Çështja çame ka përfshirë edhe diplomacinë greke në arenën e debatit që po zhvillohet në Parlamentin shqiptar.

Qeveria greke i ka kërkuar Kuvendit që të mos miratojë projektrezolutën për çamët, e cila po diskutohet në Komisionin Parlamentar të Jashtëm. Ky sinjal i fortë i qeverisë greke vjen në një kohë kur Kuvendi ka shtyrë për të tretën herë radhazi shqyrtimin në seancë plenare të kësaj rezolute. Kryetari i Kuvendit, Servet Pëllumbi, njoftoi dje në mbledhjen e byrosë parlamentare se projektrezoluta për çamët do të diskutohet të enjten në seancë, për shkak se axhenda e Kuvendit është tepër e ngarkuar. Si replikë, kryetari i PLL-së, Ekrem Spahiu, e kritikoi kryeparlamentarin Pëllumbi për vonesë të qëllimshme të shqyrtimit të kësaj rezolute. Në këtë situatë vjen edhe apeli i qeverisë greke, e cila para disa ditësh deklaroi me anën e zëdhënësit të saj se e konsideron problemin çam çështje të mbyllur dhe se do të mbajë qëndrimin që ka mbajtur deri më sot. Burime nga PS-ja njoftojnë se qeveria greke ka njoftuar me anën e peticionit kryetarin e Komisionit Parlamentar të Jashtëm, Ilir Zela, drejtues të PS-së dhe zyrtarë të qeverisë. Me anën e këtij peticioni, Greqia kërkon që Kuvendi shqiptar të anullojë rezolutën e kërkuar nga opozita shqiptare. Ndërkohë, përfaqësuesit e opozitës kanë theksuar ditët e fundit se qeveria shqiptare duhet të kërkojë shfuqizimin e ligjit të luftës që ka Greqia me vendin tonë. Një kërkesë tjetër e opozitës është kthimi i të gjitha pronave të popullsisë çame të dëbuar nga veriu i Greqisë para 50 vitesh. Anëtarët e Komisionit të Jashtëm e kanë gati që prej një jave projektrezolutën për çamët, ndërkohë që presin vetëm vendimin e kryetarit të Kuvendit Pëllumbi për ta kaluar në seancë plenare.

Karamalis mesazh Nanos: Do punojmë së bashku

Qeveria greke ia ofruar dje kryeministrit Nano mbështetje për të realizuar integrimin euroatlantik. Në një mesazh përshëndetës drejtuar Nanos, kryeministri i Greqisë, Kostas Karamalis, tha se “qeveria e re e Greqisë do të përpiqet për të zhvilluar më tej marrëdhëniet tona miqësore dhe bashkëpunimin në të gjitha fushat. Ne e konsiderojmë Shqipërinë një partner të rëndësishëm strategjik në rajonin tonë dhe jemi të gatshëm për të punuar së bashku për të shikuar përpara drejt sfidave të reja të epokës sonë dhe për t’u ofruar mundësi të reja për progres dhe prosperitet popujve tanë”.