20032003manif

Sot protesta e opozitës, më e vakët për shkak të trazirave në Kosovë
Lajmi i ores 8:35 AM

TIRANE (20 Mars) - Sot të gjithë deputetë e opozitës do të jenë të shpërndarë nëpër të gjitha rrugët hyrëse të Tiranës, për të mos lejuar forcat e policisë të ndalojnë protestuesit që pritet të vijnë nga rrethet e tjera të vendit. Ky ishte një nga vendimet të marra dje gjatë tryezës së opozitës së zhvilluar me dyer të mbyllura. Po kështu dje u vendos që javën që vjen protesta të përshkallëzohen në të gjitha qytet e vendit me një formë të paaplikuar deri më tani në protestat paqësore të opozitës. "Është vendosur për një intesifikim të madh të protestës, është vendosur vazhdimësia e saj, respektimi rigoroz i karakterit paqësor të kësaj proteste, është vendosur të ruhet lëvizja "Nano ik" si një lëvizje shumëplanëshe për të bërë të mundur realizimin e qëllimit të saj", tha kreu i PD, Sali Berisha pas përfundimit të diskutimeve me dyer të mbyllura. Ndërsa kreu i demokristianëve Nikollë Lesi u shpreh se një tjetër vendim i marrë është se protesat nëpër rrethe do të shoqërohen me bllokime rrugësh me largimin e nxënësve dhe të mësuesve nga shkollat. Po kështu është vendosur që ditën e premte të javës që vjen të fillojë turi i protestave pa ndërprerje, ditën dhe natën në kryeqytetin. Ato do të zhvillohen para godinës së Kryeministrisë dhe godinës së Kuvendit Shqiptar. Protestë është paralajmëruar se do të ketë edhe para Shtëpisë së Bardhë në Ëashington, nga shqiptarët atje ditën që kryeministri Nano do të zhvillojë një takim të planifikuar tashmë. Ndryshe nga sa pritej protesta e ditës së sotme do të jetë më e shkurtër. Arsyeja e një vendimi të tillë është situata jo e qetë në Kosovë, pas ngjarjeve të ditëve të fundit. Pas mbledhjes së të gjithë protestuesve në sheshin "Skënderbej", kryetari i Partisë Demokratike do të bëjë të ditur programin e protestës, qytetarëve të pranishëm. Më pas do të bëhet një parakalim nëpër bulevardin kryesor "Dëshmorët e Kombit". Parakalimi do të shkojë deri në sheshin Nënë Tereza pas një ndalimi që do të bëhet para godinës së kryeministrisë. Burimet thonë se vetë Presidenti i Republikës ka komunikuar me kreun e PD për të mos e zhvilluar protestën për shkak të ngjarjeve në Kosovë. Berisha ka thënë se është presioni i partive të vogla që nuk e lejon ta bëjë një gjë të tillë, pavarësisht se mund edhe ta shtynte. Një gjë të tillë i ka kërkuar edhe ambasadori amerikan James Jeffrey në takimin që pati me të. Ndërkaq Berisha me partitë e vogla kanë konkluduar në masat e mësipërme. Kordoni i deputetëve të opozitës dhe të drejtuesve të strukturave të tjera të PD-së do të përfshijë të gjithë turmën për të ruajtur nga provokimet e ndryshme që mund të priten. Po kështu në këtë protestë nuk do të mungojë as transmetimi i drejtpërdrejtë i kësaj proteste paqësore. Megji-thëse se është në kundërshtim me urdhërin e nxjerrë nga Drejtoria e Policisë së Tiranës disa nga mediat elektronike kanë deklaruar se janë të vendosur për të transmetura drejtpërsëdrejti këtë protestë madhështor. ro/ro (GazetaShqiptare/BalkanWeb)

Siguria
Pavarësisht se tubimi nuk shënoi asnjë incident, dje zyrtarët dhe organizatorët e protestës e kishin shumë të vështirë sigurimin e qetësisë. Sapo protestuesit morën rrugën drejt bulevardit “Dëshmorët e Kombit”, një pjesë e protestuesve ka dalë jashtë radhës së parë ku ishin deputetët e opozitës duke iu drejtuar me shpejtësi Kryeministrisë. Kjo ka bërë që kryetari i PD-së Tiranë Vili Minarolli të bënte thirrje për qetësi. “Të gjithë njerëzit të futen në radhë. Asnjë të mos qëndrojë në trotuar. Provokatorët të largohen dhe të mos provokojnë turmën”, -tha Minarolli me një megafon para turmës. Thirrja e tij ka zgjatur edhe pak minuta dhe më pas protesta iu rikthye qetësisë së saj deri pak hapa nga Kryeministria. Në këtë moment një grup prej 50 vetash i është drejtuar forcave të rendit. Kjo ka bërë, që pranë tyre të formohet një gardh i madh me deputetë madje edhe me ish-funksionarë të forcave të rendit në kohën e qeverisjes së PD-së. Këmbëngulja e tyre “për të vërshuar” nuk ka zgjatur shumë dhe më pas ata i janë bindur pjesës tjetër të protestuesve. Turma ka qëndruar në shesh plot 30 minuta. Ata kanë përshkruar më pas sheshin “Nënë Tereza”, por pa ndaluar. Protestuesit janë kthyer sërish para Kryeministrisë ku i priste një kordon i gjatë me deputetë dhe organizatorë të protestës si dhe tre radhë policësh. Pas thirrjeve “Nano ik”, protestuesit i janë drejtuar sheshit “Skënderbej” nga ku edhe janë shpërndarë. Ka pasur nga ata, që kanë qëndruar më gjatë edhe përballë selisë së PD-së në pritje të ndonjë deklarate të liderit të opozitës Sali Berisha, por ky i fundit nuk ka pranuar të bëjë asnjë koment para tyre.

Berisha
Protesta e djeshme nisi siç ishte parashikuar në sheshin “Skënderbej”. Pas 20 minutash nga orari i përcaktuar, në podium mbërriti edhe lideri i opozitës Sali Berisha bashkë me drejtuesit e partive të vogla të opozitës (përveç reformatorëve) dhe përfaqësues të shoqërisë civile. Gjatë fjalës së tij, kryetari i demokratëve deklaroi se kryeministri Nano i ka ditët e numëruara. “ “Nano ik”, sepse me qeverinë tënde je shndërruar në fatkeqësinë e madhe të qytetarëve. “Nano ik”, sepse ti me vjedhjen tënde dhe babëzinë tënde je bërë poshtërues për Shqipërinë dhe emigracionin”, -tha ai. Berisha i bëri thirrje gjithashtu protestuesve, që të siguronin një lëvizje krejtësisht paqësore, duke nënkuptuar se vetëm në këtë mënyrë opozita mund të fitonte betejën e saj. “Ju siguroj se ky model, ky qëndrim është rruga më e sigurtë për të finalizuar qëndrimet tuaja. Çdo rrugë tjetër është zhgënjyese për ju. Kjo është betejë paqësore, për jetë a vdekje për vlerat në Shqipëri”, -tha Berisha.

Sekretari për Marrëdhëniet me Jashtë, Lakrori tha se protesta ishte e pavend në një kohë të tillë

PS: Protesta e opozitës dëmton Kosovën

A. Rama

TIRANE - Partia Socialiste deklaroi dje se protesta e opozitës ishte e pavend në një kohë kur situata në Kosovë vazhdonte të ishte e pastabilizuar. Sekretari i Marrëdhënieve Ndërkombëtare në selinë rozë Maqo Lakrori deklaroi dje gjatë kohës që në bulevardin “Dëshmorët e Kombit” zhvillohej protesta e opozitës, se “ky miting dëmtonte më tej procesin e stabilizimit në Kosovë. Pas ngjarjeve të dhunshme të ndodhura ditët e fundit në Mitrovicë dhe treva të tjera të Kosovës, e rëndësishme ishte të kthehej sa më parë normaliteti, gjë që e dëshironte i gjithë faktori politik në vend. Sipas Lakrorit, të gjitha partitë e “Koalicionit për Integrim” mbështetën vazhdimin e proceseve demokratizuese dhe përpjekjet që po bën faktori politik dhe ndërkombëtar në Kosovë, për të ruajtur stabilitetin. “Partitë e “Koalicionit për Integrim”, si dhe vetë partitë e opozitës në rezolutën e përbashkët të njehsuar në Kuvend, i janë referuar të gjithë këtij konteksti se organizimi i manifestimeve të tilla nuk është me vend. PS ka vlerësuar të gjithë faktorët që ndihmojnë për të dhënë kontributin për ndërtimin e një Kosove demokratike”, -tha Lakrori duke dënuar aktet e rënda të dhunës në Kosovë. Zyrtari i lartë i PS-së tha se gjakftohtësia dhe respektimi i institucioneve në Kosovë, nga të gjithë qytetarët e saj, në koordinim të ngushtë me UNMIK-un dhe KFOR-in, janë të domosdoshëm për qetësimin e situatës, si dhe gjetjen e ndëshkimin e provokuesve të cilët shkaktuan viktimat. Në këtë kuadër, PS mbështeti dhe qëndrimin e qeverisë shqiptare për këto ngjarje duke vlerësuar kontributin e saj në këtë proces.