Faqja 5 - POLITIKE Gusht 14, 2004 http://www.balkanweb.com/gazeta/gazeta.htm




LIGJI NUK ESHTE MIRATUAR ME KONSENSUS

Mediu-Cako, referendum për pronat
Legalistët: Ne në pushtet, do të ndryshojmë ligjin

Denion Ndrenika

Republikanët, ballistët dhe ish-pronarët do të ndërmarrin të nisma ligjore
dhe demokratike për të mundësuar moszbatimin e ligjit për pronën. Për të
parët, këtu përfshihet referendumi, por Kushtetuta nuk e lejon. Sakaq,
legalistët thonë se kur të marrin pushtetin do ta ndryshojnë ligjin.

LAJMI

Fatmir Mediu, kryetar i PR-së dhe Alferd Cako, deputet i Ballit Kombëtar
thonë se do të ndërmarrin të gjitha nismat me qëllim parandalimin e zbatimit
të ligjit. Kryetari republikan Mediu ka qenë i qartë kur është shprehur për
"Gazetën", fillimisht mbi mospjesëmarrjen në Komitetin Shtetëror të Kthimit
dhe Kompensimit të Pronave. "PR nuk do të marrë pjesë në këtë komitet, jo
vetëm për shkak të tij, por edhe sepse në tërësi ligji është antikushtetues
dhe kundër konventave europiane të të drejtave të njeriut. Aq më tepër kjo,
që ai komitet ka vetëm një qëllim; që të zbatojë interesat korruptive të
atyre që bëjnë ligjin dhe që janë të lidhur me qeverinë. Ne, sëbashku me
pronarët do të organizojmë të gjitha format dhe mënyrat për të kundërshtuar
zbatimin e ligjit antikushtetues të kthimit dhe kompensimit të pronës"-ka
thënë Mediu. Lidhur me mbajtjen e referendumit për këtë çështje, ai ka thënë
se "po, edhe kjo është një mundësi". Mendim të ngjashëm ka Balli Kombëtar.
Ligjvënësi Cako ka thënë se "çdo lëvizje që sjell pronën te pronari legjitim
është për mua e pranueshme" dhe po ashtu se për "cilindo që ta ndërmarrë
këtë nismë, ne jemi dakort edhe që të kërkojmë dhe që të mbahet referendumi
për të moslejuar zbatimin e ligjit të sapomiratuar". Cako është shprehur
gjithashtu se ai vetë do të angazhohet për të mbledhur firmat e nevojshme
për referendumin dhe shton se Presidenti i Republikës " është i detyruar ta
shpallë atë, sepse nuk ka çfarë të bëjë, përveçse të zbatojë rregullat që
kërkon Kushtetuta për referendumin". Qëndrim tërësisht kundër ligjit të
miratuar apo nismave të ndryshme, përfshi referendumin kanë legalistët.
Kryetari i PLL-së, Ekrem Spahia i tha dje "Gazetës" se partia e tij nuk
është bërë asnjëherë pjesë e ligjeve apo tryezave të partive për pronën,
duke nisur që nga mungesa në negociatat për ligjin 7501 të korrikut 1991 dhe
deri te tryeza presidenciale për pronën e 18 dhjetorit 2002. "PLL është e
vetmja që nuk ka hyrë në negociata për ligjin 7501 dhe as tryezën e 18
dhjetorit 2002 për pronën me Moisiun. Atë deklaratë e kanë firmosur të
gjithë kryetarët e partive parlamentare. Ne kemi votuar kundër në Kuvend dhe
nuk do të shkojmë apo dërgojmë kërkënd në Komitetin Shterëror në nivel
qendror dhe lokal, sepse jmi kundër në tërësi të ligjit dhe jo vetëm për një
nen. Ne synojmë të marrim pushtetin dhe të ndryshojmë ligjet për pronën, me
qëllim kthimin dhe kompensimin real"-ka thënë Spahia.


Starova: Nuk shkojmë në komitetin e kthim-kompensimit

Liberal-demokratët, janë të vendosur për të mos marrë pjesë në Komitetin
Shtetëror të Kthimit dhe Kompensimit të Pronës. Deputeti Arjan Starova ka
thënë për "Gazetën" se "nëse nuk ka mendim të unifikuar të opozitës, nuk do
të marrim pjesë në këtë komitet". Qëndrimi i Bashkimit Liberal Demokrat
është i qartë, duke synuar njehsimin e faktorit opozitar, por gjithashtu
duke fajësuar Partinë Socialiste si shkaktare të prishjes së mirëkuptimit
për ligjin e kthimit dhe kompensimit të pronës. Starova shton se "kur them
opozita nënkuptoj PD-në si forca kryesore" dhe se "ne nuk jemi mbledhur ende
të diskutojmë këtë çështje, sepse mbetemi në qëndrimin tonë se konsensusi
është prishur nga PS". Mospjesëmarrje në këtë komitet kanë deklaruar
republikanët, ballistët dhe legalistët, ndërkohë që PD nuk u pajtua vetëm me
pikën 1 të nenit 15 për zgjedhjen e kryetarit të komitetit, i cili mbeti në
variantin propozim i kryeministrit, dekretim nga presidenti dhe votim në
Kuvend. OSBE gjithashtu ka shprehur pakënaqësinë për miratimin përsëri pa
pajtim mes palëve të ligjit, sikurse tregoi "brengosje" komisioneri europian
Kris Paten në një letër drejtuar kryeministrit Fatos Nano. Në letër paten
theksonte se "megjithë kthimin nga presidenti të ligjit, nuk kishte
mirëkuptim për votimin e disa amendamenteve".


Toro: S'ka referendum për të drejtat e njeriut

Mundësia e mbajtjes së referendumit për çështjen e pronës nuk përputhet me
Kushtetutën. Kështu mendon Sekretari i Përgjithshëm i Shoqatës "Pronësi me
Drejtësi", Agim Toro. Toro i tha dje "Gazetës" se shoqata do ta çojë ligjin
në Gjykatën Kushtetuese menjëherë sapo ai të botohet në Fletoren Zyrtare,
por citoi Kushtetutën që përjashton mundësinë e referendumit për të drejtat
e njeriut, ku përfshihet e drejta e pronës. "Janë katër këmbë-tha Toro, -ku
mbështet ligji aktual, pasi nuk mund të mbahet referendum për të drejtat e
neriut aq më tepoër që Kushtetuta e ka të zgjidhur drejtë këtë. Së pari;
shqyrtimi në Gjykatën Kushtetuese për nenet e kontenstuara. Saktësisht neni
7 gërma "v" te shtojca e ligjit është antikushteteuse dhe ne do ta godasim
në Gjykatën Kushtetuese. Pastaj është Gjykata e Strasburgut për të drejtat e
njeriut dhe rrugët e protestave apo grevave e demonstratave. Së dyti; duhet
shumica e deputetëve mbi 50 për qind për ta miratuar ligjin, së treti; duhet
domosdoshmërisht konsensus, gjë që nuk u arrit dhe së katërti; presidenti,
pavarësisht nga relatat, ka të drejtë të mos e dekretarojë". Në 92-93, PR
ndërmori nismën për mbledhjen e firmave për referendum për pronën, por Toro
thotë se atëherë bëhej fjalë për kalimin e një ligji në Kuvend.


KUSHTETUTA

NENI 150
1. Populli, nëpërmjet 50 mijë shtetasve me të drejtë vote, ka të drejtën e
referendumit
për shfuqizimin e një ligji, si dhe t'i kërkojë Presidentit zhvillimin e
referendumit
për çështje të rëndësisë të veçantë.
2. Kuvendi, me propozimin e jo më pak se 1/5 të deputetëve ose me propozimin
e Këshillit të Ministrave, mund të vendosë që një çështje ose një
projektligj i rëndësisë së veçantë të shtrohet në referendum.


NENI 151
1. Çështjet që lidhen me tërësinë territoriale, me kufizimin e lirive dhe të
drejtave themelore të njeriut, me buxhetin, taksat e detyrimet financiare të
shtetit, me vendosjen dhe heqjen e gjendjes së jashtëzakonshme, me
deklarimin e luftës dhe të paqes dhe me amnistinë nuk mund të shtrohen në
asnjë referendum.