lidhen mes Bashkisë dhe pronarëve të ndërtimeve
Qeveria duhet të sigurojë për pronarët e ndërtimeve, kredi afatgjata dhe me
normë të ulët interesi
Kushtet dhe garancitë e tjera për kreditë, të zbatohen në përputhje me
kushtet e kreditimit bankar në fuqi
Brenda dy javëve, nga hyrja në fuqi e këtij ligji, qeveria të publikojë
hartën e territoreve për çdo qytet të legalizimeve
Procesi i legalizimit të fillojë njëkohësisht në të gjitha ngulimet e
përfshira në hartë