20/06/2004 http://www.shekulli.com.al/

Një prefekt i përsosur nga Prishtina në Izmir

Enver Robelli

Ahmet Prishtina, ish-prefekt i qytetit të Izmirit dhe një nga njerëzit më të
popullarizuar në mesin e qytetarëve turq ka mbyllur sytë ditën e martë të
kësaj jave. Ky personalitet me origjinë shqiptare arriti të rizgjidhej në
postin e prefektit të qytetit të Izmirit në mars të këtij viti, falë
devotshmërisë së tij dhe punës së madhe për qytetarët. Ahmet Prishtina lindi
në vitin 1952 në Izmir, ndërkohë që rrënjët e familjes së tij janë në
Prishtinë të Kosovës.
Gjatë karrierës së tij politike, Prishtina, për dallim nga shumë shqiptarë
të turqizuar deri në asimilim të plotë, nuk e mohonte prejardhjen e tij,
ndonëse në disa shënime mbiemri i tij nga administrata turke shkruhej
"Piristina". Në bisedë me gazetarë, ai përkujtonte origjinën e familjes nga
Prishtina dhe angazhimin në favor të çështjes së Kosovës. Gjatë një vizite
në Kosovë në mars të vitit 1998, vetëm dy javë pas krimit të forcave serbe
në Prekaz, Ahmet Prishtina mbështeti kërkesat e shqiptarëve për të fituar të
drejtat e tyre njerëzore dhe dënoi represionin e përgjakshëm të regjimit të
Beogradit. Edhe më vonë ai vazhdimisht ka mbajtur lidhje me Kosovën.
Në zgjedhjet e vitit 1994 ai fitoi dhe hyri në Parlamentin turk në Ankara.
Prishtinës iu besuan shumë detyra me rëndësi në fushën politike dhe
ekonomike të rajonit të Izmirit. Ai ishte edhe anëtar i një komisioni, i
cili hetoi rrethanat e vrasjes së gazetarit Ugur Mumcu nga një islamist
radikal. Mumcu ishte kolumnist i gazetës "Cumhuryiet".
Në vitin 1999 Prishtina u zgjodh prefekt i Izmirit; atëkohë ai ishte anëtar
i Partisë së Majtë Demokratike (DSP) të kryeministrit Bülent Ecevit. Më vonë
Prishtina kaloi në radhët e partisë CHP (Partia Republikane Popullore)
Në fund të marsit Ahmet Prishtina arriti të shpëtojë Partinë Republikane
Popullore, një parti me orientim socialdemokrat. Duke qenë shumë i
popullarizuar në Izmir, ky politikan me prejardhje shqiptare siguroi edhe
një mandat në postin e prefektit. Në shumë qytete të tjera turke partia e
tij CHP humbi ndaj kandidatëve të partisë së moderuar islamike AKP të
kryeministrit Rexhep Taip Erdogan.
Gjatë shërbimit si prefekt i Izmirit, Ahmet Prishtina u dëshmua si menaxher
i problemeve të mëdha, "duke mos marrë pjesë në grindjet ideologjike dhe
duke fituar zemrat e qytetarëve të Izmirit", -shkruan gazeta "Turkish Daily
News" në një njoftim të gjatë për vdekjen e tij.
Ndër problemet më të mëdha të Izmirit ishte shpërngulja gati e pakontrolluar
në qytet e shtresave të popullsisë nga zonat rurale të Anadollit. Rritja e
numrit të popullsisë shton dukshëm krizën sociale të metropolit turk në
Detin Egje.
Pas Stambollit, Izmiri është qyteti i dytë turk për nga madhësia, që
disponon edhe port detar. Sipas statistikave të fundit në Izmir jetojnë
rreth 2,5 milionë banorë - më shumë se në mbarë Kosovën. Qyteti u themelua 3
mijë vjet para Krishtit; nën sundimin grek, Izmiri njihej me emrin Smyrna
dhe ishte qendër e tregtarëve si në kohën e selxhukëve ashtu edhe në
Perandorinë Osmane. Gjatë luftës turko-greke në vitet 20 të shekullit të
kaluar, Izmiri u shkatërrua në pjesën më të madhe nga grekët. Pas vitit 1922
qyteti u rindërtua dhe sipas marrëveshjes paqësore të nënshkruar në Lausanne
të Zvicrës mes Turqisë dhe Greqisë, Izimiri iu dha turqve.
Për Ahmet Prishtinën me rëndësi të madhe ishte hapja e qytetit ndaj botës.
Gjatë qeverisjes ai kultivoi një partneritet të ngushtë me qytetin e
Bremenit në Gjermani. Gati tre muaj pas rizgjedhjes, Ahmet Prishtina vdiq të
martën në Izmir nga një goditje në zemër. Faqja zyrtare e prefekturës së
Izmirit në internet prezantohet me ngjyrë të zezë, me një fotografi të
prefektit të vdekur dhe me një fjali lamtumire në nderim të 52 -vjeçarit, me
origjinë shqiptare.