27062004

LEKA ZOGU, Pretendenti i Fronit:
"Vleresojme se ceshtja came eshte me rendesi kombetare dhe duhet te zgjidhet sipas te gjitha te drejtave nderkombetare, por me nje angazhim te vendosur te cdo strukture te Shtetit Shqiptar. Si hap i pare, qe duhet te kryhet nga shteti grek, duhet te abrogohet Ligji i Luftes, qe mbahet juridikisht ne menyre absurde. Sipas cdo norme nderkombetare, kur nje shtet mban nje ligj lufte me fqinjin e vet, atehere cdo perfaqesues i tij juridikisht quhet okupator. Kjo situate absurde, mbahet e qellimshme qe te mos u kthehen pronat shqiptareve ne Greqi".

ARBER XHAFERRI, Kryetar i PDSH Maqedoni:

"Shqiptaret, camet dhe kosovaret shpesh kane qene objekt i ndeshkimeve. Ndryshe nga Franca, nacionalizmi ne Gadishullin e Ballkanit, u shfaq me trajta te pergjysmuara dhe shpeshhere ne kemi dilema qyteteruese. Zgjidhja per ceshtjen e pronave te popullsise came egziston, por pala greke duhet te pranoje fajin per genocidin e ushtruar ndaj cameve".

SABRI GODO, Politikan dhe shkrimtar:

"Rezoluta per ceshtjen came u miratua ne darke nga te gjithe deputetet shqiptare, e u hodh poshte ne mengjes nga socialistet. Jemi krejtesisht ne kushte te pabarabarta per te kerkuar nje zgjidhje per camet. Shkrimtaret dhe studiuesit came si Bilal Xhaferri etj, kane bere nje pune te palodhur per ceshtjen came, por kjo eshte fare pak nga ajo qe kane bere qarqet greke neper bote per zhdukjen e kesaj ceshtjeje. Shteti grek duhet t'u ktheje pronat te gjithe cameve dhe te drejten per t'u rivendosur ne to, ne qofte se camet do te duan".

--------------------------------------------------------------------------------

Ceshtja "came", e harruar nga politika

Ne 60 vjetorin e genocidit grek ndaj popullsise came, politikane, historiane e studiues kerkojne qe pala helene te pranoje fajin dhe te nise zgjidhjen e ceshtjes se pronave. Leka Zogu: "Te abrogohet Ligji i Luftes, pasi mbahet ne menyre absurde"

Zgjidhja perfundimtare e ceshtjes se pronave came eshte ne interesin e te dyja paleve, si per shqiptaret, ashtu edhe per greket, dhe ne te njejten menyre i sherben stabilitetit te rajonit te Ballkanit. Kjo ka qene tema kryesore e konferences se djeshme, e zhvilluar nga shoqata per te drejtat e cameve, ne kuader te 60-vjetorit te genocidit grek te ushtruar mbi popullsine came.

Gjate kesaj konference, ne te cilen u diskutua mjaft gjate per ceshtjen came dhe pronat e tyre te Greqi, moren pjese nje sere personalitetesh shqiptare, duke nisur qe nga politikane, historiane e studiues te njohur. Pothuajse te gjithe te ftuarit, ne fjalen e tyre te mbajtur me kete rast, kane theksuar faktin se ceshtja came tashme, eshte lene pas dore nga politika shqiptare, ndersa sipas tyre, qeveria greke eshte e interesuar qe kjo ceshtje te mos hapet per diskutim.

Shkrimtari dhe politikani i njohur, Sabri Godo, u shpreh se shkrimtaret came, e mbi te gjithe Bilal Xhaferri, kane bere nje pune te shkelqyer per sensibilizimin e ceshtjes se popullsise came, por kjo nuk ka mjaftuar kundrejt punes se qarqeve greke per ta fshire ate. "Rezoluta per ceshtjen came u miratua ne darke nga te gjithe deputetet shqiptare, e u hodh poshte ne mengjes nga socialistet. Jemi krejtesisht ne kushte te pabarabarta per te kerkuar nje zgjidhje per camet. Shteti grek duhet t'u ktheje pronat te gjithe cameve dhe te drejten per t'u rivendosur ne to", nenvizoi Godo, ne fjalen e tij. Nderkaq, edhe me optimist eshte treguar Kryetari i Partise Demokratike te Maqedonise, Arber Xhaferri, i cili vuri ne dukje se zgjidhja e kesaj ceshtjeje egziston, dhe ajo duhet te nise me pranimin e fajit nga pala greke. Kurse, Pretendenti i Fronit Mbreteror Leka i I-re, ne letren e tij pershendetese drejtuar kesaj konference, e cilesoi ceshtjen ne fjale me rendesi kombetare, qe duhet te zgjidhet sipas te gjitha te drejtave nderkombetare. "Si hap i pare, qe duhet te kryeje shteti grek, duhet te abrogohet Ligji i Luftes, qe mbahet juridikisht ne menyre absurde. Sipas cdo norme nderkombetare, kur nje shtet mban nje ligj lufte me fqinjin e vet, atehere cdo perfaqesues i tij juridikisht quhet okupator", thuhej ne letren pershendetese.

Nderkohe, ne perfundim, u vu ne dukje se zgjidhja e kesaj ceshtjeje te debatuar kohet e fundit gjeresisht ne politiken shqiptare, arrihet me integrim dhe jo me veprime te natyres ushatarake.

--------------------------------------------------------------------------------

Godo: Moisiu do ta ktheje ligjin e pronave

Ideologu republikan, Sabri Godo, shprehet i bindur se Presidenti Alfred Moisiu, do ta ktheje rishtazi ne Kuvend, ligjin per pronat. Sipas Godos, gjate ketyre diteve te fundit, Kreu i Shtetit, perpos tij, eshte keshilluar edhe me njerez te tjere, lidhur me kete ligj. "Natyrisht, ne nuk jemi ne nje mendje me te gjitha pikat. Ky ligj nuk e zgjidh problemin e pronave. Ai i le keshtu sic jane, me te tera abuzimet dhe shperdorimet qe jane bere me pronat dhe tokat, bazuar ne ligjet 7501 dhe ne ligjin mbi tokat e fermave. Ky ligj ngrihet mbi nje baze qe nuk i qendron parimit te kthehet prona tek i zoti. Ky eshte objeksioni im kryesor", nenvizon Godo. Sipas tij, perpos kesaj dhe ne kete pike ai meton se bie ne nje mendje edhe me Presidentin Moisiu, procedimi per hartimin e ketij ligji nuk ka qene normal. Godo nenvizon se, ai nuk eshte bere bazuar ne nje studim, pasi nuk dihet sa jane pronaret qe do te kompesohen fizikisht, sa jane mundesite e shtetit per te komepensuar, sa jane ata qe do te kompensohen ne vlere dhe sa eshte vlera. "Pra gjithshka ngrihet ne supozime, duke mos sqaruar asgje. Ne nje Parlament normal, nje ligj i tille nuk mund te pranohej per t'u diskutuar. Qe ne piknisje ligji eshte nisur gabim. Thuhet se eshte nje nisem e 20 deputeteve, qe kane bashkepunuar me OSBE. Ky eshte nje ligj qe ka te beje me Qeverine, e cila duhet te thote fjalen e saj, meqenese ka kosto financiare", thote Godo. Ne keto kushte, sipas tij, nuk ka perse ligji te hyje nga dera e pasme ne Kuvend. "Keto jane anashkaluar, duke u nisur vetem nga qellimi qe e lane pas dore kete pune per 6 vjet dhe tani o burra ta bejme si ta bejme, meqenese kjo eshte kerkese kembengulese edhe e bashkesise nderkombetare. Ajo qe eshte e sigurte, sipas meje, eshte fakti se Presidenti, do te refuzoj dekretimin e ketij ligji", nenvizon Godo. Sipas tij, meqenese ishte e pamundur te gjendej nje gjuhe e perbashket midis dy forcave kryesore politike per t'i anulluar keto ligje qe jane ne kundershtim te hapet me Kushtetuten, atehere nga e keqja e madhe mund te pranohej ligji si strukture, por qe te amendohej ne menyre qe te rregullohen, aq sa eshte e mundur, te tera abuzimet qe jane bere ne zbatimin e ketyre ligjeve. Por, sipas tij, as kjo nuk u be. Konflikti, nenvizon Godo, eshte i hapur dhe se ligji me teper do te shtoje konfuzionin sesa do te rregulloje pune. Sipas ideologut republikan, terheqja e PD per ceshtjen e kryetarit te komisionit, ishte aspak bindese, pasi ajo kishte aresye te tjera me te medha per ta rrezuar kete ligj, pavaresisht se PD ngul kembe per te mbajtur ne fuqi ligjin 7501, ne te cilin eshte bashkeautore. "PD "vari kapelen ne nje cengel qe nuk mban". Asnjehere nuk e merr seriozisht shkakun per te cilin u largua PD nga Parlamenti, kur diskutohej ky ligj", nenvizon Godo.

--------------------------------------------------------------------------------

28/06/2004 http://www.shekulli.com.al/

Nënkryetari i komisionit të Ligjeve tha se nëse Presidenti nuk e rikthen ligjin për diskutim, këtë do ta bëjë PD

PD: Pronat, do të ndryshojmë ligjin kur të vijmë në pushtet

N.Perndoj

Partia Demokratike do të rikthejë për rishqyrtim ligjin e pronave në Kuvend në rast se ajo fiton zgjedhjet parlamentare të vitit 2005. Nënkryetari demokrat në komisionin e Ligjeve, Fatos Beja deklaroi dje se të gjitha nenet që janë miratuar nga maxhoranca pa praninë e opozitës do të rishqyrtohen nga PD ku ajo të marrë pushtetin. Duke hedhur dyshime mbi firmën, që do të hedhë ose jo presidenti për dekretimin e këtij ligji, Beja shtoi se gjithçka mbetet e hapur për diskutim. “Ne do ta sjellim ligjin e pronave në Kuvend në rast se si nuk rikthehet nga presidenti i Republikës Alfdred Moisiu. Me marrjen e pushtetit ne do të ndërhyjmë për këtë ligj që është miratuar jo me vullnetin tonë dhe që ka defekte që me pikënisjen e tij”, -tha ai. Beja sqaroi se grupi parlamentar i Partisë Demokratike do të rikthejë të gjitha nenet që nuk u diskutuan, që do të thotë se deputetët do t’i kthehen debateve dhe rishqyrtimit të plot 15 neneve të ligjit për pronat. Ndër nenet e diskutuara nga opozita do të jetë edhe kryesimi i Komisionit Shtetëror të Kthimit të Pronave. Deputetët demokratë nuk janë dakord që kryesimi i këtij komisioni të bëhet me vendim të Këshillit të Ministrave, por nga presidenti Alfred Moisiu ashtu siç ishte parashikuar edhe në variantin fillestar të OSBE. “Institucioni që do të drejtojë procesin dhe do të administrojë shpërndarjen e pronave, zbatimin e ligjit, duhet të ishte i përbërë nga dy përfaqësues të opozitës, dy nga pozita dhe një i miratuar nga presidenti i Republikës, por që në fakt nuk ndodhi kështu”, -shtoi Beja. Ligji për pronat u miratua tre javë më parë nga maxhoranca pa praninë e opozitës. Ky ligj është kundërshtuar së pari nga OSBE dhe më pas edhe nga presidenti. Ky i fundit ka filluar dhe po vazhdon të ketë një sërë kontaktesh me përfaqësues të forcave politike. Krahas opozitës, kësaj here në negociata kanë ndryshuar qëndrim edhe partitë e vogla në pushtet, kryetarët e të cilave janë shprehur se ligji për pronat duhet të kalojë me konsensus. Ndërsa vetë presidenti Moisiu është shprehur se ligji për pronat ka nevojë për konsensusin e të gjithëve dhe se nuk mund të zgjidhet me thëniet: “kur të vij unë në pushtet do të ndryshoj ligjin”

-----------------------------------------------

Faqe 7 - Politikë

28Qershor 2004

kompensimi i të përndjekurve

fatura financiare

Ja pikat më të nxehta të debatit. Në Komisionin e Ekonomisë do të raportojnë krerët e tri shoqatave

Sot vendoset “pensioni” i të përndjekurve

PS: Të zbardhen abuzimet me statusin e të burgosurit politik

Nikolin Todolli

Shuma e lekëve që do të përfitojnë ish të përndjekurit politikë pritet të përcaktohet sot përfundimisht.

Anëtarët e Komisionit Parlamentar të Ekonomisë do të dëgjojnë sot paradite përfaqësuesit e shoqatave të ish-të përndjekurve politikë, për të përcaktuar skemën e kompensimit të tyre. Ndërkohë, Kuvendi ka parashikuar që, nëse shqyrtimi i projektligjit për kompensimin e kësaj shtrese ka mbaruar nëpër komisionet parlamentare, atëherë ligji të kalojë për votim në seancën e sotme të pasdites. Megjithatë, deputetët e opozitës kanë kundërshtuar që në fillim skemën financiare të propozuar nga ministri i Financave, Arben Malaj, i cili kërkonte që kompensimi të jepet në formën e pensionit. Opozita dhe vetë përfaqësuesit e shoqatave të ish të përndjekurve kanë protestuar javën e kaluar gjatë një mbledhjeje të Komisionit Parlamentar të Ligjeve ndaj propozimit të qeverisë, sipas të cilit, kompensimi ndahet për pesë kategori, duke filluar që nga 100 lekë në muaj deri në 5000 lekë në muaj. Ndërsa qeveria parashikon t’u japë familjeve të 639 të pushkatuarve 5000 lekë për çdo muaj.

Propozimi i PS-së
Deputetët e PS-së kanë propozuar një procedurë të gjatë deri në zgjidhjen e faturës përfundimtare për kompensimin e ish-të përndjekurve politikë. Anëtarët e Komisionit Parlamentar të Ekonomisë kanë theksuar gjatë këtyre ditëve se Kuvendi duhet të zbardhë të gjtiha abuzimet e kryera në emër të të përndjekurve politikë. Sipas tyre, mjaft persona, madje edhe pushtetarë të PD-së, kanë përfituar nga letrat me vlerë që u përdorën për blerjen e disa ndërmarrjeve gjatë qeverisjes demokratike. Mekanizmi që propozojnë socialistët është ngritja e një komisioni parlamentar hetimor, i cili do të verifikojë edhe shifrat e sakta për të personat që kanë qenë të dënuar politikë, si dhe për numrin e të pushkatuarve. Megjithëse qeveria ka përdorur të dhënat e Ministrisë së Drejtësisë për të hartuar skemën e kompensimit financiar për këtë shtresë, shoqatat e ish të përndjekurve kanë sjellë në Kuvend argumente që i kanë detyruar komisionerët të rinegociojnë me ta.

Demokratët
Negociata me socialistët për faturën

Partia Demokratike do të fillojë sot negociatat me mazhorancën për faturën e ish të përndjekurve politikë dhe kohëzgjatjen e saj. Si pikë referimi për dëmshpërblimin do të jenë precedentët e mëparshëm për disa zyrtarë të lartë shtetërorë. Edhe pse janë të bindur që një skemë e tillë nuk do të funksionojë, Pjetër Arbnori ka kërkuar që për ish të përndjekurit të ndiqet shembulli i faturës që u përdor për dëmshpërblimin e Fatos Nanos.

Venecia: Kompensim me lekë në dorë për tre vjet

Përgjigjja “e shumëpritur” e Komisionit të Venecias, e kërkuar nga PS-ja, nuk ka vonuar. Ekspertët e këtij institucioni që mbron të drejtat ligjore në botë, kanë theksuar se ish të përndjekurit politikë duhet të kompensohen me para në dorë brenda tre vjetësh.

Sa kanë përfituar pas vitit ’90

Kompensim financiar 2225 milionë lekë
Letra me vlerë privatizimi 17500 milionë lekë
Të drejta studimi 995 copë
Blerje/ndërtim banesash 1776 banesa

Të dhënat e Ministrisë së Drejtësisë

Të dënuar politikë 9807
Shuma që përfitojnë 4192000 lekë

Të dhënat e shoqatave

Të dënuar politikë 23963
Shuma e përfitimit 686088000 lekë

---------------------------------------------------------------

Kryeredaktor Mero Baze

E Enjte, Korrik 01, 2004 E Hene, Qershor 28, 2004

Raporti

Raporti i Organizatës së Kombeve të Bashkuara për drogën i vitit 2004, përmend në shumë vende Shqipërinë

OKB: Grupet shqiptare zgjerojnë tregun e heroinës në shumë vende

Në raportin e Kombeve të Bashkuara thuhet se grupet shqiptare të trafikut të heroinës kanë zgjeruar tregun dhe e kanë shtrirë atë në shumë vende. Sipas këtij raporti Shqipëria është një ndër vendet më të rëndësishme të globit në prodhimin dhe trafikun e cannabis sattiva.

Autoritetet turke vazhdojnë të prishin laboratoret e heroinës, veçanërisht në pjesën lindore të vendit. Një pjesë e madhe e heroinës që shitet në tregun e Europës Lindore, raportohet se është nën kontrollin grupeve turke dhe kurde. Mirëpo vitet e fundit grupet shqiptare me origjinë nga Kosova, Maqedonia dhe Shqipëria, kanë fituar shumë terren dhe e kanë zgjeruar tregun e heroinës në shumë vende.

Zyra kundër Drogës dhe Krimit e Kombeve të Bashkuara në Vienë të Austrisë ka prezantuar raportin për drogën ditën e djeshme, me 26 qeshor, pikërisht në ditën botërore kundër drogës. Me këtë rast edhe drejtori ekzekutiv i Zyrës Antonio Maria Costa ka dhënë një konferencë për shtyp në Moskë të Rusisë.

Kreu i Agjencisë së Kombeve të Bashkuara për drogën dhe krimin e organizuar, Antonio Maria Costa, ka shprehur shqetësim për kultivimin e drogës së paligjshme në Afganistan.

Ai e bëri këtë deklaratë në Moskë, gjatë prezantimit të një raporti të OKB-së për drogën në botë. Raporti tregon se rritja globale e opiumit po përqendrohet gjithmonë e më shumë në Afganistan. Ndërkohë që Europa, megjithëse po tregon shenja stabiliteti të tregtisë së kokainës, veçanërisht në Britani dhe Gjermani, po sheh rritje në Spanjë, Francë, Itali, Zvicër, Austri dhe Ballkan

Afganistani, shqetësues për prodhimin e heroinës

Raporti vjetor i OKB-së tregon se Afganistani tani prodhon tani 3/4 e furnizimeve ilegale me opium. Vihet re një rënie në vazhdim në kultivimin e lules së opiumit në Azinë Juglindore, por prodhimi i saj në Afganistan është rritur dhe ka ruajtur balancën. Kreu i agjensisë së OKB-së, Antonio Maria Costa, tha se nuk është e vështirë t'i bësh fermerët afganë të kultivojnë bimë që nuk ndalohen me ligj, por problemet janë gjetkë. "Shqetësimi i madh që kemi ne në Afganistan, është ekonomia e drogës. Kjo po hedh rrënjë gjithmonë e më shumë në shoqërinë afgane. Për të çrrënjosur kulturën e pasurimit të shpejtë nga kultivimi dhe trafikimi ilegal, do të jetë më e vështirë sesa shfarosja e fushave ku rriten bimë të tilla," tha ai.

185 milion përdorues droge në të gjithë botën

Bazuar në raportin e vitit 2004 për drogën, të prezantuar dje, rezulton se 185 milion njerëz janë konsumatorë të lëndëve narkotike. Rreth 3 përqind e popullsisë së përgjithshme të botës, dhe moshat mes 15 dhe 64 vjeç, janë përdorues të drogës. Studimi tregon se prodhimi i kokainës së pastër nga kokaina bimë, është rritur me 30 përqind nga katër vjetët e kaluar.

Droga me e përdorur rezulton të jetë cannabis sattiva, me 150 milion përdorues në të gjithë botën. Raporti tregon se është zgjeruar tregu i cannabis në Europën lindore. Cannabis ndiqet për nga numri i përdoruesve nga empfetamina, me 38 milion përdorues, tetë milion prej të cilëve përdorin ecstasy. Kokaina regjistron një numër përdoruesish prej 13 milion njerëzish në të gjithë botën, ndërsa heroina konsumohet nga 15 milion njerëz.

Shqipëria përmendet shpesh në raport

Zyrtari i OKB-së tha se lufta kundër terrorizmit, i ka dhënë luftës kundër trafikimit të drogës një shtysë të re. Shtimi i shkallës së ndërgjegjësimit për lidhjet midis "parave të pista" dhe terrorizmit, ka detyruar shumë vende të forcojnë kontrollet. Z. Maria Costa bëri thirrje që të forcohet lufta kundër korrupsionit, e cila sipas tij, ndihmon trafikuesit. Shqipëria dhe shqiptarët, duke folur për përhapjen e kanabisit, zyrtari i OKB-së tha se në raport thuhet se ai po kultivohet në shumë vende në Europë. Në raport shkruhet: "Vendi i cituar më shpesh si burim në Europë, është Shqipëria, e cila furnizon shumicën e vendeve në rajonin e Ballkanit dhe në Itali". Në raport po ashtu thuhet se grupet shqiptare nga Kosova, Shqipëria dhe Maqedonia vitet e fundit duket se po zgjerojnë tregun e tyre të shitjes së heroinës me shumicë në shumë vende. Raporti thotë se shumica e heroinës që ka për destinacion Europën Perëndimore, kalon nga Turqia, nëpër Ballkan. Ky treg, sipas raportit të OKB-së, njoftohet se është në duart e grupeve turke e atyre kurde. Zyrtari i OKB-së po ashtu u bëri thirrje qeverive të vendeve të ndryshme që të shtojnë përpjekjet për të shmangur përdorimin e drogës.

Heroina. Grupet shqiptare zgjerojnë tregun

Europa merr rreth 28 përqind të tregut global të drogës në vitin 2002. Rreth 90 përqind e sasisë së përgjithshme që futet në tregun europian të lëndës narkotike futet nga Afganistani. Një vend të rëndësishëm në tregun europian të heroinës e zë Ballkani, i cili është shndërruar në një nga pikat kryesore të furnizimit të Europës Lindore. Ende në vend të parë për këtë gjë ngelet Turqia. Vendet nordike kanë raportuar se vendet balltike janë një pikë e fortë për trafikun e heroinës. Sasi shumë të mëdha janë trafikuar nëpërmjet Rusisë, Bjellorusisë, në Poloni për t'u dorëzuar në Gjermani. Një sasi e madhe heroine që gjendet në Gjermani kalon direkt nga Azia Qëndrore në Gjermani. Rritja e pranisë së drogës vihet re në Europë. Veçanërisht kemi një rritje të fortë të morfinës në Turqi. Autoritetet turke vazhdojnë të prishin laboratoret e heroinës, veçanërisht në pjesën lindore të vendit. Një pjesë e madhe e heroinës që shitet në tregun e Europës lindore, raportohet se është nën kontrollin grupeve turke dhe kurde. Mirëpo vitet e fundit grupet shqiptare me origjinë nga Kosova, Maqedonia dhe Shqipëria, kanë filluar të fitojnë shumë terren dhe e kanë zgjeruar tregun e heroinës në shumë vende. Në pjesën jugore të Anglisë, biznesi i heroinës mësohet se kontrollohet nga grupe aziatike, konkretisht pakistanez. Në pjesën jugore të Anglisë tregu i heroinës vazhdon të kontrollohet nga grupe turke. Tregu i përgjithshëm i heroinës në Europë, relativisht kontrollohet nga grupet turke.

Megjithëse sasia e heroinës që hyn në Europë është rritur, çmimi i saj nuk ka lëvizur. Gjithsesi ka pasur një rënie të sasisë së heroinës, kjo e ndikuar nga reduktimi i mbjelljes së opiumit në Afganistan. Mirëpo duke pasur parasysh që nga mbjellja e opiumit deri në përpunimin dhe shndërrimin e saj në heroinë, gjasat janë që sasia e heroinës që futet në Europë të rritet sërish për vitin 2004. Gjermania ka raportuar për një rritje të heroinës që futet në Gjermani.

Kokaina, Spanja e Holanda në vend të parë për import

Rritja e trafikut të kokainës në vendet përreth Europës, ka bërë që edhe në Europë të rritet trafiku i kokainës. Shumica e kokainës futet në Itali duke u tranzituar nga Spanja dhe Holanda. Kokaina që futet në Britaninë e Madhe tregon për një rritje të tranzitit nga Spanja dhe Franca. Kokaina futet në Spanjë dhe në Francë nga vendet amerikano-latine nëpërmjet Karaibeve. Autoritetet franceze raportojnë se pesha domethënëse kokaine vijnë përmes Holandës, pra 44 përqind e kokainës që u fut në Francë në 2002, ishte e destinuar për në Hollandë. Belgjika raporton se vetëm 5 përqind e kokainës së futur në këtë vend ishte për tregun lokal, 30 përqind ishte e destinuar për në Holandë dhe pjesa tjetër për vendet e tjera të Europës. Gjermania raporton se pjesa më e madhe e heroinës, futet në vend nëpërmjet Holandës. Rreth 2/3 e kokainës së futur në Gjermani, raportohet se si destinacion kanë pasur Spanjën, nëpërmjet së cilës kokaina kalohet në Itali. Austria raporton se kokaina futet në territorin e saj nëpërmjet Gjermanisë dhe Serbisë e Malit Zi, dhe shumica e saj është e destinuar të kalojë në Itali dhe në Holandë. Vendet që janë futur në Europë, janë integruar në rrjetin paneuropian të trafikut. Ata janë bërë tregtuese direkte mes vendeve amerikano-latine dhe vendeve të tjera të Europës. Autoritetet polake raportojnë se pjesa më e madhe e kokainës që futet në vendin e tyre, hyn nga Turqia dhe është e destinuar për në Gjermani, Hollandë, Angli etj.. Hungaria raporton për importim të kokainës nga Austria, Hollanda dhe Spanja për t'u finalizuar në Itali.

Spanja dhe Holanda ngelen vendet që "importojnë" më shumë kokainë, por është rritur së shumti edhe pesha e vendeve të Europës juglindore, (ku bën pjesë dhe Shqipëria,) në trafikun e kokainës.

Shqipëria një ndër vendet me prodhimin më të lartë të cannabis

Prodhimi global i cannabisit është përqendruar në Marok, pastaj vjen Pakistani dhe më pas Afganistani. Burim tjetër shumë i rëndësishëm në prodhimin e cannabis janë vende si India, Libani, Shqipëria, dhe vende të Azisë qëndrore si Kazakistani, Kyrgizstani si dhe vende të tjera si Nepali, një numër vendesh të Afrikës dhe Federata Ruse. I vetmi vend në Amerikën Latine që prodhon sasi të mëdha cannabisi është Xhamajka. Grupe kriminale të këtyre vendeve e trafikojnë shumicën e drogës në Spanjë dhe në Holandë.

Costa: Në Shqipëri qendër e kokainës kolumbiane

Antonio Maria Costa vetëm pak ditë më parë deklaroi se në Europën Juglindore dhe konkretisht në Shqipëri gjendet një bazë e karteleve kolumbiane, për trafikun e kokainës. Sipas drejtorit ekzekutiv të Zyrës së OKB-së kundër Drogës dhe Krimit nga kjo bazë Shqipëria ka filluar të furnizojë gjithë Europën lindore, Rusinë e Ukrainën me kokainë. Deklarata e Costas është bërë vetëm pak ditë më parë dhe ka pasur një reagim të ashpër nga ana e Ministrisë së Rendit Publik. Më pas u tha se referenca e Costas ka qenë në të shkuarën, duke pasur parasysh bandën "kokaina", të Frederik Durdës, Arben Përballës dhe Sokol Koçiut.

Ministria e Rendit: OKB-në e gënjejnë të përjashtuarit e policisë

Nga ana e Ministrisë së Rendit nuk ka pasur një reagim zyrtar për raportin e Organizatës së Kombeve të Bashkuara. Në mënyrë jozyrtare drejtues të Ministrisë së Rendit kanë deklaruar se Organizata e Kombeve të Bashkuara, në ndërtimin e raportit është gënjyer nga persona në konflikt me ministrin Toska. Sipas këtyre drejtuesve, personat të cilët kanë bashkëpunuar me OKB-në, janë përjashtuar për moskorrektësi dhe vepra të ndryshme antiligjore nga Toska, dhe shfytëzojnë OKB-në për t'u hakmarrë ndaj ministrit.

Aktualiteti

Në kuadër të ditës ndërkombëtare të luftës kundër trafikut ilegal dhe abuzimit me drogën, në kryeqytet zhvillohen veprimtari sensibilizuese nën moton “Droga nuk është e pashërueshme”.

Statistikat jo zyrtare në Shqipëri flasin për 30 mijë persona që konsumojnë lëndë narkotike, ku vendin kryesor e zë marijuhana, heroina dhe më pak kokaina

Droga, përdoruesit pa qendra trajnimi shëndetësor

Faktorët që ndikojnë në përdorimin e drogës janë dramat personale apo familjare, mungesa e parave e shpresës për të ardhmen, dhunimi fizik, vetmia, depresioni, nevoja për të larguar streset dhe nevoja për dashuri

Alida Beqiri

Zyra e Kombeve të Bashkuara në Tiranë për drogën dhe krimin në bashkëpunim me disa Organizata jo Qeveritare zhvilluan dje veprimtari sensibilizuese për të luftuar përdorimin e drogës. Organizatorët marshuan dje në bulevardin kryesor në kryeqytet nën moton “Droga nuk është e pashërueshme”. Statistikat jo zyrtare në Shqipëri flasin per 30 mijë persona që konsumojnë lëndë narkotike, ku vendin kryesor e zë marijuhana, heroina dhe më pak kokaina. Aktivitetet e djeshme janë kryer në kuadër të ditës ndërkombëtare të luftës kundër trafikut ilegal dhe abuzimit me drogën. Shumica e përdoruesve të drogës, e marrin atë me shiringë. Në ditën ndërkombëtare kundër drogës, specialistët e qendrave të trajnimit, thonë se në Shqipëri ende mungon një qendër e mirëfilltë shkencore për trajtimin e përdoruesve të narkotikeve. “Sot është dita për një fushatë sensibilizuese për të treguar që droga është një sëmundje e shërueshme dhe nëse trajtohet mund të merren efektet pozitive”, thotë koordinatorja e UNODC, Ela Banaj. Sipas statistikave 64 përqind e përdoruesve marrin droge në mënyre intravenoze duke kaluar shpesh në overdozë. Prej disa vitesh ekziston qendra e zvogëlimit të dëmit “Aksion Plus” e cila u vjen në ndihmë përdoruesve të droges. Pjesa më e madhe e përdoruesve të drogës në Shqiperi vjen nga familje me të ardhura mesatare.

Rritet numri i përdoruesve të drogës, 75 përqind e tyre nga Tirana

Sot është dita ndërkombëtare e luftës kundër drogës. Numri i përdoruesve të drogës është rritur së tepërmi, edhe pse Shqipëria si vend nuk ka histori të përdorimit të drogës. Ka mjaft faktorë që ndikojnë në përdorimin e drogës. Sipas specialistëve, janë dramat personale apo familjare, mungesa e parave dhe e shpresës për të ardhmen, dhunimi fizik, vetmia, depresioni, nevoja për të larguar streset dhe nevoja për dashuri. Shifrat zyrtare të përdoruesve të pluhurit të bardhë edhe në Shqipëri, shpesh luhaten, për shkak sepse përdorimi i drogës është ilegal dhe është i pamundur të monitorohet. Ajo çka dihet, është se shumë prej përdoruesve mbërrijnë në gjendje të rëndë në klinikat spitalore dhe shpesh dalin prej andej të rehabilituar, por ka edhe raste kur pacientët nuk shkëputen dot prej varësisë. Mjekët e Spitalit Ushtarak në Tiranë pohojnë se që nga viti 1995 deri në vitin 2004, numri i përdoruesve të drogës ka ardhur në rritje. Kolonel Zihni Sulaj thotë se deri tani numërohen 7,800 pacientë që kanë mbërritur në këtë klinikë. Sipas doktorit, përdoruesit më të shumtë janë nga zonat urbane, dhe vendin e parë e zë Tirana me 75 % të numrit të përgjithshëm të përdoruesve që kanë mbërritur në këtë klinikë. Përdoruesit kryesisht janë meshkuj. Shqiptarët përdorin kryesisht drogat e forta. Kështu 90 % e pacientëve të këaj klinike kanë qenë përdorues të heroinës, më pak të kokainës, marijuanës, hashashit dhe lëndëve psikoaktive. Rrugët që përdorin për marrjen e drogave, janë ato të njohurat, kryesisht rruga intravenoze. Ndërkaq sipas mjekut, aplikuesit e kësaj rruge, sjellin rrezikshmëri për shkak se bëhen bartës të AIDS-it, hepatit B e C. Raste vdekjeje në këtë klinikë ka pak, por sipas mjekut, disa raste kanë vdekur pa mbërritur në spital. Droga jep efekte psikike të dëshiruara, të këndshme nganjëherë edhe të nevojshme, por përdorimi i saj sjell rrezikun e varësisë, abuzimit, që shkakton kriza e mungesës dhe shumë pasoja të tjera negative. Nga përdorimi i përsëritur i drogës, lind varësia psikologjike apo fizike, një formë e theksuar e skllavërisë ndaj drogës.

Prezenca e OSBE dhe “Emanuel” kujtojnë Ditën Ndërkombëtare të Drogës

Një aktivitet që ka për qëllim rritjen e ndërgjegjësimit për problemet e drogës në Shqipëri është organizuar dje në Tiranë në përkujtim të Ditës Ndërkombëtare të Drogës.

Aktiviteti “Të Rinjtë, Ndërtues të së Ardhmes” ka përfshirë një vizitë në Komunitetin Emanuel, i cili punon për rehabilitimin e përdoruesve të drogës dhe alkoolit në Shqipëri, fjalime nga autoritetet vendore, lexime poezish dhe një koncert nga një grup të rinjsh.

Ky aktivitet, i cili është organizuar bashkarisht nga Komuniteti Emanuel dhe Prezenca e OSBE-së, vjen në vazhdim të aktiviteteve të Prezencës, Zyrës së Kombeve të Bashkuara për Drogën dhe Krimin në Shqipëri, si dhe organizatave joqeveritare që merren veçanërisht me rritjen e ndërgjegjësimit për problemet e drogës dhe rolin që komuniteti mund të luajë në trajtimin e përdoruesve të drogës dhe integrimin e tyre në shoqëri.

Pjesëmarrja ka qenë e hapur për të gjithë të interesuarit. Transporti është siguruar nga organizuesit dhe kanë ardhur qytetarë nga Shkodra, Lezha, Durrësi dhe Elbasani. Aktiviteti ka nisur në orën 18:00, në Qendrën Emanuel, në komunën e Vaqarrit, Bashkia e Tiranës.