Pretendenti i fronit mbretëror, Leka I, ka kërkuar dje mbështetjen e elektoratit legalist në të gjithë Shqipërinë për lëvizjen e iniciuar prej tij, Lëvizja për Zhvillim Kombëtar.

Ai bëri thirrje në sallën ku mbështetësit e monarkisë ishin mbledhur për të përkujtuar 80-vjetorin e Triumfit të Legalitetit, ose të kundërevolucionit të 24 dhjetorit 1924, kur mbreti Zog rierdhi në pushtet. “Ne besojmë se të gjithë legalistët, duke kryer detyrën e tyre me patriotizëm, do të japin kontribut në Lëëvizjen për Zhvillim Kombëtar”, ka theksuar Leka I. Në mesazhin e tij drejtuar audiencës, ai ka vënë në dukje se pritshmëria popullore për një ”politikë ndryshe” është dhe mbetet e madhe. “Ky është shansi historik për ta bërë Shqipërinë një shtet modern dhe me dinjitet kombëtar”, ka deklaruar Leka, duke vënë theksin tek ideja se LZHK-ja është instrumenti i duhur për ta përmbushur këtë pritshmëri. Komentet e veta Leka I i bëri me anë të një mesazhi drejtuar sallës, të cilin nuk e lexoi vetë. Në emër të oborrit mbretëror, përshëndetjen e lexoi Uillson Ibrahimllari. Në tribunën e rastit në krahun e tij të djathtë ishte kreu i PLL-së, Ekrem Spahia, ndërsa në të majtë qëndronte i biri, princi Leka, tashmë, i angazhuar në lëvizjen politike të të atit.

Triumfi i Legalitetit
Simpoziumi shkencor me rastin e 80-vjetorit të Triumfit të Legalitetit në dhjetor 1924, u organizua nga partia Lëvizja e Legalitetit. Në të mbajtën disa kumtesa historianë e studiues të politikës, si Bajram Xhafa, Abdi Baleta, Murat Basha dhe të tjerë. Ndërkohë, në përshëndetjen e tij, Leka I, me një fjalim shumë të shkurtër, tha se përkujtimi i ksaj ngjarjeje historike duhet t’i bëjë shqiptarët t’i kthejnë sytë në kërkim të së ardhmes. “80 vjet më parë me moton për të rikthyer legalitetin -legjitimitetin, u mbrojt pushteti i ligjshëm për të zhvilluar shtetin modern shqiptar, mbi bazën e ligjit, me moton ‘Atdheu mbi të gjitha’”, ka vlerësuar ai lëvizjen e babait të vet, mbretit Zogu I. E ardhmja që kërkohet aktualisht, ka vërejtur Leka, qëndron në thelb të LZHK-së, e cila kërkon mbështetjen e gjithë shqiptarëve. Pretendenti i fronit tha se LZHK-ja po merr përgjegjësinë kombëtare për të realizuar ndryshimin, pasi që në ditën e saj të parë ajo pati për mision të ringjallë besimin e humbur tek e ardhmja dhe tek njeri-tjetri, për të vendosur shtetin e së drejtës, zbatimin e ligjit, pronën private, rendin dhe sigurinë e secilit. Në tribunën e rastit pranë Lekës I binte në sy mungesa e disa drejtuesve kryesorë të LZHK-së, si Dashamir Shehi dhe Maksim Begeja.

Baleta, prurja më e re në aleancat e LZHK-së

Historiani dhe politikani Abdi Baleta dhe partia e tij “Rimëkëmbja Kombëtare” duket se janë prurja më e re në koalicionin shumëpartiak që përbën Lëvizjen për Zhvillim Kombëtar. Lëvizja e iniciuar nga pretendenti i fronit mbretëror duket se do ta zgjerojë spektrin e vet me partinë nacionaliste të Abdi Baletës. Përbërja e saj e deritanishme përfshin PLL-në, konservatorët, Partinë Fshatare, si dhe partinë e Dashamir Shehit. Ndërkohë, Baleta u shfaq dje në simpoziumin shkencor për 80-vjetorin e Triumfit të Legalitetit ku mbajti një kumtesë të titulluar “Një vështrim politologjik mbi Triumfin e Legalitetit”, në të cilën mbreti Zog vlerësohej si burrë shteti, më i shquari mes shqiptarëve. Në kumtesë Baleta sulmoi ashpër Partinë Demokrtike dhe kryetarin e saj, Sali Berisha, të cilët i cilësoi si të papajtueshme me idetë e zogizmit. Baleta tha se ”berishizmi”, siç e cilësoi ai politikën e PD-së, nuk mund të jetë dakord me LZHK-në, për shkak të mjaft gabimeve të rënda që ka bërë. Baleta kujtoi para të pranishmëve, në shumicën e tyre ish-militantë të PD-së dhe të koalicionit “Bashkimi për Fitore”, dëbimin e Lekës I në vitin 1993, si dhe thirrjen për të braktisur trashëgiminë e mbretit Zog. Afrimi i Abdi Baletës në LZHK kishte disa kohë që përflitej mes mbështetësve të kësaj lëvizjeje, pasi mësohet se disa nga përfaqësuesit e saj kanë kundërshtuar përfshirjen e tij. Baleta njihet si politikan nacionalist i së djathtës që u bashkua me PD-në në ngjarjet e vrrullshme që pasuan dy vitet e parë të kalimit të kësaj partie në opozitë, veçanërisht në protestat pas vrasjes së deputetit Hajdari.

LZHK
Referendumi, kusht bashkëpunimi

Referendumi për formën e regjimit pritet të jetë kushti i LZHK-së për të ndihmuar krijimin e qeverisë së ardhshme, nëse rezultatet elektorale do të jenë të atilla që ta bënin pjesëmarrjen e saj vendimtare. Kështu, pretendenti i fronit mbretëror, Leka I, nuk e ka fshehur këtë fakt, madje e ka përsëritur sa herë është pyetur se do të kërkojë një tjetër referendum për formën e regjimit. Referendumi i vitit 1997 cilësohet tërësisht i manipuluar, meqë nuk përfaqësoi vullnetin e shqiptarëve.