Grupi parlamentar Lëvizja për Zhvillim Kombëtar pritet të marrë në gjirin e saj edhe dy deputetë të tjerë nga spektri i djathtë parlamentar.

Pas shkëputjes së bujshme të disa deputetëve të djathtë si republikani Maksim Begeja, ballisti Shpëtim Rroqi, kësaj lëvizjeje pritet që t’i shtohen edhe dy deputetë të tjerë Dashamir Shehi dhe Uran Metko, duke rrezikuar shkrirjen e një grupi tjetër parlamentar “E Djatha”. Sipas burimeve pranë LZHK-së, Shehi dhe Metko do të jenë pjesëtarët e rinj të grupit parlamentar të monarkistëve, duke e çuar në tetë numrin e tyre. Ndërkohë që ende nuk është vendosur nëse do të jetë përsëri Begeja kryetar i grupit parlamentar ose jo, pasi mund të jetë edhe Shehi. Grupi parlamentar LZHK u krijua në shtatorin e vitit 2004. Një lëvizje e tillë bëri bujë, pasi me largimin e Rroqit dhe të Begejës u shkri një grup parlamentar, ai i PBK-së dhe PR-ja shpëtoi falë ndihmës së dhënë nga PD-ja, duke i dhënë deputetët e saj borxh.

Grupet parlamentare
Për këtë sesion parlamentar pritet që të reduktohet numri i grupeve parlamentare, pasi “E Djathta” është drejt shpërbërjes. Nga 12 grupe parlamentare që janë aktualisht, numri i tyre pritet që të shkojë në 11 të tillë. Nga ky grup parlamentar kanë qenë deputetët Dashamir Shehi PDRN, Uran Metko PBK, Alfred Cako i PBKD-së dhe dy demokratët Brahim Bruka dhe Zef Gjoka. Ndërkohë që i vetmi deputet që mbetet pa grup parlamentar është Cako. Sipas burimeve pranë LZHK-së, pretendenti për fronin mbretëror gjatë këtyre ditëve po vazhdon trativa me deputetë të djathtë për të shtuar më tepër grupin parlamentar, me qëllim për t’u bërë faktor politik në Kuvend. Ndërsa grupet e tjera parlamentare të djathta pritet që të mos ndryshojnë, duke mbajtur pothuajse të njëjtët deputetë në grup. PD-ja do të ndihmojë republikanët për të pasur grupin e tyre parlamentar, duke i huazuar dy deputetët Luan Malltezi dhe Ndriçim Babasi. Gjithashtu, edhe PBL-ja e Teodor Laço pritet që të ketë të njëjtin grup parlamentar. Nga ana e kampit të majtë politik më në rrezik është PBDNJ-ja, e cila me largimin e deputetit Karamelo mund të detyrojë kreun e kësaj partie Dule që të kërkojë deputetë borxh nga PS-ja për ta ruajtur atë. Në grupin parlamentar i “Qendrës Liberale Demokrate”, bëjnë pjesë deputetët Ejup Tabaku i PS-së, Ligoraq Karamelo, Kristo Goçi, Neritan CEKA(PAD) dhe Vangjel Dule. Pas largimit të Karamelos nga PBDNJ-ja ky grup aktualisht është në krizë. Zgjidhja për këtë grup mund të vijë vetëm nëse i bashkohet kreu i PDS-së, Paskal Milo, i cili nuk është i angazhuar në asnjë grup parlamentar. Krijimi i grupeve parlamentare sipas Rregullores nis çdo fillim sesioni, ku deputetët duhet të deklarojnë se më cilin grupim politik do të jenë në të ardhmen.

Rregullorja e re dhe grupet parlamentare

Kuvendi i ri Shqipërisë, i cili do të dalë pas zgjedhjeve të reja parlamentare të këtij viti, do të funksionojë mbi bazën e një rregulloreje të re. Ky dokument që përbën “kushtetutën” e këtij institucioni është miratuar në dhjetor të vitit të kaluar. Në të është parashikuar krijimi i grupeve parlamentare me nga shtatë deputetë, duke e rritur numrin e detyrueshëm për formimin e tyre. Nga pesë deputetë që është aktualisht, rregullorja e re thekson se “për formimin e një grupi parlamentar nevojiten se duhen shtatë deputetë”. Ndërkohë që në këtë rregullore është hequr sanksionimi, i cili nuk lejohet që deputetët e partive të tjera të jepen në formë huazimi për partitë e vogla politike, për të pasur mundësinë e krijimit të një grupi parlamentar. Një gjë e tillë ka favorizuar së tepërmi partitë e vogla, të cilët edhe pas këtyre zgjedhjeve do të shpresojnë që të marrin nga dy partitë e mëdha deputetët e tyre, me qëllim për të pasur më shumë përfitime ekonomike si grup parlamentar.

Grupet parlamentare

Grupi parlamentar “E Djathta”
1. Alfred ÇAKO Lista Shumemërore
2. Brahim BRUKA Zona 44
3. Dashamir SHEHI Lista Shumemërore
4. Uran METKO, kryetar, Lista Shumemërore
5. Zef GJOKA Zona 12

Grupi parlamentar i qendrës Liberal Demokrate
1. Ejup TABAKU Zona 46
2. Ligoraq KARAMELO, kryetar, Lista Shumemërore
4. Kristo GOCI, sekretar, Lista Shumemërore
3. Neritan CEKA, n/kryetar Lista Shumemërore
5. Vangjel DULE Lista Shumemërore

Numri aktual i grupeve
1. Grupi parlamentar i PS-së
2. Grupi parlamentar i PD-së
3. Grupi parlamentar i LSI-së
4. Grupi parlamentar i PDR-së
5. Grupi parlamentar i LZHK-së
6. Grupi parlamentar i Qendrës Liberaldemokrate
7. Grupi parlamentar “Të Gjelbrit”
8. Grupi parlamentar i PSD-së
9. Grupi parlamentar i PR-së
10. Grupi parlamentar i Djathtë
11. Grupi parlamentar Liberaldemokrat
12. Grupi parlamentar Aleanca për Demokraci

Kërkohet që kjo trevë të mos lihet jashtë vëmendjes nga qeveria
Shkodër, krijohet “Lidhja e Veriut”

Një grup të rinjsh nga Veriu dhe Verilindja e Shqipërisë kanë ndërmarrë një nismë të quajtur “Lidhja e Veriut”. Kjo nismë ka për qëllim që të rrisë peshën në vendimmarrje për popullsinë e kësaj treve, si dhe të tentojë një zhvillim më të balancuar mes pjesëve të vendit. Sipas Alban Krajës, një nga anëtarët e grupit nismëtar të kësaj lëvizje, qëllimi i kësaj nisme nuk është përçarja e vendit në Jug-Veri, por një integrim më të madh të kësaj treve të Shqipërisë, e cila është lënë në prapambetje. Gjithashtu, “Lidhja” ka për qëllim punën për zhvillim të barabartë midis krahinave të vendit pa dallime, për t’i dhënë një zhvillim tjetër këtyre zonave. “Të gjithë jemi dëshmitarë që Veriu është lënë në stanjacion, është lënë në mëshirë të fatit, ndryshe nga pjesa jugore e vendit. Nuk mund të ketë ecje përpara dhe integrim të Shqipërisë pa një zhvillim të të gjitha pjesëve të vendit”, tha Kraja. Në muajin shkurt do të zyrtarizohet selia e kësaj lëvizje në Shkodër ku do të jetë edhe qendra e saj, ndërsa do të punohet gradualisht për të shtrirë degët në të gjitha rrethet veriore dhe verilindore të vendit deri në Tiranë. Në këtë lëvizje duhet të përfshihen të gjithë ato potenciale njerëzore që ka kjo trevë, e cila ka bërë jo pak për historinë dhe kulturën e Shqipërisë, pa dallime politike. “Në rast se vullneti i masës e kërkon që kjo lëvizje duhet të marrë pjesë edhe në zgjedhjet e qershorit, ne nuk do ta përjashtojmë këtë mundësi”, kanë pohuar nismëtarët e kësaj lëvizje. Kështu, “Lidhja e Veriut” duket të jetë një lëvizje politike rajonale, e ngjashme për nga emri dhe formati me “Lega Nord” të kryesuar nga senatori Umberto Bossi në Itali. Por, ndryshe nga kjo e fundit, e cila shfaqet si një lëvizje separatiste, “Lidhja shqiptare e Veriut” kërkon bashkëngjitjen e veriut të vendit me zhvillimin e krahinave të tjera të vendit. Në Itali, Veriu i pasur kërkon shkëputjen nga Jugu më i pazhvilluar, ndërsa “Lidhja e Veriut” e drejtuar nga Alban Kraja, kërkon bashkimin e veriut të varfër me jugun, si një pjesë më e zhvilluar e vendit.

Ç’është “Lidhja e Veriut”

“Lidhja e Veriut” duket se përfaqëson një nismë jo më shumë politike, sesa qytetare të banorëve të një treve me tradita si Shkodra, por që shpeshherë e konsideron veten të anashkaluar nga pushteti. Një nga drejtuesit e kësaj lëvizje, Alban Braja, duket se është nisur nga modeli i “Lega Nord” në Itali, meqenëse punon dhe jeton atje prej vitesh, pavarësisht se ka ndryshuar mjaft në thelbin e kësaj nisme.