REZOLUTA CAME NE KUVEND

Sor Kuvendi do marre ne shqyrtim rezoluten came e cila i diskutua gjate mbledhjes se komisionit te Politikave te Jashtme. Sipas kryetarit te tij Ilir Zela, deputetet e shqyrtuan ate dhe folen mbi marrdheniet aktuale Shqiperi-Greqi. Por sot do te merret vendimi final i deputeteve lidhur me kete problem te rendesishem. Nga ana tjeter legalistet kane reaguar duke thene se ata kerkojne nga

parlamenti grek abrogimin e ligjit te Luftes te vitit 1940. Por edhe njohjen e pronesise se popullsise came, duke i kerkuar qeverise greke ngrirjen e Ligjit nr. 2664, date 27 nentor 1998, qe ka te beje me regjistrimin e pronave dhe pasurive.

 18/03/2004     http://www.shekulli.com.al/

Rezoluta i kërkon qeverisë shqiptare dhe greke zgjidhjen e çështjes së pronave të çamëve. Spahia: Nuk abrogon Ligjin e Luftës

Kuvendi: Pronat e çamëve, të ndërhyhet mbi Ligjin e Luftës

A. Rama

TIRANE - Përfundon hartimi me konsensus i projektrezolutës për zgjidhjen e problemit të pronave të çamëve në Greqi. Komisioni parlamentar i Politikës së Jashtme, pas dy ditë konsultimesh, hartoi dokumentin e shumëdiskutuar këto kohë që do të shqyrtohet sot në seancë plenare, duke pasur edhe konsensusin e përfaqësuesve të opozitës. I vetmi që u shpreh kundër projektrezolutës ishte deputeti i PLL-së Ekrem Spahia, i cili tha se drafti nuk i jepte zgjidhje thelbit të problemit. Projektrezoluta kërkon që çështja e të drejtave të çamëve të rishihet nga Greqia, duke iu referuar për këtë edhe Traktatit të Miqësisë të nënshkruar mes dy vendeve që në vitin 1998. Kuvendi kërkon që në këtë proces të përfshihet qeveria shqiptare, e cila duhet të angazhohet për zgjidhjen e problemit, duke u bazuar në dokumentet e njohura ndërkombëtare. Një nga pikat kryesore të përfshira në rezolutë, kërkon gjetjen e zgjidhjes në aspektin teknik dhe juridik midis qeverive të dy vendeve për çështjen e sekuestros konservative të vendosur nga shteti grek, si pasojë e veprimit të ligjit të Luftës të vitit 1940, mbi pasuritë e popullsisë çame, por dhe ngrirjen e ligjit 2664 të vitit 1998, si hallkë e domosdoshme për kapërcimin e problemeve të krijuara. Deputetët e komisionit të Jashtëm kërkojnë që qeveria nëpërmjet grupeve të punës, të përshpejtojë negociatat me palën greke me qëllim zgjidhjen e këtij problemi. Kryetari i komisionit të Jashtëm Ilir Zela, tha dje se drafti që do t’i paraqitet Kuvendit, ka marrë parasysh një pjesë të mirë të propozimeve që deputetët e opozitës kanë paraqitur në projektrezolutën e depozituar disa muaj më parë. Sipas tij dokumenti i hartuar nga ky komision, përmban disa elementë të rëndësishëm, që nuk janë vendosur në rezolutën që Parlamenti ka miratuar në qershor të vitit të kaluar. “Dokumenti është i orientuar për zgjidhjen e problemeve që ekzistojnë mes dy vendeve. Por drafti nuk cënon marrëdhëniet dypalëshe mes Shqipërisë dhe Greqisë”, -tha Zela. Ndërkaq deputeti Spahia, tha se projektrezoluta, nëpërmjet artificeve, mbulonte zgjidhjen e problemit kryesor për mbajtjen pezull të çështjes së pronave të çamëve, abrogimin e ligjit të luftës mes dy vendeve. “Rezoluta e parë kërkonte që të rishihej akti i dhënies së shtetësisë shqiptare i vitit 1953. Ne do të kërkojmë që të miratohet rezoluta e parë e paraqitur në Kuvend”, -tha Spahia.

Pikat e rezolutës:
Kuvendi; a) vlerëson se është koha që çështja e të drejtave të popullsisë çame të rimerret në shqyrtim nga të dy palët, në frymën e traktatit të miqësisë dhe bashkëpunimit, fqinjësisë së mirë dhe sigurisë, të nënshkruar dhe ratifikuar nga të dyja vendet;
b) i kërkon qeverisë shqiptare të shtojë më tej përpjekjet për zgjidhjen e çështjes së pronave dhe pasurive të patjetërsueshme të popullsisë çame, në përputhje me dokumentet e njohura ndërkombëtare;
c) çmon se gjetja e një zgjidhjeje të shpejtë në aspektin teknik dhe juridik midis qeverive të dy vendeve për çështjen e sekuestros konservative të vendosur si rrjedhojë e Ligjit të Luftës së vitit 1940 mbi pasuritë e popullsisë çame, si dhe ngrirjen e ligjit nr.2664 të 3.12.1998, do të përbënin një kontribut shumë të rëndësishëm për kapërcimin e problemeve të krijuara prej tyre;
ç) i kërkon qeverisë shqiptare që nëpërmjet grupeve të posaçme të punës të bashkëpunojë me palën greke dhe në frymën e nenit 15 të traktatit të miqësisë, bashkëpunimit dhe fqinjësisë së mirë, të përshpejtojë fillimin e negociatave me qeverinë greke për zgjidhjen e këtij problemi.

Gazeta55 18/03/2004  http://www.gazeta55.com/
OSBE, llogari PS-së për manipulimin e "Ligjit të Pronave"

Përfaqësuesve të Fatos Nanos u duhet sot të shpjegojnë zyrtarisht, në një
takim me ambasadorin Liponen, nëse kanë ndërmend të zbatojnë detyrimin
kushtetues të kthimit të pronave, sipas marrëveshjes paraprake me
ndërmjetësim ndërkombëtar

Manipulimi i projektligjit të hartuar me konsensusin e ekspertëve të
OSBE-së, për kthimin dhe kompensimin e pronave, ka detyruar ndërmjetësit të
thërrasin sërish autorët e manipulimit, në një përpjekje të fundit për të
thirrur në arsye, meqenëse, më pas do të vijë edhe deklarimi zyrtar se janë
socialistët ata që s'kanë vullnetin për të zgjidhur këtë çeshtje. Kryetari i
komisionit parlamentar të Ekonomisë, Ylli Bufi, do të ketë sot një takim
informal me ambasadorin e OSBE-së, Osmo Liponen, me të cilin do t'i duhet të
shkëmbejë edhe një herë, pikëpamjet e socialistëve në pushtet mbi kthimin
fizik të pronave, si dhe kompensimin e tyre, në rast se aksioni i parë është
i pamundur. Ambasadori Liponen ka thirrur në takimin jozyrtar, edhe
kryetarin e komisionit parlamentar të Bujqësisë, deputetin e opozitës Jemin
Gjana, i cili pritet të shpallë në detaje, edhe hollësitë e ndërhyrjeve që
juristët e Fatos Nanos kanë bërë mbi projektin konsensual të miratuar, pasi,
ai ka marrë viston e të gjitha palëve në disa bisedime afatgjatë me
ndërmjetësim ndërkombëtar. Kryetari i komisionit parlamentar të Ekonomisë,
Ylli Bufi, mësohet se do të mbrojë vendimin e Fatos Nanos për një rishikim
të të gjithë projektit, meqenëse, siç thuhet, llogaritë paraprake kanë qenë
të gabuara dhe nuk mundësojnë një kompensim real të ish-pronarëve.
Kategoritë e interesuara kanë kërcënuar se, do të organizojnë protesta ndaj
këtij projekti dhe opozita ka parathënë votën e saj "kundër", megjithatë,
pas konsultimeve të sotme, Prezenca e OSBE-së pritet të denoncojë
socialistët, si shkaktarë për prishjen e konsensusit për kthimin e pronave
dhe t'i bëjë përgjegjës për mungesën e vullnetit politik për të zbatuar
detyrimin kushtetues të patjetërsueshmërisë së pronës private.

 

Kuvendi miraton deklaratën për Kosovën: Të kthehet stabiliteti

Lajmi i ores 1:20 PM

Kuvendi shqiptar TIRANE (18 Mars) - Kuvendi miratoi në seancë plenare një deklaratë për ngjarjet e dhunshme në Kosovë, ku humbën jetën 22 persona dhe u plagosën 600 të tjerë. Në këtë deklaratë të hartuar nga deputetë përfaqësues të grupeve parlamentare, Kuvendi vlerëson se "situata në Kosovë duhet të kapërcehet sa më parë në emër të paqes, stabilitetit e bashkëpunimit si dhe në emër të interesave të sotme dhe të së ardhmes së Kosovës". Kuvendi i Shqipërisë, me anë të kësaj deklarate shpreh besimin se të gjithë qytetarët e Kosovës do të tregojnë durim, gjakftohtësi, vetpërmbajtje dhe respektim të të gjitha institucioneve të saj. Po ashtu, deklarata nënvizon se " Kuvendi, Presidenti dhe Qeveria e Kosovës në bashkëpunim të ngushte me UNMIK-un dhe KFOR-in, do të gjejnë shumë shpejt dhe do të vënë para ligjit provokatorët, organizatorët dhe shkaktarët e gjakderdhjes, për ta kthyer sa më parë në normalitet jetën në Kosovë". ro/ro (BalkanWeb) http://www.balkanweb.com/