Demokratët tentojnë koalicionet jofiktive parazgjedhore, pavarësisht, nga strategjia e partneritetit me shoqërinë civile.

Kështu, aktualisht, ekzistojnë dy variante aleancash mbi të cilat do të ngrihen bisedimet e ardhshme, por që mbeten për t’u konkretizuar pas zhvillimit të Kuvendit të Tretë të Partisë Demokratike, dy muajt e parë të vitit të ardhshëm. Varianti i parë është një aleancë e tri forcave, PD, PR dhe PDR, të cilat nëse veçohen në zgjedhjet e ardhshme parlamentare do të ndajnë votat e të djathtëve, duke rrezikuar mjaft zona. Ndërsa, varianti i dytë, mbetet aleanca e shpallur, tashmë, edhe pse jo e firmosur në letër, ajo mes demokratëve dhe republikanëve. Shkaku kryesor që japin në zyrat e selisë blu, për këtë qëndrim pro aleancave, duket të jetë ligji zgjedhor me një raund. Përmes këtij ligji, në secilën zonë elektorale fiton kandidati që merr më shumë vota në raundin e vetëm të zgjedhjeve, edhe pse diferenca mes vendit të parë dhe të dytë mund të jetë thjesht disa vota më shumë. Një gjë e tillë rrit rëndësinë e përqindjeve elektorale të partive të vogla që nuk mund të fitojnë vetëm, por që mund të ndihmojnë PD-në në fitoren e kandidatëve të përbashkët. Por jo vetëm kaq, pasi ligji i përzier, me shumicë mazhoritare, nxjerr fituese në zgjedhjet e ardhshme parlamentare atë forcë politike, e cila merr më shumë deputetë në bazë të zonave. Ndërsa përqindja e proprocionalit, e cila nxjerr vetëm 40 deputetë nga 140 që ka Parlamenti, nuk është ndikuese në fitoren e mazhorancës. Këtë pikësynim duket se kërkon të arrijë edhe PD-ja, kur ka shpallur strategjinë e saj të partneritetit me shoqërinë civile dhe rrethet intelektuale e akademike. Këta njerëz që do të afrohen në PD, si një nga kriteret kryesore për t’u përfshirë në listën e kandidatëve për deputetë do të jetë pikërisht, përkrahja dhe figura e tyre, e vlerësuar në bazë që përbën edhe rrethin e votuesve.

Konkretizimi i aleancave
Gjithçka në lidhje me nënshkrimin publik të ndonjë marrëveshjeje paraelektorale të PD-së, lidhet me zhvillimin e kuvendit të saj të tretë. Anëtarësia dhe mjaft nga zyrtarët e PD-së kanë pasur gjithnjë kundërshtime, përsa i takon koalicioneve parazgjedhore, të cilat, sipas tyre, nuk kanë qenë efektive dhe kanë bërë deputetë, njerëz pa kontribute, madje, që shpeshsherë e kanë lënë në baltë PD-në. Kjo rezistencë e bazës, e shprehur edhe në strategjinë e fundit të hapjes ndaj shoqërisë civile, mësohet se do të respektohet. Por, në Kuvend do të jenë pikërisht përfaqësuesit e anëtarësisë që do të miratojnë dokumentet themelore, me të cilat PD-ja do të ndërtojë strategjinë elektorale. Dhe një nga pikat e kësaj strategjie pritet të jetë mosndarja e votave mes të djathtëve. Vetë Berisha, pak kohë më parë, gjatë festimeve për 14-vjetorin e themelimit, u shpreh i hapur për të ftuar të gjithë të larguarit në vite të afrohen në PD.

PDR, ende pa një qëndrim të prerë
Demokratët e reformuar të Genc Pollos duket se nuk kanë një qëndrim të prerë për aleancë parazgjedhore me PD-në. Por, gjithsesi, ata kanë bërë disa ftesa bashkëveprimi në kuadër të institucioneve drejtuar demokratëve, duke lënë të nënkuptohet se kjo mund të jetë fillimi i një bashkëpunimi të mëtejshëm. Gjithashtu, ata mendojnë se bashkëpunimet mes të djathtëve janë të rëndësishme, por nuk duhen realizuar ashtu si i ka ndërtuar më parë PD-ja marrëdhëniet me aleatët e saj. Një koalicion i mirë opozitar do të ishte ai, ku secila parti ka qëndrimin e vet për çështje të ndryshme, dhe diskuton si e barabartë me partitë e tjera aleate, një variant ky që nuk përputhet me koalicionet ombrellë që ka aplikuar deri tani, e djathta shqiptare. Gjithsesi, PDR-ja ka shprehur qëndrimin e saj se nuk do ta pranonte këtë ide koalicioni, ku PD-ja mban “çadrën” për të gjithë aleatët, por ata nuk kanë mohuar se ekzistojnë mundësi të mira bashkëpunimi.

PR, e vetmja që i mbijetoi “BF”-së
Republikanët mendojnë se janë të vetmit aleatë potencialë, përsa i takon grupimit të djathtë rreth Partisë Demokratike. Ata duket se janë në përgatitje për të qenë gati për të dalë të vetëm në zgjedhje, nëse diçka nuk do të funksiononte, pasi prirja e përgjithshme është pikërisht një aleancë-binom me PD-në. Sipas republikanëve, bashkimi i opozitës është i rëndësishëm, por duke hequr qafe bashkëpunimet fiktive siç kanë qenë, më parë, disa aleanca të PD-së. Tashmë, që koalicioni opozitar “Bashkimi për Fitore” është shpërbërë dhe tendencat janë për të mos u ringritur, ata mbeten aleatët e vetëm që mund të krijojnë koalicion me demokratët. PR-ja duket se nuk është kundër aleancës me PDR-në, pavarësisht se ende nuk ka ndonjë negociatë konkrete për këtë çështje. Por, sinjalet mbeten të mira, përderisa PDR-ja ka edhe komisionerin e tretë në komisionet zonale të votimit, të cilin deri para vendimit të komisionit bipartizan, e kishte PLL-ja.

Festa, “Shijak TV” mbush nëntë vjet transmetim

“Shijak Televizon” ka mbushur plot nëntë vjet transmetim. I pari stacion televiziv privat në Shqipëri, i ndërtuar që në vitin 1995 me iniciativën e mjekut shijakas, Gëzim Ismaili, ka festuar mbrëmë në mjediset e hotel “Rogner” nëntë vjet histori. Mes të ftuarve të shumtë, drejtuesit e “Shijak TV” kanë prezantuar sfidat e trasmetimit në të gjithë këto vite. Pjesëmarrës nga i gjithë spektri politik, biznesmenë e gazetarë të shumtë kanë uruar drejtuesit e këtij stacioni, i cili prej nëntë vjetësh jep kontribut në sfidën e informimit të publikut. “Jemi krenarë për atë kontribut që kemi mundur të japim në këtë fushë, jo vetëm të të qenurit të parët e kësaj sfide, por edhe si një stacion nga ku kanë kaluar dhjetëra gazetarë që sot punojnë në shumicën e mediave në vend”, ka deklaruar para të pranishmëve pronari i “Shijak TV”, Gëzim Ismaili. Duke ftuar të ftuarit në festimin e këtij përvjetori të nëntë, Ismaili ka premtuar se, ky stacion televiziv pritet të shtojë edhe më tej investimet për të qenë pjesë e ngritjes së të gjithë industrisë së medias vizive. “Shijak TV” nisi, fillimisht, transmetimet nga qyteti i Shijakut. Shumë shpejt ai u bë i kërkuar nga publiku, duke e transferuar selinë e vet në Tiranë, ku prej vitesh vazhdon trasmetimin 24 orë “non stop”.

Njësitë verifikojnë 1,2 milionë shtetas
Blushi: Zgjedhjet, gati 30 për qind e listave

Pushteti vendor ka verifikuar mbi 1,2 milionë shtetas dhe ka identifikuar mbi 1 milion shtetas, në procesin e hartimit të listave të sakta për zgjedhjet e ardhshme. Këto shifra, sipas ministrit të Pushtetit Vendor dhe Decentralizimit, Ben Blushi flasin për përmbushjen e 30 për qind të objektivit, gjë që tregon se procesi mund të përfundojë brenda afatit ligjor, në fund të shkurtit të ardhshëm. Sipas të dhënave të ministrisë, në 20 ditë aktive, nga ana e njësive të qeverisjes vendore është realizuar një volum i madh pune në zbatim të ligjit, duke dëshmuar edhe një punë të mirë të njësive të qeverisjes vendore dhe prefekturave. Po sipas ministrisë, treguesit më pozitivë janë arritur në qarqet Dibër, Gjirokastër, Fier, Berat dhe Tiranë, ndërsa më dobët paraqiten në këtë drejtim njësitë e qeverisjes vendore të qarqeve Durrës, Kukës, Lezhë, Shkodër e Vlorë, puna e të cilëve është nën mesataren në shkallë vendi. Vetëm gjatë javës së fundit, është realizuar një volum pune i barabartë me 11 për qind të detyrës. Ministria e Pushtetit Vendor dhe Decentralizimit ka nisur edhe pagesat, për të cilat, në total, llogaritet një faturë në shumën 48 290 000 lekë për të gjitha njësitë e qeverisjes vendore, duke respektuar tarifat e shpërblimit të përcaktuar me Vendim të Këshillit të Ministrave.

Debati mes Mediut e Sherifit
Projektrregullorja, sherr në Komisionin e Ligjeve

Debati i ashpër mes deputetëve është shënuar dje në Komisionin Parlamentar të Ligjeve, duke sjellë bllokimin e projektligjit për “Rregulloren e re të Kuvendit”. Deputeti i PR-së, Fatmir Mediu ka debatuar ashpër me kryetarin e Komisionit të Ligjeve, Elmaz Sherifin, duke bërë që konflikti mes tyre të acarohet tej mase. Gjithçka ka nisur me faktin, sepse anëtarët nuk kanë pasur në dispozicion materialet që kanë sjellë ekspertët e BE-së për këtë projekt. Sherifi duke kërkuar të mbahet qetësi, i është drejtuar Mediut se “je ti që nuk di të sillesh në komision, je edhe karagjoz, ti je edhe kryetar partie gjasme, nuk di të drejtosh”. Kreu i PR-së ka replikuar duke iu drejtuar Sherifit se “është ai karagjoz, kastravec dhe jo deputetët e komisionit”. Ndërkaq, mbledhja është ndërprerë, duke mos arritur konsenusin e nevojshëm, si dhe kourumin e nevojshëm për të vazhduar shqyrtimin e Rregullores së re të Kuvendit. Kontradiktat u shfaqën qysh në fillim të mbledhjes, kur deputeti socialist, Taulant Dedja, replikoi disa herë me kryetarin e komisionit, Elmaz Sherifi, dhe deputetin e PD-së, Fatos Beja, për të sqaruar disa nene të rregullores. Replikat mes Dedjes dhe Bejë, detyruan deputetin demokrat, Beja, njëkohësisht, bashkëpunëtor në hartimin e këtij dokumenti të braktisë mbledhjen. Projektrregullorja e re përmban 119 nene nga të cilat sot u miratuan vetëm 8 prej tyre, ndërkohë që sot është planifikuar diskutimi i këtij dokumenti në seancë parlamentare.