Faqja 6 - POLITIKE Shtator 17, 2004
http://www.balkanweb.com/gazeta/gazeta.htm


QEVERIA KA ZGJIDHUR EDHE PROBLEMIN E INFRASTRUKTURËS

Rrugët "në kurriz" të pronarëve
Projekti është "kopjuar" nga koha e Mbretit Zog

Anila Basha

Qeveria ka vendosur që me paratë që do të marrë nga pronarët e rinj të
zonave informale të mund të sponsorizojë një pjesë të infrastrukturës së
këtyre zonave, rrugë, kanalizime, ujësjellësa, shkolla etj. Një fakt të
tillë e deklaroi për Gazetën Shqiptare zv.ministri i rregullimit të
territorit dhe turizmit Artan Lame. "Në projekt është parashikuar që në rast
se mes pronarit të vjetër dhe pronarit të ri nuk do të ketë një marrëveshje,
atëherë do të jetë shteti që do të ndërhyjë. Shteti do të kompesojë pronarin
e vjetër në një vend tjetër, me vlerë sipas statusit që ka pasur toka në
momentin e fitimit të pronësisë. Ndërsa po shteti, do ti kërkojë detyrimet
pronarit të ri në tokën që ka marrë si truall, me çmimin e tregut" tha ai
për Gazetën ndërsa shton se pjesa e parave, të cilat do të përfitohen nga
gjithë ky proces, do të nevojiten për ndërtimin e infrastrukturës së zonave
informale. Por si do të zgjidhet problemi i legalizimit të atyre banesave,
të cilat sipas studimit urbanistik, do të jenë të vendosura në ato vende që
duhet të ndërtohet infrastruktura? Qeveria e ka menduar edhe këtë. "Sipas
nenit që u miratua në komisionin e ekonomisë dhe që është propozim i
qeverisë, thuhet se nuk do të fillojë procesi i legalizimit të banesave
informale, pa një studim urbanistik nga pushteti vendor për ato zona. Që do
të thotë se ndërtesat të cilat gjenden në vende të tilla do të prishen, por
do të kompesohen në hapësira të tjera të cilat do të jenë truall ndërtimi",
tha Lame. Ky lloj varianti i përdorur, nuk është i ri. Ka qenë Zogu, i cili
gjatë qeverisjes së tij ka përdorur të njëjtën metodë në një nga zonat e
Tiranës së Re, ku me paratë e marra nga banorët e rinj, ka ndërtuar edhe
infrastrukturën përkatëse të zonës, duke ua blerë tokën pronarëve të vjetër,
me statusin e saj si tokë bujqësore.

Afatet
Në këtë proces, për zv.ministrin Lame nuk janë të rëndësishme afatet.
"Thelbi mbetet tek parimi se si do të kryhet procesi i legalizimit. Me thënë
të drejtën unë nuk shoh ndryshim të madh të projektit të qeverisë me
variantin e propozuar nga Partia Demokratike. Janë të njëjtat parime vetëm
se në projektin e qeverisë janë marrë parasysh të gjitha çështjet në mënyrë
të detajuar. Ajo që ndryshon është fakti se PD kërkon të kreditohen pronarët
e rinj, në një kohë që kjo është e pamundur" sqaron Lame. Sipas tij, është
shumë e vështirë vendosja e afateve, sepse edhe pushtetit vendor do ti duhet
kohë që të sjellë projektin e urbanizimit të zonës.

Kundërshtimi
Qeveria kundërshton Parlamentin lidhur me vendimin e këtij të fundit për të
shmangur sipërfaqet prej 10 mijë metrash katrorë. "Kjo do të sillte një
Shqipëri-fshat, -sqaron Lame. Me këtë llogjikë, do të legalizohej çdo shtëpi
e veçuar në male e kodra, dhe jo në zona urbanistike. Ne që tani e shohim se
nuk ka një strukturë të qartë urbanistike, dhe ku qytetet e fshatrat, nuk
kanë më vija dalluese nga njëra tjetra, për shkak të ndërtimeve" tha
zv.ministri.


Shoqata: Ky projekt bie në kundërshtim me pesë ligje

Shoqata Pronësi për Drejtësi e ka kundërshtuar me forcë projektin që po
diskutohet në Kuvend. Sipas Sekretarit të Shoqatës Agim Toro, kuvendi e
ndryshoi propozimin e teknikëve për sipërfaqet 10 mijë metra katror sepse
"këto forca politike kanë edhe militantët apo pronat e tyre nën 10 mijë
metra që duan ti legalizojnë".
Shoqata ka dalë kundër projektit dhe shton se ky projekt i ri që po
diskutohet në Kuvend, bie në kundërshtim me shumë ligje, apo nene të tyre të
cilat janë në fuqi në republikën e Shqipërisë. Sipas Toros, Ligji për
Legalizimin e Zonave Informale bie në kundërshtim me Kodin Civil të
Republikës, në nenet 172 e 195 të tyre; bie në kundërshtim me ligjin "Për
shitblerjen e trojeve", i cili nuk lejon tjetërsimin e trojeve derisa të
bëhet kthimi dhe kompesimi i pronave; projekti aktual, bie në kundërshtim me
Kodin Penal në nenet 199 e 200 , ku për pushtimin e tokës, njerëzit dënohen
edhe me burg. "Bie në kundërshtim edhe me ligjin famëkeq 7501 i cili në
nenin 15 dhe 21 ndalon tjetërsimin e pronës dhe thuhet se "këshilli i
komunës ose i bashkisë brenda 15 ditëve nga marrja e denoncimit mblidhet të
vendosë për lirimin e kthimin e tokës në gjendjen e mëparshme për tre ditë,
prishjen e objektit të ndërtuar në mënyrë të kundërligjshme dhe kthimin e
tokës në gjendjen e mëparshme brenda 5 ditëve". Ky projekt, sipas Toros, bie
në kundërshtim edhe me ligjin e pronave i cili nuk lejon që tjetërsimi i
pasurisë së pronarëve të bëhet në këtë formë që propozohet, dhe tokat që
janë zënë në mënyrë të paligjshme i kthehen pronarëve. "Atëherë cilin ligj
do të zbatojmë këtë të riun, apo këta të tjerët? Që ky ligj të hyjë në fuqi,
atëherë duhet të shfuqizohen gjithë këta të tjerët" thotë Toro.