Faqja 4 - POLITIKE Gusht 9, 2004  http://www.balkanweb.com/gazeta/gazeta.htm

NE SHTATOR RIFORMULOHET E DJATHTA SHQIPTARE

Zogu i merr opozitës 12 deputetë
PLL e Balli Kombëtar: Do të vendosin strukturat

Denion Ndrenika

Ndërkaq, zëdhënësi i Oborrit Mbretëror, Fluturak Gërmenji pohoi dje për
"Gazetën", se ka deputetë të ndryshëm si dhe grupe të partive në Kuvend, që
janë të hapur për bashkëpunim me Lëvizjen për Zhvillim Kombëtar (LZHK).
Deputeti i Ballit Kombëtar, Alfred Cako ka pohuar se Lëvizja e Mbretit Leka
është më djathtas se PD-ja sot dhe mbështetet në synimin e bashkimit
kombëtar. "Lëvizja e Leka Zogut është më djathtas se PD-ja, sepse e ka
shpallur hapur komponentin kombëtar. Meqënëse ajo është shprehur për
bashkimin kombëtar, është edhe pranë aspiratave të shqiptarëve dhe të Ballit
Kombëtar, ndaj është e mundshme që të ketë një zhvillim apo pjesëmarrje në
grupin e ri të saj në kuvend, nëse kjo do të ndodhë. Mirëpo, për këtë nuk
mund të vendosim individualisht"-ka pohuar Cako për "Gazetën". Ai ka thënë
se nisur nga pragmatizmi mbi këto synime të LZHK, Balli Kombëtar mund të
marrë pjesë dhe ta përcaktojë këtë në strukturat partiake. Balli Kombëtar,
sipas Cakos, mendon se Lëvizja e Zogut duhet të bashkëpunojë me PD-në, si
forca më komponente e qendrës së djathtë, gjë që do të synonte të nxirrte më
shumë abstenues që janë të djathtë në votime dhe rrjedhimisht do të
merreshin më shumë vota. Ndërsa, kryetari legalist Ekrem Spahia, i ka pohuar
"Gazetës" se mund të ketë zhvillime që lidhen me krijimin e një grupi të
lëvizjes së Zogut, por ai gjithashtu ka thënë se mendohet që regjistrimi të
bëhet paraprakisht si PLL në Kuvend për grupin parlamentar, pa përjashtuar
mundësinë e ndryshimeve më pas. Deputeti tjetër legalist Bahri Kollçaku ka
pohuar se ky grup i Mbretit, mund të shkojë nga 10-12 deputetë. Deputetët që
mund të bashkohen mund të dalin nga grupi i PLL-së, Bahri Kollçaku, Sadedin
Balla apo Atem Fejzollari dhe Ballit Kombëtar, aktualisht jo shumë i qartë
(Alfred Cako, Shpëtim Roqi, Uran Metko). Burime të tjera legaliste dhe nga
Oborri thonë se qëndrime të hapura për t'u përfshirë në grup ka pasur nga
deputetë të PD-së apo PS-së, BLD-së dhe PDR-së. Kollçaku pohon megjithatë se
pas 20 gushtit, organet e PLL-së do të mund të vendosin nëse do të ketë
bashkëpunim me deputetët që janë jashtë strukturave të tyre. Por, figura
drejtuese në PD konfirmuan për "Gazetën" dje se druhen se LZHK nuk i shërben
opozitës apo që deputetë të PD-së të bashkohen me grupin e mundshëm. Uran
Metko, deputet i Ballit Kombëtar ka pohuar se çdo lloj bashkëpunimi, përfshi
këtë për grupin e Zogut, është i mirëpritur, por ende nuk ka pasur
diskutime.


PD gati të tërheqë deputetët e vet nga partitë aleate

Partia Demokratike nuk ka vendosur ende se çfarë do të bëjë me deputetët e
saj që u ka dhënë partive aleate me qëllim krijimin e grupeve të tyre në
Kuvend. Anëtarë të kryesisë pohojnë se ka dyshime nëse do t'u lihen edhe
këtë sesion deputetët demokratë dhënë grupeve të tjera në Kuvend. Ndërkohë,
deri tani partia më e madhe e opozitës ka qenë e vendosur për të respektuar
marrëveshjet me aleatët, paçka se deputetët e saj "borxh" preferojnë të
kthehen në grupin e tyre. Kështu, PD ka dhënë deputetin Sali Shehu, fitues
në zonën 21, te grupi i Lëvizjes së Legalitetit dhe treshen Shaban Memia
(zona 31), Bardhyl Londo (lista shumemërore) e Valentin Palaj (zona 4) te
grupi i Bashkimit Liberal Demokrat. Po ashtu, janë dhënë Muhamet Ukperaj
(zona 10), Gjovalin Bzheta (zona 1) dhe Pëllumb Berisha (zona 27) te grupi
parlamentar i Aleancës për Demokraci. Burime nga Partia Demokratike shprehen
se shumë shpejt do të tërheqin deputetët e tyre nga grupet. Madje ata thonë
se një gjë e tillë do të forcojë grupin parlamentar të PD. Kjo do të ndodhë
më tepër nëse do të ketë krijim të një grupi të ri të djathtë siç mund të
jetë ai që ka iniciuar pretendenti për fronin mbretëror Leka Zogu. Por nuk
dihet nëse PD do të tërheqë deputetët e vet që në këtë legjislaturë që do të
hyjë apo më vonë. Ajo që është deklaruar tashmë, është fakti se dhe në të
djathtën është duke lëvizur diçka.


DEPUTETET PRO LEVIZJES

ALFRED CAKO
- Ka pranuar se mund të Balli Kombëtar mund të bashkohet me Lëvizjen e
Mbretit, sepse ajo "është më djathtas se PD-ja sot, pasi e ka shpallur hapur
komponentin kombëtar. Prandaj, është pranë aspiratave të shqiptarëve dhe të
Ballit Kombëtar

BAHRI KOLLÇAKU
- Deputeti legalist thotë se ka hapësirë më largpamëse brenda nismës së
Mbretit Leka për të punuar për Shqipërinë. Sipas tij, është "ende shpejt,
por pas 20 gushtit mund të vendoset dhe të ketë bashkëpunim", ndërkohë që i
gjithë grupi është i prirur

SADEDIN BALLA, ATHEM FEJZOLLARI
- Të dy deputetët legalistë janë pjesë e grupit për kalimin në LZHK, por kjo
mund të konsolidohet vetëm pas datës 20 gusht. Balla është me pushime në
Turqi, ndërsa pogradecari Fejzollari në Australi

EKREM SPAHIA
- Kryetari i Lëvizjes së Legalitetit, është më i sigurt për këtë nismë. Ai
thotë se ata janë të rregjistruar si PLL në punimet e kësaj legjislature dhe
mendon se kështu do të vazhdojnë të bëjnë. "Por, nuk përjashtohet ndonjë
zhvillim i ri më pas"

URAN METKO
- Një ndër deputetët e Ballit Kombëtar, ka pohuar mundësinë e çdo lloj
bashkëpunimi me Lëvizjen për Zhvillim Kombëtar. Por, Metko, ka pohuar se
ende nuk është diskutuar mbi këtë çështje akoma në strukturat e partisë


GRUPET E PAKONFIRMUARA

PDR
Jak NDOKAJ
Saimir CURRI
Nard NDOKA
Ilirjan BERZANI
Dashamir SHEHI
Qazim TEPSHI

PBLD
Teodor LAÇO
Arjan STAROVA

PBK
Shpëtim ROQI
Alfred CAKO
Brahim BRUKA
Uran METKO.


----------------------------------------------------------------------------

09 Gusht 2004 http://www.kohajone.com/

PD: S'MARRIM PJESE NE KOMISIONIN E PRONAVE

Kryetari i PD-se, Sali Berisha, deklaroi dje se opozita nuk do te marre
pjese ne Komisionin Shteteror per Kthimin dhe Kompensimin e Pronave. Kreu
demokrat e artikuloi kete deklarate ne momentin kur pjesa kryesore e
faktorit nderkombetar ka artikuluar nje sere akuzash ndaj mazhorances per
mungesen e konsensusit ne Kuvend, gjate miratimit te ligjit te pronave.
Berisha shpjegoi se perderisa ligji nuk ishte miratuar me konsensus dhe nuk
u mireprit propozimi i opozites per Komisionin e Kthimit te Pronave, atehere
PD-ja nuk kishte pse te behej pjese e nje procesi te njeanshem.

Pak dite me pare, prezenca e OSBE-se ne Tirane shprehu keqardhjen per
mungesen e konsensusit ne hartimin dhe miratimin e ligjit te pronave. "PS-ja
dhe PD-ja deshtuan me miratimin e ligjit te pronave". Ky ishte konkluzioni
ne te cilin erdhi prezenca e OSBE-se ne Tirane, pas miratimit te ligjit te
pronave nga Parlamenti, pa konsensusin e opozites. "Prezenca e OSBE-se ne
Shqiperi mirepret votimin e dites se enjte ne Kuvendin e Shqiperise, i cili
permiresoi ligjin per kthimin dhe kompensimin e pronave, por shpreh,
gjithashtu, keqardhje qe Partia Demokratike dhe parti te tjera te opozites
bojkotuan Kuvendin para votimit", thuhej ne nje njoftim per media te
prezences se OSBE-se ne Tirane. Kryetari i Prezences se OSBE-se, Ambasadori
Osmo Lipponen, pergezoi perpjekjet e ndermarra gjate javeve te fundit per
rifitimin e konsensusit per kete ligj. "Veprimi i kthimit te ligjit nga
Presidenti Alfred Moisiu, pas raundeve te konsultimeve te kujdesshme, ishte
nje sinjal i forte se partite duhej te gjenin konsensusin per kete ligj te
rendesishem". "Kjo u dha atyre nje mundesi tjeter per zgjidhjen e çeshtjeve
te rendesishme. Fatkeqesisht, kjo mundesi nuk u shfrytezua plotesisht",
deklaroi Osmo Liponen.