28122004

Faqe 20 - Speciale

turi per monarkine
shenimet

Libri/ Shënime historike për takimet e trashëgimtarit të fronit në vitin 1997 nëpër Shqipëri

Leka I, zhgënjimi nisi me intelektualët
"Duhet pasur frikë nga njeriu që ka lexuar vetëm një libër"

ARMIR SHKURTI
Pikën kulminante të fushatës së referendumit për monarkinë të paktën unë mbaja takimin me intelektualët. Në fund të fundit, ai do të qe testimi i vërtetë.
Atë ditë unë e mendoja si provimin e diplomës për kandidatmonarkun. Që herët në shkollë, teksa studioja gjuhën, letërsinë e kulturën frënge unë gjykoja se të gjitha këto dhe çdo fisnikëri e shpirtit dhe e mendjes, detyrimisht vinin erë mbret. Pas tyre gjendej diku një Luigj.
Atë të premte të 20 qershorit Ylli (operatori i TVSH-së), Goni (shoferi) dhe unë nuk kaluam fare nga rezidenca. Takimi bëhej në Pallatin e Kongreseve, vetëm 50 metra larg Televizionit. Pasi shijuam kafenë e mëngjesit nën tendën e pjergullave e hijen e portokalleve të barit "La Pergola", rreth orës nëntë e gjysmë morëm kameran dhe paisjet e tjera në dorë dhe hymë në sallën e madhe. Megjithëse takimi donte edhe gjysmë ore të fillonte, gjysma e vendeve ishin zënë, ndërkohë që të tjerë burra e më pak gra bënin ballë tufa-tufa tek porta e madhe në krye të shkallëve. Në orën dhjetë aty nuk mbeti më karrige bosh. Dymijë vetë! Dymijë intelektualë? Edhe këtë skenë e kisha të parë edhe tjetër herë. Po kaq e mbushur me intelektualë demokratë, me intelektualë socialistë, me intelektualë të pavarur... Një pjesë të këtyre figurave i njihja. Gjatë 5 viteve në Televizionin Shqiptar i hasja të njëjtat fytyra, të njëjtat kostume e kravata në veprimtari si kjo e sotmja. Po ato portrete të menduara e të pakënaqura. Krerë të thinjur që vite e vite kanë menduar të bëjnë diçka në jetë, por nuk kanë nxjerrë asgjë në dritë, duke fajësuar për këtë diktaturën komuniste. Dhe kur diktatura iku, mori nga pas edhe mallkimin e këtyre personazheve ekzistencialistë për pasionin, talentin, krijimtarinë e lindur lulëzuar e vdekur vetëm brenda atyre kafkave të thinjura. Tani hiqen si viktima, qahen, qortojnë, japin mend, shesin mend dhe punojnë pak, për të mos thënë aspak. (....)
Leka mbërriti me pak vonesë, u ngjit në skenë dhe zuri vend në një tryezë druri të punuar enkas për të tilla takime. Në krah të majtë të tij u ul ministri i Oborrit, Abedin Mulosmani. Të dymijë pjesëmarrësit u ngritën në këmbë duke duartrokitur. Sapo ra qetësia, teknika lëshoi në altoparlant himnin e flamurit. Edhe një herë të gjithë u ngritën në këmbë tashmë të heshtur e me qëndrim solemn.
Leka e nisi takimin me formulën e zakonshme.
- Ju bie përshnetjet nga nana mbretnesh Geraldin, nga mbretnesha Suzan dhe nga princi trashëgimtar (ovacione). Së pari ju falënderoj për këtë mikpritje.
Në ato emocione të fillimit fjalët nuk po i dilnin të plota e të sigurta. Dikush nga salla nuk duroi pa e qortuar:
- E paske harru shqipen
Leka - E kam harru diçka, po, se për 50 vjet ma keni ndal!
Salla shëprtheu në një valë frenetike duartrokitjesh e brohorimash. Jo se Leka tha ndonjë gjë të madhe, por thjesht për t'i dhënë mbështetje ndaj atij sulmi që në batutën e parë. Ndërsa vetë trashëgimtari nuk e prishi terezinë. Sapo entuziazmi ra pak, ai vazhdoi mendimin:
- Motra dhe vllezën. Sot kam ardh me ato fjalë: Paqe, bashkim e vllaznim
Në pak sekonda ai burrë i gjatë, i thinjur e me pamje melankolike arriti të sundojë atmosferën në sallë.
Ndër pyetjet e para që iu drejtuan ishte (...)
Pyetje - Cili do të jetë roli dhe vendi i intelektualit në mbretni?
Leka - Për të aftit: do të jenë të nderuar
Pyetje - Naltmadhëri, pas fitores aq të dëshiruar në referendum, duam të dimë a e keni të gatshëm stafin drejtues të shtetit?
Leka - Kam disa mejtime.....Kaq po ju them: KAM DISA MEJTIME...
Unë qesha me vete. Mos vallë ky që pyeste ia kish vënë syrin ndonjë karrige në qeverinë e ardhshme? Nga Leka e priste rolin që duhet të luante ky intelektual? Pyetjet vazhdonin pa fund, por pothuaj s'kishte asgjë të re. Po ato gjëra të thëna e stërthëna nga Vermoshi në Delvinë.
(....)
Atë dashamirësi e vëllazëri që kërkonte Leka nuk e gjeti kurrë as në atë fushatë e as më pas. Në fund të fundit, politika shqiptare, të paktën në gjysmën e fundit të atij shekulli ngrihej e binte pikërisht mbi urrejtje, hakmarrje, dhunë e frikë. Plagët e luftës së klasave ishin shumë të freskëta. Për katër dekada rresht vëllai ruhej se mos e spiunonte vëllai, burri nga gruaja e prindi nga fëmija. Me shembjen e komunizmit, politika u kujdes që flaka e urrejtjes të binte, por jo të shuhej, pasi mënyra më e lehtë për ta pasur në zap këtë grusht vend është "përça e sundo". (......)
Në ato kohë qarkullonte mendimi se rrëmujat e marsit ishin të lidhura shumë ngushtë me gjendjen në Kosovë. Shthurja e shtetit tonë i hiqte mbështetjen shqiptarëve të Kosovës për çdo lloj ndërmarrjeje politike apo ushtarake. Ndaj dikush nga të ftuarit pyeti:
- Ju bëni thirrje për bashkim kombëtar. A nënkupton kjo bashkim me Kosovën dhe shqiptarët e Maqedonisë?
Leka - Po!
Pyetje - Si e mendoni bashkimin e trojeve etnike? Me luftë?
Leka -Jo! Dhashtë Zoti që të mos jetë me luftë. Problemi i Kosovës duhet të zgjidhet në mënyrë paqësore. Kjo është në interes të të gjithëve, por, sidomos, të kombit shqiptar. Por, për me ia arrit bashkimit të Shqipnisë etnike dhe që të jetë një Shqipni e fortë duhet të përdoret presioni dhe dialogu diplomatik. Mund t'ia arrisim. Por do të marri kohë.
(....)
- A e ka apo jo mbreti mbështetjen e Shteteve të Bashkuara të Amerikës?
Shumë prerë Leka iu përgjigj se shqiptarët duhet të shohin punët e tyre, pa pasur nevojë të merakosen nëse do apo jo Amerika apo kushdoqoftë tjetër. Kjo pyetje e intelektualit të paemër rrezatonte vartësi e inferioritet në këtë sallë të Pallatit të Kongreseve. Megjithatë, Leka u përgjigj me diplomaci:
- Të njëjtën lidhje do të ketë mbretnia shqiptare si me Europën, si me SHBA ashtu edhe me botën mbarë. Mbretnia shqiptare duhet të jetë e hapur ndaj gjithë botës. Por e ardhmja e Shqipërisë duhet të parashihet si një zinxhir në mes të Europës dhe Mesdheut. Kështu mund të shfrytëzojmë të 2 palët. Le ta themi më thjesht. Ne si shqiptar duhet ta kemi të qartë se asnjë shtet në botë, asnjë vend në botë nuk do të na përkrahë, nëse ne vetë nuk i kemi dhënë vetvetes përkrahjen e mirëkuptimin. Nëse ne tregojmë se vetë jemi të aftë, atëhere do të kemi shumë përkrahje nga shumë shtete dhe nga bota mbarë.
...
(Takimi mbaroi)
Pas Lekës dolëm edhe ne. Ai po tymoste mendueshëm cigaren e tij të pambarim. Dukej jo fort në humor, por unë nuk kisha nevojë ta pyesja se çfarë nuk shkonte. Përgjigjen e dija që tri ditë më parë:
Leka synonte ta niste ndërtimin e vendit duke e filluar nga koka. Me këtë ide, për javë të tëra ai mati pulsin e rinisë, studentëve dhe intelektualëve. Për të ribërë shtetin Lekës i duhej një brez të shkolluarish dhe jo votues të thjeshtë. Për këtë arsye ai nuk la universitet pa shkelur, por, me sa vura re unë, ai nuk e gjeti atë që kërkonte. Në një nga auditoret studentët e pyetën:
(.........)
- Naltmadhëri: Nëse fiton monarkia, a do të më bëni ju mua doganier siç bëri babai juaj gjyshin tim?
Salla shpërtheu në të qeshura. Edhe Leka vuri buzën në gaz hidhur. Kur ra qetësia, u përgjigj:
- Po! Ju bëj! Por nëse kryeni shkollën përkatëse, bëni stërvitjet përkatëse dhe më kryesorja, nëse vini kokën para xhepit. Se po vutë xhepin të parin mund t'ju heq kokën.
Pas takimit studentët u vërsulën t'i marrin autograf, ndërkohë që Leka nënshkruante me pamje të ngrysur në ato fletore. Ne u nisëm përpara drejt rezidencës. Në odën e pritjes gjetëm një tufë burrash që flisnin me këmbë e me duar gjithë shqetësim. Pak minuta më vonë mbërriti edhe Leka. Ai u përshëndet me njerëzit që po e prisnin dhe kërkoi t'i bënin një kafe turke të mirë. Një burrë rreth të shtatëdhjetave, me një palë mustaqe alla Çaplin, nisi t'i rreshtojë një lumë me shqetësime lidhur me mundësitë e manipulimeve gjatë votimit për referendumin. Me atë mendim ishte edhe një pjesë e Oborrit. Ata merakoseshin për hilet në fletën e votimit (...) Ndërsa në dhomë vlonte debati, e zonja e shtëpisë-rezidencë të Lekës solli kafenë. Me vështrim të përhumbur tek dritarja përballë ai thithi ngadalë cigaren e më pas ngriti filxhanin drejt buzëve. M'u duk se nuk ndodhej fare në atë dhomë por diku larg, ndaj dhe e pyeta:
- Naltmadhni, ju shqetësojnë manipulimet?
Leka ktheu kokën nga unë, më nguli sytë dhe m'u përgjigj:
- Jo zotni Armir. Më shqetësojnë pyetjet.
Leka ishte zhgënjyer. Ai priste të takonte nëpër auditorë një brez të ri djemsh të shkolluar, idealistë, të etur për ndryshim. Zogu erdhi i përgatitur të përballej me studentë plot interesa dhe jo vogëlushë kureshtarë për përrallat me mbretin.
Takimi i së premtes me intelektualët i dha fundi i këtij seriali, ndaj mendoj se ajo pamje e pikëlluar nuk shprehte më zhgënjim, por trishtim. Me ato që tha dhe dëgjoi për një muaj rresht Leka i vuri përfundimisht notën e tij administratës, inteligjencias dhe elitës së tashme e të ardhme të Shqipërisë.
(Përmbledhje e kapitujve
17 - 18)

© 2003 Gazeta Panorama

Faqe 5 - Poltikë
reforma zgjedhore
debati

Socialistët përjashtojnë mundësinë e kompromisit me LSI e LZHK për votimin e hartës elektorale

PS: Zgjedhjet, konsensus vetëm me PD
Kërkohet seancë e jashtëzakonshme parlamentare për marrëveshjen

Juli Prifti
Socialistët mendojnë të thërrasin një seancë të jashtëzakonshme parlamentare për të diskutuar një marrëveshje me demokratët në lidhje me ndarjen e re territoriale dhe ndryshimet në Kod.
Kështu, bashkëkryetari socialist i komisionit bipartizan, Elmaz Sherifi, tha dje, se pas reflektimit të PD-së për variantin e paraqitur nga OSBE-ja, PS-ja do të thërrasë një seancë të jashtëzakonshme për të miratuar ndarjen e re territoriale, para se të nisë sesioni i zakonshëm i Parlamentit. “Nuk bëhet fjalë për të pasur asnjë shans për marrëveshje me LSI-në apo me LZHK-në, për hartën zgjedhore. OSBE-ja ka paraqitur një draft për të cilin ne jemi në pritje të reflektimit të PD-së”, ka konfirmuar Sherifi idenë e negociatave vetëm me partinë më të madhe të opozitës. Gjithsesi, Sherifi konfirmon se deri më tani, nuk ka asnjë shenjë se mund të ketë konsensus, pasi ai thekson se socialistët ndodhen në pritje të reflektimit të PD-së. Por, sipas deklaratave të tij, duket se socialistët janë të gatshëm për të arritur një marrëveshje, e cila do të grumbullonte numrin e duhur të votave për të kaluar edhe ndryshimet në Kodin Elektoral në Parlament, të cilat kërkojnë plot 86 vota. PS-ja, e vetme nuk i arrin këto vota, ndërsa pozicioni i partive të tjera në Kuvend, aleate të saj, duket i lëkundur.
PS-ja sulmon PD-në
“Ndryshimet në Kodin Zgjedhor, të cilat u mundësuan me konsensus në komisionin bipartizan të Kuvendit, u shkelmuan dhe u bënë zero nga PD-ja ditën e premte, me kushtin absurd që kjo parti vuri për votimin e ndarjes se re të zonave elektorale, ndarje kjo e cila mbështetet mbi një kriter antikushtetues, siç është ai i marrjes për bazë të numrit të votuesve që kanë votuar në zgjedhjet e tetorit 2003”. Ky ka qenë qëndrimi zyrtar i socialistëve, i shprehur edhe dje nga zëdhënësi politik i kësaj partie, Gjergj Koja, qëndrim që nuk ndryshon nga ai i shprehur më parë. Duket se palët kanë nisur të sulmojnë dhe të kundërsulmojnë njëra-tjetrën se kush do ta mbajë përgjegjësinë për këtë bllokim të reformës, nga e cila varen edhe zgjedhjet e ardhshme parlamentare. PS-ja e ka cilësuar qëndrimin e PD-së, si “totalisht bllokues dhe refraktar”, duke e akuzuar atë se nuk kërkon zgjedhje të lira, të ndershme e të pakontestueshme, por po përpiqet t’i bllokojë dhe të mos i njohë ato që tani. PS-ja ftoi, dje opozitën të miratojë paketën e amendimeve të Kodit Zgjedhor, në mënyrë të pavarur nga ndarja e zonave zgjedhore.
PD-ja sulmon PS-në
Nga ana tjetër, demokratët janë përgjigjur përmes anëtarit të komisionit bipartizan, Fatos Beja, i cili ka përsëritur këmbënguljen e PD-së në variantin e saj. Sipas Bejës, ndarja e re e zonave zgjedhore duhet të realizohet mbi bazën e regjistrimit të fundit të popullsisë, ku vetë qeverisja socialiste ka qenë pjesëmarrëse. “Në këtë mënyrë, ne do të këmbëngulim për një ndarje të re elektorale, e cila të jetë sipas standardeve, nëse duam që edhe zgjedhjet e ardhshme parlamentare të përmbushin standardet e kërkuara”, ka pohuar Beja. Ai tha se nuk ekziston mundësia e votimit për ndryshimet në Kod, pa u miratuar më parë harta e re elektorale.

Qëndrimet
“Harta bashkë me kodin”
Bashkëkryetari i komisionit bipartizan për PS-në, Elmaz Sherifi, ka mohuar dje, çdo mundësi për marrëveshje mes PS-së dhe LSI-së apo LZHK-së për miratimin në Parlament të hartës elektorale. Ai tha dje se PS-ja do të vazhdojë të jetë në pritje të një reflektimi të mundshëm të PD-së, për këtë çështje. “Nuk bëhet fjalë për të pasur asnjë shans për marrëveshje me LSI-në apo me LZHK-në, për hartën zgjedhore. OSBE-ja ka paraqitur një draft për të cilin ne jemi në pritje të reflektimit të PD-së. Ne propozojmë se pas një reflektimi të PD-së ndaj këtij drafti të realizohet një senacë e jashtëzakonshme për miratimin në Parlament të hartës zgjedhore, para se të fillojë sesioni i ri parlamentar”, tha Sherifi. Ideja për marrëveshje të PS-së me LSI-në dhe LZHK-në është hedhur pak ditë më parë nga kreu i PAD-së Neritan Ceka. Sherifi u shpreh gjithashtu, se PS-ja është për ndarjen e votimit të hartës me kodin.
“S’ka lëshime për ndarjen”
“E kemi përsëritur qëndrimin tonë dhe nuk kemi ndër mend të bëjmë lëshime përsa i takon ndarjes së votimit për hartën elektorale me ndryshimet në Kodin Zgjedhor. Ndarja e re territoriale është një çështje që kërkon patjetër të shqyrtohet dhe të merret vendim, pasi ndarja ekzistuese nuk përmbush asnjë nga rekomandimet ndërkombëtare. Këto të fundit përcaktojnë përafrim të numrit të zgjedhësve për secilën nga zonat zgjedhore, kurse ndarja aktuale ka një diferencim shumë të madh mes tyre. Ne e kemi propozuar variantin tonë dhe ky është që ndarja të bëhet sipas regjistrimit të fundit të popullsisë, i cili është realizuar nga vetë qeveria socialiste. Në këtë mënyrë, ne do të këmbëngulim për një ndarje të re elektorale, e cila të jetë sipas standardeve, nëse duam që edhe zgjedhjet e ardhshme parlamentare të përmbushin standardet e kërkuara”.

Kushtet e ndërkombëtarëve
Konsensusi për zgjedhjet, bazë për negociatat
Bashkimi Evropian ka kërkuar miratimin e amendimeve të Kodit Zgjedhor, si dhe të hartës zgjedhore brenda këtij viti, por kjo kërkesë nuk është realizuar nga ana e klasës politike shqiptare.
Bllokimi i reformës zgjedhore, mosmiratimi i ndryshimeve të Kodit Zgjedhor dhe të hartës elektorale mund të ndikojë në arritjen e atyre afateve të përcaktuara nga ana e BE-së, si pjesë e rekomandimeve të bëra nga takimi i përbashkët KE - Shqipëri për procesin e asocim-stabilizimit. Në bazë të këtyre rekomandimeve është parashikuar një axhendë punimesh, ku pjesa më e madhe ka të bëjë me përgatitjen që duhet të bëjë Shqipëria për zgjedhjet e ardhshme parlamentare, për të cilin BE-ja ka vënë si kusht e ato duhet të zhvillohen të lira dhe të drejta, në përputhje me standardet ndërkombëtare. Në këtë draft të përbashkët të firmosur nga ana e negociatorëve të BE-së dhe Shqipërisë janë përcaktuar disa etapa që përfshihen disa afate për ngritjen e administratës zgjedhore, i KZZ-të, KQV-të. Gjithashtu, në këto projektrekomandime kërkohet që të përfundohet brenda muajit shkurt regjistrimi i popullsisë dhe të shpallen brenda marsit listat e zgjedhësve. Një rëndësi të veçantë i kushtohet miratimit të rregullores së brendshme të Komisionit Qendror të Zgjedhjeve. Në këtë material kërkohet që rregullorja për KQZ-në të miratohet brenda një kohe sa më të shpejtë. BE-ja kërkon që zhvillohet sa më shpejt trajnimi i komisionerëve të KZZ-ve dhe KQV-ve në mënyrë për të eleminuar mangësitë që u vërejtën në zgjedhjet e shkuara të vitit 2003.

Faqe 6 - Politikë

Korçë, ministri i Pushtetit Vendor reagon pas vizitës së Berishës

Blushi: Kreu i PD dështoi si pajtimtar i demokratëve

Bledar Hoti
Ministri i Pushtetit Vendor, Ben Blushi, gjatë një takimi të zhvilluar në qytetin e Korçës e ka sulmuar ashpër liderin e PD-së, Sali Berisha.
“Krishtlindja është një festë pajtimi, shprese dhe vlerash. Korça është shquar gjithnjë për një filozofi mirëkuptimi dhe paqeje, ndaj ne si drejtues, qoftë të PS-së, qoftë të PD-së nuk duhet të shkatërrojmë një traditë kaq tolerante dhe të bukur që e kemi trashëguar ndër vite nga paraardhësit tanë”, tha dje Blushi. Kjo festë, sipas tij, këtë vit me vizitën e Berishës nuk manifestoi vlerat e saj dhe mirëkuptimin, pasi ata u thirrën për të parë vlerat negative të përfaqësuesit të PD-së. Gjatë një konference për shtyp Blushi fillimisht ka përcjellë urimet më të ngrohta për mbarë qytetarinë korçare, duke theksuar se viti i ardhshëm do të jetë një vit më i mbarë se ky që kaloi, do të jetë begati dhe shpresë për gjithë qytetarët korçarë, sidomos për ata që aktualisht kanë humbur shpresat tashmë. Ai ka bërë një koment lidhur me vizitën e Berishës në Korçë, duke e quajtur atë një mision të dështuar për të pajtuar 2 palët e PD-së në Korçë që janë krijuar jo më larg se portat e bashkisë, për shkak të interesave cinike të tenderave dhe prokurimeve që kanë prekur njërën apo tjetrën palë. Ai është shprehur se qytetarët korçarë duhet të jenë të sigurt se Korça nuk po ndëshkohet në asnjë mënyrë për arsye subjektive apo politike. Blushi ka theksuar që, nëse ka pasur ndonjëherë manipulime të votave, kjo ka ndodhur në Korçë në vitin 2003, kur PD-ja fitoi duke reduktuar listat e zgjedhësve dhe duke i deformuar ato. Duke u ndalur tek akuzat që hodhi për të Berisha se ai i fiton votat duke hapur thesin në fushatë elektorale, Blushi ka theksuar se pikë së pari qeveria nuk investin me thasë kjo është një shprehje e rëndomtë dhe primitive, pasi qeveria vepron me buzhetin e shtetit dhe vazhdimisht. Blushi gjatë kësaj konference ka theksuar se Korça do të kishte më tepër investime, nëse do të ekzistonte një bashkëpunim më i frytshëm me qeverinë. ”Nuk kam arsye që të paragjykoj nëse Bashkia e Korçës po i realizon ato në mënyrë militante, subjektive apo politike, pasi këto procedura janë detyrë primare aktualisht për çdo autoritet lokal, por unë do t’i bëja thirrje Bashkisë së Korçës që t’i marrë seriozisht këto procedura”, theksoi Blushi.

Në vizitat në Korçë
Nano: Kemi nevojë për ditë të vërteta shprese
Më shumë se kurrë kemi nevojë për ditë të vërteta shprese. Ky ka qenë mesazhi që kryeministri Nano u ka drejtuar shqiptarëve me rastin e Krishtlindjeve. I shoqëruar edhe nga bashkëshortja, Nano ka qenë dje në qytetin e Korçës, ku ka zhvilluar një vizitë në Metropolinë e qytetit dhe i ka uruar autoritetet fetare të Metropolisë ditën e madhe të lindjes së Krishtit. “Është një ditë e rilindjes, e shpresës, e gëzimit për të gjithë, është dita e konsolidimit të lirisë së besimit, të besimit tek Zoti dhe tek e ardhmja. Roli i institucioneve fetare në ditë të tilla, që konsolidojnë institucionin kryesor të shqiptarëve, që është toleranca dhe harmonia midis njerëzve të besimeve të ndryshme, është i pazëvendësueshëm. Më shumë se kurrë kemi nevojë për ditë të vërteta shprese”, tha Nano duke iu drejtuar të gjithë besimtarëve të krishterë të Korçës dhe të gjithë Shqipërisë.
Berisha: Blushi po përgjysmon fondet
“Sensi aktual për pushtetin qeveritar është tepër primitiv. Pushtetarët e sotëm e konceptojnë pushtetin dhe ligjet e tij si një mjet për të vjedhur”, ka thënë Berisha. Ai e ka cilësuar fitoren e vitit të kaluar në qytetin e Korçës si një fitore të mbarë popullit shqiptar. “Kjo fitore është një sfidë që iu bë mazhorancës aktuale, pasi ata humbën zemrën e Shqipërisë, por Korça, në fakt, votoi për vlerat e saj, për qytetarin dhe sportistin Robert Damo”, ka thënë Berisha. Sipas tij, Blushi dhe Servet Pëllumbi, si 2 deputetët e zonës, po përgjysmojnë fondet e Bashkisë së Korçës për ta dënuar këtë qytet dhe qytetarët e respektuar të saj. Duke iu “sulur” kundërshtarit të tij politik, Nanos, ai tha se ky i fundit po tenton të vjedhë sërish vota, por koha e tij ka mbaruar. Madje, vizitën e Nanos në Korçë ai e ka cilësuar si rastësore, pasi “Nano u gjend kalimthi në Korçë e jo për të kaluar Krishtlindjet në këtë qytet, por për të kaluar drejt shtetit fqinj”, ka përfunduar ai.

Meta në Durrës: Më 2005 ikin Nano e Berisha
Kryetari i LSI-së, Ilir Meta, deklaron se 2005 do të jetë viti i ndryshimeve të mëdha për Shqipërinë dhe shqiptarët. Ai ka marrë pjesë dje në një takim festiv të LRI-së së Durrësit, i organizuar nga krerët e këtij forumi me rastin e Krishtlindjeve dhe Vitit të Ri, nga ku ka premtuar largimin e politikanëve të konfliktit, Nano e Berisha, nga politika. Meta ka falënderuar të rinjtë e LRI-së së Durrësit dhe ka premtuar në takimin e tyre se viti 2005 do të jetë viti i fitores për LSI-në. Meta ishte i shoqëruar në këtë takim nga nënkryetari Xhufi, sekretari i përgjithshëm Vasili, deputetët Spartak Braho e Monika Kryemadhi, si dhe shumë anëtarë të Kryesisë së LSI-së. Ndërkohë, kanë qenë të pranishëm në këtë festë kreu i LRI-së, Elvis Mataj, dhe Dritan Ylli, përfaqësues i forumeve të larta të LRI-së.
Moisiu: S‘kam lidhje me biznesin e nipërve
Presidenti Moisiu ka reaguar përsëri në lidhje me akuzat e bëra nga ana e liderit të opozitës, Berisha, për përfshirje në bizensin e nipërve të tij. Kreu demokrat e sulmoi presidentin për lidhje me biznesin gjatë vizitës të së dielës në Korçë. Por, burime nga Presidenca theksuan dje se Moisiu ka rideklaruar që “dy nipërit e tij janë dy shtetas të lirë në Shqipëri dhe që mund të kenë të drejtën për të ushtruar një aktivitet të tyrin privat”. Moisiu ka hedhur poshtë zërat se ai ka pjesë në këtë biznes privat, duke i cilësuar si të pavërtetë. Marrëdhëniet mes kreut të PD-së dhe presidentit pas një periudhe të qetë, duket se shkojnë drejt acarimit. “Presidenti rigaranton se nuk ka asnjë lidhje me biznesin e nipërve dhe e konsideron aktivitetin e tyre si aktivitetin e dy qytetarëve shqiptarë”, thanë dje burimet e Presidencës.
PBK: Edhe ne në komisionet zgjedhore
Pas LSI-së dhe LZHK-së, edhe PBK-ja kërkon të ketë të drejtën e përfaqësimit politik me anëtarë në komisionet zgjedhore. Kreu i PBK-së, Adriatik Alimadhi, ka kërkuar përfshirjen e partisë së tij në komisionet zgjedhore për zgjedhjet e reja parlamentare. Në mbledhjen e zhvilluar me kryetarët e degëve të PBK-së, Alimadhi theksoi se “të gjitha partitë politike duhet të kenë përfaqësues në komisionet e niveleve të dyta dhe të treta”. “Ne jemi partia më e vjetër dhe si tillë duhet të kemi përfaqësues në komisionet zgjedhore, kështu ne mund t’i ruajmë më mirë votat. Një gjë të tillë ne e kërkojmë pasi eksperienca ka treguar se zgjedhjet janë manipuluar nga dy partitë e mëdha politike”, deklaroi Alimadhi. PBK-ja pritet të dalë e vetme në këto zgjedhje, pasi aleanca e PD-në duket e do të jetë e paarritshme. Nisur nga ky fakt, ai u ka kërkuar kryetarëve të degëve në rrethet e Shqipërisë, që të përgatisin kandidaturat për deputetë për të gjitha zonat zgjedhore njëemërore.

Takimi/ Kreu demokrat bën urimet me rastin e festave
Berisha: Aleanca ime me mediat dhe shoqërinë civile
Kreu demokrat, Sali Berisha, e ka përcaktuar vitin e ardhshëm si vitin e sfidave për PD-në. Duke folur në një takim miqësor me botues, gazetarë dhe përfaqësues të shoqërisë civile, me rastin e festave të fundvitit, kreu demokrat ka theksuar se viti që vjen përmban një sërë sfidash madhore, të cilat kulmojnë me zgjedhjet parlamentare. Berisha ka theksuar se PD-ja do të qëndrojë e vendosur dhe do të përmbushë të gjitha detyrimet e saj për të arritur në standardizmin evropian të zgjedhjeve. Berisha ka përmendur gjithë problematikën e vitit të kaluar, që, sipas tij, e ngjiti Shqipërinë me 16 kate në piramidën e korrupsionit. “Ne kemi bërë çdo përpjekje për t’u vënë në shërbim të integrimit, por në fund të këtij viti, procesi është kthyer mbrapsht, pasi ata me qëllimin për të manipuluar zgjedhjet, nuk reshtin së dëmtuari Shqipërinë”, ka theksuar Berisha, duke iu referuar bllokimit të fundit të reformës. Në takimin e organizuar nga kreu demokrat ishin të ftuar përveç gazetarëve e botuesve, edhe mjaft përfaqësues të shoqërisë civile. Berisha iu drejtua atyre si një hallkë e rëndësishme që do të ndihmojë në rritjen dhe shtrirjen e demokratëve në të gjithë Shqipërinë. Procesi i hapjes së PD-së, si një strategji dhe domosdoshmëri e shpallur në prag të kuvendit të tretë të kësaj partie, ishte një nga pikat ku u përqendrua Berisha. Ai i përcaktoi përfaqësuesit e shoqërisë civile si njerëz që nuk janë pjesë e PD-së, por kanë dhe mbështesin ide të njëjta. Për këtë arsye, ata janë ftuar dhe kanë pranuar të kontribuojnë në hartimin e programit dhe politikave themelore të selisë “blu”. Rezultati i kësaj pune ka qenë, sipas Berishës, përgatitja e fuqishme e PD-së për të ardhur në pushtet dhe për të funksionuar normalisht që në muajt e parë të qeverisjes së ardhshme. Më pas, kreu demokrat u ka uruar festat e fundvitit të gjithë të pranishmëve.
Berisha, “konslutime” me të ftuarit
Berisha nuk ka ngurruar t’i takojë thuajse të gjithë të ftuarit, duke kërkuar të shkëmbejë personalisht mendime thuajse me të gjithë pjesëtarët e medias dhe të shoqërisë civile që kish ftuar në takim. Madje, gjatë bisedave nuk ka ngurruar të kujtojë detaje nga puna e gjithsecilit në fushat e tyre.