01/04/2005 http://www.shekulli.com.al/

Kryeministri mbyll listën e kandidatëve të PS. Qytetet me përplasje kandidaturash dhe emrat e rinj

PS, lista e 100 kandidatëve për deputetë

Ruçi: “Lista e kandidatëve në përfundim e sipër. Janë zgjedhje politike, kryetari ka të drejtën e propozimit”

Darina Tanushi

TIRANË – Dy drejtuesit kryesorë të PS-së Fatos Nano e Gramoz Ruçi kanë bërë pothuaj gati listën e kandidatëve për deputetë që do të prezantohet në kongresin e partisë në fund të prillit. Megjithatë ka ende zona, të cilat ose kanë nga dy pretendentë për kandidatë, ndërsa pak zona të tjera ende nuk kanë emra. Madje mësohet se edhe midis Nanos dhe Ruçit ka patur mjaft debate për caktimin e emrave, një pjesë e të cilëve është propozuar nga baza, ndërsa një pjesë e madhe janë nga ata deputetë që ende vazhdojnë të jenë në Parlament. Mësohet se ka qenë kryeministri ai që ka përzgjedhur pjesën dërrmuese të kandidatëve duke dalë shpesh edhe kundër mendimeve të ardhura nga baza. I pyetur për këtë listë, sekretari i përgjithshëm Gramoz Ruçi tha dje, se “lista e kandidatëve për deputetë është në përfundim e sipër. Do të tërhiqet mendimi i institucioneve të partisë dhe ka norma statutore se kush i miraton emrat”. Ai tha se, sipas statutit të partisë çdo anëtar partie ka të drejtë të propozojë, aq më shumë kryetari i partisë, pasi këto janë zgjedhje politike dhe kryetari ka të drejtën e propozimit. Lista e kandidatëve do të diskutohet edhe në mbledhjen e kryesisë që mund të mblidhet në dy javët e para të prillit, ndërsa ajo do të caktojë edhe datat e thirrjes së KPD-së dhe kongresit. Do të jetë ky i fundit që do t’i vërë vulën të gjithë listës, e cila ende nuk mund të quhet e përfunduar. Ndërkohë, gjatë diskutimeve dhe debateve që kanë patur me njëri-tjetrin jo vetëm dy krerët kryesorë të PS-së Nano dhe Ruçi, por edhe në nivelin vendor të degëve të PS-së është vënë re se për një zonë elektorale ka më shumë se një kandidat. Kjo duket sidomos në qarkun e Gjirokastrës, atë të Elbasanit, në Vlorë apo pak a shumë edhe në Berat. Dublime ka sidomos në ato zona ku mendohet që të mos kandidojnë më disa prej deputetëve aktualë. Kështu në Gjirokastër përballë deputetit Vangjel Tavo është përfolur edhe Dhimitraq Rafti, një nga njerëzit e njohur të kryetarit Nano, ndërsa pothuaj është caktuar që në një nga zonat të kandidojë nënkryetarja e Kuvendit Makbule Çeço. Ndërsa në qarkun e Elbasanit përballë deputetit aktual Ilir Zela, i cili mësohet se është zgjedhur të përfaqësojë sërish PS-në në një nga zonat e Librazhdit është edhe Rrapush Tola. Ndërkohë që në vend të deputetit Maksut Balla FRESSH-i ka propozuar një kandidat të tijin, Taulant Ballën. Në Vlorë nuk ka ende qartësi për disa nga emrat e kandidatëve pasi baza socialiste nuk është dakord me emrat e servirur nga Nano. Emrat e rinj janë të shumtë në listën e kandidatëve për deputetë. Vendin e parë për këtë e mban kryeqyteti, ku pak a shumë janë bërë publikë të gjithë kandidatët, si Andis Harasani, Igli Toska, Mimi Koledhi, Majlinda Keta, Shpëtim Idrizi, Arben Ahmetaj, ndërsa pritet që emra të rinj të kandidojnë edhe në zonat që janë jashtë qytetit të Tiranës. Ndërkohë në qarkun e Korçës një ndër emrat e rinj është edhe kryetari i komitetit të kulteve Ilir Kulla, në Durrës pritet të konkurrojnë si përfaqësues të PS-së këshilltari ekonomik i Nanos, Emin Barçi e të tjerë emra si Lulëzim Traga, Bujar Derveni e Sokol Kokomani, në Divjakë mësohet se do të kandidojë zv/ministri i Turizmit Artan Lame dhe në Fier prefektja Rajmonda Stefa. Në Lezhë pritet që PS-ja të kandidojë pikërisht përballë Preç Zogajt të PD-së një nga emrat e njohur edhe në lëvizjet pluraliste, Frrok Çupi. Megjithatë gjithçka pritet të saktësohet në ditët në vijim, kur pritet të mblidhen edhe forumet e PS-së. Ndërkohë sekretari i përgjithshëm Ruçi është shprehur dje,se ka patur edhe takime me aleatët, por gjatë këtij muaji ato do të institucionalizohen edhe qëndrimet deri në një qëndrim përbashkët gjë që mund të ndodhë deri në kongresin e partisë.

TIRANË – Drejtori i përgjithshëm i KESH-it, Andis Harasani, jep dorëheqjen nga Këshilli Mbikëqyrës i Bankës së Shqipërisë. “Meqënëse jam në fazën përgatitore të fushatës elektorale për zgjedhjet parlamentare, që do të zhvillohen në verën e këtij viti, më lejoni të paraqes dorëheqjen time si anëtar i Këshillit Mbikëqyrës të Bankës së Shqipërisë”, -është shprehur Harasani, në letrën që i ka drejtuar dje, kryeministrit Fatos Nano dhe guvernatorit të Bankës së Shqipërisë, Ardian Fullani. “Më lejoni fillimisht të shpreh falenderimet e mia të sinqerta për besimin dhe vlerësimin, që më keni dhënë deri më sot për punën time si anëtar i Këshillit Mbikëqyrës të Bankës së Shqipërisë. Meqënëse jam në fazën përgatitore të fushatës elektorale, më lejoni të paraqes dorëheqjen time, duke respektuar kështu Statusin e Bankës së Shqipërisë. Duke ju falenderuar edhe njëherë për besimin e dhënë deri më sot, përfundon Harasani, ju lutem pranoni dorëheqjen time si anëtar i Këshillit Mbikëqyrës të Bankës së Shqipërisë”, -thuhet në këtë letër.

Qarku Tiranë

1. Shpëtim Idrizi
2. Andis Harasani
3. Mimi Kodheli
4. Luan Rama
5. Spartak Poçi
6. Majlinda Keta
7. Musa Ulqini
8. Anastas Angjeli
9. Igli Toska
10. Arben Ahmetaj
11. Ermelinda Meksi
12. Petrit Malaj
13. Pjetër Dema
14. Durim Lame
15. Zyhdi Pepa
16. Ejup Tabaku
17. Sali Vogli
18. Arta Dade
19. I pavendosur
20. I pavendosur

Qarku Korçë

1. Ben Blushi
2. Pandeli Majko
3. Ilir Kulla
4. Niko Peleshi
5. Maqo Lakrori
6. Agim Isaku
7. Ahmet Hoxhallari
8. Sotir Kokeri
9. Fatmir Xhafa

Qarku Durrës

1. Gazmir Bizhga
2. Gjergji Koja
3. Emin Barçi
4. Agron Duka
5. Lulëzim Traga
6. Natasha Paço
7. Bujar Derveni
8. Sokol Kokomani

Qarku Fier
1. Albert Çaçi
2. Myzelejen Hoxha
3. Petro Koçi
4. Ylli Bufi
5. Blendi Klosi
6. Rajmonda Stefa
7. Kastriot Islami
8. Et’hem Ruka
9. Artan Lame
10. Fatmir Xhindi
11. I pavendosur
12.I pavendosur

Qarku Elbasan
1. Qazim Sejdini
2. Agim Leka
3. Ndriçim Hysa
4. Bukurosh Stafa
5. Durim Hushi
6. Ilir Zela
7. Taulant Balla
8. Valentina Leskaj
9. Elmaz Sherifi
10. Shpëtim Kateshi
11. Namik Dokle

Qarku Berat
1. Erjon Braçe
2. Marko Bello
3. Luan Memushi
4. Adriatik Islamaj
5. Bashkim Fino
6. i pavendosur

Qarku Vlorë

1. Arben Malaj
2. Bashkim Habilaj
3. Aldrin Dalipi
4. Mezan Malaj
5. Besnik Dervishi
6. Arben Isaraj
7. Artan Nelaj
8. Stefan Çipa

Qarku Shkodër

1. Paulin Sterkaj
2. Viktor Doda
3. Ndue Doda
4. Lekë Çukaj
5. Agron Çela
6. Ramadan Hasani
7. Zef Preçi
8. Tom Doshi
9. Ardian Kimça

Qarku Lezhë

1. Mark Nikolli
2. Agron Dibra
3. Shpëtim Cami
4. Albert Cakoni
5. Frrok Çupi

Qarku Dibër

1. Qemal Minxhozi
2. Skënder Demiri
3. Ardit Kaja
4. Ilir Gjoni
5. Ylber Çenga

Qarku Kukës

1. Shefqet Kastrati ?
2. Shyqyri Duraku
3. I pavendosur

Qarku Gjirokastër

1. Makbule Çeço
2. Vangjel Tavo
3. Gramoz Ruçi
4. Flamur Hoxha