Faqja 18 - GAZETA E TIRANES http://www.balkanweb.com/gazeta/gazeta.htm
 Tetor 20, 2004


Arkitektët: Ndërtesa ka një zgjidhje perfekte të jashtme dhe zbatim shumë
cilësor

Na ishte një herë Shtëpia e Oficerëve
Historia e godinës ku sot është Lidhja e Shkrimtarëve

Rezarta Delisula

TIRANE

Ka mbetur një nga dëshmitaret e rralla të historisë së ndërtimit të
kryeqytetit. Etja për pallate shumëkatëshe duket sikur e ka strukur diku mes
xhamllëkut të "grataçelave" e bojërave shumëngjyrëshe të godinave ngjitur me
të. Ish-Shtëpia e Oficerëve, që sot është Lidhja e Shkrimtarëve dhe
Artistëve, është projektuar e ndërtuar në vitet 1933-1934 nga inxhinier
Dhimitër Dhespoti. Kjo godinë vlerësohet nga arkitektët e urbanistët më të
vjetër si një prej ndërtimeve, ku pamja e jashtme cilësore e fasadës shkon
njësh me zbatimin cilësor të punimeve. Në fillim të viteve '30 në kryeqytet
nisën ndërtimet e para të rëndësishme, që sot bëjnë pjesë në Ansamblin
Monument Kulture. Godina e Lidhjes së Shkrimtarëve është një prej ndërtesave
që, sipas arkitektëve, ka vlera në etapat e ndërtimit të kryeqytetit. Një
pjesë e materialeve që janë përdorur për ndërtimin e këtij objekti, si
shtresa mermer, tulla dekor mozaikë, kanë ardhur nga importi. Në fillim
godina shërbeu si Shtëpi e Oficerëve. I gjithë Bulevardi "Musolini", sot
Rruga e Kavajës, shoqërohej nga ndërtime jo më shumë se tre dhe
katërkatëshe. Nga Sheshi "Skënderbej" dikur shihej fare normal ndërtesa e
bukur, e krijuar nga materiale të shtrenjta për kohën. Në pamjen ballore 6
harqe krijonin verandën e godinës. Tani harqet janë mbyllur, ndërsa
ornamenteve u është bashkangjitur pa shumë kuptim materiali i duraluminit, i
preferuar në këto vite ndryshimesh. Megjithatë, vlen të theksohet se
ndërhyrjet në pamjen e jashtme janë minimale, duke ruajtur trajtën e
dikurshme të kësaj godine. Kur u ndërtua ajo shërbeu si Shtëpia e Oficerëve,
ndërsa vite më vonë, pas Çlirimit, godina u kthye në Pallatin e Progresit
Teknik. Në fillim të viteve '70 në ndërtesën e hijshme në Rrugën e Kavajës u
vendos Lidhja e Shkrimtarëve, duke marrë fund kështu lëvizjet e "Lidhjes"
dhe "destinacionet" e godinës. Më parë, Lidhja e Shkrimtarëve pat qenë e
vendosur në ish-vilën e Musa Jukës, duke pasur "klubin" e saj në ambientet e
Teatrit Kombëtar, ndërsa që prej fillimviteve '70 e deri më sot qëndron e
vendosur në ish-Shtëpinë e Oficerëve.