http://www.gazetatema.net/ 12/08/2004

Dritan Kateshi thotë se Neritan Ceka e ka përdorur për krime politike dhe për vjedhjen e votave në qytetin e Elbasanit

Teksti i plotë i letrës së dërguar nga Dritan Kateshi

Unë, Dritan Kateshi denoncoj publikisht z.Neritan Ceka, si njërin nga bashkëpunëtorët e mi më të ngushtë dhe shtytësin kryesor që më futi në këtë rrugë ku ndodhem sot, që kam 5 vjet që rri mbrapa hekurave dhe këtë ia faturoj vetëm Neritan Cekës. Mbase nuk është momenti dhe koha, por sot ose nesër një ditë do të flisja, sepse është bërë poshtërsi me mua dhe shokët e mi. Megjithatë kur jam arrestuar është ushtruar presion dhe dhunë fizike që të mos flisja në lidhje me Neritanin, po asnjeri nuk ua vuri veshin fjalëve të familjes sime. Ku nuk shkoi nëna, në Prokurori të Elbasanit dhe në atë të Përgjithshme, por asnjeri nuk ia hapi derën. Kur isha në komisariatin e Elbasanit, më solli drejtorin e kriminalistikës së gjithë Shqipërisë, që ishte Xhavit Shala, dhe më tha mos fol për Cekën se do përfundosh si Çajupi. Çajupi është një shok që akuzohej me mua dhe asnjëherë nuk u mor vesh e vërteta si vdiq në spitalin e burgut. Xhavitit i thashë se Cekës do i thuash që, në qoftë se nuk më nxjerr që këtej, do t'i nxjerr në shesh të gjitha planet dhe ato që kemi bërë për ty. Pas disa ditësh mashtroi nënën time dhe i tha se do e nxjerrim shumë shpejt, dhe më vuri në gjumë. Por e ka përzënë disa herë nënën time dhe nuk ka dashur ta takojë, prandaj unë duke e parë këtë bukëshkalë, vendosa që të bëj publike çfarë di për të.
Po e nis nga Leka Zogu, se kjo më ka bërë më shumë përshtypje, se nëse do ishte bërë ajo që planifikuam, do ishte bërë një masakër e vërtetë. Vjen në shtëpinë e Çajupit bashkë me një shokun tonë që quhet Tan Ekmeçiu (Tan Gjembi). Në fillim menduam se erdhi për të rënkuar për vëllanë e Çajupit që ishte vrarë pak ditë më parë, por pas pak e kuptuam qëllimin e "rënkimit" të tij. Më mori mënjanë mua, Çajupin dhe 2 shokë të tjerë dhe na thotë që pritet këto 2 ditë të vijë Leka Zogu për miting, prandaj nuk duhet lënë në asnjë mënyrë të hyjë i gjallë në Elbasan. Prandaj organizohuni të jeni gati dhe të prisni sinjalin tim me anë të Tan Gjembit, se Tan Gjembi ishte garantuesi i të gjitha premtimeve që na bëri Ceka, se Ceka do na lajmëronte nga Tirana që u nis dhe ne do të zinim pritë në hyrje të Elbasanit. Pasi ta eleminonim, njerëzve që do mbeteshin gjallë duhej t'u linim përshtypjen sikur ishim militantë të Berishës, se kështu na kishte porositur Ceka, që Zogu është kundërshtar politik edhe i Berishës, dhe kështu ia faturojmë krahut të atyre. Në qoftë se bëhej kjo punë, na premtoi edhe një shumë lekësh. Po shyqyr që nuk deshi Zoti që të vinte, se neve na e kishte mbushur mendjen top, sikur Leka Zogu ishte e keqja e këtij kombi. Besoj se Leka Zogu e di shumë mirë që ka dashur të vijë në Elbasan në atë kohë, pse nuk ka ardhur nuk e di. Ju si gazetarë mund ta merrni vesh më mirë mosardhjen e Leka Zogut në Elbasan. Pasi mbaroi kjo "punë" dhe ai u sigurua që ne mund të bënim çdo gjë për atë, vinte të na takonte çdo ditë me Tan Gjembin dhe na thotë një ditë "do të kandidoj këtu në Elbasan, por pa ndihmën tuaj nuk bëhem dot deputet". Ne i thamë të mendohemi njëherë. Pasi bëmë pazaret me Tan Gjembin, edhe ky ra dakord, e garantuam që do ia jepnim votat, dhe kur erdhi dita e votimeve, çfarë nuk kemi bërë. Të zitë ata komisionerë, çfarë kanë hequr nga ne! U venim nëpër qendrat e votimit, i rrihnim, i kërcënonim dhe u thoshim se në qoftë se nuk fiton Ceka, jeni të vdekur. Dhe njerëzit që kishte caktuar Ceka, i mbushnin kutitë e votimit si në bahçen e tyre, dhe si përfundim fitoi Ceka i famshëm. Edhe injoranti më i madh i politikës e kupton si mund të fitonte Ceka kur kishte përballë 2 forcat kryesore PD dhe PS. Ceka nuk ishte Mandela e Afrikës që të çmendej populli për të, por një mashtrues ordiner që bridhte gjithë ditën në vend të parë të makinave tona.
Por këtë radhë nuk po zgjatem më, por po të ishte burrë le të përgënjeshtrojë ndonjë gjë nga këto që kam thënë unë, se pastaj do t'ia kthej unë me të njëjtën monedhë, se kam edhe disa gjëra skandaloze që po ia rezervoj Cekës për radhën tjetër. I them Cekës që nuk më rri gojëkyçur, sepse më more çdo gjë nga ato që kisha, përveç jetës.
Dritan Kateshi

Se harrova dhe diçka tjetër, prishja jonë me Cekën ka ardhur në vitin 1998, kur ky na dërgon haber që të përzinim militantët e PD, se do bënin miting. Ne e refuzuam, se nuk na kishte mbajtur premtimin që e bëmë deputet, se do na bënte gjithë të mirat, dhe që mbas asaj ku u bë Ministër i Brendshëm filloi persekutimet.

 Dritan Kateshi thotë se Neritan Ceka e ka përdorur për krime politike dhe për vjedhjen e votave në qytetin e Elbasanit

Tan Kateshi: Neritan Ceka më urdhëroi vrasjen e Leka Zogut

Dritan Kateshi, në një letër dërguar në redaksinë e gazetës "TemA", rrëfen se si është urdhëruar nga Neritan Ceka për të vrarë trashëgimtarin e fronit mbretëror Leka Zogu. Kateshi shpjegon skemën që kishte pregatitur Ceka për t'ia faturuar vrasjen e ish presidentit Sali Berisha. Përdorimi i tij nga ana e Neritan Cekës për të vjedhur votat në Elbasan, ku Neritan Ceka u bë deputet, represionet që ka përdorur Ceka për ta bërë atë të heshtë, dhe kërcënimet që i janë bërë në burg nëpërmjet Xhavit Shalës. Si është vrarë Çajup Kasa, njeriu i përdorur për vrasje në Elbasan.


Dritan Kateshi, në një letër për gazetën "TemA" akuzon kryetarin e Partisë Aleanca Demokratike, Neritan Ceka si urdhërues i krimeve të ndryshme të ndodhura në qytetin e Elbasanit, ku është përdorur Dritan Kateshi dhe njerëzit e tij. Në letrën dërguar gazetës "TemA", Kateshi thotë se me Neritan Cekën kanë përgatitur në vitin 1997 shumë krime me orientim politik dhe se në këtë rrugë e kishte futur pikërisht Neritan Ceka. Sipas Dritan Kateshit, Neritan Ceka ishte urdhëruesi i veprimtarisë së tyre në vitin 1997 në Elbasan. Ai thotë se Neritan Ceka me një ndërmjetës që ishte shok i tyre, u ka shkuar një ditë në 1997-ën, në shtëpi, dhe i ka urdhëruar që të vrisnin pretendentin për fronin mbretëror Leka Zogun. Sipas tij, Leka Zogu pregatitej që të bënte një miting në qytetin e Elbasanit, dhe ai me njerëzit e tij, me urdhër të Neritan Cekës, nuk do e linte atë të hynte në Elbasan. Urdhri ishte i prerë: - Atë ditë duhet të vritej trashgimtari për fronin mbretëror Leka Zogu që bënte fushatë për referendumin për monarkinë. Sipas dëshmisë së Dritan Kateshit, Neritan Ceka e kishte përgatitur të gjithë skemën dhe atë që dëshironte të arrinte. Ceka i kishte thënë Dritan Kateshit dhe njerëzve të tij se me vrasjen e Leka Zogut, do të hiqnin qafe edhe Sali Berishën, duke ia faturuar vrasjen këtij të fundit. Dritan Kateshi thotë se Neritan Ceka u kishte thënë se Leka Zogu në atë kohë ishte kundër Berishës dhe në ato rrëmuja do të ishte e thjeshtë t'ia faturonim vrasjen Sali Berishës.
Dritan Kateshi akuzon Neritan Cekën se ai e ka shtyrë në rrugën që ndodhet dhe tashmë vuan burgun nga krimet e urdhëruara prej tij. Dritan Kateshi e akuzon gjithashtu Neritan Cekën se ka përdorur të gjithë represionin shtetëror për ta kërcënuar në burg që të mos fliste për të. Ai thotë se e ka kërcënuar edhe duke i bërë presion me fatin e një shoku të tij, Çajup Kasës, i cili është vrarë në spitalin e burgut dhe asnjëherë nuk është zbardhur se si është vrarë. Dritan Kateshi, në letrën e dërguar gazetës "TemA" shpjegon edhe arsyen e prishjes me Neritan Cekën në vitin 1998. Ai thotë se Ceka i ka kërkuar që të mos linin simpatizantët e Partisë Demokratike të bënin një miting në këtë qytet, gjë që nuk është pranuar nga grupi i Kateshit. Pas kësaj, me emërimin e Neritan Cekës ministër i Rendit, Kateshi pretendon se kanë filluar persekucionet dhe represionet shtetërore me shantazhe e presione, duke përdorur madje edhe drejtorë policie.

Fluturak Gërmenji thotë se është vlerësuar informacioni dhe po investigohet kjo çështje

Oborri Mbretëror: Jemi në dijeni të atentatit

"Ne e kemi vlerësuar informacionin e botuar në gazetën 'TemA' dhe për këtë qëllim kemi aktivizuar disa persona për të investiguar çështjen. Nëse informacionet dhe dyshimet tona do të na rezultojnë të vërteta, atëherë ne do të kërkojmë nga Prokuroria e Përgjithshme të hetojë dhe të zbardhë çështjen," thotë zëdhënësi i Oborrit Mbretëror z.Fluturak Gërmenji.


Mentor Beqa

Oborri Mbretëror ka filluar hetimet për informacionet e botuara në gazetën 'TemA' për një atentat të dështuar ndaj trashëgimtarit të Fronit Mbretëror Leka Zogu I.
Oborri Mbretëror tha dje se ka vënë në lëvizje disa persona për të investiguar mbi informacionin e botuar në gazetën 'TemA', ku Dritan Kateshi dëshmon nëpërmjet një letre se Neritan Ceka e ka urdhëruar në vitin 1997, të vriste trashëgimtarin e Fronit Mbretëror Leka I. Zëdhënësi i Oborrit Mbretëror z.Fluturak Gërmenji tha për gazetën se është vlerësuar informacioni dhe janë aktivizuar disa persona për të investiguar për këtë çështje. Ai thotë se nëse dyshimet e tyre rezultojnë të sakta, atëherë do t'i kërkohet Prokurorisë së Përgjithshme të hetojë dhe të zbardhë këtë çështje. "Ne e kemi vlerësuar informacionin e botuar në gazetën 'TemA' dhe për këtë qëllim kemi aktivizuar disa persona për të investiguar çështjen. Nëse informacionet do të na rezultojnë të sakta, atëherë ne do të kërkojmë nga Prokuroria e Përgjithshme të hetojë dhe të zbardhë çështjen," thotë zëdhënësi i Oborrit Mbretëror Fluturak Gërmenji.
Reagimet kanë ardhur pas botimit në gazetën 'TemA' të një letre që Dritan Kateshi ka dërguar nga burgu. Ai është arrestuar në vitin 1999 dhe është i dënuar me burgim të përjetshëm. Në letrën e dërguar në gazetën 'TemA', Dritan Kateshi thotë se Neritan Ceka e kishte urdhëruar të vriste trashëgimtarin e Fronit Mbretëror Leka Zogu.
"Neritan Ceka më mori mënjanë mua, Çajupin dhe 2 shokë të tjerë dhe na thotë që pritet këto 2 ditë të vijë Leka Zogu për miting, prandaj nuk duhet lënë në asnjë mënyrë të hyjë i gjallë në Elbasan, prandaj organizohuni të jeni gati dhe të prisni sinjalin tim me anë të Tan Gjembit, se Tan Gjembi ishte garantuesi i të gjitha premtimeve që na bëri Ceka, se Ceka do na lajmëronte nga Tirana që u nis dhe ne do të zinim pritë në hyrje të Elbasanit," thuhet në letrën e shkruar nga Dritan Kateshi.
Ai thotë se Ceka kishte pregatitur skemën për t'ia faturuar vrasjen ish presidentit Sali Berisha. "Pasi ta eleminonim njerëzve që do mbeteshin gjallë duhej t'u linim përshtypjen sikur ishim militantë të Berishës, se kështu na kishte porositur Ceka, që Zogu është kundërshtar politik edhe i Berishës, dhe kështu ua faturojmë krahut të atyre," shkruan Kateshi në letrën e mbërritur në redaksinë e 'TemA'. Në letër vijohet se Neritan Ceka, pasi të vritej trashëgimtari i Fronit Mbretëror Leka Zogu, do t'i shpërblente ata me një shumë të caktuar parash.
"Në qoftë se bëhej kjo punë, na premtoi edhe një shumë lekësh. Po shyqyr që nuk deshi Zoti që të vinte se neve na e kishte mbushur mendjen top sikur Leka Zogu ishte e keqja e këtij kombi. Besoj se Leka Zogu e di shumë mirë që ka dashur të vijë në Elbasan në atë kohë. Pse nuk ka ardhur nuk e di, ju si gazetarë mund ta merrni vesh më mirë mosardhjen e Leka Zogut në Elbasan," vijohet në letrën e Dritan Kateshit.
Ai thotë se Ceka, pasi u sigurua që kjo punë do të bëhej, i takonte çdo ditë dhe u kishte kërkuar që të vidhnin votat në Elbasan me qëllim që ai të bëhej deputet.
"Pasi mbaroi kjo "punë" dhe ai u sigurua që ne mund të bënim çdo gjë për atë, vinte të na takonte çdo ditë me Tan Gjembin dhe na thotë një ditë "do të kandidojë këtu në Elbasan, por pa ndihmën tuaj nuk bëhem dot deputet". Ne i thamë të mendohemi njëherë. Pasi bëmë pazaret me Tan Gjembin, edhe ky ra dakord, e garantuam që do ia jepnim votat, dhe kur erdhi dita e votimeve, çfarë nuk kemi bërë, të zinjtë ata komisionerë çfarë kanë hequr prej nesh. U venim nëpër qendrat e votimit, i rrihnim, i kërcënonim dhe u thoshim, në qoftë se nuk fiton Ceka, jeni të vdekur. Dhe njerëzit që kishte caktuar Ceka i mbushnin kutitë e votimit si në bahçen e tyre, dhe si përfundim fitoi Ceka i famshëm," shkruan në letër Drinat Kateshi.


Një shoqërues i trashëgimtarit të Fronit Mbretëror Leka I rrëfen se si kanë shmangur atentatin

Përse dështoi atentati ndaj Leka Zogut

Mentor Beqa

Shoqëruesi i trashëgimtarit të Fronit Mbretëror Leka Zogu thotë se këtij të fundit i ishte pregatitur një atentat. Atyre fillimisht nga disa njerëz u është kërkuar që të ndalonin në Cërrik për një vizitë. Pas verifikimit të informacionit ka rezultuar se ishin ngritur dy prita për Leka Zogun

Shoqëruesit e trashëgimtarit të Fronit Mbretëror Leka I, janë vënë në dijeni se në Cërrik u ishin ngritur dy prita dhe ata kanë devijuar rrugë për të shmangur atentatin e mundshëm ndaj trashëgimtarit të Fronit Mbretëror. Informacioni është bërë i ditur nga një shoqërues i tij.
Ai thotë se në qershor të 1997-ës kanë pasur informacione se ishte organizuar një atentat ndaj Leka Zogut dhe për këtë janë detyruar që të mos zhvillonin takim në Cërrik në qeshor të 1997, përpara se të zhvilloheshin zgjedhjet.
Dritan Kateshi në letrën dërguar në gazetën 'TemA', thotë se ishte organizuar atentati dhe Neritan Ceka kishte bërë alibinë gati, por ai ka ngelur në tentativë, pasi Leka Zogu nuk kishte shkuar në miting. "Po shyqyr që nuk deshi Zoti që të vinte, se neve na e kishte mbushur mendjen top sikur Leka Zogu ishte e keqja e këtij kombi. Besoj se Leka Zogu e di shumë mirë që ka dashur të vijë në Elbasan në atë kohë. Pse nuk ka ardhur, nuk e di, ju si gazetarë mund ta merrni vesh më mirë mosardhjen e Leka Zogut në Elbasan," shkruan në letër Dritan Kateshi.
Një nga shoqëruesit e trashëgimtarit të Fronit Mbretëror Leka Zogut tregon për gazetën të vërtetën e kësaj dite. "Trashëgimtari i Fronit Mbretëror "Leka I" ka zhvilluar një sërë vizitash në jug të vendit në qershor të 1997, përpara zgjedhjeve elektorale. Një ndër këto vizita ka qenë edhe një tur që ka përfshirë shumicën e qyteteve jugore," thotë një ndër shoqëruesit e mbretit në këtë tur vizitash, emrin e të cilit për momentin nuk mund ta bëjmë të ditur për shkaqe sigurie.
"Trashëgimtari i Fronit Mbretëror Leka I është nisur nga Tirana dhe ka vizituar Fierin, Gjirokastrën, Delvinën, Tepelenën dhe në kthim e sipër është ndaluar në Pogradec. Pas një vizite në qytetin e Pogradecit ai do të kthehej në Tiranë dhe do të bënte një vizitë në Cërrik dhe në Elbasan," thotë për gazetën një prej stafit që shoqëronte trashëgimtarin e Fronit Mbretëror.
"Gjatë kthimit Naltmadhnia e Tij Leka I, pa hyrë në Cërrik, ka dërguar disa njerëz për të pyetur se si ishte situata. Përgjigjja ka qenë pozitive, madje e shoqëruar me një ftesë nga Cërriku që Mbreti të ndalonte në qytet.
Vizita po zhvillohej disa ditë pas masakrës që ishte bërë në Cërrik me ushtarët e Gardës së Republikës, ku persona të armatosur kishin masakruar ushtarët," vazhdon të tregojë për gazetën shoqëruesi.
"Pasi kemi lëvizur edhe pak, kërkuam të marrim informacione nga disa njerëz të tjerë të besueshëm se si ishte situata atje. Ata kanë informuar se ishin ngritur dy prita dhe trashëgimtari i fronit mbretëror mund të ishte i rrezikuar për jetën. Atëherë vetë mbreti Leka Zogu dhe stafi që e shoqëronim vendosëm të mos shkonin në Cërrik dhe i kemi rënë rreth e rrotull dhe nuk ndaluam në qytet," thotë shoqëruesi i trashëgimtarit të Fronit Mbretëror Leka Zogu. Kjo është edhe enigma e shpëtimit të Leka Zogut nga atentati që i ishte kurdisur në Elbasan dhe në Cërrik.


Neritan Ceka tha se edhe Prodi ka dalë në foto me persona të armatosur megjithatë nuk e ka akuzuar njeri

Ceka: Kjo është nxitur pas përplasjes me Lipponen

"Kjo është një fiasko e drejtuar nga selia blu për të diskredituar figurën time në momentin e përplasjes sime me ambasadorin e OSBE-së Lipponen. Dihet edhe lëvizja e tyre për të më lëvizur nga pozicioni im si kryetar i Komisionit Parlamentar të Rendit dhe SHISH-it," tha dje kryetari i Partisë Aleanca Demokratike Neritan Ceka.

Kryetari i Partisë Aleanca Demokratike tha se akuza e Dritan Kateshit për atentat ndaj Leka Zogut është një fisko e gazetës 'TemA' dhe Partisë Demokratike, pas përplasjes që ai ka pasur me ambasadorin e OSBE-së në Shqipëri Osmo Lipponen. Neritan Ceka në një prononcim për median, thotë se kjo është e nxitur nga Partia Demokratike për të diskredituar figurën e tij. "Kjo është një fiasko e drejtuar nga selia blu për të diskredituar figurën time në momentin e përplasjes sime me ambasadorin e OSBE-së Lipponen. Dihet edhe lëvizja e tyre për të më lëvizur nga pozicioni im si kryetar i Komisionit Parlamentar të Rendit dhe SHISH-it," tha dje kryetari i Partisë Aleanca Demokratike Neritan Ceka.
Në një koment mbi gazetën 'TemA' Neritan Ceka thotë se ajo është një gazetë e kallajxhinjve, e barinjve dhe e burgaxhinjve, ndaj dhe nuk e lexon atë. "Unë në fakt atë gazetë nuk e lexoj pasi është gazeta e kallajxhinjve, e barinjve dhe del që është edhe e burgaxhinjve," tha Neritan Ceka në një prononcim për median.
Neritan Ceka thotë se ai nuk kishte përse t'i bënte atentat Leka Zogut, pasi ky i fundit nuk i ka ndërhyrë ndonjëherë në interesat e tij dhe nuk ka pasur përplasje me të. "Leka Zogu nuk ka qenë asnjëherë një person që ka ndërhyrë në interesat e mia apo me të cilin kam pasur konflikte," tha Ceka.
Neritan Ceka shtoi se ka lidhje të vjetër familjare me familjen mbretërore dhe nuk mund të shkilte aty ku kishte ngrënë bukë. "Kallajxhinjtë e gazetës 'TemA' nuk e dinë se ne kemi një lidhje të vjetër familjare me mbretin Zog. Gjyshi im ka qenë mik me Ahmet Zogun dhe ka qëndruar me muaj të tërë në Burgajet, për t'i mësuar shqipen, kur Zogu ishte vetëm 5 vjeç. Natyrisht që midis familjeve që kanë miqësi, nuk mund të ketë kazuse dhe armiqësira. Aty ku kemi ngrënë bukë, nuk shkelim dot," tha Neritan Ceka në prononcimin për mediat.
I pyetur se si është gjendur në foto mes shumë personave të armatosur të akuzuar për krime të ndryshme në Cërrik dhe konkretisht për masakrën e gardistëve, Ceka tha se nuk i njihte as ata persona, dhe as Dritan Kateshin. Ai tha se edhe Prodi është fotografuar mes njerëzve me armë, por nuk e ka akuzuar kush. "Unë ju them se nuk e kam takuar asnjëherë atë njeri. Në 1997 gjithë Shqipëria ishte me armë. Edhe Prodi ka dalë me persona që ishin me armë dhe askush nuk ka guxuar t'i thotë Prodit që ka pasë implikim me njerëz, të cilët kanë dalë pranë tij në fotografi," tha kryetari i Partisë Aleanca Demokratike Neritan Ceka.
Ai gjithashtu kërkoi që akuza që bën Dritan Kateshi në letrën e botuar në gazetën 'TemA' është shumë e rëndë dhe i kërkon Prokurorisë të hetojë mbi këtë çështje.
"Mendoj se nuk është serioze që një gazetë të botojë letra të personave të burgosur. Natyrisht që akuza, po të ishte e vërtetë, do të ishte shumë e rëndë. Unë u them që rruga është e hapur ta çojnë në Prokurori dhe të fillojë ndjekja penale," përfundoi Neritan Ceka.

--------------------------------------------------------------------------------

http://pages.albaniaonline.net/rd/

Neritan Ceka, fytyra e shtetit terrorist që u instalua më 1997

Nëpërmjet një letre të botuar në të përditshmen "TemA", Dritan Kateshi e akuzonte Neritan Cekën se kishte dhënë urdhër për vrasjen e Leka Zogut, duke i zënë pritë në hyrje të Elbasanit

Neritan Ceka u mundua dje të përgënjeshtrojë akuzën e bërë nga Tan Kateshi ndaj tij, për organizimin e vrasjes së pretendentit për fronin mbretëror, Leka Zogut. Ceka, me një zë të dridhur dhe i zbehur në fytyrë, deklaroi në TV "Klan" se nuk e njihte fare Tan Kateshin dhe nuk kishte dhënë asnjë urdhër për vrasjen e Leka Zogut.