10062004

10 Qershor 2004 http://www.kohajone.com/

LIGJI I PRONAVE, VOTIM I NXITUAR

Tedi Blushi

Tejzgjatja e tranzicionit shqiptar mesa duket do te komplikohet me tej nga moszgjidhja si duhet e ceshtjes se pronave. Ndonese me shumice parlamentare, projektligji ne fjale u votua me 64 vota pro te vete mazhorances ne pushtet, aplikimi i tij konkret ka gjasa te jete teper i veshtire. Me shume se nje hap pozitiv, drejt zgjidhjes perfundimtare te problemeve, qe gjeneronte mungesa e nje ligji "Per kthimin dhe kompensimin e pronave", pritet qe politika te mos i kaperdije aq lehte "kartonat e kuq" te socialisteve. Por as me shume e as me pak, thjesht nje "hap pozitiv drejt zgjidhjes perfundimtare", ishte vleresimi qe dha dje OSBE-ja per miratimin e ligjit te pronave. Menjehere pasi u njoh me vendimin qe mori shumica parlamentare per ceshtjen ne fjale, kreu i prezences se Organizates per Sigurim dhe Bashkepunim ne Evrope, Osmo Liponen, ben publike qendrimin e tij zyrtar per rezultatin e arritur gjate punimeve te fundit plenare, ku perfundimisht u vendos kalimi me 64 vota pro te ligjit ne fjale. Nepermjet nje deklarate per shtyp, te shperndare per te gjitha mediat, diplomati i huaj e vleresoi kete qendrim te ligjvenesve shqiptare, si pjese te procesit per arritjen e nje zgjidhjeje te pranueshme, te ceshtjes se pronave. Ne cilesine e perfaqesuesit direkt, te te vetmit institucion nderkombetar, qe kontribuoi me konsulencen e vet konkrete, per zgjidhjen e ceshtjes se pronave, ambasadori Liponen shpjegoi dhe njehere ate cka arriti te realizoje politika fale sugjerimeve te meparshme te OSBE-se. "Pas disa perpjekjesh te pakurorezuara per miratimin e nje ligji per pronat, tashme u hodh nje hap i rendesishem. Ne e vleresojme klimen politike dhe profesionale pozitive te shfaqur gjate gjithe procesit njevjecar te hartimit dhe shqyrtimit te ligjit ne komisiont parlamentare", vecoi nder te tjera ai. Sipas kreut te kesaj organizate, per t'u vleresuar ishte dhe puna qe kane bere komisionet parlamentare per zgjidhjen e ketij problemi, pavaresisht mungeses se vullnetit te treguar ne disa raste. Kreu i OSBE-se shprehu gjithashtu edhe shqetesimin e tij per mosarritjen e nje konsensusi te mundshem mes dy kraheve te politikes, qe e percaktoi si "faktor qe mund te rrezikoje besimin tek zbatimi i ligjit". Ambasadori Liponen shtoi se procedura e ndjekur per shqyrtimin dhe ndryshimin e projektligjit gjate oreve te fundit te debatit, duhet te ishte bere edhe me transparente, ku si shembull solli shperndarjen e tekstit integral para votimit. "Megjithate, eshte per te ardhur keq qe fryma e konsensusit u prish ne oret e fundit te shqyrtimit te projektligjit, gje qe coi ne miratimin e nxituar te neneve te fundit, pa debat te plote e te hapur", nenvizoi ai. Nder ceshtjet e tjera shqetesuese qe ai radhiti ne fjalen e tij, ishte dhe kompentecat e zgjeruara qe i jane dhene Komitetit Shteteror per Kthimin dhe Kompensimin e Pronave. Pasi nje fakt i tille sipas tij do te mund te rrise hapesirat per abuzime dhe te krijoje konflikte te reja pronesie. Ne fund te fjales se tij, ai garantoi edhe njehere opinionin publik per ndihme konkrete te OSBE-se per zgjidhjen e drejte te ceshtjes se pronave, qe sipas Liponen do te perqendrohet kryesisht ne zbatimin e drejte te ligjit.

OPOZITA: NUK DO TE LEJOJME QE TE HYJE NE FUQI LIGJI I PRONAVE

Pas prishjes se konsensusit ne parim mes pozites dhe opozites, qe u pasua me bojkotim te seances plenare prej kesaj te fundit, shanset per hyrjen ne fuqi te ligjit te pronave thuajse jane tek shifrat minimale. Sinjalin e pare te ketij konstatimi na e dhane dje legalistet. Ne emer te tyre, preferoi te prononcohej vete kryetari Ekrem Spahia, i cili sqaroi opinonin publik, nepermjet nje konference per shtyp, per hapat e metejshem qe do te ndjeke e djathta, ne lidhje me kete ceshtje. "Sipas socialisteve, ky ligj permbush nje nga kushtet e Bashkimit Europian per proceset integruese, por partia jone beson se faktoret nderkombetare nuk do te mashtrohen, sepse edhe ata jane te bindur se ky ligj nuk do te zbatohet", arsyetoi kreu i Partise Levizja e Legalitetit. Ky deklarim qe kishte formen e nje paralajmerimi te hapur, jo vetem duhet marre seriozisht ne konsiderate por edhe duhet percaktuar si nje ze zyrtar qe buron nga opozita. Ne kete linje jane pozicionuar dje dhe shumica e deputeteve demokrate, qe ndonese ende nuk jane shprehur publikisht e mbeshtesin padyshim nje nisme qe do te bllokonte dekretimin e "Ligjit per Pronat" nga ana e Presidentit, Alfred Moisiu. Megjithese e kane teper te veshtire te prononcohen ne mungese te liderit, Sali Berisha, qe aktualisht ndodhet per nje vizite disaditore ne Vjene, shumica e ligjvenesve te PD-se, u shprehen dje ne menyre konfidenciale pro te gjitha levizjeve politike qe do te sigurojne nje rikthim te kesaj ceshtjeje ne parlament. Sipas ketyre te fundit eshte e pafalshme qe pas perpjekjeve per arritjen e nje konsensusi te perbashket mes dy kraheve, mazhoranca roze ne Kuvend te perdorte forcen e kartonit per miratimin e projektligjit ne fjale. Tashme per kedo eshte e qarte se gjate ketyre tri javesh diskutimi te varianteve per "Kthimin dhe kompensimin e pronave", selia blu u mundua me cdo mjet te arrinte nje bashkepunim me te majten per nje zgjidhje sa me e pranueshme te kesaj ceshtjeje. Madje, demokratet preferuan te vene ne rrezik dhe aleancen brenda opozites, kur hodhen poshte variantin e paraqitur nga dyshja Mediu-Cako. Por nga rezultati i votimit, u pa qarte se as kjo "sakrifice" e PD-se, nuk u sherbeu si argument ligjvenesve te mazhorances, per te kaluar me konsensus projektligjin ne fjale. Ndaj per kete arsye PLL-ja doli dje me nje liste prej tre pikash, ku nder te tjera kerkohej kthimi i ligjit ne fjale per rishqyrtim ne Kuvend. "Sipas nenit 84 te Kushtetutes i kerkojme Presidentit Alfred Moisiu, te mos ta dekretoje kete ligj. Gjithashtu ne baze te nenit 85 ai duhet ta ktheje ate per rishqyrtim ne parlament. Nderkohe qe Gjykata Kushtetuese qe garanton kete te fundit duhet te interpretoje ligjin qe njeh te Drejten e Prones, vuri ne dukje Spahia duke bere keshtu publike nje pjese te levizjes politike qe do te ndjeke ne te ardhmen PLL-ja per zgjidhjen e ketyre problemeve. Duke u nisur nga keto reagime apo qofte dhe nga vete debati i hapur se fundmi ne media, i vetmi rezultat konkret me te cilin jane njohur tashme ish-pronaret, nga miratimi i "Ligjit per Pronat", eshte fakti qe edhe per disa kohe, e drejta e tyre legjitime do te mbahet peng ne duart e politikes.

Tedi Blushi

KARAMELO: LIGJI NUK KA BAZE PER T'U ZBATUAR

Miratimi i ligjit per kthimin dhe kompensimin e pronave, eshte shoqeruar me reagime te ndryshme nga klasa politike shqiptare. Qendrimi i opozites lidhur me kete ceshtje tashme eshte me se i qarte, por kundershtime vijne edhe nga forcat e majta politike. Deputeti i PBDNJ-se, Ligoraq Karamelo, miratimin e ketij ligji pa konsensusin e paleve, gjate nje prononcimi per shtyp, e cilesoi nje shkelje e hapur e te drejtave te pronareve. "Miratimi i ketij ligji eshte vetem thjesht formal, ai nuk do te kete asnje lloj baze per t'u zbatuar, aq me teper qe protestat e pronareve tashme kane filluar", theksoi Karamelo lidhur me kete ceshtje. Sipas tij, miratimi i ketij ligji jo vetem qe nuk e zgjidh ceshtjen e pronave, por ai e fut vendin ne nje kolaps jashtezakonisht te madh. Madje Karamelo gjate fjales se tij, cilesoi si te domosdoshem rikthimin e ketij ligji nga presidenti. "Mendoj se do te ishte nje veprim jashtezakonisht i domosdoshem veprimi i Presidentit per rikthmin e ketij ligji. Thirrja e nje konsulte nga presidenti, jo vetem me partite politike, por edhe me perfaqesuesit e shoqatave, me qellim qe te arrihet nej konsensus i pranueshem nga te gjitha palet, ne interesa te te gjitha paleve, sepse vetem kjo do te jete kontributi per Shqiperine", theksoi Karamelo duke shprehur ne kete menyre mospranimin e ketij ligji.

O.XH

ZGJEDHJET DHE PRONAT, DY DESHTIMET E OSBE-SE

Edlira Prenga

Ditet e fundit disa nga analistet me te njohur nderkombetare per Kosoven kane akuzuar Holkerin, kryeadministratorin e Kosoves se ishte nje i huaj qe nuk e ka njohur dhe nuk arriti ta njohe sa duhet Kosoven, ndaj edhe deshtoi me krizat e marsit. E njejta gje po ndodh me bashkeqytetarin e tij, Liponnen, ne Tirane. I ndodhur ne krye te OSBE-se ai eshte bere objekt kritikash e sulmesh te personaliteteve te njohura si Meksi, Godo, Shehu, Ngjela, etj. dhe forcave politike parlamentare (partive te vogla) duke u akuzuar per loje te pandershme, politike ilegale dhe veprime ne njeanshme ne dem te stabilitetit politik te vendit.

Fakti eshte se dy nga iniciativat kryesorete OSBE-se, ligji i pronave dhe ai i reformes zgjedhore rrezikojne te kthehen ne deshtimet me te medha te kesaj organizate dhe te klases politike ne vend.

Zgjedhjet 2003, deshtimi i pare per OSBE-ne

OSBE-ja vitin e kaluar ne zgjedhjet vendore mori rol kryesor dhe zhvilloi bisedime vetem me PD-ne e PS-ne duke arritur te hartohet edhe nje Kod i ri Zgjedhor. Problemet me te medha u krijuan nga fakti se marreveshja e tyre nuk u shnderrua ne ligj me te njejten perputhje, duke lene shteg per interpretime qe sollen debate e konflikte politike.

Ajo e lavderoi ne maksimum Kodin, por pas deshtimit te tij, tha se duhen bere ndryshime ne 40 per qind te neneve te Kodit qe kishte hartuar vete.

OSBE-ja e beri aq vone marreveshjen dhe ligjin sa nuk kishte kohe teorike qe Presidenti ta kthente ligjin, pasi ishte shpallur data e zgjedhjeve.

OSBE-ja nuk mbajti asnje qendrim ndaj PS-se kur prishi marreveshjen per anetarin e shtate te KQZ-se. Kur iu kerkua te shprehet per proceduren, ajo heshti; zyrtarisht i dha te drejte Presidentit, jo zyrtarisht i dha te drejte opozites.

OSBE-ja paralajmeroi qe ne qershorin e vitit te kaluar zhvillime te dhunshme ne Shqiperi dhe asnjehere nuk sqaroi burimet e tyre dhe as beri perpjekje per zgjidhjen e tyre.

Pronat, OSBE deshtim i plote

Me 2002, tryeza e 12 partive politike e thirrur nga presidenti, ku ishte i pranishem edhe Lipponen miratoi nje deklarate parimesh per reformen e prones, te firmosur nga te gjitha partite. Ne kundershtim me kete firme dhe angazhim, OSBE-ja ngriti nje komision te saj te brendshem dhe ne bashkepunim me PD-ne e PS-ne miratoi nje draft ligji qe tashme eshte votuar ne Kuvend.

OSBE-ja tha se ka konsensus te plote per ligjin, por ne Kuvend opozita e bojkotoi dhe nuk e njeh ligjin, pra ligji nuk mori konsensusin dhe nuk u be ligj kombetar.

OSBE-ja propozoi qe kryetari i komisionit te jete caktuar nga presidenti, por kur Kuvendi u bllokua dhe u kerkua mendimi i saj per zgjidhjen e kesaj ceshtjeje, OSBE-ja refuzoi te mbaje qendrim, duke sjelle largimin e PD-se nga Kuvendi dhe miratimin e variantit me shumice votash nga mazhoranca, pra prishjen e konsensusit politik.

Ne kohen kur vete OSBE-ja e drejton kete proces, ne raportet e saj kritikon institucionet shqiptare se nuk po merren ne kohe me problemet zgjedhore dhe te prones.

Zgjedhjet 2004, OSBE mungese transparence

Me 2004, OSBE-ja ia mori nismen Presidentit per reformen zgjedhore dhe po zhvillon bisedime sekrete me PD-ne e PS-ne pa bere asgje publike dhe pa marre mendimin e partive te tjera ne Kuvend (10 parti te tjera parlamentare).

Kjo rrezikon qe PS-ja e PD-ja te arrijne ne nje marreveshje te re me OSBE-ne qe te perserise te njejten gjendje kaotike si vitin e kaluar me zgjedhjet, me KQZ-ne dhe me perjashtimin e partive te tjera nga numerimi i votave.

OSBE nuk ka shprehur asnje mendim publik per propozimet e grupit te te urteve dhe kritikat e analisteve dhe politikaneve se po punon ne ilegalitet.

Lipponen nuk ka zhvilluar asnje konference shtypi ose deklarim qe sqaron pozicionin e tij, perkundrazi ne nje interviste ka lene te kuptohet se mund te ndodhe gjithcka (perfshire edhe ndryshimi i Kushtetutes) nderkohe qe ne takime zyrtare thote se Kushtetuta nuk mund te preket. Kjo rrezikon qe OSBE-ja te mos kete nje draft real, pr ta ndryshoje ate ne varesi te marredhenieve te saj me Nanon e Berishen.

Kur te gjithe thone se jemi vone per pergatitjen e zgjedhjeve, OSBE-ja deklaron se ka ende kohe dhe nuk nxit publikisht palet per vazhdimin e punes.

MALAJ: KOMPENSIMI I PRONAREVE NE 2006

Ne buxhetin suplementar te vitit 2004 nuk do te pershfihet kompensimi financiar i ish-pronareve. Nje fakt i tille u publikua dje gjate prezantimit te ketij buxheti ne komisionin e Ekonomise nga ministri i Financave, Arben Malaj. Sipas Malajt, aktualisht nga buxheti mund te perballohet vetem kostoja e ngritjes dhe financimit te strukturave qe do te merren me kthimin dhe kompensimin e pronave. "Per ceshtjen e pronave sapo kostoja per shperblimin te jete gati, qeveria do te nderhyje me ane te strukurave te saj per ta vene ne jete projektin. Kjo mund te realizohet pas dy vitesh", u shpreh Malaj gjate fjales se tij lidhur me kete ceshtje. Ne kete menyre, kompensimi financiar i ish-pronareve do te filloje vetem pas vitit 2006, vit kur qeveria do te parashikoje per here te pare nje ze te posacem ne buxhet. Por nje ceshtje tjeter e cila gjithashtu nuk do te perfshihet ne kete buxhet eshte dhe fatura financiare per ish-te perndjekurit politike. Keshtu, gjate prezantimit te buxhetit suplementar ne komisionin e Ekonomise, ministri Malaj theksoi se "per ish-te perndjekurit ende nuk eshte hartuar nje kuader i plote ligjor". Ne kete menyre per sa kohe Kuvendi mban te ngrire projektligjin per ish-te perndjekurit politike, qeveria nuk do ta perfshije kete ceshtje ne asnje lloj buxheti financiar. Duke u ndalur tek rritja e shpenzimeve buxhetore, ministri Malaj sqaroi se "shpenzimet buxhetore jane rritur edhe si pasoje e moszbatimit ne kohe te shume projekteve nga ministrite perkatese. Kjo ka bere qe te rritet kostoja reale e tyre dhe te ngadalesohen procedurat e tenderimit". Nga fondi rezerve i shtetit, rreth 3 per qind e tij eshte perdorur per investime publike, te cilat, sipas ministrit Malaj, jane zevendesuar me te ardhurat e parashikuara nga shitja e sektoreve strategjike si Banka e Kursimeve.

Oli Xhilaga

10/06/2004 http://www.shekulli.com.al/

Zyra e Regjistrimit të Pasurisë në rreth: Kjo tokë është e llojit pyll dhe me pronar shtetin. Komuna thotë të kundërtën

Pronësia, 27-vjeçarja 3 ditë pa varrosur

Rruzhdie Murati prej tre ditësh është qarë në oborrin e shtëpisë. Bashkëfshatari nuk e linte të varrosej

Gjergj Marku

BURREL- Kishte ndërruar jetë prej gati tre ditësh, për shkak të një sëmundjeje të rëndë, por arkivoli me trupin e saj të pajetë është mbajtur në oborrin e shtëpisë, pasi toka e varrezave të fshatit, (tokë që funksionon si e tillë që prej 45 vjetësh) pretendohet nga një banor. 27-vjeçarja Ruzhdie Murati nga fshati Zall Mallunzë (komuna Komsi e rrethit Mat) është mbajtur në shtëpi prej më shumë se 48 orësh, pasi bashkëfshatari i saj, 63- vjeçari Hajredin Nuro, nuk lejonte varrimin e kufomës në tokën që ai pretendon se është e tij. Janë dashur një sërë negociatash dhe ndërhyrja e policisë, e cila shoqëroi në komisariat dhe 63-vjeçarin, që vajza e re që kishte ndërruar jetë të hënën të përcillej dje pasdite (në orën 17:00) për në banesën e fundit.
Fati i 27-vjeçares
Ruzhdie Murati, që ndërroi jetë tre ditë më parë ka qënë fatkeqe. Por ky fat e ndoqi dhe pas vdekjes. Sipas banorëve të fshatit, ajo ka vuajtur shumë. Prej vitesh vajza ka qenë e paralizuar, ndërsa familja e saj jeton në varfëri të tejskajshme. Hyjria, e ëma, përmes lotëve thotë se vajza e saj e sëmurë, prej vitesh nuk e ka bërë një ditë të bardhë në këtë jetë. “Kemi vuajtur shumë si familje. Vuajtjet tona nuk kanë të treguar. Mezi u kam dhënë bukë fëmijëve”,- thotë nëna mes dhimbjes. Hyrija i ka rritur jetimë fëmijët, pasi burri i saj ka ndërruar jetë 15 vjet më parë. Edhe ai ka pasur një vdekje tragjike. Pas një punë tejet të vështirë nëpër miniera, kryefamiljarit Murati iu gangrenizua këmba. Ai nuk kishte mundësi ekonomike që të shkonte nëpër spitale dhe për këtë shkak ndërroi jetë në moshën 52- vjeçare. Që nga ajo kohë Hyrija i ka rritur e vetme 4 fëmijët e saj. “I kam rritur me një pension qesharak që nuk dilte as për bukën thatë. Njëqind herë shkova në kemp për Ruzhdien, por ato pak lekë nuk ia dhanë deri sa vdiq”,- thotë nëna mes lotëve. Djali i shtëpisë thotë se lidhur me këtë problem disa herë i kanë shkruajtur Ministrit të Shëndetësisë dhe të tjerëve, por askush nuk e “vuri ujin në zjarr”. “Ka vuajtur shumë ajo vajzë. Dhe më e keqja është se ajo po “vuan” akoma”,- thotë dajoja i Ruzhdies. Tre ditë kemi që e mbajmë vajzën në oborrin e shtëpisë, pasi “pronari i varrezave” ku kemi përcjellë të afërmit tanë prej 45 vitesh, nuk e hap paksa shpirtin, për ta lënë të prehet e qetë dhe këtë vajzë të gjorë, përfundon dajoja.
Konflikti për varrezat
Burrat e fshatit, që i janë gjendur pranë familjes Murati, i takuam në paraditen e djeshme tek varrezat e fshatit. Ata thonë se jemi këtu për të hapur varrin për 27- vjeçaren, por edhe për t’u ruajtur nga ndonjë e papritur. Ata punojnë me radhë në rrëmihjen e varrit më të ri të fshatit, ndërsa të tjerët i bëjnë veshët pipëz dhe sytë katër. Gjithë këtë “gatishmëri enigmatike”, ata e spjegojnë me faktin se në varrimet e mëparshme, prej një kodre përballë u kanë ardhur plumbat e shtënë nga njerëz të Hajredin Nuros, një 63- vjeçar që jeton në lagjen matanë, (Zall Shoshaj). Kryetari i fshatit, Hysni Murra, thotë se varreza e fshatit është projektuar dhe vendosur këtu me vendim të asaj kohe, që në vitin 1960. Aty ndodhen mbi 80 varre. Zenel Uka shënohet si emri i parë i njeriut që u varros aty, dhe pllaka duket qartë, megjithëse përgjithësisht varrezat i ka mbuluar ferrnaja. Kjo pasi pronari i ri u ka thënë se nuk do të shohë njeri që të hyjë në varreza. Përkundër kësaj, banorët e fshatit nuk kanë mundësi që të kryejnë ritualet përkujtimore a të kujdesjen për varret, jo më për të varrosur të tjerë. Banorët e fshatit tregojnë se pas vitit ’97, hapja e një varri këtu ka qënë një aventurë. Sapo e merrte vesh këtë gjë, Hajredini menjëherë dërgonte njerëz të tij në kodrën atje. Ata qëllonin me breshëri në drejtimin tonë. Kjo gjë ka ndodhur për disa raste varrimesh të tilla, thonë fshatarët njëzëri, ndërsa disa të tjerë, për të mos i hyrë kësaj aventure, i kanë marrë arkivolet dhe i kanë dërguar në varrezën publike të qytetit të Burrelit. Më e keqja thotë një banor, është kur pleqtë na kanë lënë amanet, që t’i varrosim pranë njerëzve të afërt. Mirëpo janë të detyruar ta bëjnë këtë punë, dhe shumë prej tyre janë ndarë. Banorët e fshatit thonë se i kanë kërkuar bashkëfshatarit, që t’ia paguajnë tokën-pyll, (nëse ajo rezulton zyrtarisht pronë e tij). Ose thonë ata t’i japim tokë tjetër nën ujë, por atij nuk i është mbushur mendja. “Më e keqja kjo nuk është tokë buke, por pyll, dhe si e tillë nuk e kuptojmë ç’kërkon ky njeri”,- të thonë banorët.
Përplasje shkresash
Në fshat mëson se për problemin e varreve, disa herë ka ndërhyrë dhe policia. “Këtu kanë hile dhe ata të këshillit të komunës. Kemi kërkuar me shkrim, që kjo tokë të funksionojë si varrezë publike, ashtu siç ka qenë, por ata të komunës nuk kanë nxjerrë një vendim të prerë për këtë tokë”,- thonë banorët. Ndërkohë po prej tyre mësohet se në vitin 2002 (24 shkurt) këshilli i komunës pasi ka dëgjuar relatimin e urbanistikës ligjore, vendimin e kryepleqësisë së fshatit, kërkesën e 60 familjeve të fshatit ka vendosur ta miratojë si varrezë publike “kodrën e Celamit”, ku gjendet varreza në fjalë, por nuk ka harruar pa përmendur shtojcën “pronë e Hajredin Nuros”. Duket se kjo i ka shtënë atij “ethet” e pronësisë. Por në datën 31 maj të këtij viti është Zyra e Regjistrimit të Pasurisë në rreth ajo që ka lëshuar një vërtetim, ku thuhet se vendi ku janë vendosur varrezat e lagjes Zall Mallunzë, nuk figuron të jetë pronë e asnjërit. Aty thuhet shprehimisht se kjo tokë “është e llojit pyll dhe me pronar shtetin”. Kjo gjë në fakt duket dhe me sy, pasi aty nuk është punuar ndonjëherë, është e mbushur me dushqe, lisa, si dhe ka patur pemë gjelbëruese dimër-verë, që i përshtaten një varreze.
Familja Murati, jeta në skëterrë…
Familja Murati jeton në një varfëri të tejkajshme. Shtëpia e kësaj familjeje është tejet e rrënuar. Muret jashtë dhe brenda duken të çarë, ndërsa çatia nuk mund ta mbajë shiun. Kjo shtëpi përbëhet nga dy dhoma, njëra shërben si kuzhinë dhe dhomë fjetje. Aty ndodhet një djep që tundet nga dy fëmijë. Hyjria thotë se janë fëmijët e djalit që ka në Greqi. Edhe ai është i sakatuar në duar dhe nuk mundet të mbajë as veten me bukë. Për djalin ka qenë “me fat” fakti i shtyrjes së varrimit të Ruzhdies, pasi vetëm të martën në mbrëmje ka mundur të vijë në shtëpi. “Sot është diell, rrëfejnë njerëzit e shtëpisë, por kur bie shi, llucat vijnë deri lart”. Askush nuk e ka vënë ujin në zjarr për këtë familje. Madje si për ironi të fatit, këtyre fëmijëve, kësaj familjeje të skamur nuk i jepet as përkrahje sociale nga komuna, me pretendimin se i zoti i shtëpisë, Murati, punon në Greqi! “Po ç’Greqi zeza, punon ai sakat. Të ishte se sillte të ardhura, nuk do ta kishte lënë shtëpinë në këtë gjendje dhe fëmijët në mes të baltës dimër verë”,- thotë Hyjria.

Malaj: Nuk kemi parashikuar fonde për ta dhe ish-të përndjekurit në buxhet

Malaj: Ish-pronarët nuk kompensohen para vitit 2006

A.Rama

TIRANE - Kompensimi financiar i ish-pronarëve do të parashikohet si zë më vete në buxhet, vetëm pas dy vjetësh. Ministri i Financave Arben Malaj deklaroi dje në komisionin e Ekonomisë gjatë paraqitjes së ndryshimeve në buxhetin e qeverisë të vitit 2004, se ish -pronarët dhe të përndjekurit politikë nuk do të përfitojnë asnjë lekë nga privatizimi i Bankës së Kursimeve. Deklarimi i ministrit Malaj për të shtyrë në vitin 2006 fillimin e procesit të kompensimit financiar për pronarët, që nuk do të kompensohen fizikisht, bie në kundërshtim me ligjin “Për kthimin dhe kompensimin e tokave” i miratuar vetëm dy ditë më parë nga Parlamenti. Në ligj është përcaktuar se kompensimi financiar do të përcaktohet si zë më vete në buxhetin e vitit 2005, dhe do të mbarojë pas 10 vjetësh, pra në 2015. Ndërsa në projektbuxhetin suplementar që do të zbatohet për gjashtë muajt në vazhdim, parashikohet një zë i veçantë në të cilin përfshihen shpenzimet e nevojshme për funksionimin e Komitetit Shtetëror të Kthimit dhe Kompensimit të Pronës si dhe shpenzimet për funksionimin e komisioneve vendore. Kryefinancieri Malaj nuk dha një përgjigje të saktë duke u shprehur skeptik se si do të veprohet për kompensimin e ish -të përndjekurve, pasi është deklaruar nga zv/kryeministri Namik Dokle se projektligji do të miratohet në Parlament brenda këtij muaji. Ministri Malaj, tha se nuk është përcaktuar kompensimi i kësaj shtrese në buxhetin shtesë, pasi ligji që përcakton edhe skemën e financimit të kësaj shtrese të shoqërisë nuk është miratuar ende në Parlament. “Në hartimin e këtij ligji duhet që të merret parasysh shmangia sa më shumë që të jetë e mundur e barrës fiskale. Në këtë mënyrë zbatimi i këtij ligji nuk do të bëhet pengesë për mbajtjen nën kontroll të treguesve bazë të ekonomisë së një vendi”, -tha Malaj. Ai bëri edhe prezantimin e detajuar për të gjitha ndryshimet që janë parashikuar për t’u bërë në buxhet, i bazuar nga lekët e përfituara nga shitja e Bankës së Kursimeve, ku 50 % e shumës totale do të kalojnë për uljen e huamarrjes së brendshme në 6 500 milionë lekë dhe pjesa tjetër për investime. Deputetët e komisionit kërkuan që të shihej më mirë shpërndarja e fondeve për investime dhe të garantohej zbatimi i tyre deri në përfundim të vitit. Deputetja Valentina Leskaj, kërkoi që në këto përmirësime t’i vihej përparësi investimet në turizëm, pasi shëndoshja e këtij sektori ndikon në mënyrë të tërthortë në uljen e varfërisë.

Shefi i OSBE-së shpreh shqetësimin për kompetencat e gjera që i janë dhënë KSHKKP dhe kufirin e kompensimit prej 60 ha

Lipponen: Pronat, miratimi nga PS jo transparent

N.Perndoj

TIRANE- Kryetari i Prezencës së OSBE-së në Tiranë, Osmo Lipponen shprehu dje keqardhjen
për bojkotin e opozitës, dy ditë më parë, gjatë miratimit të projektligjit “Për kthimin dhe kompensimin e pronave”, nga ana e maxhorancës. Duke vlerësuar si hap të rëndësishëm miratimin e këtij ligji, Lipponen shtoi se, “është për të ardhur keq që fryma e konsensusit u prish në orët e fundit të shqyrtimit të projektligjit, gjë që çoi në miratimin e nxituar të neneve të fundit, pa debat të plotë e të hapur”. Prezenca e OSBE-së në Shqipëri e konsideron miratimin e ligjit “Për kthimin dhe kompensimin e pronave” nga Kuvendi shqiptar si pjesë të procesit për arritjen e një zgjidhjeje përfundimtare për çështjen e pronave. “Pas disa përpjekjesh të pakurorëzuara për miratimin e një ligji për pronat, dje u hodh një hap i rëndësishëm”, -tha kreu i Prezencës së OSBE-së, ambasadori Osmo Lipponen. “Ne e vlerësojmë klimën politike dhe profesionale pozitive të shfaqur gjatë gjithë procesit njëvjeçar të hartimit dhe shqyrtimit të ligjit në komisionet parlamentare”, -shtoi ai.
Vërejtjet
Kreu i OSBE-së parashtroi dje edhe problemet e këtij ligji. Ai theksoi se një ndër problemet ishte paraqitja e vonuar e ndryshimeve në debatet plenare, të cilat nuk ishin shpjeguar ose diskutuar plotësisht para votimit. Një ndër çëshjet shqetësuese të vëna në dukje nga ai ka të bëjë me kompetencat e gjera që i janë dhënë Komitetit Shtetëror për Kthimin dhe Kompensimin e Pronave, gjë që mund të rrisë mundësinë për abuzime dhe të krijojë konflikte të reja pronësie, në rast se nuk saktësohen kufizimet përkatëse për kompetencat e komitetit. Gjithashtu, neni që kufizon kthimin dhe kompensimin e tokës bujqësore në 60 hektarë u paraqit për t’u votuar në fund të seancës plenare, pasi kishte përfunduar shqyrtimi i të gjitha neneve të tjera. Ambasadori Lipponen shprehu edhe shqetësimin se disa nga parimet kryesore për të cilat ishte rënë dakord gjatë procesit të shqyrtimit në komisionet parlamentare, nuk janë respektuar dhe kjo mund të vërë në rrezik besimin te zbatimi i ligjit. Ai shtoi se procedura e ndjekur për shqyrtimin dhe ndryshimin e projektligjit gjatë orëve të fundit të debatit, duhet të ishte bërë më transparente dhe konsensuale, si, për shembull, duke shpërndarë një tekst integral përpara votimit përfundimtar. Ndërkohë, kryetari i legalistëve Eqerem Spahia i ka bërë thirrje dje presidentit që të mos dekretojë ligjin e pronave

Malaj: Buxheti i shtetit, pas dy vjetësh, kompensim për pronarët

Lajmi i ores 9:30 AM

Arben Malaj
TIRANE (10 Qershor) - Për herë të parë në vitin 2006 do të parashikohet një zë i vençantë në buxhetin e shtetit për kompensimin e ish-pronarëve të tokave. Këtë e ka deklaruar dje ministri i Financave, Arben Malaj, gjatë prezantimit të buxhetit suplementar në Komisionin Parlamentar të Ekonomisë dhe Financave Ai ka deklaruar se kompensimi financiar i ish- pronarëve të tokave do të parashikohet për herë të parë në buxhetin e shtetit pas dy vjetësh. Ndërsa, përsa i përket kompensimit të ish të përndjekurve politik, Malaj ka deklaruar se ende nuk është hartuar një kuadër i plotë ligjor. Megjithëse, Parlamenti Shqiptar ka votuar vetëm dy netë më parë ligjin "Për kthimin dhe kompensimin e pronave ish-pronarëve", qeveria shqiptare ka parashikuar që kompensimi financiar të fillojë në buxhetin e vitit 2006. Parlamenti Shqiptar nëpërmjet ligjit të miratuar kufizon kthimin e pronës deri në 60 hektarë, ndërkohë që në raste të dhënies së zonave turistike hapësira mbështetëse është deri në 70 hektarë. Gjatë miratimit të këtij ligji dy netë më parë në Parlamentin Shqiptar ishte i pranishëm edhe shefi i Pranisë së OSBE-së, Osmo Liponen, i cili pas seancës tha se nuk i kishte pëlqyer bojkoti i opozitës. Po ashtu Liponen pasi vlerësoi bashkëpunimin midis komisioneve parlamentarë me ekspertët, shtoi se ky bashkëpunim duhet të kishte vazhduar deri në fund. Ndërkohë, dje ministri i Financave gjatë prezantimit të buxhetit suplementar është shprehur edhe në lidhje me shpenzimet buxhetore, të cilat kjo ministri do ti kontrollojë në mënyrë rigore çdo muaj. "Shpenzimet buxhetore janë rritur edhe si pasojë e mos zbatimit në kohë të shumë projekteve, nga ministrite përkatëse, kjo ka bërë që të rritet kostoja reale e tyre, dhe të ngadalësohen procedurat e tenderimit", tha Malaj. Ai gjithashtu ka sqaruar se nga fondi rezervë i shtetit rreth 3 për qind e tij është përdoruar për investime publike, të cilat janë zëvendësuar me të ardhurat e parashikuara nga shitja e sektorëve stategjikë. bm/bm(GazetaShqiptare/Balkanweb)

Faqe 2 - Politikë

10Qershor 2004

ligji i pronave

dekretimi

Kreu i shtetit paralajmëron kthimin mbrapsh të variantit të mazhorancës

Moisiu: Jo firmë për ligjin e pronave

Elisabeta Ilnica

Vota e mazhorancës për të kaluar ligjin e pronave nuk do të marrë firmën e kreut të shtetit për t´u kthyer përfundimisht në ligj të detyrueshëm për zbatim në praktikë.

Burime pranë kreut të shtetit kanë bërë të ditur dje për “Panorama” se Presidenti pritet të rrëzojë variantin e votuar pa mbështetjen e të gjitha forcave politike. Arsyet e kundërshtimit të Mosiut janë shtuar edhe pas kontestimit të hapur që kanë bërë dje ambasadori i OSBE-së, Liponen, ambasadori i BE-së, Salzman, dhe përfaqësuesit e Ambasadës Amerikane, të cilët janë mbledhur me shpejtësi për të diskutuar mbi qëndrimin që duhet të mbajnë këto institucione pas miratimit të ligjit me votat e mazhorancës. Kështu, duke qenë se nuk u arrit konsensusi i duhur mes forcave politike për një çështje kaq të rëndësishme, zgjidhja e së cilës është një ndër kushtet kryesore vënë nga Bashkimi Evropian për integrimin e Shqipërisë, duket se Presidenti e ka tashmë në duar “armën” për të motivuar vendimin e tij në rast mosdekretimi. Në këtë linjë, Moisiu duket më i vendosur se sa ambasadori Liponen, që po ashtu paralajmëroi “votën” kundër, në se do prishej konsensusi politik, ndërsa dje e “përtypi” këtë fakt vetëm nëpërmjet një deklarate për shtyp.

Mënjanimi i Mosiut
Dy forcat politike kryesore në vend thuajse kanë mënjanuar tërësisht rolin e Presidentit për zgjidhjen e çështjes së pronave. Tryeza e 12 partive politike në dhjetor të 2002-shit, e thirrur nga Presidenti, është kontakti i fundit i përbashkët për këtë proces. Kupola “rozë” e “blu”, nën drejtimin e OSBE-së ngritën një komision, duke miratuar projektligjin në parim. Në asnjë moment, të dyja forcat më të mëdha politike, por edhe OSBE-ja nuk e pyeti kreun e shtetit shqiptar rreth kësaj çështjeje, edhe pse ky i fundit u bëri disa herë thirrje. Vetëm pas dy vjetësh, PS-ja dhe PD-ja u kujtua se ligji, para se të funksionojë realisht, kërkon edhe nënshkrimin e Presidentit të Republikës. Po ashtu, edhe ambasadori Lipponen vetëm dje është “zgjuar” nëpërmjet një deklarate për shtyp, në të cilën edhe pse i njeh defektet e ligjit për pronat, e pranon zyrtarisht atë.

Pronat vënë në rrezik Kodin Zgjedhor

Kodi Zgjedhor rrezikon të pësojë të njëjtin fat si ligji i pronave, pra të jetë një draft në varësi të marëdhënieve të OSBE-së me Nanon e Berishën. Mungesa e vullnetit politik për këtë proces, pritet që të ndikojë negativisht në ndryshimet për reformën zgjedhore. Ashtu si me draftin për pronat, OSBE-ja po shërben si zyrë takimesh vetëm për PS-në dhe për PD-në, duke përjashtuar tërësisht partitë e vogla dhe njëkohësisht propozimet e huazuara të të urtëve të Presidentit Moisiu, për të cilat nuk ka bërë deri më sot asnjë koment zyrtar. Ashtu si në zgjedhjet e vitit 2003, OSBE-ja po punon në “ilegalitet” vetëm me dy forcat e mëdha politike. Edhe pse vitin e kaluar i dha notën maksimale ndryshimeve në Kod, ambasadori Lipponen pranoi se, 40 përqind të neneve, sipas ekspertëve të tij, ishin me gabime. Por, ishte tejet vonë për të korrigjuar. Presidenti Moisiu nuk arriti dot të kthente ligjin zgjedhor, për shkak se kishte shpallur tashmë datën e garës elektorale vendore. Ndërkohë, kreu i shtetit u gjend i “tradhtuar”, edhe në një moment tjetër, nga OSBE-ja. Anëtari i shtatë i KQZ-së, ishte “molla e sherrit” që përplasi Moisiun me selinë blu. OSBE-ja nuk mbajti asnjë qëndrim ndaj PS-së kur prishi marrëveshjen për të shtatin e KQZ-së. Kur iu kërkua të shprehet për procedurën, ajo heshti. Zyrtarisht i dha të drejtë Presidentit, jo zyrtarisht i dha të drejtë opozitës.

Shkaqet

ish-pronarët
Janë arsyeja kryesore e Presidentit Moisiu për të mos dekretuar ligjin e pronave. Duke qenë se ish-pronarët i janë drejtuar që në fillim kreut të shtetit për ndihmë, ai ndjehet i detyruar që të mendohet mirë para se të hedhë firmën në ligjin e miratuar nga mazhoranca. Kjo për fakti se shoqatat e pronarëve dolën me një projektligj më vete për çështjen e pronave dhe vetëm një pjesë e papërfillshme e amendamenteve të tyre u morën parasysh. Pjesa kryesore e propozimeve të ish-pronarëve mbeti vetëm në letra. Më i rëndësishmi ishte abrogimi i ligjit 7501. Po ashtu, argumenti i shoqatave se shteti duhet t’i japë përparësi kthimit të pronës dhe jo kompesimit, për shkak se nuk ka lekë në arkën e shtetit, është një tjetër arsye për Moisiun për të mos e dekretuar ligjin.
“të vegjlit”
Kanë qenë që në fillim palë me ish-pronarët dhe i kanë mbështetur ata. Partitë e vogla të opozitës ishin të parat forca politike që iu ankuan Presidentit për personalizimin që i bëri PS-ja dhe PD-ja çështjes së pronave. Krerët e këtyre partive trokitën vazhdimisht tek zyra e Moisiut, ndërkohë që së bashku me ish-pronarët shkrinë propozimet e tyre në një projektligj të vetëm, nën autorësinë Mediu-Cako. Por, me anën e forcave të kartonit rozë e blu, drafti u hodh poshtë pa u shyrtuar në detaje. Menjëherë pas këtij akti, të vegjlit i kërkuan Presidentit që të mos e dekretojë ligjin e pronave, pasi ai nuk zgjidhte realisht çështjen e pronave, madje paralajmëruan shtimin e konflikteve sociale. Këto parti u shprehën të gatshme të rrezikojnë marëdhëniet me selinë blu për të mbrojtur të drejtën e pronarëve.
selia blu
Bojkoti i PD-së është arsyeja më madhore që Presidenti të mos bekojë ligjin e pronave. Duke qenë se Bashkimi Evropian, si një ndër kushtet për integrimin e Shqipërisë ka vënë zgjidhjen konsensuale të ligjit të pronave, dekretimi i Moisiut edhe pse selia blu kundërshton, do të ishte një rrezik i madh për vendin. Ky do të ishte një gabim i pafalshëm për kreun e shtetit, nisur nga fakti se PD-ja është forca politike më e madhe opozitare në vend. Gjithashtu, PD-ja me kërkesën e saj që kreu i Komitetit Shtetëror për Kthimin dhe Kompesimin e Pronave të jetë nën drejtimin e Presidentit të Republikës, dëshmon për një ndryshim “kursi” në kahen pozitive sa i takon marrëdhënieve me Predsidentin. Vota kundër e kreut të shtetit ndaj ligjit të pronave, do të ishte një hap i mirë për rregullimin e mëtejshëm të këtyre marëdhënieve.
osbe
“As mish, as peshk”. Indiferenca e OSBE-së karshi Presidentit, duke e ditur se në fund sërish do të përballej me të për dekretin, duket e patolerueshme. Prezenca e ka konsideruar veten si negociatore mes forcave politike, por ka hedhur firma vetëm për PS-në dhe PD-në. OSBE-ja nuk iu përmbajt vendimit kryesor të tryezës së dhjetorit 2002, për të përfshirë në procesin e hartimit të ligjit të gjitha partitë, por shërbeu vetëm si “kafene” pune e dy kampeve kryesore politike, duke shkelur në këtë mënyrë edhe iniciativën e Presidentit të Republikës. Kështu, Moisiu duket se me sjelljen e këtij institucioni, i cili nuk reagoi publikisht asnjëherë, rradhit një shkak tjetër për të mos dekretuar ligjin e pronave. Aq më tepër kur bëhet fjalë që vetë ambasadori Liponen shkeli premtimin për të mos e përkrahur ligjin, në se ai nuk do të kishte votën e të gjithëve.

Malaj: Kompensimi për pronat, më 2006

Qeveria do të pëfshijë në buxhetin e saj fonde për kompensimin e pronave vetëm në vitin 2006. Ministri i Financave, Arben Malaj, ka deklaruar kështu gjatë prezantimit që i ka bërë në Komisionin Parlamentar të Ekonomisë projektbuxhetit të këtij viti. Malaj tha se do të duhet një vit kohë për parashikimin në buxhet të një zëri të posaçëm për procesin e kompensimit të pronave. Ndërkohë që ligji i sapomiratuar në Kuvend thekson se Ministria e Financave, së bashku me Këshillin e Ministrave, menjeherë pas hyrjes në fuqi të këtij ligji duhet të fillojë të përcaktojë mekanizmat e zbatimit të tij, të cilat parashikojnë edhe faturën financiare për kompensimin e të shpronësuarëve. Ndërkohë, Malaj ka prekur dje edhe temën e dëmshpërblimit të ish-të përndjekurve politikë. Sipas tij, buxheti i këtij viti nuk do të përmbajë asnjë fond për kompensimin e kësaj shtrese. Kjo deklaratë e Malajt bëhet në një moment pasi qeveria pati premtuar se shuma për kompensimin e ish-të përndjekurve do të sigurohet nga privatizimi i Bankës së Kursimeve. Por, Qeveria do të përballet shpejt me faturën financiare për këtë shtresë, pasi Kuvendi pritet të votojë më 28 qershor projektligjin “Për kompensimin e ish të dënuarëve politikë në kohën e regjimit komunist”. Aktualisht ky draft ligjor është miratuar vetëm nga dy komisione parlamentare, ndërkohë që komisione të tjera parlamentare nuk e kanë futur aspak në anxendën e tyre për dy javët e ardhshme.

Faqe 3 - Politikë

10Qershor 2004

ligji i pronave

reagimi

Shefat e zyrës së OSBE-së, BE-së dhe ambasadës së SHBA-së, kritika formës së votimit të ligjit

Liponen: Mazhoranca gaboi me pronat

“Ligji i jep Komitetit të Kthimit të Pronave kompetenca të zgjeruara”

Nikolin Todolli

KE, OSBE dhe ambasada amerikane e kanë vlerësuar gati të dështuar ligjin për pronat miratuar nga Kuvendi.

Diplomacia ndërkombëtare është vënë në lëvizje vetëm një ditë pasi 64 votat e deputetëve të majtë miratuan ligjin e ri “Për kthimin dhe kompensimin e pronave”. Ambasadori i KE-së për Shqipërinë, Lutz Salzman, kreu i Prezencës së OSBE-së, Osmo Liponen, dhe përfaqësues të ambasadës amerikane janë mbledhur në një takim disa orësh në selinë e OSBE-së në Tiranë, ku kanë diskutuar edhe lidhur me qëndrimin e këtyre selive lidhur me votën në Kuvend. Menjëherë pas këtij takimi, ambasadori i OSBE-së ka dalë me një komunikatë për shtyp, në të cilën ka nënvizuar defektet që përmban ligji i sapomiratuar. “Eshtë për të ardhur keq që fryma e konsensusit u prish në orët e fundit të shqyrtimit të projektligjit, gjë që çoi në miratimin e nxituar të neneve të fundit, pa debat të plotë e të hapur”, tha Liponen. Megjithëse ai ka vlerësuar punën e bërë nga kryetarët e komisioneve, Braho, Gjana dhe Bufi, kreu i OSBE-së kë qenë kritik në vlerësimin që i ka bërë ligjit për pronat. Sipas tij, ndryshimet në projektligj janë sjellë tepër vonë në Parlament, pa u shpjeguar ose diskutuar plotësisht para votimit.

Liponeni kritikoi gjithashtu numrin e madh të kompetencave që ligj i jep kështu Komitetit Shtetëror për Kthimin dhe Kompensimin e Pronave, pasi kjo mund të rrisë mundësinë për abuzime dhe të krijojë konflikte të reja pronësie, në rast se nuk saktësohen kufizimet përkatëse për kompetencat e Komitetit. “Gjithashtu, neni që kufizon kthimin dhe kompensimin e tokës bujqësore në 60 hektarë u paraqit për t’u votuar në fund të seancës plenare, pasi kishte përfunduar shqyrtimi i të gjitha neneve të tjera”, ishte një tjetër vërejtje e Liponenit. Ndërkohë, pozita dhe opozita nuk kanë respektuar disa parime bazë, të cilat në fillim u zotuan se do t’i zbatojnë. “Kjo mund të vërë në rrezik besimin te zbatimi i ligjit”, tha Liponen. Vërejtjet e OSBE-së duket se janë mbështetur edhe nga ambasadori i Komisionit Evropian, Salzman, gjatë takimit që zhvilloi dje në zyrat e OSBE-së.

Rekomandimet e KE
Përballë qëndrimit të Qeverisë shqiptare dhe votimit të Kuvendit, Komisioni Evropian ka sinjalizuar kohët e fundit se, nëse nuk zgjidhet siç duhet problemi i pronave, atëherë investimet e huaja priten të bllokohen. Aktualisht, firmat e huaja nuk investojnë në tregun shqiptar të shit-blerjes së pronave dhe kjo për shkak të ligjeve jo të mira që janë në fuqi. “Italianët kanë preferuar të investojnë në tregun rumun dhe bullgar të shit-blerjes së tokës, sesa të investojnë në Shqipëri”, thekson një përfaqësues i shoqatave të ish pronarëve.

Letra dhe protestë
Ish-pronarët po ndjekin dy rrugë për të fituar të drejtat e tyre. Shoqata “Bregdeti” ka paralajmruar se do të ngrejë në protesta të gjithë ish-pronarët e zonave turistike. Ndërsa drejtuesit e shoqatës tjetër “Pronësi me Drejtësi” theksojnë se do të ndjekin rrugën institucionale për të kthyer mbrapsht në Parlament ligjin e sapomiratuar. Dje, drejtuesit e kësaj shoqate i kanë drejtuar një letër Salzmanit, Liponenit dhe përfaqësuesve të tjerë të diplomacisë së huaj. Një letër tjetër ata i kanë drejtuar edhe kryenegociatorit të KE-së, Reinhard Priebes, ku i kanë shprehur shqetësimin për “ligjin e keq” që po përgatitej nga Kuvendi. Sipas tyre, Priebe do të kthejë shumë shpejt një përgjigje, e cila pritet të jetë negative.

Ambasadorët mblidhen në selinë e OSBE-së

Takimi i tre përfaqësuesve të zyrave më të rëndësishme diplomatike ndërkombëtare në Shqipëri është zhvilluar dje tek selia e kreut të Prezencës së OSBE-së në Tiranë, Osmo Liponen. Takimi është zhvilluar në orët e mesditës me dyer të mbyllura dhe pa praninë e gazetarëve.

Flet nënkryetari i shoqatës “Pronësi me Drejtësi”
Sulstarova: Gjykata Kushtetuese ta kthejë ligjin

“Ligji për pronat është në dorë të Presidentit, i cili na ka premtuar se do të respektojë Kushtetutën”, shprehet nënkryetari i shoqatës “Pronësi me Drejtësi”, Ahmet Sulstarova, duke shpresuar se Moisiu nuk do të lejojë kalimin e këtij ligji antikushtetues. “Por edhe nëse ai e kalon, në do i drejtohemi Gykatës Kushtetuese”, thotë Sulstarova.

Si e komentoni votimin në parlament të ligjit për pronat?
Ky ligj nuk e zgjidh problemin e pronësisë dhe e kalon atë në kalendat greke. Deputetët treguan një mosseriozitet në votim. Ata madje nuk kishin as njohuritë themelore për këtë projektligj. Nga ana e saj, PD-ja mbajti një qëndrim të hapur. Nuk e prisnim largimin e saj. Ndërkohë, vlerësojmë qëndrimin e PR-së dhe së fundi të PDR-së, por sidomos të Pepës, i cili ka qenë kundërshtari ynë më i fortë.

Çfarë pasoja sjell ky ligj?
Ligji i përmban në vetevete pasojat, duke qenë kontradiktor dhe shkel nenet 41 dhe 181 të Kushtetutës si dhe konventat ndërkombëtare. Ky ligj del i pazbatueshëm ndërkohë, pasi nuk parashikon një studim të plotë për kthimin dhe kompensimin e pronave. Gjithashtu, me anën e këtij ligji, ligjërohen të gjitha abuzimet, korrupsioni dhe allishverishet që janë kryer me pronat në kurriz të ish-pronarëve si dhe mbron aferat e disa deputetëve në zonat turistike.

Cila do të jetë lëvizja tuaj e mëtejshme?
Ne do të vazhdojmë luftën institucionale. Ligji do të kalojë tek Presidenti dhe nga bisedat që kemi bërë me të, ai na ka premtuar se do të mbrojë Kushtetutën. Këtë e lemë në vullnetin e tij. Pastaj do t’i drejtohemi Gjykatës Kushtetuese, e cila në mbrojtje të Kushtetutës ka për detyrë të rrëzojë ato nene që janë antikushtetuese. Por, ne kemi informuar gjatë kësaj kohe edhe institucionet ndërkombëtare.

Ç’mendoni për kompensimin deri në 60 ha?
Kjo është gjëja më qesharake. Ligji në formën fillestare të tij kishte përcaktuar kthim dhe kompensim pa kufizim të pronës. Por, Parlamenti luan lojën e kungulleshkave. Ky kufizim nuk është veçse një absurditet tjetër i ligjit.

“Ligji i ri na lë në vëllavrasje”

“Mos na fusni në vëllavrasje!”. 161 familje ish-pronarësh nga Bregu i Matës të Lezhës i kanë drejtuar një telegram kryetarit të Kuvendit, Servet Pëllumbi, si dhe krerëve të PD-së, Berisha e Topi, përmes të cilit i kërkojnë të shmangin me të gjitha mënyrat një ligj që do tí dërgonte banorët e kësaj zone në vëllavrasje. “Na jepni pronat tona”, “shfuqizoni ligjin 7501” dhe “Mos na fusni në vëllavrasje”, kanë disa nga kërkesat që 161 familjet lezhiane u kanë drejtuar eksponentëve kryesorë të Kuvendit dhe disa drejtuesve politikë. Madje, në këtë letër, banorët shprehen se nuk kanë më ndërmend t´ua japin votën partisë që mbështesin, e konkretisht PD-së për të cilën kanë votuar gjatë zgjedhjeve të kaluara. Ndërkohë, 161 familjet shpresojnë se ka ende instanca që mund ta ndalojnë këtë ligj, i cili mund t´ua lërë tragjedinë sërish në mes, duke i vënë në vëllavrasje dhe gjakmarrje. Ndërkohë, shenja protestash ndaj këtij ligji kanë kanë shfaqur edhe ish-pronarët e “Bregdetit”, menjëherë sapo kanë mësuar se ligji i ri u jep të drejtën pronarëve të rinj që të paguajnë truallin ku kanë bërë ndërtimin në zonat turistike. “Ndodhi ajo që prisnim, që politika do të legjitimitonte fitimet e veta me tokat tona në bregdet. Kjo është shakaja më e rëndë”, janë shprehur ish-pronarët e zonave bregdetare.

Ish-pronarët, letra drejtuar politikanëve

Pas miratimit të ligjit për pronat, dhjetëra ish pronarë dhe familje të shqetësuara për pronat e tyre kanë dërgur letra tek deputetët dhe politikanët. Ata shprehin shqetësimin se ligji i sapomiratuar është i paqartë dhe nuk shpjegon se si do të kthehet apo kompensohet prona e tyre.