Lëvizja për Zhvillim Kombëtar do të aplikojë konkurrencën në bazë për përcaktimin e listës me 100 kandidatët për zgjedhjet parlamentare.

Drejtuesit e kësaj lëvizjeje kanë përcaktuar, tashmë, edhe kriteret që do të ndiqen në përzgjedhjen e kandidaturave, prej të cilave do të dalin fituesit. Arsimi i lartë, figurë morale e vlerësuar në zonë, mbështetja e programit të LZHK-së dhe mbrojtja e linjës së saj, janë kriteret bazë. Konkurrimi mes kandidatëve përfshin edhe njerëz që nuk jetojnë në zonat përkatëse, por të gjithë duhet të përfaqësojnë figurë të pastër dhe të vlerësuar në komunitet. Kështu, LZHK-ja do të nisë ngritjen e shtabeve elektorale në të 100 zonat e vendit, në të cilat do të përqendrohet puna deri në vendimin e kreut të LZHK-së, pretendentit të fronit mbretëror, Leka i Parë. Burime nga LZHK-ja thonë se seleksionimi, tashmë, ka nisur në bazë dhe lista e plotë do të shkojë në duart e Lekës së Parë për të dalë në fund me kandidatët zyrtarë. Një praktikë e tillë duket se përbën një formë të re të funksionimit qendër-bazë për listën e deputetëve, e cila zakonisht bëhet objekt pazaresh mes funksionarëve. LZHK-ja ka menduar të fusë konkurrencën si formën më të mirë, sipas drejtuesve të saj, për të përthithur kandidatët më të mirë dhe që kërkohen nga vetë banorët e zonave elektorale. Kjo formë mendohet të jetë edhe një levë për të tërhequr pas vetes të lëkundurit, si dhe ata që nuk kanë marrë pjesë në votimet e kaluara.

100 minishtabe elektorale
Ndërsa kanë miratuar kriteret që duhet të plotësojnë kandidatët për të konkurruar në listën e deputetëve të LZHK-së, drejtues të kësaj lëvizjeje thonë se në funksion të kësaj strategjie do të ngrihen shtabe elektorale në të 100 zonat në vend. E gjitha kjo do të shërbejë për mirëfunksionimin e parimit të konkurrencës në bazë. Gjithashtu, strukturat e lëvizjes do të ngrihen sipas zonave elektorale duke bërë edhe një hartë të mbulimit të të gjithë vendit me njerëz. Ndërkohë, sipas të njëjtave burime, mësohet se tashmë kanë nisur procedurat për të përvijuar emrat që përmbushin kriteret dhe që kanë përqafuar parimet dhe linjën politike të Lëvizjes për Zhvillim Kombëtar.

Struktura
LZHK-ja është përvijuar si formacion politik me përcaktimin e strukturave drejtuese dhe departamenteve. Kështu, sipas strukturës së miratuar, tashmë, në krye të lëvizjes si kryetar i LZHK-së qëndron pretendenti i fronit mbretëror, ndërsa nënkryetar, djali i tij. Përsa i takon departamenteve, janë formësuar 8 departamente, të cilat do të kenë një kryetar, një nënkryetar dhe nga dhjetë anëtarë secili. Këto departamente mendohet që të jenë edhe baza e detajimit të vijave të përgjithshme të programit politik e ekonomik, që LZHK-ja ka bërë publike më parë.

Struktura e LZHK-së

• Kryetari
• Nënkryetari
• Departamenti Parlamentar dhe i Ligjeve
• Departamenti i Politikave të Brendshme
• Departamenti i Organizimit
• Departamenti i Politikave Elektorale
• Departamenti i Marrëdhënieve me Median
• Departamenti i Politikave Ekonomike
• Departamenti i Politikës së Jashtme
• Departamenti i Çështjeve Sociale
• Departamenti i Sigurisë Kombëtare

Princi Leka, nënkryetar i LZHK-së

Pretendenti i fronit mbretëror, Leka i Parë, ndërsa ka vendosur të jetë aktivisht në krye të LZHK-së, si formacion politik elektoral, ka menduar të përfshijë në këtë sfidë edhe të birin. Princi Leka ka marrë detyrën e zëvendësuesit të babait të tij, si nënkryetar i LZHK-së, me sa duket për t’u angazhuar plotësisht para dhe gjatë fushatës elektorale të zgjedhjeve parlamentare, vitin e ardhshëm. Ky vendim i Lekës I duket se ka të bëjë me aktivizimin e të birit në politikë, por edhe me zbatimin e plotë të detyrimeve të tij si kryetar i LZHK-së, të cilat ai ka menduar se mund të mos jenë të plota, për shkak të shëndetit të dobët të kohëve të fundit.