http://www.panorama.com.al/ © 2003 Gazeta Panorama

Faqe 10 - Politikë

9Korrik 2004

koalicioni i djathtë

intervista

Kreu legalist kundërshton marrëveshjen Ruçi-Topi edhe pse pranon pjesmarrjen
në komision

Spahia: Jam me Lekën, votoj Berishën

"Jemi jashtë loje, por unë kontribuoj për lëvizjen mbretërore"


Elisabeta Ilnica

Jam futur në komisionin parlamentar për përmirësimin e Kodit Zgjedhor edhe
pse jam kundër tij.

Kreu legalist, Ekrem Spahia, është munduar dje t´i japë një spjegim
pozicionit pranues-kundërshtues të prezencës së tij në komisionin e arritur
nga marrëveshja Ruçi-Topi. Duke shpresuar se do t´i shërbejë Lëvizjes për
Zhvillim Kombëtar, të inicuar nga pretendenti për Fronin Mbretëror, Leka I,
Spahia, shprehet se prania e tij është në dobi të partive të vogla.

Pse morët pjesë në komision bipartizan, ndërkohë që pjesa me e madhe e të
vegjëlve, e kundërshtuan?
Janë një sërë arsyesh që më afruan drejt komisionit dypalësh. Pikë së pari,
duhet të jemi të vetëdijshëm për realizimin e ndryshimeve që duhen bërë në
Kodin Elektoral, duke iu referuar rekomandimeve të OSBE/ODIHR-it. Ky proces
duhet të mbarojë në një kohë rekord dhe refuzimi nuk do t'i shërbente kauzës
për zgjedhje të besueshme. Kjo, aq më tepër, kur ne vetë si opozitë kemi
këmbëngulur vazhdimisht për zgjedhje të parakohshme, të cilat nuk mund të
konceptohen pa korrigjuar defektet e Kodin Zgjedhor. Në këtë kontekst, duhet
përmenduar edhe sakrifica që kemi bërë ne si opozitë që të unifikojnë herë
pas here qëndrimet tona, përsa i përket reformës zgjedhore. Ndaj, të
tërhiqeshim në këtë moment, do të ishte sikur të hidhnim poshtë këto
sakrifica. Megjithatë, mendoj se pakti që bëri PD-ja me PS-në, ishte një
fatkeqësi për gjithë spektrin e djathtë politik. Gjithsesi, jam i bindur se
protokolli dypalësh do të bjerë shpejt, pasi ne kemi depozituar tashmë në
Gjykatën Kushtetuese një sërë ankesash, për të cilat presim përgjigje.

Konkretisht, cilat janë kërkesat drejtuar Gjykatës Kushtetuese?
Po, gjithçka do të nisë që nga mënyra se si u hartua dhe u firmos ky
protokoll, mes PS-së dhe PD-së. Më pas, kemi momentin që u fut në seancë
plenare për t'u votuar, duke shkelur hapur procedurat parlamentare.
Gjithashtu, Pika 4 e protokollit dypartiak, cilëson se çdo vendim mund të
merret vetëm nga PS-ja dhe PD-Ja, ndërkohë që përfaqësuesit e tjerë, kanë
vetëm të drejtën e propozimeve. Pra, nëpërkëmbet në mënyrë të hapur e drejta
e votës së deputetit. Të gjitha këto arsye, janë të mjaftueshme që ta
nxjerrin jofunksional komisionin bipartizan.

Duket sikur bini në kontradiktë, kur thoni se ky komision është
antikushtetues dhe vazhdoni të jeni pjesë e tij. A nuk legjitimoni në këtë
mënyrë antikushtuetshmërinë e këtij pakti dypalësh?
Në fakt, ne u gjendëm përballë një fakti të kryer. U vumë në pozitë, pasi u
gjendëm të befasuar në Parlament, kur komisioni u fut për miratim. Pasi e
diskutuam si grup, vendosëm që të ishim pjesë e këtij komisioni, vetëm për
të dhënë kontributin tonë. Mendoj se reforma zgjedhore është më e
rëndësishme, sesa inatet e momentit politike apo qejfmbetjet, pasi çdo forcë
politike, duhet të japë maksimumin për një proces zgjedhor maksimal.
Gjithsesi, prezenca e PLL-së në këtë komision, nuk do të thotë që jemi pro
tij. E thashë dhe më sipër, se ne jemi në pritje të përgjigjies nga Gjykata
Kushtetuese. Duhet që të kihet parasysh se për të dalë nga komisioni, nuk ka
asnjë lloj pengese. Në çdo moment, ne do të ndjekim hapat e grupeve të tjera
parlamentare dhe do të jemi në harmoni me vendimet e tyre. Pra, në rast se
do të arrijmë në një konsensus me gjithë spektrin politik, ne do të shikojmë
pozicion tonë në komision bipartizan.

Jeni i bindur se Gjykata Kushtetuese do të marrë një vendim të drejtë dhe aq
më tepër, në kohën e duhur, nisur edhe nga rreziku i zgjedhjeve të
parakohshme?
Është shumë e rëndësishme që ky institucion t'i shkojë kësaj çshtjeje deri
në fund dhe me ndershmëri. Nuk bëhet fjalë për pakte politike për interesa
personale, por për një çështje me rëndësi mbarëkombëtare. Ky proces zgjedhor
është kushti i vënë nga ndërkombëtarët për integrimin e Shqipërisë. Aq më
tepër, duhet pasur parasysh se një praktikë e tillë e vitit të kaluar, në
zgjedhjet vendore, vërtetoi se ishte dështimi kryesor. Pra, marrëveshja
PS-PD, nuk është gjë tjetër, veçse një ripërsëritje dështimit. Këto dhe
kërkesat tona të tjera, duhet që të shndërrohen për Gjykatën Kushtetuese,
provat për të hedhur poshtë protokollin dypalësh. Tashmë është e vërtetuar
nga ndërkombëtarët se nuk ka pasur asnjë rast që zgjedhjet të jenë prishur
nga partitë e vogla, por gjithmonë, nga dy të mëdhatë. Ndaj, shumë grupe
parlamentare jemi gati që të nisim lëvizjet tona politike.

Jeni të përgatitur edhe për zgjedhjet e parakohshme?
Nuk besoj ta ketë seriozisht kryetari i PS-së, Fatos Nano. Ai tashmë e ka
provuar veten edhe në Parlament, që ka mbetur në minorancë dhe po e bën këtë
lloj loje, vetëm për të mos lënë hapësira dhe mundësi për të fuqizuar
kundërshtarët brenda partisë së tij. Unë vazhdoj t'i qëndroj mendimit se
Nano duhet të largohet dhe të zhvillohen zgjedhjet e parakohshme. Kjo ishte
dhe ajo çka e përshkoi lëvizjen opozitare për shumë muaj me radhë.
Gjithsesi, unë flas për PLL-në dhe garantoj që ne si parti, jemi përgatitur
për çdo eventualitet zgjedhor, por mendoj se edhe opozita është e gatshme
për një hap të tillë.

Në fakt, PD-ja nuk është treguar kaq e gatshme sa ç'thoni ju. A nuk është
kjo një shndërrim i motos nga "Nano, ik!" në "Nano, rri!"?
Asnjë forcë politike opozitare nuk duhet të tërhiqet nga largimi i Nanos.
Edhe të duam ne tani që të ndalojmë që ai të ikë, Nano vetë e ka marrë atë
rrugë. Nuk ka më forcë politike që ta ndalojë kthimin e Nanos në opozitë.

Mendoni që në rast të bashkimit të forcave politike, do të kishte një
rrugëdalje?
Është normale që çdo parti politike të veprojë në varësi të rrethanave
politike, por dhe në dobi për të kontribuar për proceset demokratike në
Shqipëri, për të përfaqësuar atë pjesë të elektoratit që pretendon dhe të
gjejë rrugët që të çojnë drejt fitores. Edhe krijimi i një koalicioni të
tillë, mendoj se do të ishte i dobishëm për fatet e vendit tonë, duke parë
që situata politike është futur në shumë qorrsokaqe. Madje, ky ka qenë dhe
qëllimi i Mbretit Leka I, i cili ka shpallur tashmë dhe drejton vetë
Lëvizjen për Zhvillim Kombëtar dhe është mirëpritur nga masa e gjerë e
opinionit publik. Gjithashtu, në veçanti kjo lëvizje është përkrahur nga
qarqe akademike, intelektuale, shoqata të ndryshme, por edhe nga individë që
kanë një personalitet e integritet përballë konsumit të shumë individëve, që
merren me politikë aktive. Në këtë linjë, PLL-ja e mbështet me gjithë
infrastrukturën dhe strukurat e saj lëvizjen, sepse kjo i shërben rritjes së
ndërgjegjies kombëtare dhe për të thithur votuesin abstenues, nga politikat
qeverisëse, që nuk kanë sjellë ndonjë progres në vend, përkundrazi, kanë
shkaktuar vetëm regres. Ndaj, ne si parti politike, e shohim se kjo lëvizje
do t'u sjellë ndryshime shqiptarëve. Gjithashtu, të gjitha forcat politike
janë të ftuara që t'i bashkangjiten kësaj lëvizjeje, duke paraqitur edhe
kërkesat e propozimet e tyre përkatëse. Kjo do të bënte që, për herë të
parë, të thyhej monopoli i politikës dhe të hapeshin rrugët e zhvillimit të
vendit, e mbi të gjitha, integrimi.



Spahia shpjegon strategjine e Lekës I
Lëvizja e Mbretit, e ardhmja e pushtetit

Legalistët mohojnë se kanë "këmbyer" Mbretin me Partinë Demokratike.
Kryetari i Partisë Lëvizja e Legalitetit, Ekrem Spahia, thotë se prezenca e
tij në komision bipartizan, nuk do të thotë që janë vënë në rrezik
marëdhëniet me Lekën I. Teksa sqaron për "Panorama", ai thotë se, "vetë
Lëvizja për Zhvillim Kombëtar, e iniciuar nga familja mbretëore, ka në bazë
të saj afrimin e forcave politike për të nxjerrë Shqipërinë nga situata e
rënduar politike". Sipas tij, në asnjë pjesë të platformës së Lëvizjes nuk
thuhet se duhet të ketë distanca me forca të caktuara politike, apo që duhet
ndenjur larg proceseve më të rëndësishme të vendit, siç është rregullimi i
defekteve për Kodin Elektoral. Përkundrazi, thotë Spahia, pjesëmarrja jonë
në komisionin bipartizan i shërben edhe Lëvizjes për Zhvillim Kombëtar. "Nuk
është çështja që ne i jemi përgjigjur ndonjë partie politike. Partia Lëvizja
e Legalitetit është e lidhur në mënyrë organike me familjen mbretërore për
vetë historinë e saj. Për ne, Mbreti është simboli kombëtar dhe të gjitha
sakrificat kanë shkuar në dobi të tij, njëkohësisht dhe të atdheut", thotë
Spahia. Sipas tij, hyrja e shumë partive në komisionin bipartizan, do të
bënte që PS-PD, të dështonin në monopolizimin e politikës shqiptare.



Berisha, "indiferent" ndaj Mbretit

Demokratët duken të painteresuar për Lëvizjen për Zhvillim Kombëtar, të
iniciuar nga Mbreti Leka I. Në komentin që ka bërë lideri demokrat, Sali
Berisha, kësaj lëvizjeje, është shprehur se "është një nismë e lirë që mund
ta marrë çdo qytetar në një sistem demokratik". Gjithashtu, gjatë kësaj kohe
nuk është shënuar asnjë takim Berisha-Leka I.



Kundërshtimi i republikanëve
Mediu: Lëvizja monarkiste, e paqartë

"Monarkia" përplaset me "Republikën". Ideja e Lekës I për Lëvizjen për
Zhvillim Kombëtar nuk është e pranueshme nga kryetari i Partisë republikane,
Fatmir Mediu. Gjatë një prononcimi për "Panorama", ai shprehet se, "unë jam
republikan dhe, që të jem i sinqertë, unë nuk kam parë asnjë vizion të qartë
tek kjo lëvizje, përkundrazi shoh shumë konfuzion, rrëmujë dhe asgjë të
saktë". Sipas tij, lëvizjes së Mbretit i mungojnë shumë elementë, duke
filluar që nga pozicionimi politik. Mediu argumenton se, "nuk kam parë një
lëvizje që të funksionojë edhe majtas edhe djathtas. Kjo është jashtë
logjikës normale edhe të vendeve të tjera demokratike, e jo më për
Shqipërinë". Në këtë kuadër, Mediu jo vetëm që duket skeptik ndaj kësaj
Lëvizjeje, por e sheh krejt të pamundur që ajo të afrojë rreth vetes të
gjitha forcat politike, simodos partitë e vogla. "Unë nuk shikoj një
marrëdhënie të qenësishme ndërmjet partive të vogla dhe Lëvizjes së Mbretit,
sepse nuk ka asnjë mendim të qartë për organizimin dhe funksionimin e
mëtejshëm elektoral. Pra, më saktë nuk ka asnjë lloj bazamenti, ku mund të
mbështetet", argumenton kryetari republikan, Mediu.

 

© 2003 Gazeta Panorama

9Korrik 2004  Faqe 5 - Politikë


votimi në kuvend

përplasja

"Ligji për plehrat"/ Përplasja e parë mes dy grupeve, sjell dështimin e parë
të maxhorancës

Lëvizja Meta rrëzon PS në Kuvend

14 deputetë të majtë, dalin kundër vendimeve të socialistëve

Bledar Hoti

Ndarja në dy grupime, brenda Partisë Socialiste, sjell tronditjen e parë
serioze të maxhorancës socialiste në Parlament.

Votimi i amendamentit të paraqitur nga 27 deputetë, socialistë dhe
opozitarë, për "Mbrojtjen e Mjedisit", ka dhuruar rezultatin e parë të
përplasjes mes grupit të deputetëve të "Lëvizjes për Integrim" dhe pjesës
tjetër të PS-së. Në këtë duel të parë, janë përzier edhe aleatët e PS-së, si
deputetët e PSD-së dhe të PBDNJ-së, të cilët u janë bashkuar me votat e tyre
kësaj lëvizjeje, duke sjellë për herë të parë "rrëzimin" e maxhorancës
socialiste në Kuvend. Pas shumë debatesh, brenda PS-së dhe aleatëve të saj,
për zhvillimin e zgjedhjeve të parakohshme parlamentare, votimi i djeshëm
ishte treguesi më i mirë se ndarja brenda PS-së, në mes të dy fronteve, do
të ndikojë në miratimin e projektligjeve të rëndësishme.

Votimi
Në votimin në parim të këtij amendamenti, votuan pro 12 deputetë të
koalicionit të majtë qeveritar, të cilët, së bashku me votat e opozitës,
tronditën grupin parlamentar të PS-së. Në votimin e parë, në parim, nominal,
rezultoi se 59 vota ishin në favor të amendamentit, 55 kundër, dhe shtatë
ishin abstenim. Deputetët që votuan pro, ishin: Ilir Meta, Sabit Brokaj,
Monika Kryemadhi, Limoz Dizdari, Spartak Braho, Ndre Legisi, Mustafa Muçi,
Dritan Prifti dhe aleatët e socialistëve: Skënder Gjinushi, Gaqo Apostoli,
Ligoraq Karamelo dhe Kristo Goçi. Ndërsa, kanë abstenuar ministri
socialdemokrat, Engjëll Bejtja, socialistët Petro Koçi, Taulant Dedja, Durim
Hushi, Ilir Gjoni, Luan Rama dhe Ilir Zela.

Menjëherë, deputetët e opozitës kanë shpallur rezultatin e votimit, në favor
të tyre, duke duartrokitur njëkohësisht për suksesin e parë të tyre në
Kuvend. Të 13 deputetët socialistë, që votuan pro dhe abstenuan, dolën
kundër vendimit të grupit parlamentar të PS-së, që ishte kundër amendamentit
të paraqitur.

Votimi i dytë
Rrëzimi i maxhorancës në Kuvend, ka sjellë menjëherë irritimin e drejtuesve
të PS-së, të cilët janë vënë në lëvizje për të mos miratuar projektligjin në
tërësi. Pas votimit të amendamentit, votimi i projektligjit, në tërësi, ka
sjellë tërheqjen nga qëndrimi i votës së mëparshme, nga ana e disa
deputetëve socialistë, si dhe të ministrit socialdemokrat të Punës.
Deputetët Luan Rama, Durim Hushi, Ilir Gjoni dhe Engjëll Bejtja, të cilët
kishin abstenuar më parë, në votimin e dytë të këtij projektligji, votuan
kundër, duke sjellë vota të barabarta në Kuvend, 59 pro, 59 kundër, dhe tre
abstenime të socialistëve: Petro Koçi, Taulant Dedja dhe Ilir Zela, të cilët
nuk u tërhoqën nga qëndrimi i tyre. Votimi i barabartë në vota solli
automatikisht mosvotimin e këtij projektligji. Ndërkohë, deputetët e
opozitës e kanë kundërshtuar procedurën e votimit, duke kërkuar anulimin e
tij. Kreu i grupit parlamentar të PDR-së, Nard Ndoka, kërkoi në seancë
anulimin e votimit, duke u shprehur se "ky proces votimi ishte më i
pakuptimi dhe ka parregullsi". Ndërsa lideri i PD-së, Sali Berisha, pas
seancës u shpreh se "procesi i votimit u manipulua, u falsifikua nga
njerëzit e dherave dhe të plehrave, të cilët nuk lejuan që të kalohej
amendamenti i Komisionit të Ligjeve". "Natyrisht, me këtë votim u tregua se
maxhoranca socialiste nuk ekziston", theksoi më tej Berisha.



Votat

Deputetët, që votuan pro

Sabit Brokaj
Ilir Meta
Monika Kryemadhi
Limoz Dizdari
Spartak Braho
Ndre Legisi
Mustafa Muçi
Dritan Prifti
Aleatët e PS-së

Skënder Gjinushi, PSD
Gaqo Apostoli, PSD
Kristo Goçi, PBDNJ
Ligoraq Karamelo, PBDNJ
Abstenim në parim

Taulant Dedja
Petro Koçi
Ilir Zela
Luan Rama
Ilir Gjoni
Durim Hushi
Engjëll Bejtja, PSD
Deputetët që ndryshuan

Luan Rama, votoi kundër
Ilir Gjoni, votoi kundër
Durim Hushi, votoi kundër
Engjëll Bejtja, votoi kundër


Meta mbledh mbështetësit
LSI feston fitoren e parë me vota

Një festë e vogël mes miqsh dhe simpatizantësh të Lëvizjes Socialiste për
Integrim, ka përkuar dje pasdite me fitoren e parë të arritur nga votimi i
shtesës në Ligjin për Mjedisin në Kuvendin e Shqipërisë. Edhe pse nuk ka
qenë ky shkaku i vërtetë i takimit që është zhvilluar dje, në selinë e
Lëvizjes Socialiste për Integrim, pjesëmarrësit e kanë konsideruar votimin e
djeshëm në Parlament si lëvizjen e parë në favor të tyre. Kështu,
ish-kryeministri Ilir Meta ka mbledhur anëtarët dhe simpatizantët e
lëvizjes, në përfundim të disa takimeve që ata kanë zhvilluar në disa rrethe
të vendit. Duket se gjithçka që ka të bëjë me platformën dhe idetë e kësaj
lëvizjeje, janë plotësisht të gatshme, ndërkohë që takimet e fundit janë
konsideruar nga Lëvizja si të suksesshme dhe me një pjesëmarrje të mirë. Me
këtë rast, si një gjest falenderimi, drejtuesi i Lëvizjes Socialiste për
Integrim, Ilir Meta, ka realizuar një pauzë për të detajuar hapat e
mëtejshme që do të ndiqen. LSI-ja, tashmë, ka arritur të formatohet si një
forcë e re politike, duke pasur drejtuesit dhe strukturat e saj në Tiranë,
ndërkohë që paraqitja si subjekt elektoral në të ardhmen, kërkon shtrirjen e
strukturave nëpër rrethe. Gjithashtu, pjesëmarrësit e kanë shfrytëzuar
takimin edhe për të diskutuar për ndarjen e votave, gjatë seancës së djeshme
të Parlamentit. Projektligji që mbshtetej nga deputetët socialistë,
pjesëtarë të LSI-së, ka arritur të mbështetet me të njëjtin numër votash,
nga ata që e kanë kundërshtuar. Një fakt i tillë, duket se përbën thyerjen e
parë të maxhorancës parlamentare, ashtu si edhe ishte paralajmëruar. Kështu,
LSI-ja duket se do të vazhdojë, edhe gjatë kësaj kohe, takimet e saj me
bazën socialiste, për të testuar vetveten dhe për të përmbyllur ciklin e
shndërrimit në një forcë politike me elektorat. Gjithsesi, takimi i djeshëm
ishte një pikëndalesë, pas turit të parë nëpër rrethe.

-----------------------
http://www.shekulli.com.al/
Balla: Mungova se jam sëmurë

N.Perndoj

TIRANE- Një prej deputetëve të munguar ai legalist, Sadedin Balla deklaroi
dje për "Shekullin" se prej dy ditësh ai nuk e kishte ndjerë veten mirë me
shëndet, ndaj dhe nuk mund të ishte i pranishëm gjatë votimit të
amendamentit. I ndodhur në shtëpi, Balla sqaroi se dy ditë më parë atij i
kishte rënë të fikët në bibliotekën e Kuvendit, dhe se ishte dërguar në
spital me ambulancë për shkak të një virusi gripal. "Mua më ra të fikët dy
ditë më parë, dhe që në atë moment unë kam qenë me serume. Madje edhe tani
që po flas me ju kam marrë serume për shkak të një virusi gripal", -tha
Balla. Deputeti legalist shtoi se ai nuk do të shfaqej në kryesinë e
Kuvendit edhe disa ditë më pas, derisa gjendja e tij shëndetësore të
përmirësohej. Edhe pse kësaj here për arsye shëndetësore, deputeti legalist
Balla nuk ka qenë i pranishëm edhe gjatë një votimi tjetër të rëndësishëm në
kohën kur Kuvendi do të miratonte si ministër, Namik Doklen. Asokohe,
deputeti Balla "u shpall" deputet "në kërkim" për shkak se mungesa e tij nuk
ishte justifikuar as pranë kryesisë së Kuvendit dhe as pranë grupit të tij
parlamentar.

-------------------------
09 Korrik 2004 http://www.kohajone.com/

PRONAT NUK RIKTHEHEN NE KUVEND

Partia Socialiste po perpiqet te shmange rishikimin e ligjit te pronave ne
Kuvend pas kthimit te dekretit nga ana e kreut te shtetit. Burime prane
grupit parlamentar te PS-se bejne te ditur se kjo force politike do te beje
te pamunduren ta shmange nga kalendari i fundit i punimeve parlamentare te
kesaj legjislature. Ne kete menyre rishikimi i ligjit per kthimin dhe
kompensimin e pronave do te mbetet nje ceshtje qe mund te diskutohet ne
fillim te legjislatures tjeter kuvendore. Kjo shmangie eshte e qellimshme
per vete faktin qe PS-ja nuk e ka mirepritur rikthimin e dekretit
presidencial. Madje ata ne deklarimet e tyre publike jane shprehur te
habitur pse Moisiu e ktheu nje ligj te tille qe sipas tyre ishte i plotesuar
nga kuadri ligjor.

------------
PRONAT SHQIPTAREVE, JO KOLONEVE

Nga Gjet KOLA

Presidenti i Republikes Alfred Moisiu, ne baze te kompetences qe i jep
Kushtetuta, ktheu per rishqyrtim ne Kuvend ligjin per kthimin dhe
kompensimin e pronave. Asnje force politike nuk duket e pakenaqur nga ky
veprim i Presidentit. Socialistet mendojne se nga ky kthim, nuk eshte
demtuar pozita e tyre. Ata jane te sigurte se dhe nese nuk kane miratuar nje
ligj te "persosur", ata kane shumicen e kartonave dhe perseri mund t'ia
dergojne ligjin Presidentit per kunderfirmim tashme te detyruar, pa
ndryshimet e kerkuara prej tij. Ndersa partite e vogla te spektrit te
djathte ia atribuojne kembenguljes se tyre kthimin e ligjit. PD-se, si forca
e vertete opozitare, i interesonte ky kthim per te dhene mesazhin para
zgjedhesve se ligji nuk mund te gjeje zbatim pa konsensusin e saj dhe eshte
ajo forca qe duhet mbeshtetur.

Megjithate, mendoj se kthimi i ligjit per rishqyrtim ka vetem vlera pozitive
dhe riformulimi i tij eshte domosdoshmeri.

Kuvendi, per kete ligj kaq te rendesishem por dhe per ligje te tjera, nuk ka
marr asnjehere mendimin e Akademise se Shkencave te Shqiperise,
institucionit shkencor me te rendesishem te vendit, te pakten teorikisht. Ky
vendim i Presidentit e krijon kete mundesi. Nje kerkese e Kuvendit per nje
mendim te tille do te ishte dhe nje vleresim e ndihme e madhe dhe per vete
Akademine e Shkencave. Me nje mendim te bazuar e shkencor kjo Akademi do t'u
jepte goditje te rende gjithe "kundershtareve" e "dashakeqeve te saj" qe
thone se qe te jesh anetar i Akademise se Shkencave ne Shqiperi duhet te mos
kesh as ide as vepra.

Se dyti, me kete kthim krijohet mundesia qe ne terrenin praktik te merret
dhe mendimi i Dhomes Kombetare te Avokateve. Kjo dhome ka ne gjirin e saj jo
vetem numrin me te madh te juristeve ne krahasim me te gjitha institucionet
e tjera, por ka dhe juristet me te shquar te vendit me nje eksperience ne
profesion. Nepermjet saj, mund te evidentohen me pyetesore e forma te
ndryshme te komunikimit, problemet qe kane dal ne praktike gjate zbatimit te
ligjit per pronat te vitit 1993 dhe ligji i ri te jape zgjidhje praktike
atyre problemeve.

Projektligji nuk i jep zgjidhje problemit politikisht

Se pari, mendoj se projektligji nuk ka dhene zgjidhje problemit politikisht.
Ne nenin 6 eshte sanksionuar se subjekteve te shpronesuara u njihet e drejta
dhe u kthehen pa kufizim pronat e paluajtshme me perjashtim te tokes
bujqesore, e cila kthehet ose kompensohet deri 60 ha". Nga kjo dispozite,
del se ne projekt nuk jane percaktuar qellimisht afatet kohore ne te cilat i
shtrin efektet ky ligj. Do te njihen pronat nga shteti i Pirros, Agronit,
Teutes, Gjergj Kastriotit, Dukagjineve, do njihen pronat e marra me fermane
(dekrete) te Sulltaneve, pronat fituara pas shpalljes se shtetit te pamvarur
shqiptar me 28.11.1912, apo pronat e fituara pas njohjes nderkombetarisht te
tij ne pranveren e vitit 1913.

Njohja dhe kthimi i pronave pa percaktuar afatet kohore ne ligj, ju jep te
drejte edhe arbereshve te Italise, te Kroacise e vendeve te tjera,
arvanitasve te Greqise qe t'i kerkojne shtetit shqiptar kthimin apo
kompensimin e pronave te stergjysherve te tyre. Kushdo do te kishte te
drejte qe te paraqiste pemen e tij gjenaologjike dhe te kerkonte t'i njihej
prona e stergjysherve te tij, ne nje zone te caktuar te Shqiperise, e t'i
kthehej ose te kompensohej nga shteti shqiptar per te.

Njohja sipas p/ligjit e pronave te marra me dekrete te Sulltaneve, koloneve
te sjelle nga viset e ndryshme aziatike te Imperatorise Otomane dhe qe me
kalimin e kohes pervetesuan gjuhen shqipe dhe me largimin e pushtuesit e
deklaruan veten shqiptare kryesisht per te ruajtur ato prona, ose
kolaboracionisteve vendas qe bashkepunuan me te dhe qe se bashku gjate mbi
kater shekujsh te sundimit turko -mongol formuan klasen sunduese te vendit,
do ishte me pasoja te renda politike afatgjata per mbare nacionin shqiptar.
Politika shqiptare me te drejte ka akuzuar fuqite e medha europiane te kohes
per coptimin e trojeve shqiptare. Por fuqizimi i dekreteve te Sulltaneve dhe
kthimi i pronave trashegimtareve te pashallareve, bejlereve, latifondisteve,
agallareve etj qofte dhe pjeserisht sic percaktohet ne p/ligj, do
legjitimonte keto vendime te fuqive te medha. Fqinjet tane serbe greke etj.
na kane akuzuar ne shqiptareve se me asimilimin ne shumice ne fene e
pushtuesit kemi ndihmuar pushtuesin aziatik ne shtypjen e popujve te tjere
te ballkanit dhe si humbes te luftrave ballkanike, kane kerkuar ndeshkimin
tone bashke me pushtuesin. Klasa politike e fetare e perbere kryesisht nga
kolonet e ardhur nga viset aziatike si Vrionet, Libohovet, Turdite etj, po
dhe kolaboracionistet vendas e kane shtuar pasurine e tyre ne kurriz te
popullit shqiptar e popujve te tjere te Ballkanit. Per ta ilustruar kete ide
po permend rastin e dekretit te sulltanit per dhenien ne pronesi dhe te disa
fshatrave ne Fier Omer pashe Vrionit, si shperblim per egersine qe ai tregoi
ne komanden e trupave turko-shqiptare ne shtypjen e luftes se grekeve per
liri ne revolucionin e 1821. Ne projektin e tij, Parlamenti Shqiptar njeh
pjese te kesaj prone dhe kthen ose kompenson ate. Gjithashtu me kthimin pa
kufizim te pronave te tjera te paluajteshme, parlamenti jo vetem qe fuqizon
dekretet e sulltaneve por ben dhe diskrimin te madh te popullsise etnike
shqiptare. Per popullsine me origjine dhe jo vetem me shtetesi shqiptare,
rikthehet dhe nje here, tashme ne menyre te kamufluar, pushtimi turk me
miratimin e deshiren e vete shqiptareve. Kolonet turq, te asimiluar ne
shqiptare per shkak te fese, qe bashke me kolaboracionistet dje perbenin
klasen e bejlereve, agallareve etj, ne kete ligj, duhet te trajtohen si
maksimum te barabarte me shqiptaret dhe kurrsesi si minimum. Nje trajtim, si
i projektit, do te kishte pasoja te paparashikuara per ekzistencen e vete
shtetit shqiptar, pasi nuk ka rast ne historine e njerezimit qe pas gati nje
shekulli te shtetit te vet, pasi e ka larguar nje here nga skena, nje
parlament te kete nostalgji e te vendose rehabilitimin e pushtuesit te tij.

Thellohet diskriminimi per zonat malore

Me kete dispozite thellohet diskriminimi qe shkaktoi ligji per token 7501 ne
pergjithsi per popullsine e zonave malore dhe ne vecanti per popullsine e
rretheve te zones verilindore Mirdite, Puke, Malesi e Lezhes, Malesi e
Shkodres, Tropoje, Kukes etj.E gjithe popullsia e vendit kishte marre pjese
ne menyre te barabarte ne rritjen e siperfaqeve te tokes se punueshme dhe ne
mobilimin e saj. Nese banoret e rrethit te Pukes nuk kishin mundesi te
rrisnin siperfaqen e tokes se punueshme, ata nga viti 1945-1991 i dhane
ekonomise kombetare mbi 25 milion m3 lende drusore, minerale etj. Ndersa me
ligjin per token popullsia e ketyre zonave u perjashtua nga privatizimi i
barabarte i tokes bujqesore ne krahasim ate te zones fushore. Diferencat ne
minus shkojne nga 6 deri 10 here.

Projekti ve ne te njejtat pozita diskriminuese banoret e fshatrave te Zones
Jugore te vendit, te cilet pas miratimit te tij, kthehen ne qiragji te
kullotave e tyre. Miratimi i ketij projekt ligji ne fushen e kullotave e
livadheve, do te ndjehet ne menyre te vecante ne Jugun e Shqiperise. Banoret
e ketyre zonave, per te kullotur bagetite e tyre si para 28 nentorit 1912 do
kerkojne perseri lejen e pasardhesve te koloneve e kolaboracionisteve qe ju
kishin qendruar mbi zverk per mbi 4 shekuj. Mospercaktimi i kufirit te
fuqise prapavepruese te ketij ligji, do te kishte pasoja politike Neni 4 i
projektit, ku, ne mes te tjerash, eshte sanksionuar se dispozitat e ketij
ligji nuk zbatohen per pronat e perfituara si rezultat i zbatimit te ligjit
108, date 29.08.1945 "Per reformen agrare" me ndryshimet e mevoneshme bie
ndesh me nenin 6 te cituar me lart. Pra ndersa njihet reforma agrare qe
praktikisht sanksionoi fundin e pushtimit otoman ne fushen e pronesise,
kerkohet qe njekohesisht e njejta toke, ne gjendjen qe eshte sot pas
mobilimit me punen e papaguar te disa gjeneratave ne rreth gjysem shekulli
te pas Luftes Dyte Boterore, truall, kullote, livadhe etj. dhe deri ne 60 ha
toke bujqesore, t'iu kthehet ose kompensohet koloneve qe solli pushtuesi
gjate sundimit kater shekullor.

Prpjekti, i rrezikshem dhe per shpronesimet

Projekti mendoj se eshte me pasoja te rrezikshme politike dhe ne trajtimin
qe i ka bere problemit te shpronesimeve. Edhe ne kete drejtim nuk eshte
percaktuar shtrirja kohore e fuqise prapavepruese te ligjit. Si eshte
formuluar projekt ligji nuk del se cilat shpronesime nuk njihen; ato qe ju
beri pushtuesi otoman luftetareve te lirise per kundershtimin e tyre me
arme; shpronesimet qe bene qeverite sovrane shqiptare para dhe pas lufterave
boterore apo merren persiper dhe shpronsimet qe bene pushtuesit per te
mbajtur ne kembe makinerine e luftes ne lufterat ballkanike dhe ne dy
lufterat boterore.

Pervecse duhet te vihet kufiri kohor, politikisht sic ka rezultuar dhe nga
debatet ne parlament, problem kane qene shpronesimet e bera pas Luftes se
Dyte Boterore nga shteti i diktatures komuniste.

Shteti te ktheje pronat e paluajtshme ne bilancet e 1938

Por dhe per kete problem mendoj se mund te realizohet zgjidhje ne kete ligj.
Shteti te marre persiper qe t'ju ktheje ose t'ju kompensoje pronat e
paluajteshme te pasqyruara ne bilancet financiare te vitit 1938, bilance qe
duhej te ishin dorezuar ne organet finaciare te shtetit shqiptar brenda
tremujorit te pare, pra para 7 prillit 1939. Ne ligj mund te sanksionohet qe
ish pronaret te kompensohen per pasurine e konfiskuar nga shteti komunist ne
nivelin e bilancit 1938 dhe pasi ti zbriten nga ajo pasuri tatimet, ne ate
nivel qe i kane marre dhe vendet e tjera te sapodala nga kjo lufte. Me kete
veprim ligjvenesi do te shmangte qendrimin bsurd qe kuislinget te
shperblehen per pronat fitimet e realizuara nga bashkepunimi me pushtuesit.
Me pak se dy shekuj mbasi Zef Serembe shkruante "Shqiperia matane detit na
kujton, se ne te huaj jemi ne kete dhe'" Kuvendi i Shqiperise synon te lere
perseri nje pjese te shqiptareve etnike pa prone, sic la nje pjese te tyre
ne zonen verilindore te vendit pa toke bujqesore me 1991.

-----------------------------
http://www.balkanweb.com/
Thaçi takon Solanën, për idenë e zbatimit të Paktit të Ohrit në Kosovë
Lajmi i ores 3:40 PM


Hashim Thaçi
 PRISHTINE (9 Korrik) - Kryetari i PDK-së, Hashim Thaçi, është takuar sot në
Bruksel me Përfaqësuesin e Lartë të Bashkimit Evropian për Politikë të
Jashtme dhe Siguri, Havier Solanen. Ky takim është konform premtimit që ka
dhënë Solana gjatë vizitës së fundit të tij në Prishtinë, se do të thërriste
kreun e PDK-së, në Bruksel, për të diskutuar idenë e Thaçit rreth zbatimit
të formulës rreth Marrëveshjes së Ohrit edhe në Kosovë. Ndonëse ka pohuar se
marrëveshja identike e një vendi nuk mund të zbatohet në një vend tjetër,
Solana nuk e ka përjashtuar apriori idenë e Thaçit, sepse ka vlerësuar se
disa elemente të Marrëveshjes së Ohrit, mund të aplikohen edhe në rastin e
Kosovës. Lideri i partisë së dytë në Kosovë, pas takimit deklaroi se
gjithashtu është diskutuar mundësia që BE-ja, të merr më shumë përgjegjësi
në vend apo siç u shpreh Thaçi, të evropianizohet Kosova. Temë e
pashmangshme e këtij takimi ishin ngjarjet e marsit, të cilat u kualifikuan
sërish si të dëmshme mirëpo, ata të dy, përkatësisht Solana dhe Thaçi, janë
pajtuar se nuk bën të ndëshkohet i tërë populli i Kosovës për shkak të kësaj
episode. ro/ro (RTK/BalkanWeb)

------------------
Franca: OK një takim kryediplomatësh të Ballkanit

Lajmi i ores 11:00 PM

TIRANE (9 Korrik) - Kryediplomati shqiptar Islami gjatë takimit të djeshëm
me homologun francez Michel Barnier i propozoi këtij të fundit realizimin në
një të ardhme të kryeministrit Nano në Francë dhe më pas të një zyrtari të
lartë kryeministër apo president francez në Tiranë. Zoti Barnier gjeti
mirëkuptim për këtë kërkesë sipas një njoftimi të Ministrisë së Punëve të
Jashtme. Ndër të tjera, ministri Islami në kuadër të bashkëpunimit në fushën
e arsimit propozoi hapjen në Tiranë të një liceu francez. Po ashtu, një
tjetër propozim që kishte të bënte edhe me rajonin e Ballkanit ishte ai i
një takimi të Ministrave të Jashtëm të Ballkanit Perëndimor, ku
kryediplomati francez tha se mirëpriste idenë dhe do të merrte pjesë në këtë
takim. Ndër të tjera, u fol edhe për sigurinë e reformave dhe investimeve në
Shqipëri. Islami tha se është krijuar terreni i përshtatshëm që investitorët
francezë të vijnë në vendin tonë .bm/bm (GazetaShqiptare/Balkanweb)