E Hënë 23 Gusht 2004 http://www.panorama.com.al/

Faqe 6 – Politikë

LZHK-PD, beteja për të djathtët

PLL mes mbretit dhe Berishës

Partia Demokratike dhe Lëvizja për Zhvillim Kombëtar e shpallur nga pretendenti për fronin mbretëror, Leka I, nuk do të bëjnë asnjë negociatë për marrëveshje parazgjedhore. Sipas drejtuesve të lartë të PD-së, lëvizja e shpallur nga Leka I është një lëvizje që nuk do të përfshihet në projektin parazgjedhor të PD-së për koalicionin me partitë e djathta. Ndërkohë, mundësinë e një koalicioni parazgjedhor e kanë përjashtuar edhe vetë përfaqësuesit e LZHK-së, të cilët e konsiderojnë lëvizjen me përmasa të interesit kombëtar. “Ne jemi të hapur për të gjithë ata që dëshirojnë të kontribuojnë për një Shqipëri ndryshe”, janë shprehur përfaqësuesit e LZHK-së, duke i bërë thirrje të gjithë shqiptarëve, pa dallim partiak, që t´i bashkangjiten lëvizjes.

Gjithsesi, mes PD-së dhe LZHK-së mbetet për t´u sqaruar pozicioni i ardhshëm i PLL-së, çka mund të vendosë edhe për lëvizjen e një pjese të elektoratit. Kreu legalist, Ekrem Spahia, i cili drejton një parti që ka si elektorat mbështetësit e monarkisë, por që është në aleancë me PD-në, ende nuk ka dhënë ndonjë deklaratë që të përcaktojë pozicionin e ardhshëm elektoral.

Enigmat e Spahisë
Lajmi se, LZHK do të konkurojë në zgjedhjet e vitit 2005 në të gjitha zonat elektorale me kandidatët e saj, ka vënë jo pak në pozitë të vështirë kreun legalist. Pozicioni i Spahisë është vështirësuar edhe më tej pas idesë së hedhur nga përfaqësuesit e mbretit, për të patur një grup parlamentar që të përfaqësojë LZHK-në në Kuvend. Nëse do të realizohet kjo kërkesë, atëherë deputetët legalistë ose do të pranojnë shkëputjen nga PD e të hyjnë në listat e LZHK-së, ose do të mbeten me PD dhe më pas të rrezikojnë humbjen e të gjithë elektoratit si parti. “Me fillimin e sesionit të ri parlamentar, do të sqarohet edhe pozicioni i deputetëve të PLL-së”, kanë deklaruar drejtuesit legalistë.

Ndërkohë, nëse LZHK do të arrijë të formojë grupin e vet parlamentar, pritet që të ketë në grupin e saj edhe deputetë të PBK-së. “Grupi parlamentar jep mundësinë e iniciativave ligjore nga LZHK”, kanë shpjeguar përfaqësuesit politik të Lëvizjes për Zhvillim Kombëtar.