Blerina Sinani

Skënder Zogu, një nga pinjollët e Familjes mbretërore shqiptare, ish-drejtor shtypi i Oborrit mbretëror ka ardhur nga Parisi në Shqipëri për t'u gjendur pranë njeriut të tij më të afërt, Leka Zogut, i cili kryeson formacionin e ri politik, LZHK.

Në një intervistë për "Panorama" Skënder Zogu shprehet se nga 3 korriku shpreson një thyerje të bipolaritetit politik PD-PS, të cilët, sipas tij vijnë nga e njëjta bazë komuniste dhe se LZHK e LSI do të jenë dy forca të reja që do të krijojnë një hapësirë reale demokratike. Lidhur me çështjen kombëtare, Zogu thekson se as PD dhe as PS nuk e kanë shpallur qëndrimin e tyre pro pavarësisë së Kosovës.

Cilat janë motivet që ju kanë risjellë në Shqipëri?

Unë jam kushëriri i mbretit Leka, jam nipi i mbretit Ahmet Zog. Kam ardhur nga Franca për të marrë pjesë në fushatën e LZHK-së, si dhe për të takuar familjen e gjithë miqtë në Shqipëri. Me këtë rast kam pasur dëshirë të takoj sa më shumë bashkatdhetarë, për të biseduar me ta për çështjen kombëtare. Në këtë fushatë unë personalisht si dhe disa të tjerë që kanë ardhur nga SHBA-ja, Belgjika dhe Franca për të përkrahur Lekën, dëshirojmë të japim kontributin tonë moral, për të shprehur dëshirën dhe shpresën tonë se ka për të ndodhur një ndryshim i madh në Shqipëri pas zgjedhjeve.

Cili do të jetë kontributi juaj konkret në fushatën e LZHK-së?

Kontributi im do të jetë në faktin se do t'i tregoj popullit shqiptar se ne jemi për ndryshim, shqiptarët që jetojnë dhe punojnë jashtë atdheut kanë dëshirë për ndryshim, se jemi bashkë me ata që mendojnë se shteti ka nevojë për ndryshim. Kjo është fjala jonë.

Si e keni vlerësuar krijimin e LZHK-së?

Unë e kam vlerësuar krijimin e LZHK-së si një rrugë të tretë politike, ose si një mundësi e re për popullin shqiptar, si një shpresë të re, sepse deri tani politikanë të këtij shteti, të atdheut tonë, kanë dështuar dhe nuk kanë punuar për interesat e popullit shqiptar, por për interesat e tyre personale. Për shembull, për çështjen e pronave, ligji i pronave ende nuk është zbatuar, padrejtësitë kanë vazhduar, shteti shqiptar kritikohet edhe nga ndërkombëtarët, sepse në 15 vite reformat nuk janë bërë si duhet. Në këtë situatë LZHK-ja është një lëvizje e re. Mbreti Leka ka vepruar gjithmonë për të mirën e popullit shqiptar dhe ai është një figurë në politikë. Nuk ka pasur probleme në Shqipëri apo dhe jashtë atdheut. Ka bërë gjithmonë sakrifica për të mirën e popullit tonë dhe ka mbrojtur interesat kombëtare për Kosovën apo shqiptarët e Maqedonisë. Kam dëgjuar në fushatë që dy partitë e mëdha sot në Shqipëri, PS dhe PD nuk e kanë përmendur asnjëherë pavarësinë e Kosovës dhe as e kanë në program. LZHK-ja këtë pikë e ka në programin e saj dhe ka marrë parasysh se do të veprohet për pavarësinë e Kosovës, dhe është detyra e çdo shqiptari ta mbështesë këtë formulë. Mbreti Leka këtu është në atdheun e tij, por nuk ka i kanë dhënë një shtëpi. E kanë lënë të paguajë qira dhe nuk ia kanë dhënë të gjithë pasurinë e babait të tij. Eshtë turp që sot të mos i japin të birit të Ahmet Zogut, që krijoi shtetin shqiptar, as një shtëpi të vogël në të cilën të mund të jetojë me dinjitet. Kjo tregon se politikanët e sotëm kanë qëllime të tjera, duan ta fusin në një situatë të tillë ku Mbreti Leka të mos ketë mundësi të veprojë gjerësisht dhe të ketë një jetë familjare normale. Por, jashtë atdheut shqiptarët nga diaspora besojnë se do të bëhet ndryshimi në Shqipëri. Edhe ne kemi shumë shpresë se populli shqiptar këtë herë ka për të votuar në një drejtim tjetër. Unë u bëj thirrje të gjithëve të mos abstenojnë.

Ka akuza ndaj LZHK-së për orientimin e saj politik?

Unë e shoh LZHK-në si një forcë të djathtë të vërtetë dhe akuzat, sipas së cilave kjo parti bën lojën e Fatos Nanos ose të ndonjë tjetri, janë akuza të pavend. Po të shihet dhe lista e kandidatëve të LZHK, 50 për qind e tyre vijnë nga shoqëria civile, gjë që nuk ka ndodhur asnjëherë deri më sot në Shqipëri. 25% janë të Partisë së Legalitetit dhe një përqindje tjetër nga parti të tjera. Kjo argumenton se LZHK-ja është një forcë e djathtë e vërtetë, ndaj ta akuzosh kësisoj, është një gjë e pavend. Kur krijohet një lëvizje si Lëvizja për Zhvillim Kombëtar, një lëvizje e pavarur dhe pa ndihmë nga shteti, nuk bëhen traktate parazgjedhore. Pas nxjerrjes së rezultatit të zgjedhjeve, LZHK-ja do të ulet në tavolinë dhe do të vendosë për një koalicion paszgjedhor për interesin e kombit.

Mendoni se LZHK-ja do të marrë vota aq sa për t'u bërë një faktor pas zgjedhjeve?

Unë mendoj se si një forcë e re ka për të hyrë në Parlament. Ky është hapi i parë dhe s'mund të them më tepër, pasi nuk kam jetuar këtu kohët e fundit, por jam i bindur se LZHK-ja është një forcë që do t'i japë një drejtim të ri qeverisjes shqiptare në këtë shtet me Mbretin Leka I në krye. LZHK-ja do të sjellë një ndryshim të vërtetë politik, por ardhjen e saj në pushtet e kanë në dorë vetëm votuesit. Ne u bindemi atyre dhe kemi shpresë se një rezultat pozitiv do të dalë në këto zgjedhje.

Si e vlerësoni ju situatën politike, duke pasur parasysh krijimin e LZHK-së dhe LSI-së si forca të reja politike?

Unë mendoj se të dyja partitë kryesore politike sot në vend, PD dhe PS kanë dalë nga një vend, nga komunizmi. E djathta dhe e majta në Shqipëri, që kanë qenë në pushtet, nuk kanë bërë reformat që duheshin për popullin, i cili është lënë në mjerim dhe shumë politikanë janë pasuruar në mënyrë të menjëhershme. Kjo tregon se ka pasur korrupsion dhe padrejtësi ndaj popullit. Ne na vjen shumë keq që të rinjve sot u duhet të largohen nga Shqipëria për të sigurur të ardhmen e tyre. Besoj se dy partitë kanë përgjegjësi të mëdha ndaj popullit. Ndoshta një ditë ato mund ta ndryshojnë sjelljen e tyre, por unë nuk kam aspak besim te PS-ja dhe më vjen keq që ajo nuk ka mbrojtur interesat kombëtare, qoftë për Kosovën, qoftë për Çamërinë. Edhe PD-ja heshti kur u shtrua çështja e Çamërisë në Parlament.

Mendoni se këto forca politike mund ta çojnë vendin drejt integrimit?

Që ta çojnë vendin drejt integrimit këto forca duhet të plotësojnë kushtet që ka vënë Europa. Mos harroni se deri më sot Europa e ka kritikuar qeverinë shqiptare për mosplotësimin e standardeve të kërkuara. Vetëm kur të plotësohen këto standarde mund të integrohemi në Europë. Tani është koha që të bëhen reformat dhe të plotësohen kushtet për të hyrë në Europë.

Si i vlerësoni zhvillimet politike në 15 vite demokraci?

Unë nuk besoj se vendi ka hyrë në rrugën e demokracisë së vërtetë. Pse? Sepse drejtësia nuk ka ecur mirë, çështja e pronave është ende e pazgjidhur. Zgjedhjet janë manipuluar. Çështja e referendumit, që u bë në vitin 1997, fitoi monarkia, dhe e kanë manipuluar nën presionin e të huajve më duket. Unë besoj se në këto 15 vite është humbur shumë kohë dhe tranzicioni ka vazhduar shumë gjatë, janë bërë shumë padrejtësira.

Marrë nga gazeta "Panorama" 26 qershor 2005

Takime të z.Skënder Zogu në Skrapar dhe Berat, në kuadër të fushatës zgjedhore

Skraparllinjtë i japin besën Mbretit dhe LZHK

Legalistët, mbretërorët dhe simpatizantët e LZHK të Skraparit, i kanë rezervuar një pritje të shkëlqyer një grupi miqsh dhe mysafirësh të nderuar, të ardhur enkas nga Tirana, në mbështetje të fushatës së kandidatit të LZHK në këtë zonë, z.Përparim Hidershaj. Kështu ditën e shtunë, më datë 25 qershor 2005, kushëriri i Mbretit Leka I, z.Skënder Zogu, i shoqëruar nga Sekretari i Senatit të Veteranëve të PLL z.Seit Preni, nga anëtari i Komitetit Drejtues të PLL dhe nënkryetari i Degës së PLL Tiranë z.Hamit Kurti, nga nënkryetarja e Forumit të Grave Legaliste znj.Flutura Përleka dhe biografi e miku i Familjes Mbretërore Shqiptare z.Patrice Najbor, zhvilluan takime të rëndësishme pune në kuadër të fushatës zgjedhore në rrethin e Skraparit, organizuar nga Dega e PLL dhe stafi i kandidatit LZHK në këtë zonë. Në këto takime ata u angazhuan dhe morën pjesë drejtpërsëdrejti në aktivitetet e zhvilluara në kuadër të fushatës zgjedhore të kandidatit të LZHK për rrethin e Skraparit, z.Përparim Hidërshaj. Gjatë gjithë pranisë së tyre në këtë rreth me tradita monarkiste të njohura dhe lidhje të fuqishme me Mbretin Zog I dhe Familjen Mbretërore Shqiptare, mysafirët e nderuar u shoqëruan nga drejtuesit kryesorë të Degës së PLL Skrapar dhe të stafit të fushatës së z.Hidërshaj, si z.Kenan Hysa kryetar i Degës së PLL, z.Nivazi Drita, zonja Liri Hidërshaj, z.Agron Alia, z.Hidajet Cana, z.Çlirim Çela, z.Fatos Alia dhe shumë legalistë dhe mbretërorë të tjerë të njohur në këtë rreth për origjinën, kontributet familjare atdhetare dhe lidhjet me PLL, Mbretin Zog e Mbretin Leka.

Në takimin e zhvilluar me legalistë, simpatizantë të LZHK në këtë rreth dhe zgjedhës të shumtë të interesuar, zhvilluar në qytetin e Poliçanit, në ambjentet e zyrave elektorale të kandidatit të LZHK, ndërmjet të tjerëve e mori fjalën edhe z.Skënder Zogu, i cili foli për rëndësinë e madhe të zgjedhjve të 3 korrikut 2005 për afirmimin e alternativës zgjedhore të LZHK, ndërmarrë dhe udhëhequr personalisht nga NMT Leka I - Mbret i Shqiptarëve.

Në fjalën e tij emocionuese, e që u ndoq me interes të veçantë nga të pranishmit, z.Skënder Zogu theksoi se "... LZHK në këtë fushatë po shpalos para shqiptarëve alternativën më serioze politike, që në thelb përmban dhe përfaqëson ide dhe programe konkrete politike dhe qeverisëse për zhvillimin e vendit dhe të mbarë hapësirës shqiptare, sidomos në kushtet kur Çeshtja kombëtare shqiptare ndodhet në kulmin e zhvillimeve intensive tepër të rëndësishme për të ardhmen e kombit dhe në një kohë kur kriza totale që ka përfshirë Shqipërinë administrative dhe në tërësi shtetin shqiptar, po reflektohet me forcë dhe me të gjitha pasojat negative mbi zgjidhjet e së ardhmes së afërt të Çështjes sonë kombëtare".

Duke zbërthyer më pas rëndësinë e zgjedhjeve dhe zgjidhjeve politike që do të pasojnë, z.Skënder Zogu theksoi se "... alternativa e LZHK hap perspektiva të shkëlqyera për zhvillimin ekonomik dhe politik të vendit, si dhe të integrimit të mbarë hapësirës shqiptare, të përafrimit ideor të mbarë subjekteve politike atdhetare të këtë hapësirë, duke u dhënë impulse të reja zhvillimeve në rajon dhe më gjerë dhe duke e afruar zgjidhjen e aspiratave tona kombëtare. Eshtë pikërisht kjo arsyeja e sensibilizimit të mbarë shqiptarëve nga kjo alternativë dhe e mirëpritjes që ka shoqëruar LZHK gjatë gjithë aksionit politik dhe zgjedhor të saj.

Sot LZHK, e udhëhequr me largpamësi nga Mbreti Leka dhe e përfaqësuar nga individë të spikatur të forcave politike të këtij koalicioni dhe shoqërisë civile, jo vetëm është e aftë të konkurrojë denjësisht në këtë fushatë të rëndësishme, por në programin e saj janë sintetizuar zgjidhjet më realiste dhe konkrete të problematikës së ndërlikuar të trashëguar nga e kaluara dhe nga papërgjegjshmëria e klsës sonë politike.

LZHK premton zhvillim dhe zgjidhje të problemit të pronësisë e të kërkesave të drejta të Ish të Burgosurve dhe Përndjekurve Politikë për kompensimin e tyre të merituar për punën e papaguar në burgjet dhe kampet e diktaturës komuniste. Ajo premton zgjidhje të ngërçit dhe bllokimit të qëllimtë të reformave të thella strukturore e politike, në funksion të zhvillimit të gjithanshëm dhe çlirimit të energjive të mëdha që zotëron populli dhe kombi shqiptar, e që janë fashitur nga keq-qeverisjet dhe sabotimi i qëllimtë i zhvillimit ekonomik dhe Çështjes sonë kombëtare nga qeverisjet kolaboracioniste antishqiptare, që e kanë shndërruar vendin në placdarmë të mafias ndërkombëtare dhe fushë veprimi e monopoleve të lidhura me interesat ekonomike antishqiptare të fqinjëve të Jugut dhe Veriut, që vazhdojnë të programojnë veprimtaritë e tyre kundër kombit tonë.

Pas zgjedhjeve, LZHK si pjesë e qeverisjes së vendit, do të dëshmojë vizionin e saj të lartë dhe përkushtimin e shumëpritur për çbllokimin e proceseve të zhvillimit dhe çmontimin e platformave retrograde antishqiptare.

Me modelin e shkëlqyer të shtetformimit dhe konsolidimit të institucioneve, trashëguar nga periudha e ndritur e Mbretit Zog dhe filozofia e Zogizmit, LZHK do të kontribuojë fuqimisht në kapërcimin e krizës aktuale dhe futjen e vendit në rrugën e sigurt të zhvillimit.

LZHK zotëron kapacitete të shkëlqyera intelektuale, profesionale dhe politiko-atdhetare për këtë mision të rëndësishëm, si dhe ka sintetizuar në programin e saj modelet dhe praktikat shtetërore më efektive, që do t'i sigurojnë suksesin e ardhshëm qeverisës.

Unë jam i bindur se edhe këtu në Skrapar LZHK ka mbështeje të gjerë, falë kujtesës historike dhe lidhjeve të fuqishme që Mbreti Zog, Zogizmi dhe Familja Mbretërore kanë me këtë trevë me tradita të mëdha atdhetare. Unë besoj se z.Hidërshaj do të korrë një rezultat impresionues më 3 korrik dhe LZHK paskëtaj do të hedhë e konsolidojë baza të fuqishme mbështetjeje në rrethin e Skraparit...", - vijoi më tej z.Skënder Zogu, duke e mbyllur fjalën e tij me thirrjen: "Ju uroj skraparllinjve suksese në këto zgjedhje dhe u drejtoj atyre besimin dhe shpresën se do ta mbështesin LZHK dhe Mbretin Leka, në vazhdën e traditave të baballarëve dhe për të mirën e tyre e të mbarë shqiptarëve. Edhe njëherë, urime z.Hidërshaj për rezultat sa më të lartë...".

Pas z.Skënder Zogu e mori fjalën sekretari i Senatit të Veteranëve të PLL z.Seit Preni, i cili pasi falenderoi të pranishmit për pjesëmarrjen, interesin dhe respektin e treguar ndaj mysafirëve të nderuar, i konsideroi ato si tregues të mbështetjes së gjerë të skraparllinjve ndaj NMT Mbretit Leka dhe LZHK. Në vazhdim të fjalës së tij z.Preni u shpreh: "Unë jam i bindur se LZHK edhe këtu në Skrapar ka depërtuar me mesazhet e mëdha atdhetare në zemrat tuaja fisnike dhe se ju keni përzgjedhur dhe do ta votoni masivisht LZHK dhe z.Hidërshaj, që është njëri nga djemtë më të mirë të Skraparit. Urime për suksesin tuaj dhe të LZHK në Skrapar dhe në mbarë Shqipërinë", - e mbylli fjalën e tij z.Preni, për t'ia lënë më pas atë z.Hamit Kurti, i cili me emocion tha: "LZHK është vazhdim i alternativës zogiste në politikën shqiuptare dhe si e tillë meriton mbështetjen tuaj, të cilën ju po e dëshmoni edhe sot, duke pritur me respekt të veçantë një pjestar të shquar të Familjes Mbretërore siç është z.Skënder Zogu, ashtu siç keni mbështetur dikur edhe Mbretin Zog gjatë gjithë rrugës dhe angazhimit të tij politik. Z.Skënder Zogu ka ardhur posaçërisht për t'ju mbështetur në këtë fushatë dhe që në fillim shprehu dëshirën për të ardhur këtu mes jush, në Skrapar. Rroftë NMT Leka I - Mbret i Shqiptarëve. Rroftë LZHK-ja, kjo shpresë e shqiptarëve. Rrofshin kandidatët e saj, që janë ndër djemtë më të mirë të këtij vendi dhe urime për fitoren e LZHK e të z.Hidërshaj edhe këtu në Skrapar", - e mbylli fjalën e tij z.Kurti.

Pas tij e morën fjalën edhe kryelegalisti i Skraparit z.Kenan Hysa dhe kandidati për deputet i LZHK z.Përparim Hidërshaj, të cilët u shprehën me fjalët më të përzemërta për Mbretin Leka, Familjen Mbretërore Shqiptare dhe mysafirët e nderuar, duke e konsideruar vizitën e këtyre të fundit dhe angazhimin e tyre në këtë fushatë si një eveniment të rëndësishëm dhe inkurajim të drejtpërdrejtë për fushatën e kandidatit dhe strukturave legaliste e të LZHK në këtë zonë zgjedhore.

Më pas, për nder të të pranishmëve dhe mysafirëve, mikpritësit vendas shtruan një banket në një nga lokalet më luksozë dhe më të njohur të krahinës, me emrin e famshëm "Bogova", ndërtuar me mjeshtëri dhe arkitekturë karakteristike, në grykën madhështore të Bogovës. Këtu pjesëmarrësit kaluan momente të mrekullueshme e të paharruara, ku u ngritën edhe dollitë tradicionale për shëndetin e Mbretit Leka, Familjes Mbretërore, mysafirëve të nderuar dhe mikpritësve.

Korresp. i "Atdheu"

Skënder Zogu dhe Dr.Patrice Najbor, nga Parisi në Mat, për fushatën e z.Murat Basha

Murat Basha: "Kujto të djeshmen, ndërto të ardhmen!"

Murat Basha, takime entuziaste me elektoratin. I pranishëm edhe nipi i Mbretit Zog, Skënderi

Murat Basha ka zhvilluar takime intensive në ditët e fundit të fushatës në të gjithë zonën e tij elektorale, por një ndër më të rëndësishmit ka qenë ai i zhvilluar në bashkinë Klos, ku morën pjesë personalitete nga diaspora dhe disa veteranë të PLL. Kështu më datë 26 qershor 2005 z.Murat Basha organizoi një tubim me anëtarët dhe simpatizantët e saj në Klos të Matit (Zona Elektorale Nr.19) ku nderonin me pjesëmarrjen e tyre z.Skënder Zogu nip i Mbretit Zog, z.Patrice Najbor drejtor i Albanian Institute në Paris, si dhe veteranët legalistë z.Hamit Kurti dhe z.Seit Preni.

Në fjalën e tij prezantuese, z.Basha falenderoi pjesëmarrësit e shumtë në këtë takim dhe parashtroi shkurtimisht platformën elektorale të LZHK-së, duke theksuar rolin që ka shteti në të ardhmen e një vendi si dhe nevojën për një politikë kombëtare në të gjitha fushat e jetës.

"Në bëjmë shtet" nuk është një sllogan elektoral që mbaron më 4 korrik, por një qëndrim politik që fillon menjëherë pas kësaj date"- tha mes të tjerash kandidati për deputet në zonën 19 të Matit z.Murat Basha.

Zhvillimi dhe përparimi i zonave rurale, kërkon një politikë pragmatiste dhe politikanë të ndershëm dhe idealistë, dhe legalistët e kanë treguar prej kohësh se janë të aftë për të marrë mbi shpatullat e tyre përgjegjësitë për një qeverisje të ndershme dhe me ligje të forta, theksoi ai.

Kandidati për deputet i LZHK-së e mbylli fjalën e tij me mesazhin "Kujto të djeshmen dhe ndërto të ardhmen", duke theksuar se legalistët shqiptarë e kanë shembullin e tyre të ndërtimit të shtetit tek figura e vetme në historinë e Shqipërisë që bëri shtet, Ahmet Zogu.

"Ne, si trashëgimtarët politikë të qeverisjes së Ahmet Zogut, kemi tashmë mes nesh birin e tij, njeriu që është garanti i shtetit që do të ndërtojmë pas 3 korikut, e ku forcat e djathta dhe nacionaliste, do të jenë shtylla kurrizore e qeverisjes anti-Nano".

Më pas e mori fjalën z.Skënder Zogu, që falenderoi të gjitha pjesëmarrësit, duke u shprehur se ishte nder dhe krenari për të që i jepej mundësia të bashkëbisedonte me vëllezërit e vet. Ai shprehu besimin e tij se të dy kandidatët e LZHK-së në Mat do të ishin në parlamentin e ardhshëm shqiptar, nëse zgjedhjet do të bëheshin realisht të lira dhe të ndershme. Ai vlerësoi si shumë të vlefshme pozicionin që kishte marrë vetë Leka I Zogu, duke qenë ideatori dhe promotori i një lëvizjeje, e cila ka synime të mirëpërcaktuara në politikën mbarëshqiptare.

Më tej ai foli për aktivitetin dhe personalitetin e Mbretit Leka, duke u treguar bashkëpatriotëve të tij, episode mjaft interesante të jetës së tij.

Mandej z.Skënder Zogu ia dha fjalën z.Patris Najbor, i cili evidentoi përparësitë që ka formacioni politik LZHK, për një qeverisje të mbështetur në një legjislacion bashkëkohor, si dhe vlerat e pakrahasueshme që ofrojnë kandidatët e saj, në zbatimin e politikave shtetërore mbi pronën, politikën e jashtme dhe në perspektivat vërtetësisht integruese në strukturat euro-atlantike.

"Kandidatët e LZHK janë më të mirët mes konkurrentëve jo veç për shkak të aftësive të tyre, por edhese ata kandidojnë për një formacion politik që dallon dukshëm nga formacionet e tjera politike, në ndershmëri, stabilitet politik, idealizëm dhe mbi të gjitha në frymën atdhetare" - tha ai në mbyllje të fjalës së tij.

Në fjalën e tyre përshëndetëse, veteranët e Legalitetit, z.Hamit Kurti dhe z.Seit Preni, falenderuan nga zemra zotërinjtë Skënder Zogun dhe Patrice Najbor, për praninë e tyre, duke u shprehur se e ndienin veten krenarë që kishin mes tyre pinjollin e derës së Ahmet Zogut.

Më tej e morën fjalën kryetari i PLL-së Mat, z.Besnik Murati, i cili i bëri një përmbledhje të shkurtër fushatës zgjedhore në zonë, duke përshkruar aktivitetin dhe strategjinë e ndjekur për të arritur në fitoren e dëshiruar nga të gjithë anëtarët dhe simpatizantët LZHK-së në zonë.

Në emër të të dënuarve politikë foli z.Ramazan Spahiu, i cili vlerësoi punën e bërë nga dega e PLL-së, për të arritur rezultatet sa më të larta në zgjedhje e 3 korrikut, ndërsa z.Besnik Doda, gjeti rastin të falenderojë zotërinjtë Skënder Zogu dhe Patrice Najbor, të cilët treguan një respekt të lartë për politikën dhe personalitetin e Mbretit Zog dhe Mbretit Leka I, udhëheqësi i LZHK-së.

Në Derjan, bastionin e antikomunistëve

Nga zona e Klosit, aktiviteti i këtij grupi promovues të LZHK-së, të shoqëruar nga kryetari i degës Mat z.Besnik Murati, u zhvendos në fshatin e famshëm antikomunist Derjan të Matit. Pjesëmarrësit në këtë tubim vlerësuan qëndrimin nacionalist të kësaj zone, ndërsa z.Hamit Kurti u shpreh që kjo krahinë ka një karakteristikë të veçantë nga të tjerat, pasi që prej vitit 1945 e deri më sot nuk i është nënshtruar komunizmit dhe forcave politike që përfaqësojnë edhe sot atë ideologji antikombëtare dhe antidemokratike. Ndoshta kjo vjen, për shkak të sakrificave të kësaj zone - u shpreh ai duke treguar më tej se: - pesë vetë nga Derjani si Abdurrahman Mati me dy djemtë e tij, Qazim Preni e Bajram Neli kanë vdekur në mërgim pranë të madhit Ahmet Zogu. Gjithashtu, tha z.Kurti, nga ky fshat kanë dhënë jetën kundër komunizmit shumë burra si Sali Llani, Abaz Dylja, Ismail Doda me vëllezër, Haziz Kasemi, Kurt Hidrej, Isa Xhetani, Bilal Xhetani etj., dhe kam bindjen e plotë se vota e Derjanit në votimet e 3 korrikut, do të jetë votë për LZHK-në - tha veterani Hamit Kurti. Në vijim, grupi i kryesuar nga Skënder Zogu bëri një vizitë në shkollën e mesme të Derjanit që mban emrin "Nëna Mbretëresha Geraldinë".

Skënder Zogu, tur në të gjithë Shqipërinë

Gjatë këtyre ditëve z.Skënder Zogu dhe Dr.Patrice Najbor kanë zhvilluar takime në shumë rrethe të vendit. Kështu ata kanë zhvilluar veprimtari pranë kandidatëve të "LZHK-Leka I Zogu" si Shpëtim Roqi (Tiranë), Hamdi Gërlica (Elbasan), në Berat me disa prej kandidatëve, në Skrapar me z.Përparim Hidërshaj, në Mat me z.Murat Basha, në Tiranë me z.Blerim Kamberi, dhe në Mamurras me z.Artan Tujani.

Po ashtu ata kanë pasur një aktivitet të ngjeshur në disa zona të Tiranës, si dhe kanë qenë të pranishëm në media të ndryshme. Në ditën e parë të vizitës së tyre në Shqipëri, ata kanë zhvilluar një takim të përzemërt me Mbretin Leka në selinë e tij në Tiranë. Dy zotërinjtë që erdhën enkas nga Franca për këtë fushatë, u larguan nga atdheu në fund të afatit zyrtar të mbylljes së saj.

"Atdheu"

25 June 2005 http://www.panorama.com.al/