Faqe 6/7 - Politikë

forum

zgjedhje 2005

Platformat për zonën 43 nga kandidatët Sula, Duraku, Tola e Kola

Kamza, premtimi politik per legalizimin

Blerina Sinani

Në rubrikën e sotme “Forum” paraqiten katër kandidatë për deputetë në një nga zonat më të nxehta të Tiranës. Kryefjala e problemeve të kësaj zone fillon me legalizimin e banesave dhe pronave, që janë ngritur në Kamëz dhe Bathore pas viteve ’90. Duke qenë simboli i zonës formale, Kamza prej vitesh është pjesë e debatit publik dhe politik, për shkak të nevojave të saj urgjente për urbanizim dhe zhvillim. Mirëpo pengesa ligjore, legalizimi, duket si e kapërcyer me daljen e ligjit të fundit, por ky ligj nuk pranohet nga opozita si zgjidhje. Kandidatët për deputetë, Shyqyri Duraku i PS-së, Safet Sula i PD-së, Mustafa Tola i LSI-së dhe Astrit Kola i LZHK-së, në përgjigjet e tyre, shpalosin zgjidhjet e tyre për këtë problem. Njëkohësisht, veçori e kësaj beteje elektorale në zonën 43 është fakti se dy partitë e mëdha, PD e PS, kanë vënë përballë dy rivalë që vijnë nga i njëjti qytet, Kukësi. Sula dhe Duraku janë tashmë figura të njohura për zonën e Kukësit dhe banorët që kanë ardhur prej andej, për shkak se zoti Sula ka qenë kryebashkiak i Kukësit (1996-2000), kurse zoti Duraku deputet që nga viti 2001.   Kamza është një nga zonat më të vështira në hartën elektorale të vendit, jo thjesht për përbërjen e saj heterogjene, sesa për mprehtësinë e problemeve që ajo ka. Legalizimi, punësimi, shkollimi, shëndetësia dhe shërbimet publike, janë maja e ajsbergut të shqetësimeve të zonës 43, në të cilën kandidojnë figura të njohura për këtë zonë. Profili politik i secilit kandidat dhe platforma e tyre politike për Kamzën, këtë herë vijnë ndryshe para lexuesit, larg debatit ekstra politik, tipar dallues për zgjedhjet e kaluara në këtë zonë. 1-Cilët do jenë zgjedhësit që do votojnë për ju? Safet Sula (PD). Zgjedhësit e zonës sime elektorale janë të pozicionuar me vite si një bastion i demokratëve, ku në zgjedhjet e 2001 ka pasur një terren rreth 3000-4000 vota për PD-në. Unë besoj që po këta zgjedhës do të jenë plotësisht me mua, por sot mendoj se edhe votues të tjerë tani kanë arsye për të votuar për PD-në. Kjo zonë, përveç problemit themelor, që është ai i legalizimeve dhe që me ligjin aktual nuk po arrin të gjejë zgjidhje adekuate, është e diskriminuar edhe në krahasim me zonat e tjera urbane. Prandaj them që numri i votuesve do ta kalojë shifrën e katër viteve më parë dhe kam një bindje të plotë fitoreje në këtë zonë. Shyqyri Duraku (PS). Zgjedhësit që do të më votojnë mua do të jenë njerëzit e thjeshtë, por edhe një pjesë e biznesmenëve, me të cilët kam marrëdhënie shumë të mira. Unë bazohem më shumë tek opinioni i mirë që kanë njerëzit në këtë zonë, sepse edhe kandidimi im ka të bëjë me lidhjet shpirtërore që kam unë dhe familja ime me Kukësin, ku një pjesë e mirë e zonës elektorale është e përbërë nga qytetarë të Kukësit dhe zonave përreth. Pavarësisht pikëpamjeve politike, zgjedhësi shqiptar sot ka arritur një pjekuri të tillë, që di të bëjë edhe diferencimin individual. Unë nuk e kërkoj votën për një rrogë parlamentari, as votën si fanatik partie, por kërkoj votën si përfaqësues i mijëra kuksianëve, dibranëve, tropojanëve, pukjanëve etj, të cilët sot kërkojnë legalizim, urbanizim, punë dhe stabilitet. Mustafa Talo (LSI). Njerëzit që do të më votojnë mua janë ata që janë lodhur nga politika e deritanishme, njerëzit e zhgënjyer nga të gjitha partitë e tjera, ata që nuk kanë shkuar në kutitë e votimit në zgjedhjet e kaluara. Janë rreth 23 mijë votues që nuk kanë shkuar në kutitë e votimit zgjedhjet e kaluara. Sikur 5 mijë prej tyre të jenë emigrantë, të tjerët janë aty. Vetëm nga këta persona për LSI-në do të votojnë një pjesë e madhe. Nga ana tjetër ne kemi një bazë të fuqishme, sepse kemi strukturat tona në të gjithë territorin, dhe përballë LSI-së konkurrojnë dy parti, të cilat janë shpërbërë nga strukturat. PD-në e kanë provuar shqiptarët dhe i mbajnë mend mirë ngjarjet e 1997, si dhe PS-në që nga kjo kohë dhe deri në 2005. Astrit Kola (LZHK). Zgjedhësit që do të më votojnë janë ata që, në vitin 1997, votuan pro referendumit për ndryshimin e formës së regjimit politik në Shqipëri. Pra, në favor të NMT, Leka Zogu I. Pikërisht, këta zgjedhës do të jenë ata që do të votojnë sërish për alternativën e drejtuar dhe përfaqësuar nga NMT, Leka Zogu, rrjedhimisht edhe për mua, si njërin nga kandidatët e Lëvizjes për Zhvillim Kombëtar. 2-Cilat janë pikat kryesore të platformës suaj elektorale? Safet Sula (PD). Unë personalisht mendoj se një deputet nuk duhet të krijojë platforma elektorale. Platforma e një kandidati për deputet është programi politik që ka partia e tij. Kjo, besoj i bën më të besueshme premtimet. Individualisht kandidati duhet të jetë i ndershëm, të përkushtohet për komunitetin, të përfaqësojë zërin e këtij komuniteti në Parlament. Unë personalisht kam qenë kryetar bashkie dhe e di se çfarë duhet të bëjë një pushtet lokal, ashtu siç duhet të kihet parasysh se çfarë mund t’i kërkohet një deputeti, detyra e të cilit, natyrisht, nuk është ndërtimi i urës apo lulishtes. Duke mos lënë mënjanë hallet dhe problemet e përditshme të zgjedhësve të mi, unë do të përpiqem të jem përfaqësuesi i tyre dinjitoz në një nga institucionet kryesore të demokracisë, siç është Parlamenti. Shyqyri Duraku (PS). Themeli i gjithë platformës sime elektorale është integrimi, jo thjesht si koncept lokal, por në një koncept më praktik e më të gjerë. Kjo platformë e imja buron nga këndvështrimi aktual që u bëhet qytetarëve të Kamzës, që shpesh herë jo vetëm konsiderohen, por edhe trajtohen si qytetarë të dorës së dytë. Ata akoma vazhdojnë të mos gëzojnë ato të drejta ligjore dhe njerëzore që ka fqinji i tij në qytetin e Tiranës apo edhe në qytete të tjera. Me keqardhje konstatoj se i vetmi aks që ka mbetur në vendnumëro është ai Tiranë–Veri, ndërsa akse të tjera si ai Tiranë-Durrë apo Tiranë-Elbasan kanë pësuar ndryshime cilësore. Kamza nuk duhet të mbetet një dele e zezë për investime, për zhvillim, për shkollim e punësim. Mustafa Tola (LSI). Ne kemi ndërtuar planin strategjik të fushatës dhe platformën zgjedhore të zonës 43 mbi bazat e problemeve që ka zona, mbi bazën e problemeve që ka në përgjithësi gjithë vendi, por në radhë të parë jam përqendruar në infrastrukturën e zonës dhe më e veçanta e programit elektoral atje, në raport me partitë e tjera, është qëndrimi që mban LSI-ja për çështjen e legalizimeve. Eshtë problemi thelbësor që shqetëson qytetarët e asaj zone. Ligji i legalizimeve është një ligj mjerimi dhe nuk është legalizimi, bashkë më fasadën që mban brenda. Astrit Kola (LZHK). Pika kryesore e platformës është premtimi dhe shtjellimi i argumentuar i idesë se vetëm LZHK-ja mund të ndërtojë dhe garantojë shtet dhe institucione të vërteta demokratike. Shteti fantazmë aktual, i uzurpuar plotësisht dhe në të gjitha qelizat nga mafia politike, me vakumin institucional dhe arbitraritetin skandaloz, dhe jo vetëm që përbën komponentin më negativ të krizës totale, por ka stimuluar krijimin dhe potencimin e idesë së gabuar, sipas së cilës, ne shqiptarët nuk jemi të aftë të bëjmë shtet. 3-Legalizimi është një shqetësim i madh, kryesisht për zonën tuaj. Keni menduar ta trajtoni këtë problem? Safet Sula (PD). Legalizimi është një nga prioritetet e mia kryesore. Dua të theksoj se ky është një problem ligjor, pasi ligji aktual është një ligj i pazbatueshëm, sepse detyron qytetarët që kanë ndërtuar në këto zonë të paguajnë shuma të mëdha. Kjo skemë pseudolegalizimi që ofron ky ligj, e kthen komunitetin në një borxhli afatgjatë ndaj shtetit. Kjo do të thotë që ata për dekada të tëra të rrinë duke paguar (kuptohet nëse kanë mundësi të paguajnë) dhe njëkohësisht kjo pasuri do të mbetet e ngrirë për shumë vite të tjera. Ky ligj bllokon iniciativën e këtyre njerëzve, duke i futur në këtë proces, pasi nuk kanë mundësi pagese dhe vazhdimisht do të jenë në proces të larjes së këtij borxhi ndaj shtetit. Ndryshimi i këtij ligji dhe legalizimi me një ligj tjetër, me ato propozime që ka vendosur PD-ja, nga 1-4 milionë lekë të vjetra, i hap rrugën legalizimit dhe e fut këtë pasuri të madhe në treg. Më e rëndësishmja është që ky legalizim të mos ketë këto vlera. Shyqyri Duraku (PS). Nga konktatet e para që kam në këtë zonë elektorale me banorët e ardhur aty nga shumë fshatra të veriut, mendoj që ligji për legalizimet më shumë se sa e bën të interesuar zonën ku kandidoj, nuk e bën asnjë zonë tjetër të Republikës. Kjo është zona më informale sot për sot, por kam vënë re që shumë njerëz këtë problem nuk e kanë të qartë. Unë kam arritur të organizoj gjatë kësaj periudhe takime me Ministrinë e Rregullimit të Territorit dhe Turizmit, me përfaqësues që merren me zbatimin e ligjit, për të përcaktuar sa më qartë se çfarë përfitojnë banorët dhe tregtarët e Kamzës nga legalizimi. Në thelb unë ua kam bërë të qartë se legalizimi është procesi më i rëndësishëm për ata që kanë të drejtën ta përfitojnë këtë, sepse nga ai moment ata bëhen pronarë të rëndësishëm të një objekti, shtëpie, magazine, aktiviteti tregtar etj. Kam vënë re se të gjithë banorët e duan legalizimin, e duan ligjin, e duan urbanizimin. Por nga ana tjetër ata kanë kontestimet e tyre të natyrshme për vlerësimin financiar të çdo njësie. Duke qenë se ata vijnë nga zona ku kanë lënë nga një e dy shtëpi të ndërtuara me shumë mund e sakrifica, si dhe duke sakrifikuar akoma më shumë me lëvizjen drejt Tiranës, u duket e vështirë pagesa për legalizimin. Mustafa Talo (LSI). Angazhimi ynë është ai që ka marrë përsipër forca jonë politike, të cilin e ka thënë dhe Meta në Parlamentin shqiptar. Qëndrimi është që ky ligj të abrogohet ose të ndryshohet në thelbin e vet dhe jo në një nen, pasi ai është i papranueshëm. Puna e parë që do të bëjë LSI-ja është që ky ligj i mbrapshtë të abrogohet, të ndryshohet në përmbajtje dhe legalizimi të bëhet me çmimin e vitit 1993. Astrit Kola (LZHK). Angazhimi im në zgjidhjen e problemit të legalizimeve, (nëse arrij të zgjidhem deputet), do të jetë legalizimi i zonave informale dhe ndërprerja e menjëhershme e përhapjes së dukurisë së zaptimit të paligjshëm të trojeve të lira. Ndërsa, për sa i përket kompensimit të pronarëve, LZHK-ja do ta realizojë atë nëpërmjet dhënies së trojeve shtetërore akoma të pauzurpuara nga mafia me koperturë politike, dhe sidomos nëpërmjet konfiskimit të trojeve të zëna nga pushtetarët dhe mafiozët. 4-Një tjetër problem është varfëria dhe papunësia. Në programin tuaj elektoral, çfarë parashikohet? Safet Sula (PD). Problemet e këtij komuniteti janë jashtëzakonisht të mëdha, sepse ky është një komunitet që jeton në një zonë të re, ku nuk është vënë dorë nga shteti. Kështu që PD-së dhe qeverisë së ardhshme i bie barra të ketë në vëmendje të posaçme këtë komunitet. Mendoj se një nga detyrat e mia të para do të jetë hulumtimi dhe realizimi i një treguesi të qartë për fuqinë aktuale punëtore, për përqindjen e papunësisë, për punësimin aktual dhe në këtë kontekst do të përgatis në përputhje me programin e PD-së një platformë për zgjidhjen e problemit. Me këtë rast kujtoj se edhe ata qindra banorë që punojnë në ndërtimin e pallateve dhe vilave të Tiranës punojnë në të zezë dhe çdo fatkeqësi e tyre në punë dhe nesër në pension mbetet e pambuluar me sigurime shoqërore. Pra, fillimisht duhet rregulluar tregu i punës dhe në vazhdimësi, përmes investimeve të shtohen vendet e punë në këtë zonë. Shyqyri Duraku (PS). Lidhur me problemein e papunësisë do të thoja se, për Kamzën e Bathoren ka qenë fat qenia e Tiranës afër. Kryeqyteti ka shërbyer për zbutjen e përqindjes së papunësisë në këtë zonë, por vihet re se vetë zona nuk ka burime të mjaftueshme për punësimin. Tirana i ka të gjitha mundësitë për të ofruar punë, sidomos tani që ajo po ndërtohet. Po kështu edhe segmenti Tiranë-Vorë, që është një zonë e mirë industriale ka ofruar shumë punë. Por përsëri, papunësia është e madhe, sepse jo të gjithë mund të punojnë në ndërtim apo profesione të tjera. Besoj se programet e zhvillimit dhe projektet, që ka qeveria për Kamzën do të ofrojnë një perspektivë më të mirë punësimi. Punësimi është një pikë që më obligon edhe mua, jo thjesht si biznesmen, por edhe si deputet i kësaj zone. Nxitja e biznesit të brendshëm përmes kreditimeve do të jetë një ambicie e imja për të gjithë ata që kërkojnë një gjë të tillë. Astrit Kola (LZHK). Luftën kundër varfërisë, LZHK-ja do ta bëjë nëpërmjet zbatimit të programeve të njëmendta kundër varfërisë dhe atyre për zhvillimin ekonomik, zgjidhje që janë prioritare në platformën tonë politike dhe elektorale. Pas çrrënjosjes së varfërisë, që është plaga më e rëndë në një shoqëri demokratike dhe njëkohësisht shprehje e tiranisë së kamufluar të oligopoleve dhe segmenteve të politikës së lidhur me to, lufta kundër papunësisë do të jetë shumë më e lehtë. Mustafa Tola (LSI) Problemet më madhore që ka zona ku kandidoj unë janë varfëria dhe papunësia. Varfëria shprehet te kushtet e jetesës dhe pamundësia që kanë qindra familje për të bërë një jetë normale. Papunësia, burim kryesor i kësaj gjendjeje, është plaga që vulos situatën në Kamëz. Pavarësisht përpjekjeve që janë bërë, përsëri kjo zonë ka papunësinë më të madhe. Kjo situatë nuk është mirë as për Tiranën. Stabiliteti i zonës së Kamzës është progres edhe për Tiranën. 5-Vlerësimi juaj për rivalët? Safet Sula (PD). Rivali që kandidon përballë meje është ai i PS-së. Eshtë patrioti im nga Kukësi. Personalisht e njoh si çdo kuksian. Nuk kam dëshirë të shprehem më tepër. Populli i Kukësit na ka parë të dyve. Të dy kemi marrë votat e kuksianëve. Shyqyri Duraku (PS). Unë kam nderin të kandidoj me kundërshtarë shumë seriozë, njerëz që i njoh nga larg, të cilët rrjedhin nga familje shumë të mira dhe që kanë dhënë prova që bëjnë punë të mira. Kështu që, edhe unë jam i obliguar të bëj një fushatë sa më rezultative dhe sa më të qytetëruar. Për mua nuk ka rëndësi beteja personale, por ballafaqimi për vlerat dhe alternativat. Mustafa Tola (LSI). Rivalët e mi unë i vlerësoj në raport të partive politike që përfaqësojnë. Nuk kam gjë me planin elektoral të tyre, sepse nuk i njoh mirë, por forcat e tyre politike, sidomos PD-ja dhe PS-ja janë forca politike të konsumuara dhe nuk mund të japin diçka të re pas shumë vitesh. Astrit Kola (LZHK). Pavarësisht se e vlerësoj realisht fuqinë politike dhe mbështetjen e tyre, ndiej se mund t’i rivalizoj me dinjitet. Mendoj se në raport me ta kam avantazhe në planin politik, ideor dhe programor. Jam i bindur se gara në zonë tonë do të jetë intriguese, e fortë dhe dinjitoze.   Rezultatet e zgjedhjeve të 2001 proporcional Shaban Memia PD+BF 7824 vota ose 55.1% Muhabet Bela PS 4370 vota ose 30.8% Qiqiri Cenaj AD 420 vota ose 2.96% Fajton Softa PV 396 vota ose 2.78% Osman Shehu PR 329 vota ose 2.32% Pavlin Mema PLPSH 199 vota ose 1.40% Rustem Preci PSD 183 vota ose 1.29% Sokol Frroku PDK 164 vota ose 1.15% Muharrem Tatoshi PKBSH 69 vota ose 0.48% Sadik Troçi PBDSH 52 vota ose 0.36% Fiqiri Burreli Pl.Mon.D 42 vota ose 0.29% Qamil Gjuci PKSH 35 vota ose 0.24% Fajton Liksinaj P.KONS 24 vota ose 0.16% Hazis Porja PASH 24 vota ose 0.16% mazhoritar PD+BF 7857 vota ose 54.96% PS 4005 vota ose 28.01% PDK 1.012 vota ose 7.08% PDR 439 vota ose 3.07% PSD 295 vota ose 2.06% PBDNJ 157 vota ose 1.09% PAD 156 vota ose 1.09% PKSH 115 vota ose 0.80% PKBSH 58 vota ose 0.40% PBD 50 vota ose 0.35% PAA 24 vota ose 0.16% PBSH 20 vota ose 0.14% PSKSH 18 vota ose 0.12% PLPSH 16 vota ose 0.11% PBDSH 13 vota ose 0.09%   Safet Sula Kryebashkiaku i luftës së Kosovës Safet Sula kandidon për herë të parë në zgjedhjet parlamentare të këtij viti, si përfaqësues i Partisë Demokratike. Zoti Sula mbahet mend në opinionin e gjerë si kryebashkiaku i qytetit që përballoi krizën humanitare të luftës së Kosovë. Safet Sula është anëtar i partisë më të madhe opozitare, që nga viti 1995. Eshtë i martuar dhe ka dy fëmijë. Safet Sula ka lindur në Kukës në vitin 1961. Studimet e larta i ka kryer në universitetin e Shkodrës, në degën Fizikë Speciale, të cilat i ka përfunduar në vitin 1987. Më pas ai është emëruar asistent pedagog në universitetin e Shkodrës. Nga ky post është larguar me dëshirë në vitin 1993 dhe më pas ka punuar rreth një vit në Drejtorinë Arsimore në qytetin e Kukësit. Në vitin 1996-2000 ka qenë kryetar i bashkisë së Kukësit. Sula ka punuar më pas në Tiranë, në Drejtorinë e Doganave për rreth tre vjet. Shyqyri Duraku Biznesmeni pa teserë partie Shyqyri Duraku, deputeti aktual i PS-së kandidon në zonën e Kamzës, duke synuar kështu të fitojë një mandat të dytë në zgjedhjet e 3 korrikut. Zoti Duraku ka lindur në vitin 1954 në qytetin e Kukësit. Kandidon në zonën zgjedhore 43, si përfaqësues i Partisë Socialiste, ndërkohë që nuk është anëtar i PS-së. Duraku është i martuar dhe ka pesë fëmijë. Studimet e larta i ka kryer në universitetin e Tiranës për Shkenca politike. Shyqyri Duraku pjesën më të madhe të jetës ia ka kushtuar biznesit, duke filluar nga viti 1990. Aktualisht është pronari i “Eurodrin”, një nga firmat e karburanteve më të mëdha në Shqipëri. Gjithashtu ai është dhe aksioner në shoqërinë e sigurimeve “Sigal”, si dhe në mjaft shoqëri të tjera, brenda vendit dhe në Kosovë. Eshtë një nga biznesmenët më të suksesshëm në vend. Mustafa Tola Dibrani i LSI në garë për Kamzën Mustafa Tola kandidon për herë të parë si përfaqësues i LSI-së në zgjedhjet e tre korrikut. Eshtë i martuar dhe ka fëmijë. Ai ka qenë një nga anëtarët e PS-së, në vitet 1990-2004, por më pas ka aderuar në radhët e LSI-së. Tola është banor në zonën ku do të kandiojë, edhe pse vendlindja e tij është Dibra. Studimet e larta i ka kryer në Universitetin Bujqësor të Tiranës, në Fakultetin e Mjekësisë Veterinare. E ka ushtruar këtë profesion për një kohë të gjatë. Aktualisht është anëtar i Këshillit Koordinues Kombëtar për mbrojtjen e konsumatorit në Ministrinë e Ekonomisë. Në zonën zgjedhore ku kandidon dhe jeton, Tola është kryetar i Komitetit Drejtues të zonës për LSI-në, i zgjedhur sipas parimit “një anëtar, një votë”. Gjithashtu është anëtar i Konventës Kombëtare të LSI-së dhe i propozuar për strukturat e larta. Astrit Kola Gazetari që synon politikën Astrit Kola kandidon në zgjedhjet e tre korrikut si kandidat i Lëvizjes për Zhvillim Kombëtar. Eshtë i martuar dhe ka një fëmijë. Ka lindur në qytetin e Burrelit në vitin 1955. Studimet e larta i ka kryer në Universitetin Bujqësor të Tiranës, në degën Mjekësi Veterinere. Për shumë vite ka punuar në profesionin e tij. Angazhimi i tij në politikë ka nisur që në vitin 1990, si një nga themeluesit e PD-së, si një angazhim që përfshin kontribute dhe pjesëmarrje në forume drejtuese lokale të kësaj partie dhe në mediat e djathta opozitare. Aktualisht është anëtar i Partisë Lëvizja e Legalitetit, ku mbulon funksionin e zëdhënësit politik të saj, si dhe të kryeredaktorit të organit të saj periodik, gazetës “Atdheu”. Astrit Kola ka qenë mjaft aktiv në shtypin shqiptar, kryesisht në gazetat e djathta, në të cilat ka botuar mjaft artikuj me tematikë politike.