30092004

Meta dhe Zogu “rrëmbejnë” këshillin bashkiak

Autori i Lajmit: B.GJ.
Durrës - Këshilli bashkiak i Durrësit nuk do të ndahet më mes dy partive më të mëdha politike, por do të ndahet dhe me dy partitë e reja të dala në skenën politike: Lëvizja Socialiste për Integrim dhe Lëvizja për Zhvillim Kombëtar. Tre këshilltarë socialistë pritet të deklarojnë daljen e tyre më vete nën siglën e LSI-së dhe të paktën katër këshilltarë të djathtë do të krijojnë grupin e LZHK-së në këtë bashki. Në mbledhjen e parë që do të zhvillojë këshilli muajin që vjen pritet të deklarohet dhe ndryshimi i grupeve të votuara në zgjedhjet vendore të tetorit 2003. Burimet të sigurta pranë këtij këshilli bëjnë të ditur se jo vetëm PS-ja do të ketë humbje në numra, por dhe PD-ja. Pas kuvendit të 8-të lokal të PD-së në Durrës pritet të ndryshohen shifrat e grupimit të së djathtës. Rreth 5 këshilltarë nga opozita do të krijojnë një grup më vete. Sekretari për marrëdhëniet me publikun në degën e PD-së së Durrësit është shprehur se 5 anëtarë të këshillit kanë nënshkruar deklaratën për të legalizuar në të parën mbledhje të këshillit grupin e Lëvizjes për Zhvillim Kombëtar. Ndërkaq, Lëvizja Socialiste për Integrim do të ketë në krye të grupit të këshilltarëve ish-kryetarin e degës së PS-së në këtë qytet, Leonidha Gjermenin. I pozicionuar në krahun e Ilir Metës, ai ka mundur që të thithë pas vetes dhe shumë figura të tjera të partisë në këtë rreth. Vetë Gjermeni ka deklaruar për mediat në Durrës se së bashku me të janë edhe së paku dy këshilltarë të së majtës. Ai gjithsesi nuk ka bërë të qartë nëse ata janë këshilltarë të PS-së apo u përkasin partive aleate të majta në këshill. Lëvizja e Ilir Metës ka synuar që të marrë sa më shumë mbështetje nëpër rrethe dhe ka gjetur mbështetës dhe në pushtetin vendor. Duket pak paradoksale, por edhe pse është një parti e krijuar kaq vonë, LSI-ja ka mudur të sigurojë një mbështetje jo të paktë në radhët e këshilltarëve në shumë bashki e komuna. Kështu, si rast precedent është ai i Elbasanit, ku kjo lëvizje ka marrë gati gjysmën e këshilltarëve socialistë në këshill.