Data e Publikimit: 31/05/2004 http://www.ballkan.com/

Leka Zogu trondit PS dhe PD

Dizdari: Ai s'mund të jetë faktor në politikë. Mediu e Beja: Qëllim i mirë,
platformë e vjetër

 Autori i Lajmit: Erl Murati
TIRANE - Deputetë të partive politike të spektrit të majtë e të djathtë e
quajnë qëllimmirë platformën e shpallur nga Leka Zogu "Për zhvillimin
kombëtar". Po rata janë përgjithësisht skeptikë lidhur me të ardhmen e Zogut
në politikë dhe zbatimit të ideve të tij. "Sipas meje ai dhe platforma e tij
nuk do të nxjerrë ndonjë konkluzion real në politikë", thotë democrati Fatos
Beja. Ndërsa republikani Mediu shprehet se tezat e pretendentit për fronin
mbretëror janë të vjetra.
Qëndrimi
Përveç deputetit të Ballit Kombëtar Demokrat, Alfred Cako të gjithë
politikanët e tjerë e quajnë të vjetër dhe të parealizueshme, platformën e
Zogut pr zhvillim kombëtar. Sipas tyre, Zogu nuk është I qartë se çfarë
kërkon të realizojë dhe me cilët njerëz. "Zogu nuk është i qartë në ftesën
që i bën partive, cilët fton në këtë lëvizje dhe cilët do e drejtojnë atë,
vetë Leka apo PLL-ja", thotë reformatori Tepshi. Skepticizmi ndaj tezave të
Zogut kulmon me ironinë e socialistit Limoz Dizdari I cili duke qeshur
shton: "Zogu? Nuk mendoj se do të jetë ndonjëherë faktor në politikë!" Sipas
liberaldemokratit Neritan Ceka, ende nuk është e qartë se në ç'mënyrë do të
kërkohet për të arrirë objektivat. "Do të ishte mirë që pretendenti për
fronin mbretëror të sqaronte më mirë pozicionin e vet, se në ç'mënyrë do të
përpiqet t'i realizojë objektivat e veta: nëpërmjet shpalljes si mbret i
Shqipërisë apo nëpërmjet futjes në politikën aktuale, ndoshta duke ndjekur
formulën që ndoqi Simeoni në Bullgari i cili më pas u zgjodh kryeministër
pas zgjedhjeve parlamentare", shprehet Ceka.
Platforma
Dy ditë më parë, në ambjentet e vilës 26, trashëgimtari i fronit mbretëror
ndërmori një lëvizje politike për të sfumuar dy forcat kryesore politike në
zgjedhjet e 2005-s. Leka Zogu u ka premtuar shqiptarëve se do t'u rikthejë
rendin, do të shfarosë korrupsionin dhe varfërinë, dhe do të shmangë
politikën amorale të deritanishme. Për të arritur këtë, ai ka kërkuar në
këmbim mbështetjen dhe votën në zgjedhjet e 2005-s. Lëvizja mbretërore nuk
do të ketë trajtën e një partie, por të një thirrjeje qytetare për të
përkrahur këtë platformë që ofron i biri i Mbretit Ahmet Zogu, i cili
mbretëroi për 15 vjet në Shqipëri. Trashëgimtari i fronit mbretëror, Leka
Zogu, u ka bërë thirrje publike të gjithë intelektualëve dhe politikanëve që
e ndjejnë veten jashtë realitetit aktual politik që ofron vendi, për t'u
afruar në këtë lëvizje për zhvillim kombëtar dhe për t'u bërë pjesë e saj.
"Unë u drejtohem inteligjencës kombëtare që të zgjohet dhe të organizohet,
pasi ne duhet të bashkëpunojmë dhe të bashkohemi për të realizuar ndryshimet
që kërkon populli shqipar, i cili dëshiron të hyjë në Bashkimin Evropian",
tha ai. Duke e parë këtë mënyrë bashkimi si të vetmen formë të realizimit të
zhvillimit kombëtar, Zogu shtoi se "inteligjenca dhe kombi shqiptar duhet të
shpallin misionin e tyre me zgjedhjet e reja, në të cilat jam i bindur që
populli ka mundësi për ta bërë Shqipërinë dhe kombin shqiptar komb-shtet dhe
shtet modern me dinjitet".


Kur Leka Zogu mohoi luftën me Serbinë

Megjithëse ngulmon vazhdimisht për Shqipërinë e Madhe, pretendenti për
fronin mbretëror e mohonte kategorikisht disa vite me parë mundësinë e
hapjes së një lufte me Serbinë. Në vitin 1997, Leka Zogu deklaroi se edhe
nëse do të zgjidhej një ditë mbret i shqiptarëve, nuk do të hapte një luftë
me vendin fqinj. "Nuk është çështja ende për luftë. Shqipëria nuk është në
gjendje për të dalë nga situata e rëndë ekonomike, gjendjen e saj e dinë të
gjithë fatkeqësisht. Nuk jemi në një situatë që do të dëshironim për të bërë
luftë. Bashkimi i trojeve mund të bëhet me anë të presionit diplomatik dhe
politik", shprehej asokohe Zogu. Megjithëse u bë protagonist I disa
ngjarjeve të dhunshme në Tiranë, Zogu shfaqej një njeri paqësor, patriot dhe
antisocialist. Sipas tij, ngjarjet e vitit '98 nuk ishin aspak një
grushtshteti, por një revoltë popullore. Në këtë mënyrë Zogu justifikoi në
një farë mënyre organizatorët e ngjarjeve të 14 shtatorit 1998.
"Grushtshteti nuk bëhet në mënyrë të tillë, por futkeqësia e jonë është se
në vend se të bëhen demonstrata paqësore, shpesh kalojnë nga natyra e
shqiptarit me eksitimin e vet. Ngjarjet ishin një revoltë popullore për
dorëheqjen e Nanos", thoshte Leka Zogu.


Neritan Ceka, PAD

Mendoj se lëvizja që ka inicuar Leka Zogu nuk ka asgjë negative, por unë
mendoj se ajo nuk mund të rivalizojë në politikën shqiptare. Do të ishte
mirë që pretendenti për fronin mbretëror të sqaronte më mirë pozicionin e
vet, se në ç'mënyrë do të përpiqet t'i realizojë objektivat e veta:
nëpërmjet shpalljes si mbret i Shqipërisë apo nëpërmjet futjes në politikën
aktuale, ndoshta duke ndjekur formulën që ndoqi Simeoni në Bullgari i cili
më pas u zgjodh kryeministër pas zgjedhjeve parlamentare.

Limoz Dizdari, PS
Ç'është kjo . (qesh). Nuk mendoj se Leka Zogu mund të jetë faktor në
politikën shqiptare.

Fatmir Mediu, PR
Unë mendoj se Leka Zogu zëdhënësat e tij i ka në Partinë Lëvizja e
Legalitetit e cila përfaqësohet në Kuvend. Nuk ka asgjë të re në platformën
politike apo mbarëkombëtare që parashtroi ai, përveç disa tezave që unë
mendoj se janë thënë me kohë dhe fare mirë mund të mbrohen nga ajo forcë
politike në Parlament e cila mbështet orientimet e pretendentit për fronin
mbretëror. Pra, mendoj se nuk ka asnjë të re në atë që u quajt platforma e
Leka Zogut.

Fatos Beja, PD
Leka Zogu nuk ka qenë dhe nuk është aktor në politikë pavarësisht nga
dëshira e mire e tij. Unë nuk gjykoj se nisma e tij është një nismë që do të
ketë ndikim në zhvillimet politikke shqiptare po të kemi parasysh se ai nuk
përbën një nga aktorët aktivë të politikës. Sipas meje ai dhe platforma e
tij nuk do të nxjerrë ndonjë konkluzion real në politikë. Gjithsesi, kjo
është një deklaratë qëllimmirë për shqiptarët.

Qazim Tepshi, PDR
Nuk besoj se Leka Zogu do të jetë një pol i tretë në politikë, thjesht për
atë që nuk ka ndonjë element të ri në atë që kërkon ai. E dyta, Zogu nuk
është i qartë në ftesën që i bën partive, cilët fton në këtë lëvizje dhe
cilët do e drejtojnë atë, vetë Leka apo PLL-ja. Pastaj, ai nuk ka bërë të
ditur se çfarë premton në luftimin e varfërisë për të thithur ftesat e të
pakënaqurve dhe të abandonuarve që janë larg partive të mëdha. Ai duhet të
na shpjegojë se çfarë linje do të ndjekë për të thithur përkrahjen e atyre
njerëzve që nuk kanë vajtur në zgjedhje.

Alfred Cako, PBKD
Pas vitit '90 dy figura kryesore ka pasur e djathta: Leka Zogun dhe Abaz
Ermenjin. Mendoj që PS-ja e PD-ja nuk janë parti identiteti, por parti
arriviste. Pas votimit të PD-së lidhur me çështjen e pronave është më i
nevojshëm se kurrë bashkimi i së djathtës nga Leka Zogu. Ai është një nga
njerëzit më të spikatur në drejtim të virtyteve dhe së bashku me një elitë
të ndershme intelektuale që nuk është përzier me politikë, mund të lozin një
rol të rëndësishëm në politikën shqiptare. Të djathtët janë të zhgënjyer nga
Partia Demokratike dhe këto vota abstenuese mund t'i tërheqë Leka Zogu.