Objekt i rubrikës “Forum” janë sot zona nr. 4 në Shkodër dhe kandidatët e saj. Kjo zonë përfshin disa nga lagjet më të vjetra të qytetit të Shkodrës siç janë Tophana, Dudasi Kirasi dhe Rusi, të cilat ndodhen në perëndim të qytetit, përbri liqenit të Shkodrës. Infrastruktura tejet e amortizuar, papunësia e lartë, numri relativisht i madh i banorëve të ardhur nga zonat rurale dhe të veriut të vendit tonë, legalizimi i tyre etj, janë disa nga problemet më të mëdha që ka kjo zonë. Këtu do të kalojë një pjesë e rëndësishme e segmentit rrugor të Unazës së qytetit, e cila do të bëjë lidhjen e aksit rrugor Shkodër-Hani i Hotit me atë Shkodër-Tiranë. Por fatkeqësisht, me gjithë premtimet e shumta të qeverisë qendrore dhe të donatorëve të huaj, ky aks akoma ndodhet në një gjendje të shkatërruar dhe të pakalueshme. Zona 4, ashtu si pjesa dërrmuese e Shkodrës ka njohur shumë pak investime dhe për pasojë burimet e brendshme të punësimit janë shumë të pakta. Aktiviteti kryesor është ai tregtar, por mungojnë investimet prodhuese. Turizmi është shumë i varfër për shkak të infrastrukturës së dobët dhe mungesave të tjera.

Për zgjedhjet e 3 korrikut në zonën 4 beteja tashmë ka krijuar profilin e vet nga fushata që po kryesojnë katër subjektet politike: PD, PS, LSI dhe LZHK.

Një nga shkaqet kryesore përse gara është bërë kaq interesante lidhet me cilësinë e figurave të secilit nga kandidatët e zgjedhur për të konkurruar në këtë zonë. Secili prej tyre ka synim përmirësimin e gjendjes aktuale në këtë zonë nëpërmjet investimeve.

1-Si e vlerësoni vendimin e partisë suaj për t’ju kandiduar në zonën nr.4?
Gilman Bakalli (PD). Zgjedhja ime nga kryesia e Partisë Demokratike si kandidat për deputet në zonën nr.4 duhet konsideruar si pjesë e atij procesi ristrukturimi dhe rikonceptimi që ka përfshirë PD-në. Ky proces ka filluar me krijimin e Komitetit të Orientimit të Politikave dhe vazhdoi me përfshirjen në politikë të individëve, të cilët si në rastin tim, nuk ishin angazhuar direkt në strukturat partiake. Unë e kam pritur me kënaqësi propozimin që më bënë. Nga ana tjetër unë e shoh këtë besim si një detyrim timin për elektoratin shkodran, i cili e meriton realisht ndryshimin me vepra dhe jo me fjalë.
Musa Heta (PS). Caktimi im si kandidat për deputet është vlerësim dhe kërkesë për angazhim. Kam parasysh faktin që një forcë e madhe dhe serioze, me kapacitete të mëdha intelektuale, duke më kandiduar më ka dhënë një vlerësim të madh. Nga ana tjetër ky vlerësim kërkon angazhim nga ana ime, sepse PS-ja nuk është e prirur të gjejë thjesht një konkurrent fitues, por ajo kërkon më shumë një njeri të përkushtuar, të aftë të krijojë lidhje të qëndrueshme me elektoratin dhe t’i shërbejë atij realisht nesër në Parlament. Pas shpalljes së listës së kandidatëve për deputetë të PS-së, mjaft emra ish-deputetësh mungojnë pikërisht për këtë arsye.
Ruzhdi Fatusha (LSI). Ndjehem i respektuar nga subjekti që unë përfaqësoj, i cili më besoi mua për të kandiduar në këtë zonë. Eshtë edhe një obligim moral dhe qytetar i imi që unë të kem kurajën dhe forcën e duhur për t’i kërkuar votën bashkëqytetarëve të mi, miqve, shokëve dhe dashamirësve, pasi ata kanë vite që më njohin.
Siç duket, personaliteti im jo vetëm në fushën profesionale, por edhe në atë morale, politike dhe qytetare bëri që forumet e kësaj partie të më propozojnë në kryesinë e saj, që unë të zgjidhem kandidat në këtë zonë.
Ferit Hafizi (LZHK). Pavarësisht se përgjigjen e saktë mund ta japin ata që e morën këtë vendim, për veten time mund të them se kjo gjë më ka prekur thellë. Do të shkonte shumë gjatë të shpjegoja elementët që kanë të bëjnë në këtë rast, të tilla si vlerësimi i lartë, besimi që kanë tek unë, shpresat që ushqehen dhe pas gjithë këtyre nuk ke si të thuash me vete; A do të jem në lartësinë e duhur? Me besimin se një e djathtë reale e bën shtetin dhe demokracinë, kam hyrë me kënaqësi në këtë garë.

2–Cilat janë disa nga problemet kryesore të zonës suaj dhe çfarë premtoni për zgjidhjen e tyre?
Gilman Bakalli (PD). Disa nga lagjet e zonës ku kandidoj kanë nivele të larta papunësie, një infrastrukturë të shkatërruar, mungesë të theksuar të furnizimit me energji elektrike. Por, çështja më problematike e kësaj zone mbetet shkalla e lartë e zhgënjimit të njerëzve nga politika, mungesa e besimit dhe shpresës së tyre për një të ardhme më të mirë. Aktualisht mendoj se zgjidhja e këtyre problemeve duhet shqyrtuar në dy plane, në atë psikologjik dhe në atë teknik. Me fjalë të tjera, me këta njerëz të lodhur nga politikat indiferente apo mashtruese, duhet punuar për të rindërtuar komunikimin normal me shtetin. Këta njerëz duhen bindur se problemet e tyre nuk mund të zgjidhen përveçse nga një përfaqësues politik i angazhuar dhe i ndershëm. Më pas mendoj se zgjidhja konkrete duhet bërë në bashkëpunim të ngushtë me banorët e zonës dhe me një staf me kompetenca teknike të spikatura. Do të angazhohem që kjo zonë e lënë pas dore të fitojë statusin e veçantë në projektet e qeverisë së ardhshme demokratike.
Musa Heta (PS). Unë jam banor i qytetit dhe si i tillë përjetoj shqetësimet që preokupojnë njerëzit, por si specialist vlerësoj gjendjen e infrastrukturës, të cilën e konsideroj edhe problemin kyç të zhvillimit të zonës. Kjo zonë ka një infrastrukturë tejet të amortizuar në raport me pjesët e tjera të qytetit dhe nga pikëpamja ekonomike mbetet zona më e varfër. Të transformosh një realitet të tillë ka vështirësi, por nuk është e pamundur. Përparësi në programin tim është ndërtimi i Unazës së qytetit, e cila kalon pikërisht përmes kësaj zone. Nga ana tjetër, rëndësi ka sistemimi dhe asfaltimi i rrugëve që lidhin lagjet periferike me qendrën e qytetit dhe me njëra-tjetrën. U ndala në këto dy momente, sepse mungesa e Unazës dhe gjendja tejet e amortizuar e rrugëve ka bërë që lagjet e zonës sime, të cilat janë periferike, të mbeten të shkëputura në mënyrë të ndjeshme në raport me dinamikën e zhvillimit tregtar dhe ekonomik me pjesët e tjera të qytetit. Kështu, veç ca dyqaneve apo klubeve me aktivitet të kufizuar nuk sheh asnjë investim tjetër serioz, sidomos të biznesit prodhues.
Ruzhdi Fatusha (LSI). Shkodra dhe zona nr.4, që përfshin disa nga lagjet më të vjetra ka probleme pa fund. Kur vizitova zonën me një pjesë të shtabit elektoral pashë një infrastrukturë të shkatërruar, megjithëse zona ka resurse të mëdha dhe një numër të madh banesash të paligjshme që presin legalizimin. Ndaj dhe unë po hartoj një strategji, duke u mbështetur në platformën elektorale të subjektit që unë përfaqësoj dhe besoj se do të jem zëri dhe mendja e halleve të këtyre banorëve.
Ferit Hafizi (LZHK). Unë i njoh problemet aq sa mund t’i njohë një banor i thjeshtë, ndaj jam i sigurt që ka të tjerë që teknikisht i njohin më mirë dhe pikërisht me këta do të bashkëpunoj. Unë ju ftoj t’i kushtoni vëmendje sloganit tonë; Ne bëjmë shtet! Kjo do të thotë shumë dhe ne do të përpiqemi t’ia shpjegojmë elektoratit sa më gjerë e më thellë domethënien e saj. Duke qenë se sot problemet janë të shumta, nganjëherë ka një prirje që ato të thjeshtohen në dy-tre elemente jetësore si uji e dritat. Ne s’mund të gëzohemi që në këtë prag fushate vërejmë se problemi i ujit dhe i dritave u zgjidh si me magji. Eshtë mëkat t’ua kursesh fjalët e mira drejtuesve të KESH-it. Kjo tregon se ka specialistë që zgjidhin probleme të tilla jetësore dhe shumë shpejt! Të bësh shtet, të kesh shtet do të thotë që ai të jetë një sistem i përhershëm i jetës sonë, që probleme të tilla të funksionojnë pavarësisht nga fushatat partiake, vullnetet subjektive dhe kjo për çdo fushë të jetës ku duhet të ndjehet dora e shtetit.

3–Pse besoni se do të fitoni në këto zgjedhje?
Gilman Bakalli (PD). Natyrisht që besoj se do të fitoj! Besoj në zgjuarsinë instinktive të elektoratit, i cili di të bëjë fajtor për situatën aktuale personat e duhur dhe t´i ndëshkojë ata me votën e tij. Nga ana tjetër, po ky elektorat di të bëjë dallimin midis së keqes dhe të mirës.
Musa Heta (PS). Sigurisht kur futesh në një garë, e para gjë që ke me vete është besimi dhe kur beson, njeriu mendon si të arrijë fitoren. Armët e mia në këtë garë janë morali im, përkushtimi, marrëdhëniet me njerëzit, si dhe zgjidhjet serioze që unë u ofroj për problemet që i shqetësojnë ata. Ndoshta këto që thashë tingëllojnë pak si klishe, por gjithsesi janë cilësitë e mia, sepse në radhë të parë jam njeri, pastaj ndërtues që gjithmonë kam punuar për njerëzit, duke cenuar edhe interesat e mia.
Ruzhdi Fatusha (LSI). Subjekti im politik dhe unë personalisht, në këtë garë elektorale kemi hyrë vetëm për të fituar. Ndaj dhe bindjen time e mbështes në disa faktorë; subjekti politik që unë përfaqësoj është shpresa kryesore për ndryshim dhe për integrimin e shpejtë drejt Evropës. Kryetari i LSI-së, Ilir Meta ka qenë kryeministri më i suksesshëm dhe ka ndikuar fuqishëm në zhvillimin e zonës veriore e sidomos të Shkodrës. Por nuk mund të lë pa përmendur edhe një fakt tjetër që mendoj se më bën optimist për ta fituar këtë garë; sapo kisha vendosur posterat e parë në disa pika të qytetit krahas rivalëve të mi, disa anëtarë të shtabit erdhën të mërzitur dhe më thanë se ato ishin grisur. Më pyetën si do t’ia bënim. Unë i pyeta për të rivalëve dhe më thanë se nuk ishin grisur. Atëherë u thashë të mos mërziten, sepse kjo ishte fitorja jonë e parë. Na konsiderojnë rivalë të fortë, ndaj dhe na i kanë grisur posterat.
Ferit Hafizi (LZHK). Zakonisht fushatat shoqërohen me zhurmë e bujë, me shumë fjalime e premtime e që s’mund të thuash që s’e bëjnë efektin e tyre. Këtë deri në një farë shkalle. Po ashtu, bëhen edhe disa punë, që gjithsesi kanë dobinë e vet; diku një rrugë, ca fonde të shpenzuara aty-këtu. Megjithatë, edhe ata që duan të shquhen në kësi raste fushatash e kanë kuptuar nevojën e ndryshimeve dhe kjo është arsyeja që fjala ndryshim artikulohet aq shumë sot. Unë i siguroj ata që presin fushatën tonë dhe u them të kenë besim, pasi kjo do të jetë një fushatë ndryshe.

4– Cilat janë avantazhet tuaja ndaj kandidatëve të tjerë?
Gilman Bakalli (PD). Nuk mund të flas për avantazhe të mia ndaj kandidatëve të tjerë, pasi do më duhej të njihja dobësitë e tyre. Mund të them vetëm se njoh dy kategori politikanësh; politikanët e kategorisë së parë, ku bëj pjesë, të cilët hyjnë në politikë për t´i dhënë asaj idetë, konceptet dhe alternativat, dhe politikanët e kategorisë së dytë, që futen në politikë për të marrë prej saj favoret dhe statusin social. Pra, pika ime e fortë qëndron në faktin që unë futem në politikë me vullnetin e mirë për t´i shërbyer interesave të komunitetit. Një avantazh tjetër i imi është edhe forca politike që unë përfaqësoj, si forcë e vetme që mund të luajë një rol në integrimin e vendit në Evropë.
Musa Heta (PS). Në radhë të parë eksperienca ime, e cila përfshin një hark kohor prej 35 vitesh pune si projektues dhe organizator. Ajo nis që nga Fierza, Komani, ndërmarrja e ndërtimeve në Zyrën e Urbanistikës si shef i saj deri në 1992, kur neni i famshëm 24/1 më detyroi që për të mbijetuar të krijoj një firmë ndërtimi e të ballafaqohesha në mënyrë të suksesshme me ligjet e tregut.
E gjithë kjo veprimtari më ka siguruar një kontakt të vazhdueshëm me Shkodrën, për rrjedhojë edhe me problemet e saj. Edhe problemet që ka zona kanë të bëjnë pikërisht me ndërtimin dhe sistemimin e rrugëve. Profesionalizmi, profesioni inxhinier ndërtimi është një epërsi ndaj kandidatëve të tjerë.
Ruzhdi Fatusha (LSI). Krahas vetive të mia individuale mendoj se edhe forca politike është një forcë e re, tamam ajo që i duhej shkodranëve dhe shqiptarëve. Kjo është e vetmja forcë politike reale e majtë që mendon për shtresat e varfra dhe të mesme. Elektorati shkodran besoj se e ka kuptuar se si janë sjellë dy forcat e tjera politike. Kushdo që më njeh mua, si në aspektin profesional dhe atë politik, besoj se e ka të qartë që unë nuk i kam zhgënjyer asnjëherë.
Ferit Hafizi (LZHK). Fjalët e bukura dhe listat e titujve nuk bëjnë shumë punë. Avantazhi, për të cilin si unë edhe elektorati ynë është i sigurt, qëndron te simboli ynë fisnik; Mbreti Leka I-Zogu. Kemi kaq vite që menjëherë pas rënies së simboleve të komunizmit, krijuam idhuj të rremë duke u atribuuar atyre lirinë që na e fali Zoti, duke bërë një krim ndaj të vërtetës dhe kjo fushatë mendoj se do të shërbejë për të ndriçuar disa të vërteta themelore, pa njohjen dhe respektimin e të cilave nuk kemi si të ecim përpara.

Rezultatet e zgjedhjeve të 2001

Astrit Bushati PD+BF 7033 vota ose 53.0%
Esmeralda Uruçi PS 4731 vota ose 35.6%
Nexhat Kali PV 769 vota ose 5.80%
Alban Kraja PSD 310 vota ose 2.33%
Nadir Erkoçi PBDSH 154 vota ose 1.16%
Agim Lera PDK 117 vota ose 0.88%
Mahmud Çuliqi PBDNJ 55 vota ose 0.41%
Gjergj Ujka PASH 46 vota ose 0.34%
Fran Shytani PKSH 38 vota ose 0.28%

PD+BF 7544 vota ose 56.7%
PS 4280 vota ose 32.1%
PDR 574 vota ose 4.31%
PSD 170 vota ose 1.27%
PAA 123 ose 0.92%
PKSH 94 vota ose 0.70%
PAD 79 vota ose 0.59%
PBD 71 vota ose 0.53%
PSKSH 65 vota ose 0.48%

Gilman Bakalli
Demokrati me diplomën e “Graz”-it

Gilman Bakalli ka lindur në Shkodër në vitin 1967. Kandidimi si përfaqësues i PD-së në këto zgjedhje përbën kandidimin e tij të parë. Eshtë anëtar i Partisë Demokratike që në krijimin e saj në vitet ’90. Studimet e larta i ka ndjekur fillimisht në Universitetin e Tiranës në Fakultetin e Gjeologjisë, të cilat nuk i ka përfunduar. Më pas, në vitet 1996-2000 ai ka ndjekur studimet në Universitetin e Tiranës, Fakulteti i Gjuhëve të Huaja dhe është diplomuar në Degën e Gjuhës Gjermane. Gilman Bakalli mbron gradën Doktor i Filozofisë në Universitetin e Gracit, Austri, në vitin 2004. Aktualisht Bakalli është drejtor i Departamentit të Gjuhës Gjermane. Ka thelluar studimet e tij në fushën e gjermanistikës dhe lidhjeve austro-shqiptare dhe gjermano-shqiptare. Gjatë gjithë kësaj periudhe 15-vjeçare është dalluar për devocion qytetar, kulturor dhe demokratik.

Musa Heta
Inxhinieri që ndërtoi hidrocentralet

Kandidon për herë të parë nën siglën e Partisë Socialiste për zgjedhjet e 3 korrikut. Ka lindur në Shkodër në vitin 1945 dhe është i martuar. Studimet e larta i ka ndjekur në Universitetin e Tiranës, Dega Inxhinieri Ndërtimi. Pas përfundimit të studimeve, ai ka punuar në hidrocentralin e Fierzës në një sërë postesh drejtuese, në vitet 1970-1979. Në vitet 1979-1982 ka punuar brenda në qytetin e Shkodrës, ndërsa në vitet 1982-1986 në hidrocentralin e Komanit. Heta ka punuar gjithashtu edhe në ndërmarrjen e ndërtimit në Shkodër, kurse aktualisht është kryetar i Shoqatës së Ndërtuesve për Qarkun e Shkodrës. Gëzon një reputacion të mirë në shoqëri dhe njihet për përkushtim të veçantë. Si ndërtues kërkon t’i ofrojë qytetit të tij më shumë rregull urbanistik, më shumë investime infrastrukturore dhe më shumë shërbime sociale.

Ruzhdi Fatusha
Morali i ri i së majtës shkodrane

Ruzhdi Fatusha kandidon për herë të parë në këto zgjedhje si përfaqësues Lëvizjes Socialiste për Integrim. Ai ka lindur në vitin 1950 në Shkodër ku jeton aktualisht. Eshtë i martuar. Studimet e larta Fatusha i ka kryer në Fakultetin e Inxhinierisë Mekanike në Universitetin e Tiranës. Pasi ka përfunduar këto studime, ai për vite të tëra ka punuar në sektorin e bujqësisë. Kështu, në vitet 2002-2003 ka qenë drejtor rajonal i Shërbimit të Transportit në Tiranë. Gjithashtu në vitet 1997-2000 ka qenë anëtar i Këshillit të Qarkut Shkodër. Aktualisht Ruzhdi Fatusha punon në një kompani sigurimesh. Gjithashtu ai gëzon reputacion shumë të mirë në zonkn ku do të kandidojë për zgjedhjet parlamentare.

Ferit Hafizi
Demokrati që garon për LZHK-në

Ferit Hafizi kandidon për herë të parë si përfaqësues i LZHK-së. Ka lindur në Shkodër në vitin 1939, është i martuar. Studimet i kreu në Universitetin e Tiranës në vitin 1971, ku u diplomua në Degën Gjuhë dhe Letërsi Shqipe. Nga viti 1983 deri në 1990 ka punuar si specialist në fondet Albanologji-Ballkanologji, në bibliotekën “Marin Barleti” të Shkodrës. Më pas, në vitet ‘92-’93 ka qenë drejtor i kësaj biblioteke. Për rreth një vit ai ka qenë diplomat në ambasadën e Shqipërisë në Pakistan, ndërsa në vitet 1994-1996 specialist në MPJ, Drejtoria e Vendeve Arabe. Gjithashtu Hafizi ka qenë diplomat në Arabinë Saudite në vitet 1996-1999. Më pas ka punuar në Drejtorinë e Arkiv-Dokumentacionit në MPJ. Ka dalë në pension në vitin