14062004leka

Faqe 3 - Aktualitet

kurora mbretërore

mashtrimi

AFRIKA E JUGUT/ Policia e Pretorias arreston 38-vjeçaren. Përfitoi mijëra dollarë duke u hequr si princeshë

Mashtrim me kurorën e Ahmet Zogut

Lechane Bezuidenhout u vetëshpall "Princeshë e Shqipërisë"

Një 38-vjeçare është arrestuar, pak kohë më parë, në qytetin e Pretorias, në Afrikën e Jugut, sepse ka përvetësuar titullin, "prin-ceshë trashë-gimtare e fronit mbretëror të Ahmet Zogut".

Lechane Bezuidenhout, e cila pretendonte se ishte "Princesha e Shqipërisë", akuzohet për përvetësim të titullit me qëllim mashtrimin. Gjykata e Pretorias, vendosi që ajo të lihej e lirë me kusht të paguante një shumë të majme garancie në monedha vendase. Gjyqi ndaj saj do të zhvillohet më 8 korrik të këtij viti. Lajmi bëhet i ditur nga gazeta "Independent Online" e Afrikës së Jugut, ndërsa konfirmohet edhe nga Fluturak Gërmenji, ministër i oborrit mbretëror të pretendentit për fron Leka Zogu. Gruaja mashtruese u arrestua më 28 prill të këtij viti, pasi ndaj saj, kishte filluar një procedim penal për mashtrim.

Mashtrimi
"Kam lindur në Shqipëri, në familjen mbretërore, por prindrit e mi atje vdiqën, ndërsa unë u transferova në Afrikën e Jugut, ku edhe u rrita", kështu u thoshte "princesha", personave që kërkonte të mashtronte. Kujtojmë këtu që familja mbretërore shqiptare me Mbretëreshën Xheraldinë ka jetuar në Afrikën e Jugut që vitet ‘80. Në pjesën më të madhe të rasteve, viktimat e saj ishin njerëz të pasur apo krerë të qeverive lokale të Afrikës së Jugut. Oficeri i policisë së Pretorias, Cecil Purcocks që është marrë me hetimin e çështjes, është shprehur për gazetën "Independent Online", se i kishte pëlqyer shumë fakti se kishte gjetur në një gazetë lokale, një arkiv të pasur me informacione rreth Lechane Bezuidenhout. Inspektori Purcocks, konfirmoi se Bezuidenhout, e vetëquajtur "Princesha e Shqipërisë", akuzohet për mashtrim me shuma deri në 100 mijë Rand (monedha e Afrikës së Jugut) ose rreth 160 mijë dollarë. Sipas policisë ajo është e njëjta grua që duke u hequr si trashgimtare e fronit mbretëror të Shqipërisë, në qytetin e KwaZulu-Natal, mashtroi disa investitorë dhe politikanë. Madje sipas gazetës, ajo gati ia arriti të mashtronte dy policë, të cilëve u kërkoi të linin detyrën, për t´u bërë truproja të saj. Madje, ajo u ka shkruar letra disa familjeve të njohura mbretërore, deri dhe asaj Britanike.

Gjykimi
Lechane Bezuidenhout duhet të paraqitet në gjyq, më 8 korrik, ku do të përballet me akuzat për mashtrim dhe korrupsion. Ajo akuzohet nga një grup biznesmenësh, të cilëve u ka marrë paratë, duke u premtuar favore të mëdha, pasi të rimerrte titullin e saj mbretëror në Shqipëri. Por gruaja nuk ka qenë e vetme në mashtrimet e saj, ajo është ndihmuar nga bashkëshorti, i mbiquajtur "Princi Fransua", i cili pretendonte, se edhe vetë kishte prejardhje mbretërore. Bamirësve të saj Bezuidenhout, u thoshte se kishte lindur në Shqipëri, por pas vdekjes së prindërve të saj, ishte rritur në Afrikën e Jugut. Për ata që e takuan "Madhërinë e saj Mbretërore" në KwaZulu-Natal, kjo histori, tingëllon familjare. Në KwaZulu-Natal, Bezuidenhout njihej me emrin Princesha Charné. Ajo i premtoi drejtorit të përgjithshëm të qeverisë lokale të këtij qyteti, Otty Nxumalo, që qendra e saj e biznesit "Këshilli për Zhvillimin Afrikan", do të investonte në këtë qytet 800 milion Rand. Ndërkohë, ajo kishte një borxh prej 13 mijë Rand, të barabartë me rreth 14 mijë dollarë, para të cilat i pagoi për të rregulluar dokumentat e televizionit të saj "African Television Network" (Rrjeti Televiziv Afrikan). Ajo dhe bashkëshorti i saj jetonin në mënyrë madhështore në një shtëpi të ndërtuar për mbretër. Ajo kishte paguar shuma të mëdha në disa operacione plastike. Makina e tyre ishte luksoze. Ndërsa ata kishin mijëra dollarë borxhe në disa qytete të Afrikës së Jugut.

"Princesha e Shqipërisë", për Oborrin Mbretëror nuk është gjë tjetër veçse një mashtrim. Fluturak Gërmenji, Ministri i Oborrit Mbretëror i kontaktuar nga gazeta "Panorama" se thelbi i mashtrimit sipas tij është përfitimi. "Popullariteti i Oborrit Mbretëror, ideja për t´u bërë pjesë dhe për t´u futur në rangun e tij, gjithashtu edhe mendimi për të fituar para, qëndrojnë në thelbin e këtij mashtrimi", thotë Gërmenji. Në një intervistë për gazetën, ai tregon për korrespondencat e miqve të Familjes Mbretërore që nga Afrika e Jugut për këtë çështje, si e ka përjetuar Familja dhe pse Leka Zogu kërkoi në gjykatë njohjen e trashëgimisë së të atit.

Një 38-vjeçare me emrin Lechane Bezuidenhout, në Pretoria të Afrikës së Jugut, e ka quajtur veten "Princesha e Shqipërisë", duke pretenduar se është trashëgimtare e pasurisë së Mbretit Zog. Si e ka përjetuar Familja Mbretërore këtë ngjarje?
Familja Mbretërore dhe pjesëtarët e tjerë të Oborrit Mbretëror, pasi kanë mësuar për këtë ngjarje, e kanë pritur fare qetë dhe pa më të voglin shqetësim. Sigurisht ne kemi pasur korrespondenca elektronike nga miqtë e familjes, të cilët kanë lexuar shtypin në Afrikën e Jugut. Shtypi i atjeshëm është në dy gjuhë: njëra në gjuhë afrikane dhe tjetra në gjuhë angleze, dhe nga shtypi i shkruar në këtë të fundit, miqtë kanë lexuar për këtë histori që sigurisht është një mashtrim. Familja Mbretërore ka arritur në Afrikë në vitet ´80, dhe që në atë kohë ka qenë e rrethuar me miq me të cilët mbajnë korrespondenca të vazhdueshme që lidhen edhe me zhvillime ekonomike apo sociale në vendin tonë.

Cili është reagimi i Oborrit Mbretëror në lidhje me këtë çështje?
Siç ju thashë më lart, kjo ngjarje nuk ka qenë aspak shqetësuese. Pretendimet nga ana e personit në fjalë nuk janë gjë tjetër veçse mashtrime për përfitime. Popullariteti i Oborrit Mbretëror, ideja për t´u bërë pjesë dhe për t´u futur në rangun e tij, gjithashtu edhe mendimi për të fituar para, qëndrojnë në thelbin e këtij mashtrimi.

Gjykata e Faktit në Tiranë, i njohu Leka Zogut aktin e trashëgimisë. Kohë më parë, edhe nipi i Zogut, Skëndër Zogu, pretendonte të kishte pjesë në këtë trashëgimi. Ka ardhur ndonjë pretendim nga ana e tij në Oborrin Mbretëror pas vendimit të gjykatës?
Skënder Zogu natyrisht është shumë i afërt me Familjen Mbretërore. Ai është djali i xhaxhait të trashëgimtarit Leka Zogu, por që sigurisht nuk ka pjesë në trashëgimi. Ai ka një trung tjetër familjar në të cilin ka edhe të drejtë trashëgimie. Çështja që ngriti Leka Zogu në gjykatë, ishte më shumë një element juridik, i cili i shërbente procedurave për pronat, pasi në parlament ende nuk është rënë dakort për ligjin e kthimit të pronave.

Ishin familjarët e saj, anëtarë të një fisi në Afrikën e Jugut që e zbuluan mashtruesen dhe i hoqën kurorën "Madhërisë së saj". "Është një histori pakuptim. Ne na vjen keq për të", thanë të afërmit për shtypin vendas, kur mësuan se çfarë, kishte ndodhur. Ata thanë se prejardhja e vërtetë e Lechane Bezuidenhout, nuk ishte aspak mbretërore. Ajo ishte fëmija e një hollandezi dhe e një vendasje.

Ahmet Zogu, lindi në vitin 1895 në Burgajet të Matit. Më 1 shtator të vitit 1928, Zogu u shpall Mbret i Shqipërisë dhe qëndroi në këtë fron për rreth 10 vjet. Më 6 prill të vitit 1939, largohet nga Shqipëria, duke marrë me vete edhe trashëgimtarin 7-ditësh. Ai quhej Leka Zogu i I-rë dhe froni i kaloi atij pas vdekjes së të atit më 9 prill të vitit 1962 në Suresnec të Francës. Leka Zogu jetoi jashtë vendit të tij për shumë vite. Djali i tij, Leka i II-të, lindi në Johanesburg të Afrikës së Jugut në vitin 1982. Ai është trashëgimtari i vetëm i Familjes Mbretërore.

Gjykata e Faktit Tiranë katër ditë më parë, i dha të drejtën për njohjen e pronësisë Leka Zogut të I-rë si trashëgimtar të vetëm të pronave të mbretit. Vendimi i dhënë nga Gjykata nuk e përcakton specifikisht pronësinë të cilën i takon Leka Zogut të I-rë me ligj, por vetëm njohjen e tij si trashëgimtar të pronave të Ahmet Zogut dhe të mbretëreshës Geraldinë. Kështu, ai tashmë është trashëgimtar i dhjetra pronave në rrethe të ndryshme të Shqipërisë që i përkisnin babait të tij si dhe të pronave që i përkisnin mbretëreshës Geraldinë. Pronat e shumta të ish-mbretit Zog, u shpronësuan nga regjimi komunist në vitin 1944, duke u kthyer në pronësi të shtetit.

© 2003 Gazeta Panorama