PD-ja tenton pushtetin duke pranuar gabimet e së kaluarës. Sali Berisha ka mbledhur dje, në dy takime festive, anëtarët e vjetër e të rinj demokratë dhe bazën e partisë, për të rrëfyer rrugën drejt fitores së zgjedhjeve.

Kjo strategji duket se është konceptuar nga lideri i PD-së si rrugë që kalon nga pranimi dhe largimi prej fajeve të së kaluarës. Pas një retrospektive fitoresh, që nuk mund të mungonte në një përvjetor, Berisha ka njohur gabimet e vitit 1997. Ai e ka analizuar rrëzimin e shtetit në këtë vit, për shkak të tregut informal dhe skemave piramidale mashtruese. “Ish-komunistët shqiptarë e përdorën këtë duke ushtruar dhunë mbi institucionet shtetërore”, ka thënë ai. Një ditë para datës zyrtare, demokratët kanë festuar, por në fjalimet dhe prononcimet e politikanëve të djathtë në mendje kanë qenë përherë zgjedhjet dhe pritja e të gjithëve për t’i fituar ato. Duket se gjysma e jetës së deritanishme, kaluar në opozitë, ka qenë një provë e fortë për zyrtarët dhe anëtarësinë e PD-së, ndaj edhe fjalimi i Berishës u ka takuar fillimisht atyre që ai i quan “qëndrestarë”. Por, kësaj radhe, lideri demokrat nuk ka ngurruar të ftojë gjithë ish-themeluesit e PD-së, 14 vjet më parë, të afrohen sërish në partinë që krijuan si për të ndrequr një nga gabimet e akumuluara në vite. “Të gjithë ata që e themeluan këtë parti, kanë emrin dhe vendin që u takon në PD”, është shprehur kreu demokrat, Sali Berisha. Kjo thirrje që ai e artikulon shpesh, me shpalljen e strategjisë së dyerve të hapura dhe partneritetit me shoqërinë civile, ka pasur sukses në koktein e pasdites. Në këtë tubim, veç atyre që kanë qenë për gati shtatë vjet përbërës të gjithmonshëm të përvjetorëve “blu”, kanë qenë të pranishëm edhe mjaft personalitete të botës akademike, intelektualë, ish-themelues dhe ish-anëtarë të PD-së. Një numër pedagogësh dhe dekanësh të fakulteteve të Tiranës, Ylli Pango, Kudret Çela dhe të tjerë, intelektualë, ish-anëtarë të PD-së, Arben Imami, Preç Zogaj, aleatët republikanë dhe të partive të tjera të djathta, kanë qenë të gjithë të pranishëm në festë.

Surprizat
Profesori Gramoz Pashko, një nga themeluesit e programit të parë të Partisë Demokratike, ka qenë një nga “surprizat” e festës, edhe pse afrimi i tij u duk që në tryezën e organizuar me rastin e 8 dhjetorit. Por, nuk kanë munguar aleatët “në projekt” të PD-së, Ligoraq Karamelo i të Drejtave të Njeriut, si dhe Dashamir Shehi i Lëvizjes për Zhvillim Kombëtar kanë qenë të ftuarit specialë. Por, PDR-ja nuk e ka konsideruar ftesën të rëndësishme për t’u përfaqësuar në nivel kryetari. Ajo ka sjellë urimet për partinë e “origjinës” me Gramoz Meçani, ndërsa ka qenë i pranishëm edhe pjesa kontestuese e kreut të PDR-së, përfaqësuar nga Kreshnik Çollaku. Nuk kanë munguar përfaqësues të trupit diplomatik të akredituar në Tiranë, si dhe institucioneve të tjera ndërkombëtare.

PD, koncert festiv për mbështetësit

Festa e paradites iu kushtua gati tërësisht anëtarësisë së demokratëve, të cilët në përvjetorët e mëparshëm kanë qenë paksa të privuar nga pjesëmarrja në koktejet zyrtare. Por, nuk ka qenë vetëm kjo arsyeja që shtyu PD-në dhe kreun e saj, Sali Berisha, të organizonin koncertin e larmishëm. Kjo strategji është menduar si shenjë e vitalizimit të strukturave të PD-së, e masivizimit të anëtarësisë së saj dhe shprehje e shpresës së hapur për fitoren e zgjedhjeve të ardhshme. Koncerti nën logon “Ditët e shpresës”, duket se është i pari i një serie aktivitetesh që do të mbajnë pezull jetën e përditshme të partisë për të mos e lënë në heshtje dhe pasivitet atë. Kjo ide është artikuluar nga Berisha, nën sloganin se rruga deri më 22 mars do të krijojë dhe përvijojë edhe strategjinë dhe ardhmërinë e partisë, për zgjedhjet parlamentare të vitit të ardhshëm. Këtë vit ka pasur shumë më pak fjalime, që i janë rezervuar vetëm kryetarit dhe shumë muzikë nga këngëtarët më të njohur të skenës shqiptare. Të ftuarit nga Kosova i kanë dhënë një dimension të ri festës, ndërkohë që grupe baleti dhe fëmijët me flamuj blu, kanë qenë të pashmangshëm në gëzimin e demokratëve. Pas kësaj, fjalimi i kreut demokrat, Berisha, është përcjellë nën të njëjtën atmosferë të krijuar nga muzika dhe baleti. Berisha ka analizuar zhvillimet demokratike dhe arritjet e PD-së në vitet e ekzistencës së saj, lidhur ngushtësisht me pluralizmin shqiptar.

Festa, fatura 32 milionë lekë

Demokratët kanë arritur të mbledhin shumën e domosdoshme për “Rrugën e shpresës” nga biznesmenë të lidhur ose të ndikuar nga politika e djathtë. Dhe fatura ka qenë 32 milionë, me pagesat e këngëtarëve dhe balerinëve, por edhe me logon e re që ka freskuar dekorin e PD-së. Kështu, festimet e djeshme, kanë pasur këtë shifër të përafërt, e cila nuk deklarohet zyrtarisht.

Deklarata
Do njohim rezultatin e zgjedhjeve

Kreu demokrat tha dje, se PD-ja do të njohë çdo rezultat nga zgjedhjet e ardhshme parlamentare me kushtin e vetëm që ato të jenë të lira dhe demokratike. Kreu i PD-së e bëri këtë deklaratë nga fundi i fjalimit të tij, kur po analizonte potencialet e demokratëve për të mirëqeverisur dhe dhunën e përdorur nga socialistët në pushtet gjatë gjithë zgjedhjeve të zhvilluara në këto shtatë vjet të PD-së në opozitë. “Në rast se Nano vendos të qëndrojë në pushtet duke dhunuar votën e lirë, ai duhet të bëjë llogaritë jo vetëm me ne, por edhe me organizmat ndërkombëtare të botës”, ka thënë Berisha. Ky pohim i kreut demokrat krijon premisat për një marrëveshje parazgjedhore mes palëve, për moskontestimin e zgjedhjeve.

Akuzat

Presidenti Moisiu dhe kryeministri Nano u krahasuan dje nga Berisha si binomi që mbajti shqiptarët nën errësirën e diktaturës, larg Evropës, Haxhi Qamili-Ramiz Alia. Berisha komentoi kështu rolin e presidentit dhe të kryeministrit aktual në drejtim të demokratizimit dhe të procesit të integrimit. Sipas kreut të PD-së, ajo që aspirohej në vitet 90’, për të përfshirë Shqipërinë në Evropë është një aspiratë aktuale, edhe pas 14 vjetësh.

aleanca

Biznesmenë dhe përfaqësues të shoqërisë civile duket se kanë qenë të ftuarit më të shumtë në festën e sivjetshme të PD-së, reflektim i politikës së partneritetit me ta. Duket se PD-ja ka nisur ftesa për të gjithë njerëzit e rëndësishëm të Tiranës dhe duket se mjaft prej tyre i janë përgjigjur ftesës, përveç atyre që kuptohet kanë qenë prej kohësh nën shenjestrën e konferencave të përditshme të shtypit në selinë blu.

PDK-ja e vetme në zgjedhje

PDK-ja do të dalë e vetme në zgjedhjet e ardhshme, por shprehet se do të ketë aleanca parazgjedhore me Partinë Demokratike. Nikollë Lesi ka marrë dje mandatin e dytë si kryetar i demokristianëve shqiptarë, në Kongresin e Pestë të partisë, duke u shfaqur si politikan i së djathtës. Ai ka theksuar se PDK-ja duhet të përvijojë prej kësaj dite, strategjinë për të shkuar në zgjedhjet parlamentare me struktura dhe njerëzit e duhur për të krijuar edhe grup parlamentar. Kështu, deputeti Lesi në fjalën e tij në kongres ka sulmuar socialistët dhe kryeministrin Nano për korrupsion dhe aktivitete të paligjshme. Ai tha se ata po e çojnë Shqipërinë në një udhë pa krye, ndërkohë që përmendi se Nano, tashmë, meriton të shkojë përsëri në burg, kësaj radhe jo për vjedhjen e ndihmave ushqimore të shqiptarëve, por për akte më të rënda kriminale. Lesi mundi në garën për kryetar, rivalin e tij, Gurakuqi, me diferencë votash.

PS-ja po përdor forcën në Dushk

Krerët e LSI-së denoncojnë PS-në për presionet që po përdor në procesin zgjedhor që do të zhvillohet sot në Dushk për zgjedhjen e këshilltarëve. Anëtari i kryesisë së LSI-së dhe deputet i kësaj partie, Ndre Legisi, ka theksuar dje se LSI-ja e konsideron këtë presion të pushtetit cënim të procesit zgjedhor demokratik në Shqipëri. “Denoncojmë publikisht përpjekjet e pushtetit për të përdorur të gjitha mjetet në favor të vet. Nuk është çështja tek fitorja në këtë komunë, por çështja është tek koncepti që ata kanë për zgjedhjet e lira dhe për demokracinë në përgjithësi”, tha Legisi. Ndërkohë, ai ka përgënjeshtruar sërish akuzat e hedhura nga zyrtarë të PS-së se LSI-ja po bashkëpunon me PD-në në Dushk. “Është një politikë shumë abuzive edhe e vet PD-së dhe liderit të saj, po të kemi parasysh edhe ftesën që i ka bërë Metës për herë të parë për të qenë në festën e PD-së. Askush nga ju nuk ka harruar se në festën e vjetshme të PD-së, i ftuar ishte kryetari i PS-së me bashkëshorten e disa të tjerë dhe nuk ishte Ilir Meta”, tha Legisi.