Komisioni Qendror i Zgjedhjeve shpërndan fondin prej 60 milionë lekësh për partitë politike në përballimin e fushatës elektorale.

Në këtë vendim paraprak KQZ-ja ka vendosur që të shpërndajë fillimisht 50 për qind të shumës së akorduar nga qeveria për partitë politike, vetëm për ato subjekte që janë të përfaqësuar në Kuvend. Fondi prej 30 milionë lekësh është shpërndarë për 11 parti politike, duke vendosur që pjesa tjetër të ndahet, pasi subjektet e tjera të regjistrohen në KQZ, si pjesëmarrëse në zgjedhjet e 3 korrikut.

PD dhe aleatët
Në mbledhjen e KQZ-së çështja që kushtoi më tepër kohë ka qenë mënyra e ndarjes së fondit të koalicionit “Bashkimi për Fitore”, në të cilën bëjnë pjesë Partia Demokratike dhe aleatët e saj në zgjedhjet e 2001, si PR-ja, PBK-ja, PLL-ja dhe PBL-ja. KQZ-ja kanë parashikuar që ky fond të ndahet si koalicion dhe këto pesë parti të bien dakord me njëra-tjetrën. “Ne nuk kemi zgjidhje tjetër, por vetëm në këtë mënyrë mund të ndahet ky fond. Partitë e koalicionit le ta gjejnë zgjidhjen ndërmjet tyre, si do ta ndajnë këtë fond”, deklaroi kreu i KQZ-së, Celibashi. Ndërsa anëtari Dodë Prenga ka kërkuar që KQZ-ja të ndajë fondin në mes këtyre partive politike. Por një gjë e tillë është cilësuar si e parealizueshme teknikisht. Sipas Celibashit, e rëndësishme për KQZ-së është që këto parti që kanë dalë në zgjedhjet e 2001 nën emrin e koalicionit “Bashkimi për fitore” janë në Kuvend dhe kanë kaluar kriterin prej 2,5 për qind të votave.

Fondi
Neni 145, pika 1 c të Kodit Zgjedhor, i azhornuar parashikon shpërndarjen e 50 për qind të shumës së akorduar nga buxheti i shtetit, subjekteve zgjedhore që në zgjedhjet pararendëse kanë marrë jo më pak se 2,5 për qind të votave, sipas formulës së paraqitur në këtë ligj. Kjo shumë duhet t’u jepet partive politike jo më vonë se 10 ditë nga data e nxjerrjes së dekretit të presidentit për datën e zgjedhjeve. Në bazë të këtij sanksionimi prej 30 milionë lekësh, PS-ja përfiton një shumë mbi 13 milionë lekësh, ndërsa PD-ja me katër partitë aleate të saj do të përfitojnë një shumë prej 11.650.507 lekësh.

Trajnimet

KQZ-ja ka miratuar dje projektin e trajnimit të komisioneve të qendrave të votimit (KQV) dhe grupeve të numërimit të votave (GNV). Ky projekt përfshin të gjitha detyrat funksionale të anëtarëve të KQV-ve dhe GNV-ve, gjatë ditës së zgjedhjeve dhe më pas në procesin e numërimit të votave.

Fondet

1. PS 13.139.382
2. PD+PLL+
PR+PBK+PBL (BF) 11.650.507
3. PDR 1.610.099
4. PSD 1.153.688
5. PBDNJ 827.364
6. PAA 812.804
7. PAD 806.157

Partitë që s’kanë kthyer lekët

1 Partia AGRARE 977 235
2 Partia E DJATHTE
DEMOKRATIKE 902 042
3 Partia LEVIZJA
E LEGALITETIT 2 074 653
4 PDR 692 308
5 Partia
DEMOKRISTIANE 3 699 653
6 Partia BALLI
KOMBETAR 2 646 442
7 Partia KOMUNISTE 1 792 498
8 Partia E PUNES 813 781
9 Partia BASHKIMI
LIBERAL 1 627 209
10 Partia BALLI
KOMBETAR DEMOKRAT 1 623 564
11 Partia BASHKIMI
DEMOKRAT 1 419 877
12 Partia LIDHJA
KOMBETARE 735 427
13 Partia LEVIZJA
PUNETORE 1 669 060
14 Partia BASHKESIA
KOMBETARE 697 357
15 Partia
KONSERVATORE 1 604 481
16 Partia E
UNITETIT KOMBETAR 1 629 411
17 Partia
SOCIALKRISTIANE 723 088
18 Partia BASHKIMI
DEMOKRISTIAN 1 665 741
19 Partia PAJTIMI
KOMBETAR 703 918
20 Partia EMIGRACIONI 698 626
21 Partia LIDHJA
FSHATARE 18 198
22 Partia SHQIPTARE
AMBJENTALISTE 10 422
23 Partia E MIREQENIES
POPULLORE 3 726
24 Partia LEVIZJA
PER DEMOKRACI 857 142
25 Partia BASHKIMI
DEMOKRAT 1 044 851
26 Partia LEVIZJA MONARKISTE
DEMOKRATE 789 474 TOTALI 31 120 184

Skënder Demiri dhe Dashnor Sula firmosin para Sollakut
“Do të bëhemi deputetë”, dy prokurorët japin dorëheqjen

Prokurori i përgjithshëm, Theodhori Sollaku, e ka filluar ditën e djeshme të punës së tij, me një kafe pune ku kanë qenë të pranishëm dy prokurorët, Skënder Demiri dhe Dashnor Sula, të cilët i kanë paraqitur dorëheqjen kreut të akuzës. Skënder Demiri, prej disa vitesh në krye të Prokurorisë së Apelit të Tiranës, është ftuar nga Partia Socialiste si kandidat i saj për deputet në qytetin e Burrelit, ndërsa Dashnor Sula ka lënë detyrën e prokurorit në Drejtorinë Kundër Krimit të Organizuar në Prokurorinë e Përgjithshme, pas ftesës së Partisë Demokratike. Kryeprokurori Sollaku u ka shprehur falënderimet e tij dy prokurorëve për kontributin e dhënë në organin e akuzës. Gjatë takimit, Sollaku ka pranuar dorëheqjen nga funksioni i prokurorit të dy kandidatëve për deputetë dhe u ka uruar atyre suksese në një garë të ndershme elektorale. Sollaku në takimin me ish-vartësit e tij ka vlerësuar se dy ish-prokurorët duhet të japin shembullin personal të zbatimit korrekt të Kodit Zgjedhor. “Nëse fitoni, të kontribuoni në ndërtimin e demokracisë dhe shtetit të së drejtës, si dhe në emancipimin e mëtejshëm të klasës politike në vend për të respektuar ligjin dhe institucionet e shtetit”, ka pohuar kryeprokurori Sollaku. Në bazë të ligjit, gjykatësit dhe prokurorët nuk lejohen të kandidojnë në zgjedhje pa dhënë më parë dorëheqjen nga posti që mbajnë.