Kreu i Lëvizjes për Zhvillim Kombëtar, Leka Zogu, ka bërë të ditur se lëvizja e tij do të jetë faktor kyç për krijimin e qeverisë së ardhshme pas zgjedhjeve. Për trashgimtarin e familjes mbretërore, nuk ka rëndësi se cila forcë politike do të fitojë, pasi LZHK-ja do të jetë pjesë e aleancës qeverisëse. "Pavarësisht rezultateve të zgjedhjeve të ardhshme, asnjë forcë politike nuk do të mund të krijojë qeveri pa pjesëmarrjen në kabinetin e ardhshëm edhe të Lëvizjes për Zhvillim Kombëtar", tha dje Zogu gjatë një takimi të zhvilluar në Durrës. Takimi bëhej në kuadër të turit të ndërmarrë nëpër rrethe për prezantimin e platformës elektorale për zgjedhjet e ardhshme. Sipas pretendentit për fronin mbretëror vendi ka nevojë për një tjetër qeverisje në mënyrë që të zgjidhen jo vetëm problemet e brendshme, por edhe ato të shqiptarëve jashtë vendit. "Synimi i LZHK-së është që të kthehet në një forcë politike serioze në mënyrë që të jetë faktor në ndërtimin e qeverisë", shtoi ai. Ai ka sqaruar se do të bashkëpunojë me ato forca politike që në themel të tyre kanë interesat e vendit. Gjithsesi, ai ka theksuar se LZHK-ja synon të jetë forca kryesore në zgjedhjet e ardhshme. Leka Zogu ka prekur çështjen e korrupsionit në qeverisje. Ai ka shtuar se "nuk e kam menduar se me ardhjen time në Shqipëri do të më duhej të merrem edhe me qeverisjen brenda vendit, pasi synimi im ka qenë politika ndërkombëtare e shtetit shqiptar". Sipas tij, vendit tonë i mungon "shtylla kryesore e demokracisë, prona dhe kthimi i pronës tek pronarët". Çështja "çame" ka zënë sërish një pjesë të fjalimit të Zogut, i cili është shprehur se "qeveria dhe parlamenti aktual nuk kanë bërë atë që duhej bërë për këtë gjë". Ai ka marrë përsipër që ta zgjidhë këtë problem pasi të vijë në pushtet.

 

KOLOVAJSJA LEKA ZOGU Pretendenti për fronin mbretëror Leka Zogu, u dha dje politikanëve të tjerë shqiptarë një leksion të vogël. Ai tha se Lëvizja për Zhvillim Kombëtar drejtuar prej tij, do jetë faktor kyç në krijimin e qeverisë së ardhshme. Leka Zogu nuk paragjykoi aspak fituesin dhe një deklaratë e tillë duket se i shërben stabilitetit dhe jo krizave politike. Ndryshe nga kryetarët e partive të tjera, të majta apo të djathta, Leka dje nuk përmendi në asnjë rast ultimatumet se nuk do të hyjë kurrë në qeveri një parti apo ndonjë politikan. Leka Zogu, pas vendosjes së tij përfundimtare në Shqipëri duket se po tregohet shumë më konstruktiv se politikanët shqiptarë të prodhuar pas vitit 1990.