17/07/2004 http://www.shekulli.com.al/

PLL e PBK: Status dëshmori për viktimat e komunizmit

N.Perndoj

Kryetari i grupit parlamentar i Partisë Lëvizja e Legalitetit, Eqerem Spahia
dhe deputeti i Partisë së Ballit Kombëtar Demokrat, Alfred Cako bënë publike
dje amendimin e depozituar në kryesinë e Kuvendit lidhur me ligjin 8607
"Statusi i dëshmorit të atdheut". Duke cituar paragrafe të amendimit të
përgatitur, dy përfaqësuesit e opozitës theksuan se Statusin e Dëshmorit të
Atdheut, duhet ta fitojnë të gjithë ata që i rezistuan me armë komunizmit si
dhe ata që u vranë me gjyq apo pa gjyq nga ingranazhet e regjimit komunist
në periudhën 29 Nëntor 1944 - Mars 1991. Ata kërkuan gjithashtu që dita e
dëshmorëve të mos jetë 5 Maji por 7 Prilli. "Nuk mund të jetë dita e
dëshmorëve data 5 maj pasi kjo datë është një simbolikë partiake komuniste.
Si e tillë nuk është një datë që mund të jetë përfaqësuese për gjithë të
rënët për atdhe, aq më tepër që është dhe një sfidë ndaj aleatëve
perëndimorë antikomunistë. Ne kërkojmë që data përkujtimore për Dëshmorët e
Atdheut të mos jetë 5 Maji por 7 Prilli, pasi kjo ditë është dita e fillimit
të rezistencës nga ana e nacionalistëve shqiptarë ndaj pushtuesit fashist"
 -tha Cako. Ndërsa Spahia kujtoi se data në fjalë shënon dhe ditën e parë të
rezistencës në Luftën e Dytë Botërore për gjithë Ballkanin.