Faqja 4 - POLITIKE Korrik 30, 2004 http://www.balkanweb.com/gazeta/gazeta.htm


DJE NE KUVEND LIGJI KALOI ME 69 VOTA PRO

Opozita bojkotoi ligjin për Pronat
Ruçi: Topi është shmangur për konsensusin

Artemida Çollaku

Socialistët në mazho-rancë, pa pjesmarrjen e opozitës, dhe me votat e disa
aleatëve e të qeverisë, kanë votuar me 69 vota pro, ligjin e pronave sipas
variantit të Presidentit të Republikës. Opozita e bojkotoi këtë proces,
ndërkohë që socialistët e kanë votuar të vetëm këtë variant të presidentit.

LAJMI

Gjithçka ndodhi dje, kur kryetari i Kuvendit Servet Pëllumbi vendosi në
pikën e fundit të rendit të ditës së këtij sesioni projektin e Pronave.
Demokratët u çuan nga salla dhe e bojkotuan votimin. Socialistët shprehën
moskuptimin e tyre ndaj veprimit të demokratëve, të cilët tashmë, nuk ishin
dakord as me socialistët e as me Presidentin. Arma më e fortë në dorën e
socialistëve, mbeti fakti i ofertave të shumta që i ishin bërë Partisë
Demokratike për kompromis, të papërfilluara nga këta të fundit.

Çfarë u mor parasysh
Komitetit shtetëror për Kthimin dhe Kompesimin e pronës iu hoq kompetenca
për të riparë vendimet e marra më parë lidhur me pronën, nga komisionet që
kanë ekzistuar dhe në bazë të ligjeve që kanë ekzistuar. Sipas ligjit të ri,
komisioni ka për detyrë vetëm të verifikojë nëse zbatohen procedurat e këtij
ligji. Në ligj u saktësua ndër të tjera se shkarkimi i anëtarit të Komitetit
Shtetëror për Kthimin dhe Kompesimin e Pronave të bëhet me votim të
Kuvendit. Këto shkarkime do të bëhen vetëm atëherë kur të provohet se
anëtari i këtij komiteti ka përfituar në mënyrë të paligjshme dhe
abuziviste.

Ruçi: S'e kuptoj largimin e PD
Demokratët lanë sallën kur u votua ligji, ndërkohë që kishin deklaruar se do
të ishin present në Parlament por "do të votonin kundër". Kreu i grupit
parlamentar socialist Gramoz Ruçi tha se "opozita dëshmoi mungesë vullneti
përballë kërkesës së bërë gjatë dy ditëve me rradhë nga Partia Socialiste
për të hyrë në bisedime e për të gjetur një konsensus lidhur me propozimet
që donte të bënte opozita për ligjin". "Atyre ju mungon vullneti politik për
të pasur një consensus politik për këtë çështje kaq madhore" tha Ruçi në
foltoren e Kuvendit. Ai bëri publike në sallën e Kuvendit përpjekjet e tij
për të kontaktuar me homologun demokrat Bamir Topi, përpjekje që sipas tij
rezultuan të dështuara për shkak të mosdëshirës së demokratëve. Madje, kreu
i deputetëve socialistë, kërkoi që të hidhej poshtë ndryshimi i bërë në
komisionin e ligjeve, me propozim të deputetit të PD Ritvan Bode për të
hequr nga e drejta për të blerë truallin, personat të cilët kanë marrë atë
truall me qera për një kohë relativisht të shkurtër. "Ne e mbështetëm këtë
propozim duke pretenduar se do të kishim konsensusin e PD për pjesën tjetër
të ligjit" tha Ruçi. Ndërkohë që më pas parlamenti kaloi për miratim vetëm
pikat e kërkuara nga Presidenti i Republikës.


"Ikëm se bisedimet i konsideruam të pavlera për ligjin e pronës"

Bamir Topi, kryetar i grupit parlamentar të Partisë Demokratike u shpreh pas
votimit të ligjit se bojkoti i demokratëve lidhej me mosndryshimin e ligjit
nga ana e socialistëve. "Ne e pamë shumë mirë qëndrimin që socialistët
mbajtën gjatë shqyrtimit të ligjit në komisionet kuvendore dhe nuk prisnim
asgjë të mirë" tha Topi. Ai ndër të tjera sqaroi se kërkesa e kreut të
grupit parlamentar të Partisë Socialiste Gramoz Ruçi për të zhvilluar
bisedime për ligjin e pronës përpara se ai të kalonte në seancë plenare,
ishte e pafrytshme. "Pika e vetme në të cilën socialistët kërkonin që të
binim në konsesus politik ishte që kryetari i Komitetit Shtetëror për
Kthimin dhe Kompensimin e Pornave të zgjidhjes sipas variantit të PD-së",
tha Topi. Sipas tij, PD-ja nuk mund të jepte konsesusin e saj kur në ligj ka
një sërë pikash thelbësore, të cilat kanë nevojë për ndryshime.


PDR qëndron në sallë e voton kundër, po ashtu edhe Legisi

Gramoz Ruçi kryetar i Grupit Parlamentar të Partisë Socialiste bëri publik
qëndrimin në parlament se socialistët kërkuan konsensusin e PD për të votuar
ligjin e pronës, por nga kjo e fundit, gjithçka u refuzua. Socialistët kanë
mbetur të habitur kur pasi lideri i PD Berisha foli për të gjitha pikat e
rendit të ditës, sa erdhi çështja e pronave, bojkotuan sallën në mënyrë të
menjëhershme. Ruçi tha se është dashur konsensusi i PD për kalimin e ligjit,
por që pas mbledhjes së grupit parlamnetar të Partisë Socialiste, ka pasur
një hermetizim të komunikimit mes dy kryetarëve të grupeve parlamentare. Në
kuvend qëndroi vetëm republikani Maks Begeja, ndërkohë që qëndruan edhe
deputetët e PDR. Këta të fundit kanë votuar kundër projektit në Parlament.
Kundër projektit për pronat, votoi edhe socialisti Ndre Legisi.


----------------------------------------------------------------------------

30 Korrik 2004 http://www.kohajone.com/

PRONAT, LIGJI MIRATOHET PA KONSENSUS

Oli Xhilaga

Pas shume debatesh dhe kundershtimesh, parlamenti shqiptar miratoi me ne
fund ligjin per kthimin dhe kompensimin e pronave. Keshtu ne seancen e
djeshme plenare Kuvendi pasi mori ne shqyrtim dekretin e presidentit per
ndryshime ne ligjin e pronave, e miratoi ate me 69 vota pro kundrejt 6
votave kunder dhe 3 abstenim. Por perseri ligji per pronat dhe ne kete
seance nuk gjeti konsensusin e te gjitha forcave politike. Kujtojme se nje
nga arsyet per te cilat kreu i shtetit e riktheu kete ligj ishte pikerisht
mungesa e konsensusit, por ne momentin kur do te votohej per ndryshimet e
propozuara ne kete ligj, deputetet demokrate braktisen seancen. Edhe pse nuk
parashtruan asnje argument qe conte ne largimin e tyre nga seanca,
demokratet gjate ketyre diteve paralajmeruan se nuk do te marrin pjese ne
kete votim nese nuk respektohen propozimet e bera nga keta deputete sa i
takon ligjit ne teresi dhe jo vetem pikave te kontestuara nga presidenti.
Lidhurme keto propozime, gjate diskutimeve ne komisionet e ndryshme
parlamentare, sidomos ne ate te ekonomise, deputetet socialiste nuk pranuan
qe te miratoheshin dhe si rrjedhoje nuk u kaluan per shqyrtim ne seancen e
djeshme. Duke qene se kjo force politike, kontestoi kete ligj qe ne
miratimin e pare te tij, nuk e shikoi te drejte pjesemarrjen ne votimin e
dyte te ligjit per kthimin dhe kompensimin e pronave. Por nga ana tjeter,
socialistet duke denuar kete veprim te PD-se, vune ne dukje se kjo force
politike nuk ka pasur asnjehere vullnetin politik per gjetjen e konsensusit,
sa i takon ketij ligji kaq te rendesishem. Nderkohe edhe pse partite e
djathta parlamentare moren pjese ne kete votim, ato kundeshtuan propozimet e
bera nga mazhoranca. Megjithate ashtu sikurse pritej, mazhoranca socialiste
nepermjet forces se kartonave, i dha fund odisese se tejzgjatur te pronave.

Ridebatimi

Sipas rregullave parlamentare, ligji "Per kthimin dhe kompensimin e pronave"
u miratua ne seancen e djeshme me votat e mazhorances dhe kjo pas zhvillimit
te debatit te dyte. Nga ana tjeter, kujtojme se vetem nje here e ka te
drejten institucioni i kreut te shtetit te paraqese kerkesen e tij per
kthimin mbrapsht dhe rishqyrtimin e ketij projektligji ne Kuvend. Keshtu pas
zhvillimit te debatit neper komisionet perkatese te Kuvendit, ligji u kalua
per miratim ne parlament, por kesaj here vetem pikat e kontestuara nga
institucioni i presidences. Dhe kesaj radhe, votimi e kaloi kete ligj vetem
me votat e mazhorances, duke e konsideruar ne kete menyre te miratuar. Pas
kesaj, megjithese ligji mund te kete serish diskutime, nuk ka me te drejte
askush qe ta dekretoje per rishqyrtim. Ai konsiderohet si i miratuar.

Rezervat e Moisiut

"Konstatoj se ligji i miratuar nuk reflekton plotesisht piken e pare te
marreveshjes se partive politike te 18 dhjetorit 2002, si dhe konstatoj
angazhime politike ne nje perqindje jo te vogel, te cilat jane kunder
zgjidhjeve ne aspekte te vecanta te ligjit", eshte shprehur presidenti
lidhur me kete fakt. Duke u ndalur tek hartuesit e ligjit, te iniciuar nga
OSBE-ja dhe hartuar me ndihmen e saj per kreun e shtetit, varianti
perfundimtar nuk respekton parime dhe elemente thelbesore te marreveshjes se
arritur me ndermjetesimin e saj. Nenet qe konteston Moisiu ne ligjin e
pronave jane: 1. Ne nenin 16, pika 1/a dhe 3, eshte percaktuar se Komiteti
Shteteror per Kthimin dhe Kompensimin e Prones ka te drejte te shfuqizoje
vendime te komisioneve vendore. 2. Nje rregullim me implikime te panevojshme
mendoj se eshte dhe e drejta e Komitetit Shteteror, neni 16, pika 2, qe te
verifikoje vendimet e komisioneve qe kane zbatuar Ligjin nr. 7698,
dt.15.04.1993 "Per kthimin dhe kompensimin e pronave ish-pronareve" dhe
Ligjin nr. 7501, date 19.07.1991 "Per token" dhe t'i shfuqizoje ato ose te
kerkoje shfuqizimin e tyre ne rruge gjyqesore. 3. Neni 15, krijon Komitetin
Shteteror per Kthimin dhe Kompensimin e Prones.

----------
PDR: TE AMENDOHET LIGJI 7501

Kryetari i PDR-se, Genc Pollo, gjate nje konference per shtyp, e cilesoi te
paqenesishem ligjin per kthimin dhe kompensimin e pronave. "Projektligji i
paraqitur nuk merr parasysh as verejtjet e presidentit, as nenet e
Kushtetutes, as realitetin e Shqiperise dhe as te drejten e prones", theksoi
Pollo gjate fjales se tij.

Duke e quajtur nje farse kete ligj, Pollo vuri ne dukje se "kete farse nuk e
mbulon dot as perpjekja pseudo-konsensuale per te caktuar "kryellokmaxhiun"
e duhur ne krye te Komisionit te Kthimit te Pronave". Gjithashtu, Pollo beri
disa propozime lidhur me kete ligj, te cilat do te gjenin dhe zgjidhjen e
duhur te tij. Keshtu ai kerkoi qe te amendohet ligji 7501 dhe ai i turizmit
i vitit 1993 per zonen bregdetare, te mos kufizohet ne madhesi dhe ne vlere
dhe as nga lloji i tokes: toke-truall, toke-buqesore, si dhe prona te njihet
me te dy format e saj, e luajtshme dhe e paluajtshme.

----------------------------------------------------------------------------

http://www.shekulli.com.al/

Asnjë kompromis për ligjin e pronave. PS miraton vetëm një vërejtje të
presidentit

Pronat, PS miraton ligjin opozita bojkoton seancën

A.Rama

TIRANE- Parlamenti miratoi pa konsensus ndryshimet në ligjin "Për kthimin
dhe kompensimin e pronave ish -pronarëve", duke përmirësuar vetëm një nga
vërejtjet e përfshira në dekretin e kthyer nga presidenti Moisiu për këtë
çështje. Ndonëse nuk shprehu asnjë qëndrim për dekretin dje në seancë, grupi
parlamentar i PD-së u largua në momentin që do të fillonte procedura e
votimit. Selia blu kishte deklaruar se nuk do të merrte pjesë në votim në
rast se nuk rishiheshin disa nga pikat kryesore të miratuar pa konsensus në
votimin e mëparshëm të ligjit. Ndërkaq të vetmit që ngelën në sallë nga
opozita ishin grupi parlamentar i PDR-së, dhe republikani Maksim Begeja. Në
tërësi ligji i votua me 69 vota pro, 6 kundër dhe tre abstenime. Kryetari i
grupit parlamentar të PS-së Gramoz Ruçi, tha se opozita nuk kishte pasur
vullnetin politik për të dhënë konsensusin e miratimit të amendamenteve që
do t'i bashkangjiteshin ligjit të pronave. "Ne ishim të gatshëm për
konsensus dhe këtë e bëmë duke ofruar ndryshimin e pikës 4 të nenit si dhe
propozuam që Komiteti Shtetëror i Kthimit dhe Kompensimit të Pronave të
ishte me një përbërje të balancuar. Por ata e kishin të pandryshueshëm
qëndrimin duke llogaritur koston elektorale se do të humbisnin mbështetjen e
ish -pronarëve në zgjedhjet e vitit tjetër", -tha Ruçi. Sipas tij edhe
presidenti në një takim që ai kishte pasur me të pas kthimit të dekretit,
kishte kërkuar që të miratohej me konsensus. Ruçi tha se kryetari i shtetit
i kishte premtuar se do të ndërhynte ai që grupi i PD-së të ndryshonte
qëndrimin. Ndërsa deputeti republikan Maksim Begeja, kërkoi që të ndryshohej
edhe kufizimi për kthimin e pronave me 60 ha i vendosur për ish -pronarët si
dhe disa çështje të tjera të ligjit. Por Ruçi tha se Begeja, nuk kishte
paraqitur asnjë amendament gjatë debatit të zhvilluar këtë javë në
komisionet parlamentare. Ndërsa Gjinushi e konsideroi propagandë elektorale
atë që kërkonte Begeja dhe qëndrimin e mbajtur nga PD. Pas votimit u
mbështet vetëm amendamenti për të shtuar si pikë më vete në nenin 15,
procedurat që do të zbatohen për shkarkimin e anëtarëve të KSHKKP-së. Ndërsa
për vërejtjen e kërkuar për pikën a të nenit 16, u vendos që të hiqet pjesa
"vendimet administrative të marra në zbatim të ligjit 7501 "Për tokën" dhe
ligji i vitit 1993 "Për kthimin dhe kompensimin e pronave ish -pronarëve".
Nuk u miratua vërejtja e presidentit për të hequr kompetencën e KSHKKP-së
për të kthyer vendimet e marra nga komisionet vendore.

----------------------------------------------------------------------------

30Korrik 2004  © 2003 Gazeta Panorama
Faqe 5 - Politikë

Maxhoranca pranon vetëm dy kërkesa të presidentit Moisiu. PD-ja dhe aleatët
braktisin seancën

Pronat, ligji miratohet nga PS-ja

Gramoz Ruçi: PD-ja nuk e ka dashur arritjen e konsensusit


Bledar Hoti

Ligji i Pronave rivotohet në Kuvend pa konsensusin politik të kërkuar
pozitë-opozitë.

Deputetët e Partisë Demokratike, Partisë Republikane, Partisë së Ballit
Kombëtar, Partisë Lëvizja e Legalitetit, kanë bojkotuar votimin, duke lënë
në fuqi mosarritjen e konsensusit politik për çështjen e pronave. Në seancën
e votimit të Ligjit të Pronave kanë mbetur, përveç socialistëve dhe aleatëve
të tyre, edhe pesë deputetët e PDR-së. Me 69 vota pro, 5 kundër dhe 3
abstenime, janë votuar vetëm dy ndryshimet e kërkuara nga presidenti i
Republikës. Pesë votat kundër kanë qenë të deputetëve të PDr-së, ndërsa
abstenime kanë ardhur nga socialistët Pepa dhe Dizdari, si dhe nga Goçi i
PBDNJ-së. Në momentin kur kryeparlamentari Pëllumbi ka kërkuar votimin e
Ligjit të Pronave, deputetët e opozitës janë ngritur në këmbë dhe kanë dalë
nga salla, duke mos marrë pjesë në këtë proces votimi.

Qëndrimi i Ruçit
Kryetari i Grupit Parlamentar të PS-së, Gramoz Ruçi, ka kërkuar
mosndryshimin e mëtejshëm të Ligjit të Pronave, por vetëm të atyre pikave që
ka kërkuar presidenti i Republikës. Përfaqësuesi i lartë socialist ka
fajësuar demokratët për mosarritjen e konsensusit politik. "Që nga dita e
martë, unë kam qenë i mandatuar nga Grupi Parlamentar i PS-së për të
negociuar me përfaqësuesit e PD-së. Por që nga ajo ditë e deri më tani,
PD-ja ka mbajtur një qëndrim hermetik në lidhje me çështjen e pronave, duke
treguar kështu se nuk e ka vullnetin politik për arritjen e konsensusit",
deklaroi Ruçi. Nisur nga ky qëndrim i demokratëve, Ruçi kërkoi votimin e
ligjit, duke u shprehur se "unë nuk kam asnjë merak politik për këtë
 çështje". Deputeti i PS-së, Limoz Dizdari, kërkoi që "të mos votohet në
seancë ky ligj, por të tentohej përsëri konsenusi me PD-në"; kjo është
kundërshtuar nga ana e Ruçit, i cili kërkoi votimin e ligjit. "Unë jam
takuar edhe me presidentin e Republikës, i cili më premtoi se do të
bisedonte me PD-në. Por siç duket, nga ky veprim i PD-së, as kreu i shtetit
nuk arriti të bindë PD-në për çështjen e pronave", theksoi Ruçi.

Ndryshimet e ligjit
Partia Socialiste ka pranuar që të ndryshojë vetëm dy pika në nenet e ligjit
"Për kompensimin dhe kthimin e pronave", duke plotësuar edhe një kërkesë
tjetër të presidentit të Republikës. Ndërsa ndryshimin e kërkuar nga PD-ja
për qiratë e trojeve, e përcaktuar në Nenin 8 të këtij ligji, socialistët,
edhe pse të miratuara në Komisionin e Ligjeve të Ekonomisë, nuk pranuan ta
votonin në seancë. Përveç përcaktimit të rasteve se kur shkarkohen anëtarët
e Komisionit Shtetëror të Pronave, në seancë u hoq edhe fjalët në Nenin 16,
Pika 2 "dhe vendimet administrative të dhëna për ndarjen e tokës bujqësore,
sipas Ligjit 7501 "Për Tokën" dhe ndarjen e tokave bujqësore të
ish-ndërmarrjeve bujqësore", duke u ngelur vetëm Ligji 7698. Ndërkohë, nuk
ndryshohet formula e përbërjes së Komisionit Shtetëror të Pronave.



Kuvendi i rinis punimet më 6 shtator

Kuvendi i Shqipërisë i mbylli dje punimet parlamentare, për t'i rinisur ato
më 6 shtator. Me rastin e mbylljes së Sesionit të Gjashtë të Legjislaturës
së XVI të Kuvendit, kryeparlamentari Pëllumbi theksoi se gjatë kësaj
periudhe janë miratuar 107 ligje dhe 26 vendime të rëndësishme, si dhe janë
zhvilluar 9 mocione për debat dhe 35 interpelanca.



Ndryshimet e votuara nga PS

Nuk ndryshohet Neni 16, Pika 1
Nuk ndryshohet formula e zgjedhjes së anëtarëve të KSHKKP-së, ku kryetari i
këtij institucioni propozohet nga kryeministri, dekretohet nga presidenti
dhe votohet në Kuvend. Ky institucion përbëhet nga shtatë anëtarë

Ndryshohet Neni 16, Pika 2
Komiteti Shtetëror i Pronave verifikon vendimet e komisioneve të kthimit dhe
kompensimit të pronave, të ngritura sipas Ligjit 7698 "Për kthimin dhe
kompensimin e pronave ish-pronarëve". Kërkesa për verifikimin e vendimeve të
dhëna, paraqitet në mënyrë të motivuar nga organet e qeverisjes vendore ose
subjkete të shpronësuara.


----------------------------------------------------------------------------

http://www.ballkan.com/

Pronat, prishet pakti PS-PD
 Ruçi: Opozita nuk ka vullnet politik për të arritur konsensus. PD-ja
braktis seancën

 Autori i Lajmit: Teuta Metra

Tiranë - Parlamenti ka ripërsëritur të njëjtën skenë me Ligjin e Pronave si
disa javë më parë, duke e miratuar atë pa i bërë ndryshimet që kërkonte
presidenti dhe opozita. Po ashtu, parlamenti ka mbyllur seancën e fundit të
tij me sharje, fyrje dhe braktisje seance. Kjo ka qenë panorama e fundit që
deputetët kanë lënë në mbyllje të sesionit parlamentar.
Pozita dhe opozita nuk kanë arritur të gjejnë një konsensus për çështjen me
të diskutuar që ka të bëjë me Ligjin e Pronave. Ligji për kthimin dhe
kompensimin e pronave është miratuar vetëm me votat e mazhorancës. Kështu me
69 vota pro, 6 kundër dhe tri abstenime Kuvendi miratoi ndryshimet e bëra,
duke marrë parasysh një pjesë të vërejtjeve të presidentit.
Votimi
Gjatë seancës së djeshme u diksutuan vetëm ndryshimet që janë bërë nga
Komisionet e Ligjeve dhe të Ekonomisë, që kanë të bëjnë me disa pika në
nenin 15 dhe në nenin 16. Gjatë shqyrtimit të ndryshimeve të bëra, opozita e
ka braktisur sallën, duke mos marrë pjesë në diskutim dhe në votimin e këtij
ligji. Sekretari i përgjithshëm i PS-së, Gramoz Ruçi, i vë fajin opozitës se
nuk ka vullnet politik për të gjetur një konsensus. Ruçi shprehet se tashmë
i ka realizuar të gjitha përpjekjet e tij dhe nuk i ka mbetur asnjë merak
për të shtyrë apo për të diskutuar këtë ligj. Lidhur me takimin me homologun
e tij, Bamir Topi, Ruçi ka thënë se ky takim kishte të bënte vetëm me ligjin
për kthimin dhe kompensimin e tokave. Pasi pozita po përdorte të gjitha
format për të gjetur një konsensus me palën tjetër. Ky takim, sipas Ruçit,
është bërë vetëm në kuadër të ndryshimeve dhe sygjerimeve të presidentit për
këtë ligj, por gjithashtu është diskutuar edhe për nenin aq të përfolur,
nenin 15. Nen për të cilin PD-ja u largua nga marrëveshja me PS-në.
Debati
Deputeti socialist Erion Braçe i është drejtuar opozitës, duke u kujtuar se
"është pikërisht ajo që ka një konflikt interesash, ku njëri është pronar i
gjysmës së Tiranës dhe tjetri i gjysmës së Shqipërisë". Ashtu si dhe herë të
tjera, deputeti i PR-së, Maksim Begeja, është shprehur kundër mënyrës së
kalimit të këtij ligji. Por këtë radhë Begeja ka kalur në një formë më të
fortë të shprehuri, duke i thënë palës së mazhorancës se "PS-ja po vazhdon
të lëpijë atë që ka pështyrë deri dje". Socialistët, për të kaluar ligjin, u
ndihmuan dhe nga votat e reformatorëve, të cilët, megjithëse votuan kundër,
ndihmuan PS-në me prezencën e tyre në sallën e parlamentit. Ligji për
kthimin dhe kompensimin e pronave nuk gjeti një konsensus midis dy forcave
më të mëdha politike. Neni për të cilin ata nuk arritën këtë marrëveshje
ishte pikërisht neni 15, që kishte të bënte me kryetarin e komitetit për
kthimin dhe kompensimin e pronave. Opozita kërkonte që kryetari të zgjidhej
nga presidenti. Dy javë më parë pozita ftoi opozitën për një marrëveshje,
duke pranuar dekretin e presidentit, por që kryetari i komitetit të zgjidhej
vetëm me vendimin e parlamentit.

Data e Publikimit: 30/07/2004

----------------------------------------------------------------------------

Lajmi i ores 9:15 AM  http://www.balkanweb.com/

Kuvendi miraton ndryshimet në ligjin për kthimin e pronave, opozita bojkoton
seancën


 TIRANE (30 Korrik) - Edhe pse kishin deklaruar se nuk do ta braktisnin
sallën e kuvendit, demokratët kanë vepruar ndryshe duke e lene në doren e
socialisteve miratimin e ligjit për pronat. Gjithcka ndodhi pasi kryetari i
kuvendit Servet Pëllumbi vendosi ne piken e fundit te rendit të ditës
projektin për pronat. Në seancen e djeshme komitetit shteteror për kthimin
dhe kompensimin e prones i'u hoq e drejta për te ripare vendimet e marra më
parë lidhur me pronën. Detyra e re e këtij komisioni ështe që të beje
verifikimin nese zbatohen procedurat e këtij ligji. Sipas kreut te grupit
parlamentar socialist, Gramoz Ruci, ikja e demokrateve tregon nje mungesë të
theksuar vullneti përballë kërkesës së socialisteve për te hyre ne
negociata. Kunder projektit kanë votuar vetëm anetaret e partisë Reformatore
te drejtuar nga Genc Pollo, Maks Begeja dhe deputeti socialist Ndre Legisi.
bm/bm (GazetaShqiptare/BalkanWeb)

----------

KRRTRSH miraton projektin e "Club Med" për fshat turistik në Kakome

Lajmi i ores 5:10 PM


KRRTRSH

 TIRANE (30 Korrik) - Nën drejtimin e kryeministrit Fatos Nano, sot në
ambjentet e Galerise Kombetare të Arteve u zhvillua mbledhja e radhës së
Këshillit të Rregullimit të Territorit të Republikës së Shqipërisë. KRRTRSH
miratoi projektin e kompanisë franceze "Club Med' për ndërtimin e një fshati
turistik në Gjirin e Kakomesë në bashkëpunim me shoqërinë shqiptare Riviera.
KRRTRSH miratoi edhe gjendjen kadastrale dhe pronësinë mbi siperfaqen e
tokës, për zonën e Gjirit të Kakomesë. KRRTRSH vendosi aktivizimin e
vendimit të marrë në KRRTRSH e mëparshme për studimin dhe lejen e ndërtimit
të fshatit turistik Kakome. Lidhur me pretendimet e ngritura për pronësinë e
zonës së gjirit të Kakomesë Ministri i Rregullimit të Territorit dhe
Turizmit Bashkim Fino paraqiti arsyetimet ligjore në këtë drejtim. Tokat në
dhe rreth Gjirit te Kakomese, ku do te ndertohet fshati turistik, jane te
rregjistruara ne zerin kadastral "kullote" ne pronesi te shtetit. Bëjnë
perjashtim 9 objektet e rrenuara, me nje siperfaqe totale 1.800 m2, te
privatizuara me procedura të parregullta. Eshtë tërësisht e ligjshme, dhënia
e lejes së ndërtimit Shoqërisë Riviera, për ndërtimin e Fshatit Turistik në
Gjirin e Kakomesë. Duke folur për çështjen e Gjirit të Kakomesë, Nano u
shpreh se interesa kakofone, te unifikuara me kohezion negativ, po perpiqen
ta mbajne peng me cdo kusht piratet e rinj te betonit, duke krijuar
artificialisht "klime te nxehte" mes premtimeve piramidale per "ndarje"
tokash shteterore dhe tendencave per nje zhvillim bashkekohor". "Shqyrtimi
dhe inkurajimi i projekteve te tilla me rendesi kombetare, e ben edhe me te
prekshem procesin e integrimit, ndaj sot ndihemi te afte per te kontribuar
dhe konkurruar ne levizjen globale te vlerave". Në mbledhje u miratua
studimi urbanistik pjesor dhe sheshi i ndërtimit për "Mjedisin stërvitor
qëndor "TZH-2010" në rajonin e Zall-Herrit, Tiranë. Ky mjedis do të shërbejë
për përgatitjen ushtarake të efektivave kryesore të Forcave Tokësore, të
parashikuara për t'u vendosur në këtë rajon. U miratua studimi urbanistik
pjesor dhe shesh ndërtimi për objektin "Qendra Antitrafik Delta-Forcë,
Radhimë-Vlorë. Moli i Radhimës në Vlorë parashikohet të kalojë në përdorim
të Ministrisë së Rendit Publik për t'u përdorur nga strukturat
DELTA-FORCE-Shqiptare, në luftën kundër trafikut të paligjshëm. ro/ro
(BalkanWeb)