08/06/2004 http://www.korrieri.com/

Pronat, opozita le Kuvendin

Posti i Kryetarit te Komisionit te Kthimit e Kompensimit te Pronave prish
konsensusin mes PS dhe PD. Deputetet demokrate largohen nga Parlamenti,
ndersa socialistet vijojne votimit e projektligjit. Berisha: "Duan te vene
melcite e qengjit ne qafe te ujkut, pronat ne dore te Farudinit"

Renato KALEMI

Miratimi me konsensus i projektligjit "Per kthimin dhe kompensimin e
pronave", i kerkuar aq shume nga nderkombetaret, nuk eshte arritur dje mes
dy partive me kryesore te vendit, PS dhe PD. Shkaku i prishjes se ketij
konsensusi, qe ne plan te pare dukej plotesisht i arritur, ka qene neni 15 i
projekt-ligjit ne fjale, ndersa opozita, pas votimit ka braktisur seancen ne
shenje proteste.

Deputetet e mazhorances dhe ata te opozites, nuk kane rene dakort me
njeri-tjetrin, gjate seances se djeshme parlamentare, ne lidhje me perberjen
e Komitetit qe do te beje kthimin dhe kompensimin e pronave per
ish-pronaret, vecanerisht per kryetarin e ketij komiteti. Keshtu, opozita
(PD) kerkonte qe ky Komitet te perbehej nga pese anetare, ku dy anetare te
ishin te pozites, dy te opozites, ndersa i pesti, qe automatikisht do te
ishte dhe Kryetari, te propozohet nga Presidenti i Republikes dhe miratohet
nga Kuvendi. Por, ky amendament i paraqitur nga PD-ja, u hodh poshte me 64
vota kunder. Nderkaq, varianti i PS-se, i cili u miratua me 60 vota pro,
ndryshonte vetem tek pika e Kryetarit, ku mazhoranca kerkonte qe ai te
propozohej nga Keshilli i Ministrave dhe pastaj te dekretohej nga Presidenti
e mandej Kuvendi ta miratonte. Ne kete pike, deputeti demokrat, Jemin Gjana
deklaroi se gjithcka eshte ne kundershtim me frymen qe eshte punuar per
hartimin e ketij projekt-ligji dhe se tashme u thye perfundimisht konsensusi
i kerkuar nga OSBE-ja. "Parlamenti u bllokua per shkak te Kryeministrit
Fatos Nano, qe kerkon farudizimin e Komitetit per Kthimin dhe Kompensimin e
Pronave dhe nxirjen e procesit. Tani serish duan te vene melcite e qengjit
ne qafe te ujkut, pronat ne dore te Farudinit", u shpreh Kryetari i PD-se,
Sali Berisha.

Nga ana tjeter, numri dy i PS-se, Gramoz Ruci theksoi se shmangia e qeverise
nga ky prjekt-ligj eshte nje absurditet, ndersa para votimit te
amendamenteve kerkoi edhe kesaj here, mirekuptimin e opozites. "Po gjenden
sebepe per te prishur kete konsensus. Ju doni qe mazhoranca te kthehet ne
minorance, ju nuk keni vullnetin ta miratoni kete", nenvizoi ne fjalen e
tij, Ruci.

Nderkohe, pas braktisjes se seances nga opozita dhe pas afro kater ore
debatesh vetem per nenin 15, deputetet e mazhorances (mes tyre PDR dhe
republikani Maksim Begeja), miratuan ne parim te gjitha nenet e
projekt-ligjit ne fjale, ndersa kishte mbetur dhe shqyrtimi i pikes kater te
nenit 8, ne lidhje me truallin. Pas rreth kater seancash, here te
tensionuara e here jo, ne te cilat duhej te mbizoteronte konsensusi me baze
te gjere politike, por qe ne fund nuk i'a doli mbane, ish-pronaret shqiptare
edhe pse e kundershtojne, do te kene per here te pare nje projekt-ligj qe do
te tentoje rikthimin e "hakut tek i zoti".

----------------------------------------------------------------------------

http://www.shekulli.com.al/
PS dhe PD nuk bien dakord për formulën e Komitetit Shtetëror . Ligji I
pronave, ende i pamiratuar

Pronat, prishet konsensusi PD-PS

Deputetët socialistë miratojnë formulën e tyre për Komision e Kthimit të
Pronave

A.Rama

Mbahet peng në Parlament miratimi i projektligjit "Për kthimin dhe
kompensimin e pronave ish -pronarëve". Konsensusi i arritur në miratimin e
neneve të para të draftit të hartuar nga komisionet parlamentare të
Kuvendit, u bë inekzistent për nenin 15, ku janë të parashikuara kompetencat
e Komisionit Shtetëror të Kthimit dhe Kompensimit të Pronave dhe i emërimit
të anëtarëve. Me shumicë votash, Kuvendi miratoi variantin e propozuar nga
maxhoranca socialiste, sipas të cilit, kryetari i KSHKKP-së emërohet nga
kryeministri, dekretohet nga presidenti dhe më pas votohet në Parlament. Por
as me këtë variant opozita nuk ra dakord, duke votuar kundër. Opozita kërkoi
që kjo strukturë të ngrihet, në bazë të variantit fillestar të propozuar nga
OSBE-ja, ku përcaktohet që kryetari i KSHKKP-së të emërohet nga presidenti.
Kryetari demokrat Sali Berisha, tha se nuk do të bënin atë gabim që bëmë
duke dhënë miratimin për komisionin e Farudin Arapit, sepse kjo do të
përbënte një krim. "Nuk do të lejojmë arapizimin e kësaj strukture, ju në
rast se nuk tërhiqeni, ta gëzoni Arapin. Në vende të ndryshme janë zbatuar
mënyra të ndryshme për zgjidhjen e këtij problemi. Ka pasur edhe raste kur
është anuluar ligji analog me 7501, por në asnjë prej këtyre shteteve
ish -komuniste nuk ka qenë në krye një qeveri si kjo, dhe me një
kryeministër të lidhur me interesat kriminale", -tha Berisha. Lidhur me
emërimin e kryetarit nga ana e presidentit, kryetari i komisionit të Ligjeve
Spartak Braho, tha se në këtë pikë nuk kishte asnjë shkelje ligjore.
"Presidenti mund të ushtrojë kompetenca të ngarkuara me ligj. Presidenti ka
bërë emërime për anëtar KKRT-së", -tha Braho duke hedhur poshtë pretendimet
e disa përfaqësuesve të maxhorancës, se nuk ishte kompetencë e presidentit
emërimi i një anëtari të Komitetit Shtetëror. Ndërkaq pas këmbënguljes së
opozitës për këtë pikë, maxhoranca u detyrua të tërhiqet nga varianti, i
hartuar nga komisioni i Ekonomisë, ku përcaktohet që kryetari emërohet nga
qeveria. Kryetari i grupit kuvendor të PS-së Gramoz Ruçi, propozoi që
përbërja e Komitetit Shtetëror të jetë e balancuar, ku secila prej palëve të
jetë e përfaqësuar me nga 3 anëtarë. "Nga gjashtë anëtarët, Parlamenti të
zgjedhë kryetarin me votim të fshehtë. Ju kërkoni të ndani pronat duke qenë
pakicë, por kjo është e papranueshme. Ne kërkojmë që të hartojmë një ligj, i
cili të jetë i zbatueshëm, jo një ligj që të ngelet në letër", -tha Ruçi. Ai
paraqiti disa raste kur strukturat që kanë drejtuar kthimin dhe kompensimin
e pronave, kanë qenë në varësi të qeverisë, apo të ministrive të veçanta të
saj. Në mbështetje të propozimit të Ruçit u shpreh edhe kreu i PSD-së
Skënder Gjinushi, duke shtuar se qeverisë do t'i interesonte që të lante
duart nga procesi i kthimit dhe kompensimit të pronave. "Kjo çështje po
personalizohet sepse, kjo qeveri edhe një vit do të jetë, dhe nuk do të
arrijë të kontrollojë asgjë nga kthimi dhe kompensimi i pronave. Për 1 vit,
Komiteti Shtetëror vetëm do të arrijë të ngrejë strukturat dhe do të merret
me metodologjinë", -tha Gjinushi.

--------------

"Takimet Jusuf Vrioni" për të dytin vit ftojnë njerëzit e letrave në debatet
për letërsinë. Sot në Shtëpinë e Librit dhe Komunikimit: Si bashkëjetojnë
letrat shqipe me kulturën europiane

Vrioni dhe letrat shqipe: Pas censurës, në Evropë


E.Demo

Një ndër të ftuarit e parë në Takimet Jusuf Vrioni, shkrimtari francez
Claude Arnaud dhe romani i tij "Kameleoni" kushtuar Shqipërisë së viteve '
70, shënoi zanafillën e debateve në fushën e letrave shqipe. I takoi
censurës, raporteve të saj në të kaluarën dhe format moderne të këtij
fenomeni në të tashmen, të ishte objekt debati, iniciuar nga Ambasada
Franceze në Tiranë në bashkëpunim me Shtëpinë e Librit dhe Komunikimit. Një
vit më pas, rikthehet në këto takime që mban emrin e të quajturit,
përkthyesit frankofon modern, Jusuf Vrionit, pikërisht në orën 9 të ditës së
sotme në ambientet e SHLK-së, do të diskutohet se si bashkëjtojnë letrat
shqipe me kulturën europiane.
E përshëndet takimin Ministri i Kulturës Rinisë dhe Sporteve, Blendi Klosi
përballë të ftuarve të posaçëm dhe bashkëpunëtorë në realizimin e këtyre
debateve si Bernard Regnauld-Fabre, nga Ambasada Franceze në Tiranë, Claude
Bléton, drejtor i Kolegjit të përkthyesve të Arlit dhe gjithë të ftuarve të
tjerë që do të mbajnë kumtesat në lidhje me këtë fenomen bashkëjetese. Janë
Pirro Misha, drejtor i ShLK-së, Aurel Plasari, përkthyes dhe drejtor i
Bibliotekës Kombëtare, të tjerë njerëz të njohur të letrave, Besnik
Mustafaj, Ardian Klosi, Edmond Tupja, Gentjan Çoçoli, Mirela Kumbaro etj..
"Diversitet dhe globalizëm" janë fenomenet që kanë prekur edhe në kulturën e
të shkruarit, si qarkullim idesh, përvojash. Cilat janë korrentet e tyre në
kulturën tonë? Në "Takimet Jusuf Vrioni", do të debatohet për librin dhe
përkthimin si një nga mjetet e shkëmbimit të kulturave, parë kjo në terrenin
shqiptar.

http://www.panorama.com.al/

Faqe 6 - Politikë
8Qershor 2004

Mazhoranca kaloi mbrëmë projektin. Komiteti i Kthimit të Pronave, kreu
propozohet nga Nano

Ligji, pronat miratohen pa opozitën

Bie kërkesa e Liponen. Ruçi: OSBE po na imponohet hapur


Nikolin Todolli

PS rrëzon kërkesën e opozitës dhe OSBE-së për të lënë në dorë të Presidentit
propozimin për kreun e Komitetit të ri të Kthimit dhe Kompensimit të
Pronave.

Ka qenë OSBE-ja dhe opozita ajo që ka detyruar mazhorancën të tërhiqet
përkohësisht nga varianti i saj për emërimin e kryetarit të Komitetit
Shtetëror të Kthimit dhe Kompensimit të Pronave. Që në fillim të seancës së
djeshme opozita ka bërë të ditur se nuk do të tolerojë lidhur me kryetarin e
Komitetit të ardhshëm, duke pohuar se do të pranojë vetëm variantin që ai të
propozohet nga Presidenti i Republikës. Këtë variant duket se e ka propozuar
edhe amendamenti i OSBE-së, i dërguar me urgjencë dje paradite në zyrat e
Kuvendit. Por, gjatë debatit dje në mbrëmje në Parlament, kryetari i grupit
parlamentar të PS-së, Gramoz Ruçi, ka dalë kundër OSBE-së dhe opozitës.
"OSBE-ja nuk na u përgjigj se cila është përvoja e shteteve të tjera të
Evropës Juglindore për përbërjen e Komitetit Shtetëror të Pronave, por ajo
na solli në një gjuhë jodiplomatike riformulimin e nenin 15 të
 projektligjit", tha Ruçi. Ai tha se shtete si Hungaria, Rumania, Bullgaria
dhe Çekia kompetencën e drejtimit të këtij komiteti ia kanë caktuar ose
Ministrisë së Drejtësisë ose Gjykatës. Duke parë këmbënguljen e opozitës,
Ruçi u tërhoq nga varianti i propozuar nga Komisioni i Ekonomisë për të
sjellë dy propozime të reja. Sipas tij, anëtari i pestë i Komitetit
Shtetëror të Kthimit dhe Kompensimit të Pronave duhet të propozohet nga
kryeministri, më pas të dekretohet nga Kuvendi për t'u miratuar nga
Parlamenti. Ndërsa varianti i dytë që propozoi Ruçi flet për një përbërje
tre me tre të komitetit të pronave. Gjithsesi, pas një pushimi prej rreth
një ore, mazhoranca është kthyer në sallë duke votuar propozimin e Ruçit, që
komisioni i ardhshëm të ketë dy anëtarë nga mazhoranca, dy nga opozita,
ndërkohë që kryetarin ta propozojë kryeministri, ta dekretojë Presidenti dhe
ta votojë Kuvendi. Ky votim ka bërë që opozita të braktisë punimet, çka
solli që debati për miratimin e plotë të ligjit për pronat të shtyhet
sërish.

Braho: Propozimi i PD-së është kushtetues

Kryetari i Komisionit Parlamentar të Ligjeve, Spartak Braho, ka mbështetur
kërkesën e opozitës që kreu i Komitetit të Pronave të jetë një kandidaturë e
presidentit. Sipas Brahos, këtë e toleron nenin 181 i Kushtetuës, pasi
Presidenti ka propozuar edhe herë të tjera gjeneralë, apo anëtarë
komisionesh të ndryshme.



Votimi pa opozitën
Prona, kthimi 45 ditë pas kërkesës

Deputetët e mazhora-ncës kanë vazhduar miratimin të disa neneve të tjera
edhe pse opozita bojkotoi votimin nen për nen të projektligjit. Kështu, pas
kalimit me shumicë votash të nenit delikat 15, i cili prekte kryetarin e
Komitetit Shtetëror të Pronave, deputetët e Partisë Socialiste dhe të
aleatëve të tyre kanë miratuar edhe gjashtë nene të tjera, të cilat
trajtojnë kompetencat e këtij komiteti, ngritjen e komiteteve vendore për
kthimin dhe kompensimin e pronave. Sipas nenit 19, këto komitete vendore i
njohin dhe i kthejnë pronat brenda 45 ditësh nga paraqitja e kërkesës së
ish-pronarit. Po kështu, mazhoranca ka miratuar edhe nenin 20, i cili i jep
të drejtën një qytetari që ka probleme me pronësinë të ankohet tek Komisioni
Vendor i Kthimit dhe Kompensimit të Pronave. Votimi i mëtejshëm i neneve të
mbetura ka qenë thuajse formal dhe ka kaluar gati pa asnjë debat.



Byroja parlamentare ka vendosur dje paradite për ish-të përndjekurit
Kompensimi, debati më 28 qershor

Projektligji për kompensimin e ish të përndjekurve politikë do të votohet në
Parlament në datën 28 qershor. Byroja parlamentare ka vendosur dje gjatë
debatit të paradites që drafti për ish të përndjekurit politikë të
shqyrtohet në Parlament brenda datës 15 qershor dhe pas kësaj date të vijojë
miratimi në parlament. Topi dhe kryetarët e tjerë të grupeve opozitare kanë
protestuar për mosfutjen në kalendar të miratimit të këtij ligji. Sipas
Topit, mazhoranca dhe qeveria nuk kanë mbajtur premtimin që ky projektligj
të miratohet brenda datës 15 qershor. Por, akuzën e opozitës nuk e ka
pranuar zëvendëskryeministri, Namik Dokle, sipas të cilit, propozimi i
qeverisë dhe i PS-së ka qenë ndryshe. Megjithatëë Dokle tha se qeveria dhe
mazhoranca politike mbetet e angazhuar për të miratuar ligjin për
dëmshpëlbimin e ish të përndjekurve. Të njëjtën gjë ka konfirmuar dje edhe
kryetari i grupit parlamentar të PS-së, Gramoz Ruçi, i cili shtoi se për
miratimin e këtij projektligji nevojitet një shqyrtim sa më i mirë nga ana e
komisioneve parlamentare.

 © 2003 Gazeta Panorama

-------------------------------------
http://www.balkanweb.com/

Parlamenti miraton me shumicë votash ligjin për kthimin e pronave

Lajmi i ores 9:10 PM


Parlamenti Shqiptar
 TIRANE (8 Qershor) - Është miratuar sot pasdite në seancën e kuvendit,
projektligji për pronat. Sipas News24, me 64 vota pro dhe 5 kundër i është
dhënë okey, projektligjit më të diskutuar në seancat e kuvendit shqiptar.
Nga deputetët socialistë në sallë, kanë abstenuar 4 prej tyre. Në seancën e
pasdites ishte i pranishëm dhe shefi i misionit të OSBE-së në Tiranë, Osmo
Liponen. Pas mbylljes së seancës, Liponen ka deklaruar se shprehte keqardhje
për mospjesmarrjen në votim dhe largim të opozitës në mes të seancës. Nga
opozita deputetë të PD, PLL, PR nuk kanë marrë pjesë në votim. Shumë
diskutime e debate nga më të ndryshmet, janë zhvilluar mes pozitës dhe
opozitës, ku nga njëra anë mazhoranca mbështet projektligjin sipas
propozimit të OSBE-së, dhe opozita e ndarë në dy qëndrime. Në seancat e
mëparshme u arrit pakti PS-PD i cili vendosi të mbështeste projektligjin
sipas skemës së OSBE-së por me një kusht që të hiqej neni "mbi tatimin e
jashtëzakonshëm" i cili nuk lejon kthimin e pronave të konfiskuara në 1945.
Por ky pakt u shoqërua me reagime negative nga deputetë të së djathtës
sidomos atyre republikanë, të cilët e kundërshtuan me forcë këtë pakt.
Seanca e sotme e pasdites i ka dhënë fund njëherë e përgjithmonë debateve
rreth këtij projektligji, duke vendosur të kompensojë ish pronarët e tokave
të cilët kanë vite që presin të shpërblehen për pronat e trashëguara nga
baballarët e tyre. bm/bm (BalkanWeb)


   Grupi parlamentar i PS-së miraton projektligjin për pronat

Lajmi i ores 8:20 PM



arkiv
 TIRANE (8 Qershor) - Grupi parlamentar i Partisë Socialiste, gjatë
mbledhjes së sotme (e Martë) miratoi projektligjin për "kthimin dhe
kompesimin e pronave", pavarësisht bojkotimit nga opozita në Kuvend.
Deputetët socialist ndryshuan disa nene të projektligjit duke rënë kështu
dakort edhe për vendosjen e masës së kompesimit të tokës bujqësore, e cila
sipas tyre nuk duhet t'i kalojë 60 ha. Po ashtu, deputetët socialist ranë
dakort edhe për miratimin e projektligjeve të përfshira në rendin e ditës së
seancën plenare të ditës së Enjte (10 Qershor). Gjatë pasdites së sotme,
Kuvendi pritet të përfundojë miratimin e projektligjit për pronat. bm/bm
(BalkanWeb)


   PS-PD, çahet kompromisi i pronave; sherri për kreun e komisionit

Lajmi i ores 11:10 AM

TIRANE (8 Qershor) - Propozimi i Ruçit për komisionin e Kthimit dhe
Kompesimit të Pronave është miratuar dje në orët e vona të mbrëmjes vetëm me
votat e deputetëve socialistë. Komisioni do të përbëhet nga dy anëtarë të
propozuar nga PS dhe dy anëtarë të propozuar nga PD-ja, ndërsa kryetari do
të propozohet nga qeveria dhe do të dekretohet nga presidenti Moisiu.
Deputeti i PD-së Gjana ka reaguar duke thënë PS-ja e prishi konsensusin me
votimin e sotëm(djeshëm), veprim ky që do të na detyrojë të mos e votojmë
ligjin për pronat. Në kuvend u diskuan dje dy variante që kanë të bëjnë me
zgjedhjen e kryetarit të komisionit të kthimit të pronave, e parashikuar në
nenin 15 të ligjit për pronat. Diskutimet për këtë ligj rinisën edhe një
herë ditën e djeshme, pas një ndërprerjeje disa ditore dhe plot sherr mes
palëve, PD e PS. Dje sërish palët politike kanë mbajtur qëndrimet
respective. PD në fillim të seancës ka kërkuar 30 minuta pushim me qëllim
diskutimin edhe një herë të kësaj çështjeje, të cilën ata e konsiderojnë të
rëndësishme. Sipas përfaqësuesve demokratë, asgjë nuk do tia kthejë atyre
mendimin që kryetari i këtij komisioni të propozohet nga Presidenti. Sipas
tyre, kjo do të garantonte një paanshmëri në marrjen e vendimeve dhe më
shumë pavarësi nga ekzekutivi. Madje sipas demokratëve, duhet që ky kryetar
komisioni, çdo tre muaj të raportojë pranë komisioneve të financave e
ligjeve në parlament për aktivitetin që kryen, ndërsa çdo gjashtë muaj të
raportojë përpara Kuvendit për punën e vet. Lidhur me idenë e Ruçit se
Presidenti nuk ka kompetenca në bazë të kushtetutës për të zgjedhur
kryetarin e këtij komisioni, Bamir Topi, kryetar i grupit parlamentar të
PD-së tha se sipas nenit 94 të Kushtetutës, Presidenti ka kompetenca të
dhëna me Kushtetutë dhe kompetenca të dhëna me ligje. ro/ro(Balkanweb)


http://www.ballkan.com/

Bllokohet në Parlament dhënia e pronave
 Kuvendi vendos për një interpelancë të veçantë me kryeministrin për lirinë
e medias

 Autori i Lajmit: Bledar Hoti
TIRANË - Seanca e Kuvendit është fokusuar në debatet se, kush duhet ta
drejtojë Komisionin Shtetëror për Kthimin e Pronave.
Drejtuesit e Partisë Demokratike kanë kërkuar dje në seancë që kryetari i
këtij komisioni të propozohet dhe të emërohej nga ana e presidentit të
Republikës. Sipas Berishës, vetëm kështu mund të garantohet një transparencë
për punën e këtij komisioni, duke shmangur edhe ndikimin që mund të ketë
qeveria në procesin e ndarjes së pronave për ish-pronarët. Ndërsa
socialistët, nga ana e tyre, kanë kundërshtuar një propozim të tillë, duke u
shprehur se përgjegjësi për procesin e kthimit të pronave duhet jetë
Qeveria, si i vetmi institucion ekzekutiv. Por, demokratët janë shprehur
skeptikë për qëndrimin e mbajtur nga deputetët e mazhorancës, duke insistuar
në idenë e tyre për formulën e caktimit të kryetarit të Komisionit të
Kthimit Shtetëror të Pronave.
Ruçi
Nisur nga debatet e shumta për votimin e nenit 15 të projektligjit "Për
kthimin e kompensimin e pronave për ish-pronarët", kryetari i grupit
parlamentar të PS-së, Gramoz Ruçi, propozoi dy formula të tjera për ngritjen
e këtij Komisioni të Pronave. "Ne si PS, nisur nga këto debate, propozojmë
këto amendime të nenit 15, i pari është, që kryetari i Komisionit të Pronave
të propozohet nga kryeministri, të dekretohet nga Presidenti dhe më pas të
votohet në Kuvend. Ndërsa varianti i dytë është që Komisioni i Pronave të
përbëhet nga 6 anëtarë, tre përfaqësues të mazhorancës dhe tre të opozitës.
Kryetari i këtij komisioni të zgjidhet me votim nga Kuvendi", tha mbrëmë
Ruçi. Propozimi i drejtuesit të lartë socialist u kundërshtua nga lideri i
PD-së, Sali Berisha. "Me këto amendamente që ju propozoni nuk synoni asgjë
tjetër veçse ta keni nën kon troll këtë strukturë të rëndësishme, për
realizimin e procesit të ndarjes së pronave", tha kryedemokrati. Lideri i
opozitës ka bërë të ditur votën kundër deputetëve të partisë së tij, për
amendimet e paraqitura nga Ruçi, në emër të PS-së. Më pas, Ruçi është
detyruar të kërkojë një orë kohë për të vendosur, lidhur me kërkesën e
opozitës.
Lesi
Seanca e Kuvendit ka nisur me protestën e deputetëve të opozitës në mbrojtje
të botuesit të gazetës "Koha Jonë", Nikollë Lesi. Lideri i PD-së, Sali
Berisha, ka kërkuar që Kuvendi të miratojë një rezolutë në mbrojtje të
medias së lirë. "Më gjeni ju një kryeministër që ka bërë shumë gjyqe dhe
kërkon heqjen e imunitetit të deputetëve, si dhe jep urdhër për prerjen e
fletë-arresteve të botuesve pa imunitet", theksoi Berisha. Ndërsa deputeti i
PDK-së, botuesi Nikollë Lesi tha se "nga kryeministri Nano po ushtrohet
presion i paparë ndaj tij dhe kompanisë që drejton". Ai theksoi se "është i
habitur për mënyrën e shpejtë të veprimit të Gjykatës së Lartë, e cila
shqyrtoi në një kohë rekord çështjen për heqjen e imunitetit të deputetit".
Pas këtyre debateve, kryetari i Kuvendit, Servet Pëllumbi, nuk ka pranuar
kërkesën e opozitës për hartimin e një rezolute. Më pas deputetët e opozitës
kanë kërkuar që të parashikohet një seancë e veçantë me kryeminisitrin për
çështjen e lirisë së medias. Kjo kërkesë u pranua dhe u vendos që kuvendi,
pas dy javësh, të ketë interpelancë me kryeministrin për lirinë e medias në
Shqipëri.

PD kërkon largimin e kryetarit të Kuvendit
Byroja, Pëllumbi: Unë nuk jap dorëheqjen
TIRANË - Partia Demokratike ka kërkuar dje zyrtarisht dorëheqjen e kryetarit
të Kuvendit, Servet Pëllumbi. Kryetari i grupit parlamentar të PD-së, Bamir
Topi, akuzoi kryetarin e Kuvendit, Servet Pëllumbi, si "shkaktar të thyerjes
së rregullores parlamentare dhe si nxitës i tensionit tek opozita, në sallën
e Kuvendit". Duke iu refer uar deklaratës së dy ditëve më parë të opozitës,
e cila kërkoi dorëheqjen e kryetarit të Kuvendit, për "shkelje të
Rregullores në drejtimin e seancave plenare", Pëllumbi deklaroi se "nuk kam
ndërmend të jap dorëheqjen, pas akuzave të kryetarit të opozitës".
Kryeparlamentari theksoi se pas qëndrimeve të mbajtura nga lideri i
opozitës, të cilat janë qesharake, nuk ka ndërmend të japë dorëheqjen.
Ndërsa kryetari i grupit parlamentar të PS-së, Gramoz Ruçi, e ka cilësuar
qëndrimin e liderit të opozitës, si mjaft banal, "që flet vetëm me zhargonin
e rrugës". Debati me kryeministrin, Fatos Nano, do të zhvillohet me datë 14
qershor. Byroja parlamentare vendosi që më datë 14 të këtij muaji, të
zhvillohet debati i kërkuar nga ana e Partisë Demokrate të Re. Kryeministri
Nano është thirrur në këtë seancë për të dhënë shpjegime për nivelin e
varfërisë në vend, si dhe masat që ka marrë qeveria shqiptare për uljen e
kësaj gjendjeje. Ndërkohë që byroja parlamentare ka diskutuar më tepër për
miratimin e projektligjit për "Dëmshpërblimin e ish-të përndjekurve politik.
Përfaqësuesit e grupeve parlamentare të opozitës kanë kërkuar futjen brenda
këtyre dy javëve të këtij projektligji, sipas kërkesave të vetë
socialistëve. Por me ndërhyrjen e zëvendëskryeministrit, Namik Dokle, u
vendos që ky projektligj të shqyrtohet nga ana e Kuvendit me datë 24
qershor. Arsye e kërkesës për shtyrje, të numrit dy të qeverisë shqiptare,
qëndronte në faktin e mos dërgimit të mendimit nga ana e Komisionit të
Venecias për dëmshpërblimin e ish-të përndjekurve politikë. Gjithashtu u
theksua se për shkak të diskutimeve të projektligjit për pronat, i cili ende
nuk ka përfunduar, ligji për të përndjekurit duhet të shtyhej për më vonë.
Me gjithë kërkesën e bërë nga zëvendëskryeministri Dokle, deputetët e
opozitës, Topi, Spahia e Mediu, e kundërshtuan shtyrjen e projektligjit,
duke theksuar se "mazhoranca nuk e ka vullnetin e duhur politik për të
dëmshpërblyer ish- të përndjekurit politik".