Zona 96 është zona zgjedhore brenda në qytetin e Vlorës. Gjithashtu ajo është zona ku kërkohet vëmendje e veçantë për turizmin, si një nga pikat kryesore të zhvillimit, jo vetëm të kësaj zone, por edhe të gjithë qytetit.

1-Çfarë evidentoni ju në qeverisjen socialiste të 8 vjetëve?
Bashkim Habilaj (PS). PS-ja e mori pushtetin në vitin 1997 në kushte mjaft të vështira, ku gjithçka ishte e shkatërruar dhe asgjë nuk funksiononte. Me marrjen e pushtetit, kjo parti për një kohë shumë të shkurtër arriti të stabilizojë vendin dhe më pas hartoi programi i kalimit të emergjencës, si stabilizimi i rendit dhe elementë të tjerë jetikë të komunitetit. Më pas u hartuan programe dhe ide në drejtim të zhvillimit të vendit, duke bashkëpunuar dhe me strukturat ndërkombëtare. Gjatë këtyre viteve, qyteti i Vlorës ka pësuar një ndryshim mjaft të kënaqshëm, si në infrastrukturën e rrugëve të zonës brenda qytetit, por dhe në zonat e plazhit, ose zonës turistike. Ndryshimi ka qenë shumë i madh në zonat turistike dhe në plazhet e bregdetit, ku dinamika e turizmit ka qenë shumë e lartë, të paktën katër vitet e fundit. Besoj se mjafton për të thënë si ka qenë qeverisja socialiste.
Ardian Kollozi (PD). Fillimisht dua të kujtoj spastrimin e paligjshëm të institucioneve nga nëpunës që etiketoheshin si të PD-së, si strategji për të krijuar rrjetet e tyre korruptive. Fenomeni i krimit të organizuar, kapja e shtetit, korruptimi i çdo qelize të tij në mënyrë vertikale ose ndryshe krijimi i një megabande shtetërore. Qeverisja socialiste do të kujtohet nga shqiptarët si ajo e vjedhjes së thesarit, vrasjes së deputetit, vjedhjes së votave, manipulimit të listave, apo mënjanimi nga gara i kundërshtarit politik etj. Më vjen keq që duhet të përsëris praktika dhe fenomene të qeverisjes socialiste, çka mund ta lodhin lexuesin, por nuk mund të lë pa kujtuar ata 8 dimra të gjatë pa drita dhe ujë të pijshëm, fenomene ose ngjarje të rënda sociale si; emigrimi pa fund, krime, vetëvrasje, përdhunime dhe plagë të tjera të hapura gjatë kësaj periudhe.
Besnik Elezi (LSI). Së pari duhet thënë se qeverisja socialiste dihet se si e mori vendin pas krizës së vitit 1997, dhe në këtë kuptim nuk mund të thuhet se nuk ka pasur arritje. Por, LSI-ja u krijua dhe u shkëput nga PS-ja, pikërisht për mangësitë që u vërejtën me kohë ne qeverisjen e saj. Ndër këto mangësi do të përmendja ato që lidhen me thellimin e reformave me natyrë sociale, p.sh. në arsim, punësim, pensionet, sidomos në fshat, në punën e administratës dhe natyrisht meqë jam edhe në sferën time, në fushën e mjekësisë. Nuk u arrit të zbatohej si duhet skema e sigurimeve shoqërore, shërbimi mjekësor në zonat rurale është jo eficent si dhe ka mangësi serioze, të cilat u shfaqën edhe në krijimin e monopoleve.
Sulejman Abazaj (LZHK). Në planin e pasojave që ndihen sot në nëpërkëmbjen e interesave kombëtare, do ta quaja një politikë dhe një qeverisje të dështuar. Në këto pak ditë që kam marrë kontakt me zgjedhësit në zonë, kam ndjerë reagimin e tyre karshi vështirësive të jetës dhe prapësive të qeverisjes lokale në kurriz të biznesit të mesëm dhe të vogël. Tetë vjet nuk janë shumë, por janë edhe të mjaftueshëm për të dhënë shanse dhe shpresë për të gjitha shtresat në nevojë. Qeverisja socialiste premtoi se në këto vite do të shtonte deri në 250 mijë vende pune, më pas e uli premtimin në 150 mijë dhe sot fatkeqësisht, sipas statistikave të institucioneve ndërkombëtare, papunësia ka një rritje mbi 3 për qind në Shqipëri.

2-Cilat janë prioritetet e programit tuaj?
Bashkim Habilaj (PS). Partia Socialiste është një parti në gjendje të ndryshojë vetveten, është në gjendje të marrë përgjegjësi, të ndryshojë dhe vendin. Ajo është në gjendje të programojë zhvillimin e vendit në rang mbarëkombëtar, duke ofruar një harmoni të plotë midis interesave të brendshme dhe të jashtme, për të qenë në harmoni të plotë me njëra-tjetrën për zhvillimin e vendit. Unë përfaqësoj një parti progresiste, një parti të demokratizuar, ndërsa Partia Demokratike me vet rezultatet e saj, si gjatë qeverisjes, por dhe në përfundimin e saj në vitin 1997, nuk ka dhënë asgjë, si dhe nuk ka arritur të reformohet dhe të organizohet, që do të thotë se nuk ka ndryshuar asgjë nga ajo që ka qenë vite më parë, dhe nuk do të jetë në gjendje të sigurojë dinamikën e zhvillimit të vendit. Një kandidat do aftësi, do ndershmëri, do dhe përkushtim, elementë që kam realizuar gjatë angazhimit tim në politikë dhe jashtë saj.
Ardian Kollozi (PD). PD-ja i ka shpallur dy prioritetet kryesore të zhvillimit ekonomik të vendit, turizmin dhe bujqësinë. Duke pasur parasysh shtrirjen gjeografike të zonës 96, ne ndihemi shumë të favorizuar nga projektet shumë ambicioze, që programi ka parashikuar. Sllovenia ka vetëm 40 km vijë bregdetare dhe pozicion gjeografik me pak të favorshëm se yni, megjithatë atje sigurohet një pjesë e konsiderueshme e GDP-së pikërisht nga turizmi. Turizmi është prioriteti absolut i Vlorës. Do të vëmë në veprim të gjitha energjitë tona, që Vlora të bëhet një qytet turistik atraktiv i preferuar nga të gjitha agjencitë turistike botërore. Bregdetin e Vlorës nuk mendojmë ta mbjellim me beton, por do të ndërtojmë struktura të lehta turistike, në mënyrë që të ruajmë biodiversitetin e veçante të gjirit të Vlorës. Ndërtimi i shpejtë i rrugës Lushnjë-Vlorë, si dhe i një aeroporti në afërsi të qytetit do të bëjë të mundur plotësimin e infrastrukturës dhe kritereve që agjencitë turistike aplikojnë.
Besnik Elezi (LSI). Prioritetet e programit të LSI-së, forcës që unë përfaqësoj, janë të shprehura në vetë sloganin tonë elektoral, “Forcë e re, Shqipëri e Re”. Ndër këto prioritete janë politikat në shërbim të shtresave në nevojë, ulje të varfërisë, krijimi i hapësirave për biznesin e vogël, luftë kundër monopoleve, krijimi i kushteve reale për zhvillimin e turizmit dhe agrobiznesit nëpërmjet investimeve në infrastrukturën rrugore në drejtim të zonave turistike, politikave konkrete në drejtim të ndihmës ndaj fermerëve vendas. Kundërshtarët e mi përfaqësojnë dy forca të vjetra, që tashmë pas 15 vite tranzicioni u ka kaluar koha. Përfaqësuesi i PS-së nuk është një figurë e re e saj, sepse ai ka qenë me kohë në pozita drejtuese në rrethin e Vlorës dhe natyrshëm që është mbartës i frymës së vjetër të PS-së. Ndërsa përfaqësuesi i PD-së, ndonëse i ri në karrierën politike, përfaqëson një parti që, pavarësisht nga kozmetikat e KOP-it apo deklaratat e lidershipit të saj, përfaqëson një parti që ende nuk mund të thuhet se është shëruar plotësisht. Pikërisht në këtë plan qëndrojnë diferencat e mia me kundërshtarët. Unë përfaqësoj një forcë politike, që merr përsipër të shërojë plagët e tranzicionit të zgjatur dhe të vitalizojë forcat dhe resurset e vendit drejt integrimit në Evropë.
Sulejman Abazaj (LZHK). Përparësitë e programit të LZHK-së janë të dukshme në raport me plagjiaturat, që paraqesin kundërshtarët tanë në këtë fushatë zgjedhore. Intelektualët dhe specialistët brenda LZHK-së, mbështetur në idetë e mesazhit të mbretit Leka I, kanë marrë përsipër të bëjnë shtetin e munguar shqiptar, shtetin e së drejtës nëpërmjet forcimit të autoritetit të ligjit. Të gjithë ne e duam shtetin tonë të tillë, që ai të mbrojë interesat e qytetarëve të tij, që ai të jetë rregullatori i tërë veprimtarisë politike, sociale, ekomomike dhe të çdo fushe, duke u dhënë autoritetin e duhur institucioneve dhe jo një sistemi burokratik në konflikt të gjerë interesash dhe me neopotizëm në idiotësi. Programi parashikon vlerësimin e çështjeve më të prekshme, që kanë të bëjnë me thelbin e demokracisë. Të tilla janë ato që kanë të bëjnë me pronën private, me ligjin, me drejtësinë, me elementët e sigurisë kombëtare, me zhvillimin e biznesit të mesëm dhe të vogël, me lehtësitë për arsimin dhe të ardhmen e rinisë sonë. Situatën e rëndë në jetën socialpolitike, për të gjitha këto që trajtova më lartë e kanë ndjerë qytetarët vlonjatë dhe shqiptarët kudo. Prioriteti më madhor i programit elektoral të LZHK-së është përmbajtja e tij në një frymë të thellë kombëtare, duke vënë prioritet mbrojtjen e interesave kombëtare për të shkuar drejtë Evropës me dinjitet.

3-Cili është avantazhi juaj ndaj kundërshtarit?
Bashkim Habilaj (PS). E thashë dhe më lart, kryesorja është te programi i partive, në fushatën e zhvilluar si në zonat zgjedhore ashtu dhe mediatike, në programe dhe alternativa. Në njohjen e realitetit, problemeve të zonës, si dhe të komunitetit ku dhe kandidon, gjë që unë e njoh më së miri, duke qenë dhe kryetari aktual i Partis Socialiste të Vlorës.
Ardian Kollozi (PD). Kundërshtari Habili si përfaqësues tipik i PS-në në pushtet, ka humbur të drejtën morale t’u kërkojë votën zgjedhësve pas 8 viteve qeverisje të kontestuar tashmë haptas, si nga faktori ndërkombëtar, ashtu edhe nga gjithë shqiptarët, madje dhe nga shumica e socialistëve të ndershëm. Lidhjet e mia me zonën dhe banorët e saj janë ato të njeriut të lindur e të rritur mes respektit e dashurisë së banorëve të kësaj zone. Prindërit e mi kanë kontribuar për shumë vite në edukimin e gjeneratave të fëmijëve të po kësaj zone. Ajo që dua të theksoj është vendosmëria, ndershmëria, përkushtimi dhe këmbëngulja, karakteristika të miat për çdo impenjim dhe detyrë, të cilën unë marr përsipër. Këto cilësi kanë bërë të mundur suksese në aktivitetin tim privat.
Besnik Elezi (LSI). Përparësitë, nëse flasim për forcat politike që ata përfaqësojnë, natyrisht janë të lidhura me diferencat që përmenda më sipër. Nëse do të flasim në planin individual, ndaj tyre unë jam një figurë e pakonsumuar, që politikën dua ta lidh me misionin tim në shërbim të njerëzve. Përfaqësuesi i PS-së është me GREENCARD në xhep dhe familjen në SHBA. Ndoshta është një fakt personal, por kur merr përsipër të angazhohesh në politikë, kjo nuk bëhet për njëfarë kohe ose me fushata, por për t’i shërbyer në vazhdimësi elektoratit, qoftë nëse zgjidhesh apo edhe kur nuk zgjidhesh si deputet. Përfaqësuesi i PD-së është një biznesmen, mbase edhe i suksesshëm, por unë mendoj se në Shqipëri ende nuk është krijuar bindja se biznesi mund të bashkëjetojë me politikën, madje eksperienca ka treguar se lidhja e biznesit me politikën bëhet për qëllime të pastra përfitimi.
Sulejman Abazaj (LZHK). Nuk do ta trajtoja problemin kështu. Si individ kam begraundin tim dhe kam vite që e kam vënë në shërbim të çështjes kombëtare. Veprimtaria ime është e njohur në publicistikë dhe në kontributin tim studimor shkencor, duke u bërë i lexueshëm për opinionin. Avantazhin do ta trajtoja në çështjet problemore dhe programore, në çështjet më delikate që prekin dhe rëndojnë sot psikologjinë e shqiptarëve, duke i dhënë të drejtën LZHK-së që, të ushqejë shpresat e tyre drejt rrugëve të munguara të demokracisë.

4-Çfarë raportesh do të krijoni me komunitetin në rast fitoreje?
Bashkim Habilaj (PS). Bashkëpunimi im me komunitetin ka qenë dhe do të jetë shumë i mirë. Do të vlerësoj gjithçka, si në mendimet e komunitetit, por dhe në bashkëpunim për zgjidhje të problemeve të tyre. Kjo në një kohë të shkurtër, sepse zona ku kandidoj ka nevojë në vazhdim për dorën e ndërhyrjes së pushtetit vendor dhe atij qendror. Jam i bindur që këtë dorë ta afroj sa më shumë dhe ta bëj prezente në të gjitha strukturat e larta të partisë dhe shtetit.
Ardian Kollozi (PD). Në këto vite qeverisje është deformuar raporti i marrëdhënieve midis komunitetit dhe përfaqësuesve të tij në Parlament. Zona ime elektorale, ndoshta duhet mbivendosur në këtë realitet, duke dëshmuar fort shpërdorimin dhe papërgjegjshmërinë ndaj votuesit dhe besimit të tij. Pikërisht te kthimi i besimit, tek ai raport i sinqertë me komunitetin fillon numëruesi i këtij raporti, që ka për emërues angazhimin dhe përkushtimin tim maksimal në përmbushjen e premtimeve dhe detyrimeve të mia si deputet i zonës 96. Unë tashmë e kam ndërtuar infrastrukturën shpirtërore me ta, mbetet që së bashku të bëjmë ndryshimin. Jam i vendosur për këtë.
Besnik Elezi (LSI). Si të fitoj, gjë për të cilën kam shumë besim, si të mos fitoj, lidhjet e mia me komunitetin nuk do të ndërpriten. Këto lidhje unë do t’i vendos pikërisht me këtë fushatë; takimet kokë më kokë që do të bëj gjatë fushatës do të më ndihmojnë të njihem më nga afër me hallet dhe problemet e tyre. Në fund të fundit LSI-ja është një parti e re, të cilës i takon e ardhmja dhe pikërisht në emër të së resë, që ajo do të sjellë në jetën politike shqiptare, lidhjet e përfaqësuesve të saj me elektoratin do të forcohen që të shërbejnë edhe për fushatat e ardhshme.
Sulejman Abazi (LZHK). Kam lindur dhe jam rritur në Vlorë dhe me qytetin tim nuk më ndan asgjë. Di të them se kam punuar gjithë jetën time me njerëzit dhe kam kuptuar se diçka në kohën e sotme duhet të jetë ndryshe. Njerëzit ende kanë nevojë për praninë dhe angazhimin në problemet e tyre. Në masë mbizotëron një gjendje e rënduar psikologjike, e cila përditë thellon problemet sociale të shqiptarëve. Të gjithë votuesit e zonës nr. 96 do të kenë pranë tyre një mik, një shok, njeriun e tyre që u ka munguar në këto dy legjislatura, ata do të kenë një derë të hapur kudo dhe në çdo kohë, duke marrë së bashku përsipër të bëjmë atë që është më e mira. Por, të mos flasim shumë për këtë, le t’ia lëmë kohës.

 

Rezultatet e zgjedhjeve të 2001

PS 5604 vota ose 45.7%
PD+BD 3687 vota ose 30.0%
PSD 108 vota ose 9.04%
PDR 430 vota ose 3.51%
PAD 376 vota ose 3.06%
PAA 291 vota ose 2.37%
PBDNJ 227 vota1.85%
PKSH 140 vota ose 1.14%
PLPSH 92 vota ose 0.75%
PSKSH 92 vota ose 0.75%
PKBSH 51 vota ose 0.41%

Mazhoritar
Ardian Myslymaj PS 5835 vota ose 47.89%
Mexhid Haxhiu PD+BF 3942 vota ose 32.35%
Hasan Laba PSD 1571 vota ose 12.89%
Shkëlqim Bello PD 341 vota ose 2.79%
Edvin Kulluri AD 105 vota ose 0.86%
Grigor Seferaj PBDNJ 92 vota ose 0.75%]
Edmond Gjoka PLPSH 91 vota ose 0.74%
Sadedin Zeqo PKSH 85 vota ose 0.69%
Taire Bozhani PASH 78 vota 0.64%
Marjeta Lagji PMP 43 vota ose 0.35%

 

Bashkim Habilaj
Ish prefekti në garën e korrikut

Bashkim Habilaj kandidon nën siglën e Partisë Socialiste për zgjedhjet e tre korrikut. Ai ka qenë prefekt i Qarkut të Vlorës si dhe kryetar i këshillit të këtij qarku. Gjithashtu ka qenë anëtar i Këshillit të Bashkisë si dhe anëtar i Këshillit të Qarkut. Habilaj ka lindur në vitin 1955 në Vlorë, është i martuar dhe ka dy fëmijë. Studimet e larta i ka kryer në degën e Inxhinierisë Mekanike në Universitetin e Tiranës. Aktualisht ai mban postin e kryetarit të PS-së, dega Vlorë. Angazhimi i tij politik pranë Partisë Socialiste ka nisur që nga themelimi i kësaj partie, duke qenë për disa vite edhe anëtar i zgjedhur i forumeve të PS-së të Vlorës. Aktualisht Habilaj është anëtar i Komitetit të Përgjithshëm të PS-së. Para viteve ‘90 Bashkim Habilaj ka qenë drejtues i disa ndërmarrjeve shtetërore.

Ardian Kollozi
Vlonjati demokrat që synon fitoren

Ardian Kollozi është anëtar i Këshillit Kombëtar të Partisë Demokratike dhe kandidon si përfaqëues i saj në qytetin e Vlorës. Ai ka lindur në vitin 1967 në qytetin e Vlorës ku edhe jeton aktualisht. Ardian Kollozi ka ndjekur studimet e larta në Universitetin e Tiranës, në degën e Inxhinierisë së Ndërtimit, të cilat i ka përfunduar në vitin 1990. Zotëron tri gjuhë të huaja. Ardian Kollozi ka qenë një ndër studentët e lëvizjes së dhjetorit. Ai është i martuar dhe ka dy fëmijë. Gjithashtu ai është anëtar i Partisë Demokratike qysh në fillimet e krijimit të saj, si dhe është një nga figurat më të shquara të demokratëve në qytetin e Vlorës.

Besnik Elezi
Mjeku i Vlorës në garë për LSI-në

Besnik Elezi ka lindur në Vlorë në vitin 1960. Eshtë i martuar dhe ka dy fëmijë. Në zgjedhjet parlamentare të tre korrikut ai do të kandidojë për Lëvizjen Socialiste për Integrim. Kjo është hera e parë që ai angazhohet në një parti politike, ashtu siç është hera e parë që ai kandidon në zgjedhje të përgjithshme për një subjekt politik. Besnik Elezi ka kryer shkollën e mesme Mjekësore “Jani Minga” dhe më pas ka ndjekur studimet e larta në Fakultetin e Mjekësisë në Universitetin e Tiranës. Më pas ai është specializuar në fushën e kirurgjisë së përgjithshme. Aktualisht Besnik Elezi është shef reparti i kirurgjisë në spitalin e Vlorës.

Sulejman Abazi
Ish-oficeri nën siglën e LZHK

në VlorëSulejman Abazi kandidon për herë të parë në këto zgjedhje për LZHK. Abazi ka lindur në Vlorë në vitin 1954 ku edhe jeton aktualisht. Është i martuar dhe ka fëmijë. Ka kryer arsimin e plotë ushtarak dhe ka marrë gradën e oficerit në vitin 1976. Ai kryer studimet në Akademinë e Mbrojtjes dhe Kursin e lartë të Shtatmadhorisë. Më pas është specializuar në Gjermani për drejtimin e brendshëm. Karriera e tij profesionale vijon më tej me marrjen e titullit “Doktor i Shkencave në Psikologji” në vitin 1999. Abazi ka botuar pesë libra të fushë së psikologjisë dhe asaj të sigurisë kombëtare. Eshtë dekoruar 4 herë nga Kuvendi Popullor. Ka qenë komandant i ishullit të Sazanit, shef shtabi dhe komandant i Divizionit të Tiranës si edhe pjesëmarrës në manovrën luftarake në periudhën e luftës në Kosovë.