OBORRI MBRETEROR SHQIPTAR                                                          ROYAL COURT OF ALBANIA

Rezidenca: Vishnje, Petrelë                               TEL/FAX: 00355 4 271 191                       P.Box. Kutia postare Nr.8170,

Tiranë, SHQIPËRI                                    E-mail royalcourt@albaniaonline.net                                       Tirana, ALBANIA

Tiranë, 10 gusht 2004

Me besa-besë me të gjithë shqiptarët në Lëvizjen për Zhvillim Kombëtar

-Njoftim për Shtyp-

Në Rezidencën e Familjes Mbretërore në datën 10 gusht u zhvillua një Mbledhje e Zgjeruar për ecurinë e Lëvizjes për Zhvillim Kombëtar. Mbredhjen e drejtoi NMT Leka I. Ishin të ftuar specialistë të fushave të politikës, ekonomisë, arsimit, kulturës, rinisë, çështjeve sociale, medias, shëndetësisë, financës, etj. Në mbledhje NMT Leka I parashtroi disa çështje për vazhdimin e Lëvizjes për Zhvillim Kombëtar, si një Lëvizje, që i drejtohet ndërgjegjes së çdo shqiptari, që kërkon drejtësi dhe zhvillim, dinjitet dhe përparim. Mbreti Leka kërkoi, që me fisnikëri dhe me përgjegjësi kombëtare të analizohen alternativat konkrete për të gjitha fushat, ku po vuan populli ynë, që është populli më i mirë në botë. Mbreti Leka I theksoi: “Ne të gjithë, sëbashku duhet t’i hedhim sytë përpara, në kërkim të së ardhmes për të gjithë shqiptarët. Na duhet të gjejmë rrugët më të mira që do të ngremë dinjitetin e Atdheut tonë të përbashkët. Ky është thelbi i Lëvizjes për Zhvillim Kombëtar. Me një besa-besë me të gjithë shqiptarët, me një kushtrim për ata që kanë përgjegjësi dhe bashkohen që “Shqipërinë ta shpëtojmë të gjithë sëbashku”. Kështu ne do të realizojmë qëllimin tonë: Të garantojmë zhvillimin dhe përparimin tonë kombëtar.”

Gjatë Mbledhjes u shprehën mendime nga shumë pjesëmarrës, duke theksuar se Lëvizja për Zhvillim Kombëtar nuk është aq e re: Të gjithë ata njerëz patriotë e të mënçur që kanë bërë historinë tonë me jetën dhe veprën e tyre, i kanë shërbyer kësaj Levizjeje. LZHK përfaqëson një ideal historik, ende të parealizuar për shqiptarët, që jetojnë të ndarë, edhe me keq - të përçarë, të varfër, të përbuzur, të nëpërkëmbur dhe të pazhvilluar.

Në këtë mbledhje u diskutua për të përcaktuar problematikën kryesore, që ka ardhur si një reagim i popullit për një politikë ndryshe, me moral dhe ideal kombëtar. Diskutantët u përqëndruan në këto çështje kryesore:

Shqipëria sot nuk përfaqësohet me dinjitet dhe vazhdon të jetë një vend i izoluar edhe pse historikisht e gjeografikisht është një prej korridoreve më me rëndësi në shkëmbimet ekonomike dhe pozicionet gjeostartegjike.Shtetasi shqiptar nuk mbrohet as brënda shtëpise së tij. Interesat ekonomike janë vënë në ankand nga cilido shtetar i rradhës. Ekonomia kombëtare gjendet në një krizë totale. Kjo rrezikon të thellohet në muajt e ardhshëm, me afrimin e periudhës elektorale. Të gjithë vlerësojnë se ekonomia shqiptare është shndërruar në satelit të ekonomive fqinje. Shqipëria është kthyer në një piramidë kombëtare.

Varfëria po thellohet me shpejtësi, ndërsa investimet serioze Europiane dhe botërore nuk kanë asnjë motiv për zbatuar projekte me interes të përbashkët. Të gjithë e kanë thënë shkakun: Klasa politike është e lidhur me mafian dhe ekonominë e zezë. Të gjithë përmendin korrupsionin, presionin shtetëror, monopolet dhe sundimin politik të personave të dyshimtë, që janë pasuruar brenda natës dhe janë të mbështetur me Ligje dhe akte administrative favorizuese.

Një problem tjetër i rëndësishëm, që u diskutua ishte kriza e përfaqësimit. Për këtë u paraqitën këto konkluzione: Shqiptarët nuk kanë përfaqësuesit e tyre legjitimë në institucionet shtetërore, që nga parlamenti dhe Komisioni Qendror i Zgjedhjeve. Në këto vite të gjoja “demokracisë pluraliste” kemi deputetë apo pushtetarë që nuk janë votuar as nga gjysma e zonës së tyre. Rreht 60 – 70 % nuk shkojnë të votojnë. Balotazhet, gjyqet apo votimet deri në pesë raunde kanë krijuar këtë klasë politike, që në fakt, as me vota, nuk e përfaqëson popullin shqiptar. Këtu ka filluar humbja e besimit nga populli. Këtu është edhe mungesa e shpresës. Mbreti Leka I dhe diskutantët e përqëndruan vëmendjen edhe në një problem tjetër, të cilin Mbledhja e vlerësoi si shumë të rëndësishëm: Është krijuar një shtresë shumë e madhe e popullatës, që nuk shkon në votime. Ajo mund të prodhojë ose ndryshimin politik me anën e votës, po të ishim në kushtet e një demokracie normale ose kaosin dhe diktaturën e turmave të komanduara, siç ndodhi me piramidat e vitit 1997. Dhe kjo duhet të mbahet parasysh me shumë seriozitet, sepse mund të keqpërdorohet politikisht fakti që Shqipëria është kthyer në një piramidë të madhe.

Mbreti Leka I theksoi: “Të mos harrojmë se prej ngjarjeve të dhunshme të vitit 1997, roli i faktorëve politikë kryesorë në të gjitha krahinat e Shqipërisë është ulur në kuotat minimale, rreth 15 – 30 %. Nuk u besohet më premtimeve të shumë politikanëve. Edhe imazhi i tyre mbarëkombëtar dhe ndërkombëtar ka rënë shumë poshtë. Shqiptarët, nënat dhe motrat tona, sidomos rinia nuk u besojnë më shumë prej tyre. Ju e shikoni edhe këto kohët e fundit. Si në palament, ashtu dhe në media apo në mbledhje të shumta e me bujë mediatike, debati mbi idetë dhe alternativat është zhvendosur në debate për njerëzit që drejtojnë, madje edhe më pak se kaq. Palët pranë pushtetit tani bëjnë garë që të vlerësojnë se cili grup është më i pasur, për të ruajtur të drejtën e qeverisjes së vendit. Qëllimi është pasurimi i tyre i mëtejshëm.”

Diskutantët theksuan se nga shumë politikanë vazhdon një demagogji tipike për të ruajtur pushhtetin, apo për t’u ricikluar në pushtet. Mes premtimeve të tyre dhe realizimit konkret, mes elektoratit dhe partive sunduese është krijuar një hendek shumë i madh. Kjo ka krijuar kushte favorizuese për rrjetet kriminale dhe korrupsionin e jashtëzakonshëm. që tashmë komandojnë politikën dhe pushtetin. Shpesh ata bashkohen në kompromise të dyshimta për pronat, për të persekutuarit politikë, për Kodin Elektoral. Kështu bëjnë edhe kur caktojnë shpërblimet për deputetët apo për shtetarët e tjerë.

Në diskutimet për programet e LZHK, shumë diskutantë theksuan se partitë e mëdha i kanë reduktuar platformat e tyre politike në përpjekje të dëshpëruara për të siguruar partnerë ndërkombëtarë elektoralë. Përpiqen të blejnë ftesa për vizita dhe për të bërë  deklarime publike, për të gënjyer votuesit shqiptarë. E gjithë kjo, - theksuan disa diskutantë - ka zhvlerësuar vlerat e demokracisë dhe rolin e verdiktit të popullit, si sovrani i vetëm. Vazhdojnë të bëhen plane dhe kompromise që “votuesit”, të shihen vetëm si njësi politike vendim-marrëse, pasi “votat” e tyre mendojnë se do t’i numërojnë specialistët e manipulimeve, siç është bërë në të gjitha rastet e votimeve në Shqipëri. Për këto u bënë propozime konkrete për organizimin e LZHK në të gjithë krahinat, duke filluar nga çdo komunë.

Duke e marrë fjalën gjatë diskutimeve të shumta Mbreti Leka I theksoi se të gjithë pjesëmarrësit ishin në një mendje se “Lëvizja për Zhvillim Kombëtar duke marrë përgjegjësinë kombëtare për të realizuar ndryshimin, që kërkon Kombi Shqiptar, është kërkesë mbarëkombëtare për një frymë të re Kombëtare. Qysh në ditën e parë të saj, Lëvizja për Zhvillim Kombëtar pati për mision të ringjallë besimin e humbur tek e ardhmja dhe tek njëri-tjetri, duke vendosur shtetin e së drejtës, zbatimin e ligjit, pronën private, rendin dhe sigurinë e seicilit. Lëvizja do të sigurojë pavarësinë dhe reformimin e pushtetit gjyqësor, forcimin rrënjësor të sigurisë kombëtare. Fjala vjen, ne kemi nevojë urgjente për shtetin ligjor, me drejtësi të besueshme, me ekonomi tregu të qëndrueshme dhe një qeverisje të urtë. Këto janë në qendër të lëvizjes për Zhvillim Kombëtar. Ju specialistët jeni Këshillat e Politikave  të Lëvizjes për Zhvillim Kombëtar.”

Nga diskutantët u përqëndruan mendimet dhe propozimet për t’u mbështetur në profesionalizëm dhe në shqiptarizmin, pasi kjo rrugë është vazhdim i traditës dhe ndihmon në zhvillimin e kulturës sonë, pa cënuar kulturat dhe përparimin e kujtdo që jeton pranë nesh apo brenda territoreve tona. U theksua se: “Ne kemi nevojë për këtë shqiptarizëm – patriotizmi ynë historik, jo për mjetet e dhunës. Ne dëshirojmë të mirën e Atdheut tonë. Historikisht, jo vetëm për ne, por në të gjithë botën, kjo do të thotë që t’i besh nder edhe fqinjit. Për këtë pati propozime konkrete dhe u theksua se grupet e punës do të planifikojnë masa konkrete për të vazhduar rrugën e nisur në këtë drejtim, në të gjitha krahinat ku jetojnë shqiptarët. Për këtë problem Mbreti Leka I theksoi: “Respekti qe ne kemi ditur dhe dimë ta tregojmë për të tjerët, për pakicat kombëtare apo kulturore, është rruga më e sigurt për të kërkuar dhe garantuar respektimin e të drejtave të shqiptarëve kudo ku ata ndodhen.”

Diskutantët, përfaqësues edhe të rinisë dhe të shtresave të ndryshme sociale theksuan se aspirata shqiptare Euro-Atlantike është e ligjshme dhe jetike për fatin e së ardhmes. Ndryshe nga deri më sot, shqiptarët kanë më shumë përgjegjësi ndaj këtij procesi, i cili do të fshijë kufinjtë ndarës mes shqiptarëve duke i dhënë fund padrejtësive historike dhe të kaluarës së errët të Ballkanit.

Për këtë problem u shprehën disa propozime, për të cilat Mbreti Leka I theksoi: “Duke gjykuar mbi situatën politike aktuale, unë vlerësoj se pritshmëria popullore për një “politikë ndryshe” është dhe mbetet e madhe. Ne duhet, që të gjithë sëbashku duhet të punojmë që në Shqipëri të realizohet kërkesa ndërkombëtare dhe mbarëkombëtare që të ketë zgjedhje të lira dhe të ndershme, që kërkojnë si parakusht një infrastrukturë zgjedhore demokratike dhe ne mbështesim çdo përpjekje që afron këtë realitet. Ne nuk duhet të lejojmë kompromiset, manipulimet. Verdikti i popullit duhet të zbatohet. Ky është shansi historik për ta bërë Shqipërinë një shtet të fortë. Kështu shteti amë do të ndihmojë fuqimisht në zgjidhjen e Çështjes sonë Kombëtare.”

Në Mbledhje u konkludua, që së shpejti, LZHK, duke u mbështetur edhe në kërkesën e shumë subjekteve politike e juridike, personaliteteve publike e shkencore, përfaqësuesëve nga të gjitha krahinat e vendit, do të paraqesë publikisht platformën dhe programet konkrete politike, ekonomike dhe sociale, si një Bashkim Kombëtar, që do të rregjistrohet për të marrë pjesë në zgjedhjet e ardhshme, si Lëvizja për Zhvillim Kombëtar.

Zyra e Shtypit