28/05/2004 http://www.korrieri.com/

PS-PD, konsensus per ligjin e pronave

Pasditen e djeshme, dy partite kryesore kane arritur konsensusin e kerkuar
per miratimin e projekt-ligjit per pronat duke hedhur poshte nenin per
"tatimin e jashtezakonshem". Ky ishte kushti kryesor qe i kishte vene PD,
mazhorances per ta miratuar perfundimisht kete projekt-ligj. Mediu: "Ligji
eshte antiparimor"

Renato KALEMI

Kuvendi i Shqiperise i ka hapur dje rrugen, miratimit te projekt-ligjit "Per
kthimin dhe kompensimin e pronave" te paraqitur nga Partia Socialiste dhe te
mbeshtetur edhe nga Organizata per Sigurim dhe Bashkepunim ne Evrope (OSBE).
Ne seancen e djeshme parlamentare, deputetet socialiste dhe ata demokrate
arriten konsensusin e kerkuar dhe hodhen poshte nenin per "tatimin e
jashtezakonshem", i cilesuar si "klecka" nga e cila varej vota "pro" e PD-se
per te miratuar kete projekt-ligj. Ne kete menyre, pasi socialistet jane
bindur per ta rrezuar kete nen, duket se gjithcka eshte e zgjidhur mes te dy
kraheve te kundert politike te vendit ne lidhje me kete ceshtje, mjaft te
debatuar gjate koheve te fundit. Tashme, per here te pare edhe ish-pronaret
shqiptare do te kene nje ligj te mirefillte qe do te tentoje te zgjidhe
kthimin dhe kompensimin e pronave te tyre, nje kusht ky, i vene edhe nga
strukturat evropiane per integrimin e Shqiperise ne to. Nderkaq, ata qe
kerkonin rrezimin e variantit te projekt-ligjit te paraqitur prej OSBE-se
dhe PS-se, ishin kryesisht deputetet e partive te vogla tradicionale
opozitare si, Partia Republikane, Levizja e Legalitetit apo edhe Balli
Kombetar, te cilat kesaj rradhe kane qene kunder qendrimit te partise me te
madhe te opozites (PD) per kete ceshtje. Keshtu, pas kalimit ne parim te
ketij projekt-ligji ne Kuvend, me konsensus mes PS-se dhe PD-se, eshte
realizuar edhe kerkesa e Presidentit te Republikes, Alfred Moisiu i cili
deklaroi dy dite me pare se "pres qe ai (projekt-ligji) te miratohet mbi
bazen e nje konsensusi sa me te gjere te mundshem, duke kaluar permes nje
procesi transparent e gjitheperfshires, si dhe duke i'u permbajtur kerkesave
te Kushtetutes". Presidenti Moisiu e vleresoi kete ligj si me te
rendesishmin per Shqiperine.

Nderkohe, nga diskutimet e deputeteve, te cilat u zhvilluan gjate paradites
dhe oreve te drekes, doli qarte se ky projekt-ligj do te miratohej me
konsensus vetem ne rast se mazhoranca do te pranonte amendamenetet e
propozuara nga PD-ja. Kryetari i PR-se, Fatmir Mediu deklaroi se ky
projekt-ligj eshte antiparimor dhe tenton te shkaterroje cdo shprese te
pronareve legjitime "duke i hapur rruge korrupsionit dhe vrasjeve". Sipas
tij, ky ligj eshte ne kundershtim te hapur me nenet 41 dhe 181 te
Kushtetutes se Shqiperise dhe konventave nderkombetare te te drejtave te
njeriut. Por, nga ana tjeter, krejt te kunderta kane qene fjalet e
zevendes-kryeministrit, Namik Dokle, i cili e cilesoi projekt-ligjin si me
te mirin e mundshem. Ndersa, nga fjalet e Kreut te PD-se, Sali Berisha doli
qarte se se nese nuk hiqej neni per "tatimin e jashtezakonshem" dhe nuk
merreshin parasysh amendamentet e PD-se, atehere varianti i projekt-ligjit
per pronat, i paraqitur nga PS dhe OSBE, nuk do te kishte voten e saj.

Neni per "tatimet e jashtezakonshme", i miratuar nga Kryesia e Keshillit
Antifashist Nacional Clirimtar me date 13 janar 1945, perjashtonte mundesine
e kthimit dhe kompensimit te pronave te konfiskuara nga shteti.

Miratohet ne parim projekt-ligji

Kuvendi i Shqiperise miratoi dje ne parim projekt-ligjin "per kthimin dhe
kompensimin e pronave" me 93 vota pro, 12 kunder dhe vetem 2 abstenime.
Megjithate, gjithcka eshte shtyre per ne seancen e ardhshme parlamentare, qe
do te zhvillohet te henen, ku do te votohet perfundimisht projekt-ligji per
pronat. Ky vendim erdhi nga Kryetari i Kuvendit, Servet Pellumbi pas me
shume se tete ore debatesh dhe diskutimesh, te ndara ne dy seanca. Seanca e
djeshme u nderpre ne kohen kur po diskutoheshin nje per nje, 28 nenet e
projekt-ligjit ne fjale dhe pikerisht neni 10 i tij. Nderkaq, nente nenet e
para u miratuan duke i bere edhe ndryshimet perkatese te propozuara nga
opozita, pozita dhe Komisionet Parlamentare te Ekonomise dhe Ligjeve.

Fatmir Mediu, Kryetar i PR-se:

"Pas tij, ky ligj fsheh legjitimimin e korrupsionit. Ai eshte ne kundershtim
te plote me nenet 41 dhe 181 te Kushtetutes se Shqiperise si dhe me
konventat nderkombetare te te drejtave te njeriut. Ky projekt-ligj nuk ka
asnje siguri per t'u zbatuar dhe kufizon plotesisht te drejten e ankimimit
nga pronaret. Ai do ta lere Shqiperine jashte Bashkimit Evropian. I kerkoj
Partise Demokratike qe ta votoje kunder kete projekt-ligj dhe Presidentit te
Republikes qe ta hedhe poshte ne rast se ai miratohet".

Sali Berisha, Kryetar i PD-se:

"Ky ligj eshte ligji me I rendesishem qe ka miratuar ndonjehere
legjislatura. Ai ligj eshte i barabarte me cdo nen te kushtetutes se
Shqiperise. Zgjidhja ideale do te ishte sikur te abrogohej ligji 7501 dhe
dekreti per pronesimin e 160 mije fermereve nga pronat shteterore, por jam
kunder ketyre te dyjave. Ne qofte se ju (shumica) doni qe te perligjni
shkaterrimin e sistemit kapitalist ne Shqiperi, atehere kjo eshte
hipokrizi".

Namik Dokle, zevendes-kryeminister:

"Projekt-ligji eshte I plote dhe ai realizon thenien e vjeter te popullit
"Shkon haku, tek I zoti". Ai ka ecur ne parimet e legjislacionit civil dhe
te se drejtes civile. Kerkohet vetem vullnet politik per te pranuar te
verteten nga te gjithe ne".

Ylli Bufi, Kryetar i Komisionit te Ekonomise:

"Zgjidhja qe ofron ky projekt-ligj vleresojme se eshte perfundimtare, eshte
kushtetuese dhe plotesisht e zbatueshme e ne perputhje me konventat
evropiane. Ne jemi per minimizimin e kompensimit financiar, pasi do te ishte
nje barre teper e rende per taksa paguesit shqiptare".


----------------------------------------------------------------------------

http://www.shekulli.com.al/
Me mirëkuptimin e dy grupeve parlamentare kryesore, u miratua heqja e
Tatimit të Jashtëzakonshëm

PD-PS, konsensus për pronat

Parlamenti miraton 8 nenet e para të ligjit për kthim dhe kompensim

TIRANE - Parlamenti gjen konsensusin për heqjen nga ligji "Për kthimin dhe
kompensimin e pronave ish -pronarëve" të kufizimit për moskthimin e pronave
mbi të cilat ka vepruar ligji "Për tatimin e jashtëzakonshëm". Me
mirëkuptimin e dy grupeve parlamentare kryesore, u miratua nga Kuvendi
mospërfshirja e këtij kufizimi në ligjin përfundimtar, gjatë votimit nen për
nen të draftit. Kjo çështje ishte kushti kryesor që grupi parlamentar i
PD-së kishte vendosur për të mbështetur votimin në tërësi të draftit në
fjalë. I vetmi që shprehu rezerva për heqjen e kësaj pike nga ligji i ri për
pronat, ishte kryetari i komisionit të Ligjeve Spartak Braho, duke pohuar se
ishte detyrim ligjor dhe kushtetues që Tatimi i Jashtëzakonshëm të ngelej në
ligj, pasi ligji do të ishte i mangët. Por nga ana tjetër kreu i PSD-së
Skënder Gjinushi, tha se heqja e kësaj pike nuk e cënonte ligjin dhe nuk
përjashtonte detyrimet që rridhnin prej saj. Sipas tij, kjo nuk do të thotë
që kategoria e prekur nga ky ligj, pas kësaj do të marrë pronat, por në çdo
rast do të ketë punë me Gjykatën Kushtetuese. Në seancën e gjatë të
zhvilluar dje për shqyrtimin e këtij projektligji, u miratuan vetëm 8 nenet
e para, duke iu bashkangjitur neneve bazë disa amendime të rëndësishme të
hartuara nga komisioni parlamentar i Ligjeve dhe ai i Ekonomisë. Në parim
projektligji u mbështet nga 93 deputetë, ndërsa 12 votuan kundër dhe 2
abstenuan. Votat kundër ishin përkatësisht të tre grupeve parlamentare të
opozitës PR, PLL dhe PBK, procesi i votimit në disa raste u shoqërua me
konfuzion, pasi për të njëjtin nen ishin disa amendime.
Ndërkohë ndryshimet kryesore iu bashkëngjitën projektligjit në nenin 8, për
trojet. Përfaqësuesit e opozitës kundërshtuan amendamentin e hartuar nga
komisioni i Ekonomisë, përkatësisht pika 4, sipas të cilit, për tokat e
dhëna me koncesione ose me qira të gjatë sipas ligjit, qiratë i përfiton
shteti deri në përfundim të kontratës, duke kërkuar që paratë e qirasë t'i
përfitonte pronari i tokës. Për shkak të debateve të shumta, kjo pikë do të
ridiskutohet pasi të përfundojë edhe një herë në seancën e së hënës kur do
të vazhdojë miratimi i neneve të tjera. Ndryshime u bënë edhe në nenin 6 ku
u përcaktuan, se u njihet e drejta e pronës subjekteve të shpronësuar,
pronat e të cilëve janë përmbytur nga ndërtimi i hidrocentraleve, në ato
raste kur nuk kanë përfituar nga ndonjë ligj tjetër. Po kështu në këtë nen u
përfshi si pikë më vete, amendamenti i grupit të PS-së për të kompensuar
tokën bujqësore deri në 100 ha. Në nenin 8 u përcaktua moslejimi i
tjetërsimit të tokave, deri në përfundim të procesit të kthimit dhe
kompensimit. Ndërsa për nenin 9, për banesat, u debatua gjatë lidhur me
faktin nëse duhet ta paguajë shteti pas dy vjetësh qiranë, ashtu siç është
përcaktuar në draft, pikë kjo që e mbështeti edhe opozita. Disa deputetë
kërkuan që të përcaktohet në ligj afati se kur duhet të lirohen nga
qiraxhinjtë banesat e ish -pronarëve. Berisha nga ana tjetër propozoi që në
këtë nen të shtohet si pikë me vete klauzola, kur banorët e ndërtesave të
ngritura nga shteti janë ish -pronarë, ata përfitojnë truallin e banesës si
kompensim. Por për shkak të konfuzionit asnjë nga çështjet e përmbledhura
dhe amendamentet e këtij drafti nuk u miratuan.
Debatet dhe qëndrimet
Maxhoranca dhe opozita nuk u tërhoqën nga qëndrimet e mbajtura publikisht
lidhur me projektligjin "Për kthimin dhe kompensimin e pronave
ish -pronarëve". Diskutimi në parim i draftit të shqyrtuar në komisionet
parlamentare, u ndal kryesisht tek çështjet kryesore për të cilat dy partitë
kryesore parlamentare, nuk kanë gjetur konsensusin para se projektligji të
kalonte për miratim në seancë plenare. Ndërkaq opozita u shfaq edhe në këtë
seancë e përçarë, duke dalë me dy qëndrime të ndryshme, pro dhe kundër
projektligjit. Grupi parlamentar i PD-së ripërsëriti kushtet për të votuar
projektligjin e "Për kthimin dhe kompensimin e pronave" duke e vënë theksin
tek heqja e kufizimit që nuk lejonte të përfitonin ish -pronarët e prekur
nga ligji i 1945-ës "Për tatimin e jashtëzakonshëm". Ndërsa PR, PBK, u
shprehën kundër miratimit të draftit duke e cilësuar atë si goditjen
përfundimtare që u bëhej pronarëve legjitimë dhe si ligjin që u vinte kapak
të gjitha veprimeve abuzive me tokat të realizuara gjatë 13 viteve të
fundit. PD kërkoi që kryetari i Komitetit Shtetëror të Kthimit dhe
Kompensimit të Pronave, duhet të caktohej me emërimin e presidentit Moisiu
dhe jo nga qeveria.
Ajo që u duk qartë gjatë diskutimeve të djeshme në Parlament, ishte
vendosmëria e dy partive kryesore për të mos abroguar ligjin 7501 "Për
ndarjen e tokës bujqësore". Kreu demokrat Sali Berisha tha se ishte kundër
abrogimit të këtij ligji, edhe pse kjo mund të ishte zgjidhja ideale e
problemeve të ndërlikuara me pronat, sepse do të kishte efekte të rënda.
Sipas tij lëvizjet e mëdha demokrafike në vend, të diktuara nga bllokimi që
i bëri lëvizjes së lirë regjimi komunist, bënë të pamundur që në Shqipëri të
realizohej një ndarje tjetër. "Kompensimi fizik për ish -pronarët duhet të
realizohet në zonat e lira që janë në bregdet, sepse aty ka mundësi reale
për ta bërë këtë gjë", -tha Berisha. Ndërkaq deputeti Ridvan Bode kritikoi
ligjin për faktin se ai ishte i pashoqëruar nga një faturë financiare, për
të realizuar kompensimin në lekë për ish -pronarët që nuk mund të
kompensoheshin në natyrë. Nga ana tjetër ministri i Financave Arben Malaj
tha dje se realizimi i kompensimit, duke iu referuar çmimeve të tregut dhe
kërkesave të disa deputetëve, ishte i pamundur. Ai shtoi se afati i mbylljes
së këtij procesi mund të vazhdonte deri në 20 vjet. Malaj vërejti, se asnjë
nga detyrimet e papaguara nga aktivitete të tjera për ndonjë ish -pronar,
nuk do të faleshin për efekt të kompensimit. Ndërsa zv/kryeministri Dokle
tha se ligji nuk njihte kufizime për pronën. Ai shtoi se kompensimi 100 për
qind i pronarëve të mëdhenj ishte i pamundur sepse, vetëm 20 prej tyre
zotëronin 35 mijë ha tokë, që do të thoshte me vlerën e tregut disa milionë
dollarë.
-------------------------
Deputetët janë treguar pasivë dje gjatë senacës së miratimit të ligjit

Ligji i pronave, Parlamenti bosh

A.Rama

TIRANE - Parlamentarët shqiptarë tregohen pasivë gjatë shqyrtimit dhe
miratimit të disa neneve të projektligjit "Për kthimin dhe kompensimin e
pronave". Sikur të mos mjaftonte paraqitja me vonesë në të dyja pjesët e
seancës së djeshme, thuajse gjatë gjithë kohës salla e Kuvendit ka qenë e
boshatisur. Madje indiferenca më e madhe është shfaqur nga deputetët e
maxhorancës, të cilët gjatë paradites mungonin, përfshirë këtu edhe pjesën
më të madhe të kabinetit qeveritar. Kryeministri Nano nuk u pa dje as për
një moment në Parlament, ndërsa kundërshtari i tij Sali Berisha ka marrë
pjesë aktivisht gjatë diskutimeve dhe debateve për nene të caktuara.
Mungesën e socialistëve në Parlament e vuri në dukje lideri opozitar
Berisha, i cili i kërkoi kryetarit të seancës që për diskutimin e një ligji
të tillë, Parlamenti të tregonte seriozitetin maksimal, duke kërkuar që
ministrat e qeverisë dhe maxhoranca të vinin në Parlament, ndryshe edhe
përfaqësuesit e opozitës do të largoheshin për t'u marrë me punët e tyre.
Ajo që vlen të veçohet është fakti se pjesa më e madhe e deputetëve ishin
pasivë si gjatë diskutimit në parim, ashtu edhe gjatë procesit të votimit
duke ngritur kartonin jeshil në mënyrë automate. Kjo vinte si pasojë e
mosnjohjes së ligjit nga ana e tyre, gjë që e pohoi deputeti Dritan Prifti,
i cili tha se nuk do të merrte pjesë në procesin e votimit. Sipas tij ai nuk
e njihte draftin, pasi jo të gjitha komisionet parlamentare e kishin marrë
atë si dokument. Kundër mënyrës se si po procedohej gjatë votimit u shpreh
edhe socialisti Zyhdi Pepa, duke shtuar se edhe ai nuk do të merrte pjesë në
votim.

Nenet e miratuara

Neni 1/Ky ligji ka për objekt
rregullimin e drejtë, sipas kritereve të nenit 41 të Kushtetutës, të
çështjeve të së drejtës së pronësisë që kanë lindur nga shpronësimet,
shtetëzimet apo konfiskimet
kthimin dhe aty ku sipas këtij ligji, kthimi është i pamundur, kompensimin e
saj
procedurat për realizimin e kthimit dhe kompensimit të pronave si dhe
organet administrative të ngarkuara për realizimin e tyre
Neni 2/ E drejta e pronësisë
Çdo subjekt i shpronësuar ka të drejtë të kërkojë në përputhje me këtë ligj,
njohjen e të drejtës së pronësisë në rast se i është hequr sipas akteve
nënligjore, vendimeve penale të gjykatave ose të marrë në çdo mënyrë tjetër
të padrejtë nga shteti nga data 29.111944 si dhe kthimin ose kompensimin e
pronës së kërkuar.
Neni 3/ përkufizime
a) "Kompensim", nënkupton shpërblimin e drejtë, sipas vlerës së tregut në
momentin e njohjes së shpërblimit të kryer sipas nenit 11 të këtij ligji
b) "Pronë", nënkupton një send të paluajtshëm sipas përcaktimit në Kodin
Civil
c)" Subjekt i shpronësuar", nënkupton personat juridikë ose fizikë apo
trashëgimtarët e tyre, prona e të cilëve, është shtetëzuar, shpronësuar apo
konfiskuar, sipas akteve ligjore e nënligjore në fuqi apo sipas vendimeve
gjyqësore penale
d) Tjetërsim, nënkupton kalimin e pronësisë nga një person fizik ose juridik
tek një tjetër sipas Kodit Civil
e) Truall, nënkupton tokën që ndodhet brenda vijave kufizuese të qendrave të
banuara në çastin e hyrjes në fuqi të këtij ligji
Neni4/Përjashtimet nga ky ligj
Dispozitat e këtij ligji nuk zbatohen për
a) pronat e përfituara si rezultat i zbatimit të ligjit 108 datë 29.08.145
"Për reformën agrare" me ndryshimet e mëvonshme
b)shpronësimet kundrejt një shpërblimi të drejtë dhe që përdoren për
interesa publike
c)pronat që i janë dhuruar shtetit, veprim për të cilin ka dokumente zyrtare
Neni 5/prona e luajtshme
Njohja, kthimi dhe kompensimi i pronave të luajtshme rregullohet me ligj të
veçantë
Neni 6
1)Subjekteve të shpronësuara u njihet e derjta e pronësisë dhe u kthehen pa
kufizim pronat e paluajtshme, me përjashtim të, tokës bujqësore e cila
kthehet ose kompensohet deri në 100 ha
2)subjekteve të shpronësuara, pronat e të cilëve janë përmbytur nga
hidorcentralet, trajtohej sipas këtij ligji
3)subjektet e shpronësuar përftitojnë kompensimin, për të gjitha ato raste
kur nuk kanë përfituar nga ligje të tjera
Neni 7
Nuk kthehen pronat e paluajtshme që shërbejnë për interesa publikë dhe që
a)shërbejnë për realizimin e detyrimeve të shtetit shqiptar që rrjedhin nga
traktatet dhe konventat në të cilat shteti ynë është palë
b)kanë investime ose përdoren për realizimin e projekteve me shtrirje
territoriale ose vendore në fushën e transporteve të çdo lloji, të
energjitikës, e telekomunikacioneve si dhe investime të tjera të përcaktuara
sipas ligjit "Për shpronësime publike"
c)shërbejnë për ruajtjen e mjedisit, kulturës, arsimit publik ose edukimit
parashkollor
d) shërbejnë në fushën e mbrojtjes kombëtare
e) janë pasuri e veçantë kulturore ose historike e përcaktuar në ligjet në
fuqi
f)janë të zëna sipas akteve ligjore paraqitur në shtojcën 1 të këtij ligji,
përveç rasteve kur sipas këtyre ligjeve shteti është pronar dhe prona e
paluajtshme nuk i shërben një interesi publik
g) Në rast se pronat e paluajtshme kur kërkohen të tjetërsohen nga shteti,
ato u kthehen ish -pronarëve
Neni 8/ trualli
1.Në rastin kur trualli u është tjetërsuar personave të tretë dhe mbi të nuk
janë ngritur ndërtesa të përhershme dhe të ligjshme, ai u kthehet subjekteve
të shpronësuara, ndërsa shteti u kthen të tretëve vlerën sipas çmimit të
blerjes të shumëzuar me indeksin e rritjes së çmimeve.
2.Kur mbi truallin e subjektit të shpronësuar, shteti a persona të tretë,
kanë kryer ndërtime ose investime "të rëndësishme", në përputhje me
legjislacionin në fuqi, ato llogariten sipas vlerës së tregut në çastin kur
i njihet e drejta e pronësisë subjektit të shpronësuar dhe veprohet :
a) Kur vlera e investimeve përbën deri në 100% -150% të vlerës së truallit,
prona i kthehet subjekteve të shpronësuara, pasi ato të kenë paguar
kundërvlerën e investimeve të kryera
b)kur vlera e investimeve përbën më shumë se 100 % -150 % të vlerës së
truallit, shteti ose personat e tretë ruajnë pronësinë dhe subjekte
kompensohen sipas këtij ligji.
3)Në rastet e ndërtimeve mbi truall të bëra para datës 10.8.1991, për të
cilat nuk është regjistruar pronësia e truallit, personi që ka në pronësi
ndërtesën detyrohet të paguajë vlerën e truallit sipas vlerës fillestare të
trualli, sipas nenit 10 të ligjit 7652 "Për privatizimin e banesave
shtetërore", të shumëzuar me indeksin e rritjes së çmimeve
4) Në rastet e ndërtimeve të ligjshme të bëra në truallin e dhënë nga shteti
me qira ose koncesion, pronari i ndërtesës paguan vlerën e truallit mbi të
cilin është bërë ndërtesa sipas çmimeve të tregut
4) Në raset e ndërtimeve të ligjshme të bëra në truallin e dhënë nga shteti
me qira ose koncesion, subjektit të shpronësuar i rinjihet pronësia dhe i
kalojnë të gjitha të drejtat pronësore që deri me hyrjen në fuqi të këtij
ligji i gëzon shteti, me kusht që ai të respektojë kontratën e nënshkruar.
Në përputhje me Kodin Civil, pas përfundimit të kontratës, subjekti i
shpronësuar vendos vetë për marrëdhëniet e mëtejshme me të tretët. Subjektet
e shpronësuara kanë të drejtë të heqin dorë nga prona e tyre kundrejt
kompensimit, sipas nenit 11 të këtij ligji. (Do të diskutohet sërish)
Neni 8/1 pronat në zonat turistike
1) Subjekteve të shpronësuara në zonat e stimuluara për zhvillimin e
turizmit, u rinjihet, kthehet dhe kompensohet prona sipas dispozitave të
këtij ligji
2) Për tokat në zonat e stimuluara për zhvillimin e turizmit që janë në
pronësi të shtetit, organet kompetente të administratës publike, ndalohet të
lidhin kontrata posedimi a pronësie me të tretë deri në përfundimin e
procesit të kthimit dhe kompensimit të pronave.

---------------------------------
http://www.balkanweb.com/
Partia e Ballit Kombëtar kundërshton projektligjin për 'kthimin e kompesimin
e pronave'

Lajmi i ores 9:10 PM

TIRANE (28 Maj) - Kryetari i Partisë së Ballit Kombëtar (PBK), Adriatik
Alimadhi, kundërshtoi të Premten miratimin në parim nga Kuvendi, të
projektligjit 'për kthimin dhe kompesimin e pronave'. Gjatë një konference
për shtyp, Alimadhi i kërkoi Presidentit Alfred Moisiu, që të mos e
dekretojë projektligjin që sipas tij 'bie ndesh në mënyrë flagrante me
kushtetutën'. Duke iu referuar konsensusit të arritur së fundi mes Partisë
Socialiste dhe Partisë Demokratike për miratimin e projektligjit për pronat,
Alimadhi e cilësoi këtë një "marrëveshje të fshehtë mes dy palëve". Gjatë
diskutimit të djeshëm, në Kuvend të këtij projektligji, deputetët e PBK-së
nuk e votuan në parim këtë draft të rëndësishëm bm/bm(BalkanWeb)


   PS e PD bëjnë pakt për pronat, hiqet Tatimi i Jashtëzakonshëm

Lajmi i ores 8:50 AM

Parlamenti shqiptar

 TIRANE (28 Maj) - Pas një muaj debatesh për futjen apo jo në ligjin e
pronave të "Tatimit të Jashtëzakonshëm", kërkesë kjo permanente e Partisë
Demokratike, PS-ja është dorëzuar. Dje PS ka pranuar heqjen e Tatimit të
Jashtëzakonshëm, sepse ky ligj i përket pronave të luajtshme. Për PD heqja e
"Tatimit të Jashtëzakonshëm ka një rëndësi të madhe morale në krahasim me
atë materiale, duke qenë se është një ligj që i përket diktaturës komuniste.
Diskutimet nen për nen të projektit u ndërprenë dje rreth orës 21.00 kur
palët nuk kanë rënë dakord me amendamentet e nenit 9, i cili ka të bëjë me
banesat, pronë e subjekteve të shpronësuara, por të zëna nga qeramarrësit.
Diskutimet do të vazhdojnë ditën e hënë. Demokratë e socialistë dukeshin në
një unison të paparë prej një kohë shumë të largët, tek i dëgjoje të
diskutonin mbi të mirat që do ti sjellë shoqërisë ligji ri i pronave. Kreu i
demokratëve Berisha u shpreh se ky është i vetmi ligj, i cili do të bëjë të
mundur bllokimin e tjetërsimit të pronave nga pushtetarët. Duke pranuar
mundësitë që ky ligj i lë abuzivizmit me pronat, Berisha u shpreh se është
mëse e mundur që të hartohet metoda transparente dhe kontrolluese për të
gjitha veprimet që duhet të kryhen për zbatimin e këtij ligji. Diskutimi i
kreut të Republikanëve Fatmir Mediu për variantin e OSBE-së të ligjit të
pronave ishte mjaft i egër. Sipas tij ky ligj nuk është gjë tjetër veçse një
ligj antiparimor. "Ky ligj po tenton të shkatërrojë çdo shpresë të ish
pronarëve dhe i hap rrugë vrasjeve dhe korrupsionit", tha Mediu. Sipas tij
miratimi i këtoj ligji do të thotë shkelje e hapur e Konventave
Ndërkombëtare të të drejtave të njeriut. ro/ro (GazetaShqiptare/BalkanWeb)

---------------------------
http://www.panorama.com.al/  © 2003 Gazeta Panorama

Faqe 5 - Politikë 28Maj 2004

Ligji i pronave
debati
Mazhoranca u jep fund shpresave për heqjen e "Tatimit të Jashtëzakonshëm" me
praninë e opozitës
PS-PD: Pronat e konfiskuara s'kthehen
Dokle e Berisha: Nuk mund të ketë kthim e kompensim të plotë


Nikolin Todolli

Pronat e konfiskuara në vitin 1945 nuk do të kthehen më. Kuvendi e ka
miratuar këtë ndryshim në projektligjin "Për kthimin dhe kompensimin e
pronave", pasi e ka miratuar draftin në parim me 93 vota pro, 12 kundër dhe
2 abstenime.

Megjithëse miratimi është shtyrë për të hënën paradite, Kuvendi ka vendosur
dje përfundimisht të mos kthejë pronat e përfituara nga ligji i 1945-ës "Për
reformën agrare", shpronësimet kundrejt një shpërblimi të drejtë dhe për
interesa publike, si dhe pronat e konfiskuara në bazë të tatimit të
jashtëzakonshëm. Megjithëse gjatë gjithë debatit të paradites, lideri
demokrat Berisha ka këmbëngulur në heqjen e tatimit të jashtëzakonshëm, ai
nuk ka protestuar kur deputetët e mazhorancës kanë votuar pro përjashtimit
të kësaj pike nga ligji i ri për pronat. Kështu, pavarësisht nga debatet dhe
replikat, PD-ja e ka mbështetur numrin dy të qeverisë, i cili ka pohuar
përfundimisht pamundësinë e kthimit dhe kompensimit të plotë të pronave.
Dokle u ka bërë thirrje gjithashtu brezave që të gjejnë gjuhën e përbashkët
për të kuptuar sistemin e ri të kompensimit. "Prona mund të kthehet vetëm në
një mënyrë që të kanaqë pronarët dhe palët e tjera të përfshira në këtë
proces", tha Dokle.

Aleatët kundër Berishës
Debati i djeshëm prej dhjetë orësh në Parlament tregoi qëndrimet e kundërta
midis partive opozitare. Kryerepublikani Mediu, si dhe legalistët dhe Partia
e Ballit kanë dalë kundër demokratëve, duke deklaruar votën kundër draftit
të Kuvendit dhe të OSBE-së. Opozitarët "e vegjël" kanë braktisur seancën,
pasi kanë parë se PD-ja nuk ka dëgjuar apelin e tyre të fundit për të
shfuqizuar Ligjin 7501 të vitit 1991 "Për kthimin e tokës".

PS: Duam kohë për propozimet tona
PS-ja ka kërkuar kohë deri të hënën për të miratuar disa nga propozimet e
saj. Kryetari i Komisionit Parlamnetar të Ekonomisë, Ylli Bufi, tha se duhen
kompensuar vetëm 100 ha tokë bujqësore, ndërkohë që shteti duhet t'u kthejë
pronarëve tokat e shpronësuara gjatë ndërtimit të hidrocentraleve, por që
nuk janë përdorur për interes publik. Ndërkohë, që Kuvendi ka pranuar dje të
shtojë në ligj kthimin e pronave të tjetërsuara për interes jopublik.
Ndërkohë që Komisioni i Ekonomisë dhe ai i Ligjeve do të diskutojë përsëri
lidhur me kthimin dhe kompensimin e pronave në zonat turistike, si dhe për
problemin e familjeve që rrinë me qira. Në këtë pikë, Berisha propozoi që
shteti t'u japë qiraxhinjve kredi të buta afatgjata.

Ndryshimet në ligjin për pronat

Përjashtimet nga ligji

Pronat e përfituara nga ligji i 1945-ës "Për reformën agrare"
Shpronësimet kundrejt një shpërblimi të drejtë dhe që përdoren për interesa
publike
Pronat që i janë dhuruar shtetit, për të cilat ka dokumente zyrtare
Ligji nuk trajton pronat e shtetëzuara apo të konfiskuara sipas ligjit të
1945-sës "Për tatimin e jashtëzakonshëm"
Nuk kthehen pronat:

Që shërbejnë për interes publik, për ruajtjen e mjedisit, shëndetit,
kulturës, arsimit publik ose edukimit parashkollor
Që shërbejnë për mbrojtjen kombëtare
Që janë pasuri e veçantë kulturore ose historike, e përcaktuar sipas
legjislacionit në fuqi
Pronat e ndara sipas 7501-shit dhe ligjeve të miratuara pas vitit 1991
Ndryshime të tjera

Shteti nuk ka të drejtë të lëshojë më toka me qira
Kur vlera e investimit përbën deri në 150% të vlerës së truallit, prona u
kthehet subjekteve të shpronësuara, pasi ato të kenë paguar kundërvlerën e
investimeve të kryera
Në rastet e ndërtimeve mbi truall të bëra para viti 1991, për të cilat nuk
është regjistruar pronësia e truallit, ai që ka bërë në pronësi ndërtesën
detyrohet të paguajë vlerën e truallit me vlerën e tregut


opinione

Arben Malaj
Trajtimi i këtij projektligji duhet të zhvillohet mbi baza të një analize
teknike. Asnjë forcë politike nuk mund të kërkojë miratimin e amendamenteve
në një ligj të tillë për kredo politike. Duhet t'i mëshohet kërkesës që e
drejta për t'u kompensuar të realizohet nëpërmjet kompensimit fizik të
pronës. Mendoj se, duhet të synojmë që të arrijmë një kompensim fizik
maksimal të mundshëm të pronës dhe kompensim financiar sa më të vogël.

Namik Dokle
Kthimi dhe kompensimi i pronës nuk mund të realizohet 100%. Projektligji i
ri, duke u bazuar tek e drejta civile dhe ajo ndërkombëtare, ndërton raporte
besimi midis shtetit dhe pronarëve. Duhet vullnet për të pranuar të
vërtetën, si dhe për t'u integruar në Evropë nevojitet harmoni brezash. Në
vitin 1944 97 familje kanë pasur rreth 100 - 300 ha tokë. Ndërsa vetëm
shtatë familje kanë patur rreth 2000 ha tokë.

Spartak Braho
Është e gabuar dhe nonsens të kërkohet kthimi i pronës, aq më tepër të
kërkohet që t'u kthehet prona kolaboracionistëve. S'mund të ketë kthim
absolut, por vetëm një rregullim maksimal të çështjes së pronës. Çdo të
bëhet me ata që përfituan nga Ligji 7501? Këta mund të shpronësohen vetëm
kundrejt një shpërblimi sipas nenit 42 të Kushtetutës, por kjo do të sillte
një faturë të madhe financiare.

Sali Berisha
Unë shprehem kundër shfuqizimit të Ligjit 7501 dhe dekretit për dhënien e
pronës 160 mijë familjeve fshatare. Në asnjë vend të botës nuk ka ndodhur
që, për shkak të eksplozionit demokgrafik të mbetet shumë pak tokë, siç ka
ndodhur këtu. Edhe sot po të kishte familje të mëdha pronare tokash, reforma
do të kryhej përsëri. Nuk mund të ruhej sistemi i bujqve.

Ritvan Bode
PD-ja ka qenë e gatshme që të marrë pjesë në komisionet e ndryshme për
pronën, duke siguruar kthimin dhe kompensimin maksimal të pronës me vlerën e
tregut. Abrogimi i Ligjit 7501 është i vonuar. Askush më sot nuk beson në
prishjen e një strukture ekonomike të ndërtuar brenda 14 viteve të fundit.
PD-ja ka propozuar krijimin e një fondi publik për kompensimin e
ish-pronarëve, duke u përfshirë në buxhet, kthimin e asaj prone që është
shpronësuar, por nuk është përdorur për qëllime publike.

Jozefina Topalli
Po të diskutohej sot për lojërat e fatit, atëherë salla do të ishte plot me
deputetë të mazhorancës. Gjatë diskutimit të projektligjit nëpër komisione
ka pasur anomali të rënda. Ndërkohë që me kalimin e viteve ka humbur kuptimi
i së drejtës të pronës. Është e vërtetë se ky projektligj ka një vakuum
ligjor, pasi nuk ka marrë parasysh të gjitha të dhënat, por kjo mund të
rregullohet. PD-ja e ka zgjeruar konceptin e pronës.