Bllokimi i reformës zgjedhore pritet të jetë objekt i debatit politik mes dy forcave kryesore të politikës, socialistëve dhe demokratëve.

Seanca e ditës së sotme pritet të jetë mjaft e nxehtë, ku deputetët e PS-së dhe të PD-së pritet të akuzojnë njëri–tjetrin për mosarritjen e konsensusit për ndarjen e të 100 zonave zgjedhore. Ndërkohë që PD-ja ka theksuar se në asnjë rast nuk duhet të realizohet një ndarje zonale, sipas vullnetit të mazhorancës, duke kërkuar arritjen e një konsensusi politik. Nga ana tjetër, PS-ja për ndarjen e re të zonave zgjedhore, e cila votohet me një shumicë të thjeshtë të votave, po synon ta zgjidhë me votat që ajo ka në dispozicion, duke përfshirë këtu edhe kartonat pro të aleatëve të saj. Socialistët kanë sulmuar ashpër edhe qëndrimet e mbajtura nga një pjesë e grupit të ekspertëve të OSBE-së, duke i cilësuar si jo të aftë në paraqitjen e zonave zgjedhore, sipas kërkesave të ligjit dhe të vendimit më të fundit të Gjykatës Kushtetuese. Ndërkohë që PD-ja në seancën e sotme të Kuvendit pritet që t’i bëjë thirrje socialistëve për gjetjen e një konsensusi politik për hartën e re zgjedhore, e cila është pjesë e njërit prej kushteve mes palëve për reformën zgjedhore. Burimet pranë kësaj partie kanë pohuar se opozita e sheh si të domosdoshme ndryshimin e hartës elektorale, për shkak se me 100 zonat zgjedhore aktuale përfitojnë tri zona direkt socialistët. Socialistët në bisedimet me demokratët kanë hedhur poshtë edhe një nga variantet e paraqitura nga ana e PBDNJ-së, e cila parashikon edhe bashkimin e disa krahinave të të dy qarqeve të VLorës dhe të Gjirokastrës me popullsi të minoritetit. Një variant i tillë nuk u pranua nga socialistët, të cilët u shprehën edhe të habitur për dakordësinë e shpallur nga demokratët për një propozim të kreut të kësaj partie, Vangjel Dule. Socialistët dhe demokratët kanë rëndë dakord parimisht që të hiqen dy zona zgjedhore nga dy qarqet e Vlorës dhe të Beratit, por dy partitë kryesore politike nuk kanë rënë dakord se ku duhet të vendoseshin ato. PD-ja ka kërkuar që një zonë t’i shtohej Shkodrës, por që u refuzua nga ana e socialistëve, pasi ky qytet njihet si bastion i demokratëve. ndërsa demokratët janë kundër idesë që një zonë e tillë të kalojë në Qarkun e Dibrës. Përplasjet jo të vogla kanë të bëjnë edhe më kriteret që duhet të merren në konsideratë, ku socialistët insistojnë për regjistrimin e fundit që po kryhet nga njësitë e qeverisjes vendore, bazë për të cilën do të jenë edhe listat e zgjedhësve.

Godo: Varianti Dule, i rrezikshëm

Kreu i Asamblesë së Partisë Republikane, Sabri Godo, ka reaguar në lidhje me variantin e paraqitur nga ana e kreut të PBDNJ-së, Vangjel Dule, për bashkimin e zonave të minoritetit. “Ky është një variant i rrezikshëm, i cili nuk duhet të miratohet. Nuk e di se nga ka ardhur një ide e tillë, ndoshta nga ato qarqe të vjetëruara greke, që synojnë të krijojnë zona etnike të pastra”, theksoi Godo. Ai kërkoi të ndalohej një gjë e tillë dhe se partitë politike nuk duhej ta votonin një variant të tillë, të cilësuar si ogurzi. Sipas tij, këtyre skemave iu ka kaluar koha dhe nuk duhet të bëhet një gabim me krijimin e disa zonave të tilla. Ndërkohë që kundër këtij varianti ka dalë edhe një parti tjetër që mbron të drejtat e minoritetit. Kryetari i PLDNJ-së, Ligoraq Karamelo, i cili e quajti si jo të drejtë kërkesën e shpallur nga ana e Dules, duke shtuar se përqendrimi i votave të zonave të minoritetit do të ishte një gjë shumë e dëmshme. Kundër variantit të Dules për bashkimin e disa fshatrave të të dy qarqeve VLorë dhe Gjirokastër ka qenë edhe PS-ja. Sipas njërit prej negociatorëve, një propozim i tillë bie ndesh me ligjin, pasi kriteret e sanksionuara për ndarjen e zonave ndalojnë bashkimin e dy qarqeve në një zonë të vetme. PBDNJ-ja ka qenë kundër heqjes së një zone zgjedhore në Qarkun e Vlorës, pasi prekeshin fshatrat e minoritetit. Nisur nga ky fakt, Dule propozoi një variant për zonat zgjedhore, i cili u kundërshtua nga socialistët, të cilët theksuan se janë kundër krijimit të zonave etnikisht të pastra.

OSBE
Vulçanov, mision i pamundur

Për zhbllokimin e reformës zgjedhore në Tiranë mbërriti edhe zëvendësdrejtori i përgjithshëm i ODIHR-it, Nikolai Vulçanov. Ai për disa ditë negocioi mes partive politike, PS-së dhe PD-së, si dhe me partitë e tjera parlamentare për zhbllokimin e kësaj situate, por misioni i tij mbeti i papërfunduar. Ndryshe nga herët e tjera, Vulçanov nuk arriti t’i bindë socialistët dhe demokratët për të arritur një konsensus për hartën e re zgjedhore.

Metodika e Komitetit të Pronave pritet të kundërshtohet në Kuvend nga partitë e djathta
Deputetët, paketë të re për çmimin e trojeve

Partitë e djathta pritet të paraqesin një variant të tyrin për mënyrën e kompensimit financiar të pronave për pronarët legjitimë. Partitë e djathta janë në pritje të mbërritjes së metodikës së miratuar nga ana e Komitetit Shtetëror për Kthimin e Pronave. Sipas burimeve, LZHK-ja pritet të paraqitet në Kuvend me disa variante për kompensimin financiar të kategorive të ndryshme të tokës, si asaj turistike, bujqësore apo dhe trojeve. Me këtë paketë synohet të rritet vlera çmimit për kompensimin financiar, veçanërisht për trojet. Sipas deputetëve të LZHK-së, është i papranueshëm çmimi i vendosur, prej 606 eurosh për metër katror, për kompensimin e trojeve, në një kohë që çmimi maksimal në Tiranë shkon sa dyfishi i asaj që ka përcaktuar Komiteti Shtetëror i Pronave. Tri ditë më parë, kryetari i këtij institucioni, Sokrat Sina, paraqiti një listë për mënyrën e kompensimit financiar të pronarëve. Përcaktimi i këtyre çmimeve është nisur nga çmimet e tregut dhe jo nga ato të hipotekës apo të ligjit të tokës, kur ajo i është marrë pronarit të ligjshëm. Kështu, për tokën bujqësore në zonën e Shqipërisë së Mesme, në Berat dhe në Lushnjë dhe në të gjitha zonat përreth, çmimi i një metri katror varion nga 3,4 në 3,8 euro. Çmimi për zonat urbane varion nga 78 euro për metër katror, kur është fjala për Tiranën për shembull, deri në 606 euro për metër katror. Ndërsa për zonat turistike, çmimi varion nga 40 euro për metër katror deri në 210 euro. Edhe pse tregu i tokës në Shqipëri vazhdon të mbetet informal, çmimet që publikoi Komiteti Shtetëror i Kthimit dhe Kompensimit të Pronave janë nxjerrë duke u mbështetur në prodhimin e mundshëm bujqësor, për tokat bujqësore, është fjala për dokumentet zyrtare të ruajtura në kadastra. Për tokën turistike, Komiteti Shtetëror i Kthimit dhe i Kompensimit të pronave nuk do të ketë asnjë lloj kufizimi. Çmimet dhe kriteret e mësipërme do të diskutohen në Parlamentin shqiptar, javën e ardhshme, dhe vetëm pas miratimit të tyre, mund të nisë aplikimi i tyre.

Pronësi me Drejtësi takim në Greqi

Shoqata Pronësi me Drejtësi ka marrë këto ditë në takimin e zhvilluar nga shoqata ndërkombëtare e pronave në Greqi. Në këtë takim janë shkëmbyer shumë mendime në lidhje me procesin e kthimit dhe kompensimit të pronave. Në këtë takim nga shoqata “Pronësi me Drejtësi” ka marrë pjesë avokat Agim Tartari, i cili u ka kërkuar të pranishmëve të njihet me ekperiencën që kanë kaluar për kthimin dhe kompensimin e pronës. Gjithashtu, ai u ka kërkuar drejtuesve të kësaj shoqate që të zhvillojnë një vizitë në Shqipëri, për t’u njohur nga afër me këto probleme.

Axhemi
“Fisnikëria e Veriut, vlerë për LSI-në”

Nënkryetarët e LSI-së, Pëllumb Xhufi dhe Sokol Axhemi, zhvilluan takime me strukturat drejtuese të LSI-së në Shkodër dhe Malësi të Madhe, në kuadrin e organizimit të punës lidhur me votimin për zgjedhjen e strukturave drejtuese të LSI-së, në bazë të parimit një anëtar - një votë. Në Shkodër nënkryetarët e LSI-së, Axhemi dhe Xhufi, zhvilluan një takim me kryesinë e LSI-së për rrethin Shkodrës. Kryetari i LSI-së për Shkodrën, Agim Jahja, pasi theksoi faktin e mbështetjes së madhe që po gjen LSI-ja te banorët e Shkodrës, bëri një ekspoze të deritanishme të anëtarësimeve dhe shtrirjes së strukturave të LSI-së në çdo qendër votimi dhe në çdo komunë. Nënkryetari i LSI-së, Axhemi, tha se “duhen të merren të gjitha masat për zhvillimin e zgjedhjeve të drejtuesve të LSI-së në bazë të parimit një anëtar – një votë. “Asnjëri prej anëtarëve të LSI-së nuk duhet të mbetet pa votuar, pasi secili prej anëtarëve ka të drejtën e tij për të zgjedhur drejtuesit e partisë. Ne nuk bëjmë demagogji, siç bëjnë forcat e tjera, që ndryshe thonë dhe ndryshe veprojnë. Ndaj, dhe fisnikëria e Shkodrës dhe e gjithë Veriut është vlerë për LSI-në dhe jo demagogjia e PS-së”, u shpreh Axhemi. Ndërsa Xhufi foli për traditat dhe qytetarinë e Shkodrës, që janë nëpërkëmbur nga papërgjegjshmëria e pushtetit aktual, duke theksuar se “ne do t’i kthejmë vlerat që i takojnë Shkodrës së kulturës dhe traditës, ndaj dhe shkodranët duhet të përqafojnë alternativën e LSI-së”. Dy nënkryetarët e LSI-së, Xhufi dhe Axhemi, morën pjesë edhe në aktivin e LSI-së në Malësinë e Madhe. Kryetari i kësaj dege, Bahri Shabani evidentoi punën organizative për përgatitjen e zgjedhjeve në bazë të parimit një anëtar - një votë dhe garantoi zhvillimin e suksesshëm të zgjedhjeve brendapartiake.