Kuarteti i garës elektorale në zonën nr.38 përbëhet nga tre profesorë dhe nga një gazetar, të cilët kryesojnë sondazhet për mbështetje në elektorat. Përfaqësues të katër forcave politike të mëdha (PD, PS, LSI dhe LZHK), katër individualitetet e rubrikës sonë “Forum” shpalosin premtimet e tyre elektorale me tendencën pozitive për ndryshimin dhe përmirësimin e treguesve ekonomiko-socialë dhe kulturor të zonës ku kandidojnë. Duke qenë se një pjesë e zonës së tyre elektorale përfshin edhe “Qytetin Studenti” protagonistët kanë treguar një interes të posaçëm për investime dhe mbështetje. Një pjesë jo e vogël e zgjedhësve përbëhet nga të ardhurit nga zona të ndryshme të vendit, të cilët bashkëshoqërohen me problemet e legalizimit, strehimit dhe punësimit. Zona nr.38 është fituar me balotazh nga Angjeli përballë kandidatit Robert Çeku të kolicionit të djathtë “Bashkimi për Fitore” në zgjedhjet e 2001. Fakti që rezultati këtë herë shpallet me shumicën e thjeshtë të votave e vështirëson pozitën për zotin Angjeli. Përkrah tij është profesor Panariti, i cili këtë herë kërkon votat e të majtëve për LSI-në. Përfshirja në këtë garë e profesor Pangos, një nga përfaqëuesit kryesor të KOP-it të PD-së, e ka bërë akoma më interesante fushatën në këtë zonë.

Zona nr.38 përfshin disa lagje të kryeqytetit me shtrirje deri në Sauk. Por, e veçanta e saj është se ajo ka brenda saj “Qytetin Studenti” dhe lagjet përreth, pikërisht atë pjesë ku nisi rrëzimi i rregjimit komunist dhe u shpall pluralizmi në dhjetor 1990.

Ajo është një zonë historike e opozitës demokratike, por që në zgjedhjet e fundit u fitua me balotazh nga socialitët. Informaliteti i ndërtimeve dhe problemet urbane janë serioze përballë një dendësie të madhe banorësh, që kërkojnë më shumë rrugë, ujë e drita. Përballë gjithë këtyre problemeve, katër kandidatët japin garancitë e tyre për ndryshmin dhe përmirësimin e gjendjes aktuale.

1-Cilët mendoni se do të jenë zgjedhësit që do t’ju votojnë?
Anastas Angjeli (PS). Ata që besojnë në punën dhe jo në histerizmat politike, ata që jetojnë çdo ditë me ndryshimet që ndodhin në zonë. Ata që kanë tetë vite që kanë gjetur një portë të hapur ditën dhe natën për të qenë pjesë e komunitetit që përfaqësoj. Ata banorë, jo vetëm socialistë dhe simpatizantë të PS-së, por dhe ata me të cilët nuk ndajmë të njëjtat bindje politike, por ndajmë të njëjtat shqetësime dhe u kemi dhënë zgjidhje në shërbim të të gjithëve. Sepse të gjithë ecim në të njëjtat rrugë të rindërtuara apo të reja, fëmijët na mësojnë në të njëjtat shkolla të rindërtuara. Të gjithë e dinë se kam qenë realisht zëri i tyre, jo vetëm në Parlament, por edhe në të gjitha institucionet e vendit në shërbim të komunitetit.
Ylli Pango (PD). Kandidoj në një zonë heterogjene, ku ka banorë të ardhur nga të gjitha rrethet e Shqipërisë, Tropoja, Kukësi, Gjirokastra, ku ka fshatarë, qytetarë, tiranas të vjetër, për rrjedhojë mendoj se do të më votojë gjithë Shqipëria, sepse edhe nga sondazhet që janë bërë kam dalë në avantazh të theksuar me kundërshtarin tim, pasi jam një figurë të pastër akademike. Kam punuar 27 vjet, kam ndërtuar, kam shkruar, kam mbajtur leksione, kam takuar me mijëra njerëz, studentë, prindër që kanë respekt, dhe si rrjedhojë shumë njerëz do të votojnë për mua.
Edmond Panariti (LSI). Pa dyshim ata shqiptarë të shumtë, të cilët rotacionin politik nuk e shohin si rrotullim rreth boshtit PD-PS. Do të më votojnë ata zgjedhës, të cilët besojnë se një votë jo fanatike, por një votë e peshuar dhe e menduar, e cila mbështet vlera dhe alternativa, është gjithmonë zgjedhja dhe zgjidhja e duhur.
Rudi Erebara (LZHK). Ata qytetarë që besojnë në shtet dhe rregulla ligjore. Do më votojnë ata që besojnë se mirëqenia nuk shpërndahet me firma piramidale dhe as me diktaturë komuniste. Ata që votojnë kundër korrupsionit socialist dhe privatizimit të institucioneve shtetërore. Ata që e ndiejnë veten zot të pronës private, që e kanë trashëguar apo blerë, por që me ligjet e sotme, të djeshme të PS-së dhe të PD-së, nuk munden ta përdorin si gjithë bota perëndimore, pasi për çdo ditë mbeten nën kërcënimin mjeran të një cope letër që quhet tapi, që realisht, ligjërisht dhe moralisht është detyrim shtetëror.

2-Cilat janë pikat kryesore të platformës suaj elektorale?
Anastas Angjeli (PS). PS-ja dhe programi i saj për zhvillim dhe integrim janë baza e një fitoreje të padiskutueshme. Në platformën elektorale, duke qenë se e njoh thellësisht zonën ku jam dhe do të jem deputet për herë të tretë, kam disa prioritete. Së pari, rritja e mëtejshme e shkallës së përfaqësimit të banorëve në Parlament, që është një element bazë i çdo demokracie. Së dyti, vazhdimi i projekteve në të gjitha fushat duke realizuar platformën e zhvillimit të zonës.
Ylli Pango (PD). Brenda sloganit të PD-së na takon të ndryshojmë çdo gjë, duke filluar me arsimin, pasi një zonë me mijëra banorë nuk ka një shkollë të mesme. Shëndetësia, pasi ka një gjendje katastrofike për shëndetin e njerëzve dhe duhet punuar jashtëzakonisht. Problemet sociale, se duhet ngritur një qendër e shërbimeve sociale. Pastaj është biznesi i vogël. Kemi premtuar që për 3 vjet do të jetë i çliruar nga taksat, sepse pjesa më e madhe e shqiptarëve të thjeshtë përfaqësojnë biznesin e vogël. Prioritet do të jetë edhe infrastruktura, e cila është ndërtuar shumë pak nga kundërshtari im, mbi bazën e parimit “ca të nënës, ca të njerkës”. Mund të shohësh që, aty ku janë lagjet e demokratëve, rrugët janë të pashtruara, ndërsa disa lagje ku kanë votuar socialistët, rrugët janë të shtruara. Gjithashtu edhe ndriçimi, dhe ju siguroj që do të ketë kushte shumë të mira.
Edmond Panariti (LSI). Rikthimi i dinjitetit, përfilljes dhe përkrahjes për të gjithë banorët e zonës. Luftë frontale papunësisë dhe varfërisë së banorëve me projekte zhvillimi, të mbështetura me fonde dhe afate rigoroze. Legalizim i shpejtë i banorëve të zonave informale. Garantimi i furnizimit me ujë dhe energji elektrike i banorëve, ngritje të shkollave, kopshteve dhe të qendrave shëndetësore publike.
Rudi Erebara (LZHK). Pika kryesore e platformës është zgjidhja e procesit të kthimit të pronave, sepse gjykojmë që kjo, moralisht për LZHK-në dhe ligjshmërisht për vendin, do të rikthejë besimin e shkatërruar mbi vlefshmërinë e institucioneve dhe do të rikonstruktojë fuqinë e shtetit. Në të gjitha raportet ndërkombëtare Shqipëria dhe qeveritë pas 1990 gjykohen si të papërgjegjshme në ligjet për kthimin e pronave të sekuestruara nga regjimi diktatorial. Prioritet është ndëshkimi i krimit, pasi ai po e gjakos përditë Shqipërinë. Rikthimi i dënimit me vdekje do të ulë krimin në një kohë rekord, kur kemi parasysh që vetëm ky ligj vërtet mund të bëjë çarmatosjen e popullsisë civile, veçanërisht fëmijëve që nën këtë kërcënim po kryejnë vetëvrasje.

3-A keni ju një strategji për studentët, duke qenë se një pjesë e mirë e zonës banohet nga ata?
Anastas Angjeli (PS). Nuk ka munguar asnjëherë angazhimi ndaj “Qytetit Studentit”, si për sa u përket investimeve të bëra në të, falë këmbënguljes sime si deputet, kur miratohej buxheti i shtetit, ashtu dhe si njeri dhe si prind, si një familjar i mirë që mendoj si për fëmijët e mi. Kam pasur gjithmonë idenë për hartimin e një projekti gjigant për “Qytetin Studenti” në kthimin e tij në një kampus të vërtetë, me të gjithë elementët që duhen për të funksionuar si i tillë. Tashmë puna ka filluar dhe një pjesë e elementëve kanë filluar të jenë aktiv. Po punohet për infrastrukturën, duke e ndarë tërësisht nga pjesa tjetër që nuk banohet nga studentë. Po punohet gjithashtu edhe për ndërtimin e lehtësirave të tjera të nevojshme për një jetë dinjitoze dhe aktive, duke mos dalluar nga pjesa tjetër e vendit, e cila po zhvillohet me shpejtësi. Pjesë e kësaj strategjie, e cila tashmë ka filluar të implementohet është rikonstruksioni i plotë i bibliotekës, krijimi i klubeve studentore, ndërtimi i këndeve të lojërave, rikonstruksioni i kompleksit sportiv dhe atij social-kulturor.
Ylli Pango (PD). Pa dyshim sepse jam dhe kryetari i hartimit të platformës për arsimin në PD dhe si anëtar i KOP-it. Kam hartuar një plaformë, e cila synon hapjen e dyerve të universiteteve për të gjithë shqiptarët që mbrojnë shkollën e mesme. Drejtim, investim për arsimin e mesëm, zgjerim të regjistrimit në arsimin e mesëm si një nga treguesit e zhvillimit kryesor, sipas BB. Zero tolerancë për analfabetizmin. Studentët kanë qenë një pjesë shumë e rëndësishme e jetës sime. Për ta unë kam ndërtuar një fakultet, i cili është ndërtuar nga e para dhe një amfiteatër me 300 vende, që nuk e ka asnjë fakultet. Kam shtypur 11 libra për ta. I kam dashur dhe më duan shumë. Ata janë votuesit e mi dhe padiskutim, ndonëse vota është e fshehtë dhe kundërshtarët e mi pretendojnë se kam konflikt interesash, duke qenë pjesë e zonës sime elektorale do të votojnë për atë që duan. Ata votojnë në bazë të asaj që ke bërë për ta, dhe them se do të votojnë për mua pa asnjë lloj presioni.
Edmond Panariti (LSI). Si ish-student dhe tani pedagog, ndihem veçanërisht i detyruar për t’ju gjendur në krah dhe mbështetur fort këtë komunitet. Studentët në Shqipëri nuk kanë status. Mungesa e statusit i privon ata nga shumë të drejta dhe përfitime. Statusi i studentit sanksionohet në kartën e studentit. Ky dokument i lejon atij të përfitojë me çmime të ulëta materiale shkollore, shërbime të multimediale, fotokopjime, skanime, shërbime sociale, kulturore dhe shëndetësore me tarifa të reduktuara në kampuset universitare. Ai përbën angazhimin zyrtar të shtetit dhe të shoqërisë në mbështetje të tyre. Unë angazhohem për miratimin e këtij statusi në Parlament. Besoj se “Qyteti Studenti” dhe të gjitha kampuset universitare në Shqipëri duhet urgjentisht të çlirojnë mjediset e studimit dhe të banimit nga aktivitete, të cilat nuk kanë të bëjnë me jetën studentore. Për këtë unë garantoj vendosmërinë time. “Qyteti Studenti” ka nevojë urgjente për salla studimi, mungesa e të cilave e ka kthyer jetën studentore në një stres të mirëfilltë. Do t’i përkushtohem vendosmërisht nxjerrjes së fondeve për ngritjen e këtyre ambienteve, të cilat do të ofrojnë ndër të tjera falas edhe shërbime të internetit dhe të multimediave.
Rudi Erebara (LZHK). Kam qenë student i dhjetorit 1990. Nuk kam ngrënë në tasin e pistë të politikës shqiptare dhe nuk e trashëgoj fare këtë aftësi prapalëpirëse që karakterizon jetën politike. Studentët e dhjetorit ’90 rrëzuan diktaturën komuniste me ideal lirinë, integrimin evropian për një mirëqenie më të lartë sesa një palë pantallona dhe një banjë e qelbur për gjithë katin e konvikteve. Studentët e atëhershëm kërkonin realisht fjalë për fjalë mirëqenie. Bashkë sot do kërkojmë liri dhe mirëqenie, si atëherë për të mirën e atdheut, kundër korrupsionit komunist që vazhdon dhe sot. Studentët e këtyre viteve e dinë po aq mirë sa ne atëherë që diktatura nuk mbaroi me shembjen e murit të Berlinit, pasi siç thotë Brehti për nazizmin barku që e polli në rastin tonë, komunizmin, ende nuk është tharë.

4-Legalizimet janë një tjetër problem. Çfarë parashikohet në programin tuaj?
Anastas Angjeli (PS). Duke qenë kandidat për një zonë informale, kam punuar pavarësisht problemeve të legalizimit, që të zbusim efektet sociale të këtij procesi të pashmangshëm. Tashmë, po të hedhësh një sy do të shohësh se është ndërtuar një infrastrukturë moderne me rrugë, ndriçim, ujë të pijshëm dhe rrjet telefonie. Këto hapa janë një pjesë e rëndësishme e procesit të legalizimit. Nuk do të kishte kuptim që të jepnim disa karta formale dhe zona të mbetej përsëri informale nga ana e zhvillimit. Jam krenar që kam kontribuar që zhvillimi i kësaj zone të jetë në të njëjtin hap edhe me lagjet e tjera të kryeqytetit. Nga ana ligjore, Parlamenti tashmë ka marrë vendime të rëndësishme dhe ne kemi angazhuar shume vullnetarë për të bërë regjistrimet dhe për të përgatitur dokumentacionin e nevojshëm. Në këtë drejtim jemi më përpara se të gjithë të tjerët dhe të gatshëm për të finalizuar procesin, duke i bërë ata banorë të ndjehen përfundimisht të qetë përballë të gjitha presioneve politike apo të çfarëdo lloji tjetër.
Ylli Pango (PD). Gënjeshtra më e madhe e socialistëve është premtimi se, brenda 6 mujorit të parë legalizimet do të bëheshin për të gjitha shtëpitë me kosto minimale, nga 2 deri 4 milionë lekë të vjetëra. Në zonën 38 ka një avantazh, ndryshe nga zona të tjera, sepse këto toka i janë blerë pronarit dhe i vetmi justifikim që kanë nxjerrë socialistët, pa të drejtë, ka qenë që kjo është bërë kur nuk ekzistonte ligji për tokën. Pavarësisht nga kjo, toka është blerë nga pronari, dihet pronari, blerësi i saj që ka ndërtuar dhe është shumë e drejtë dhe e arsyeshme të legalizohet sepse i takon me të drejtë të ligjit.
Edmond Panariti (LSI). Angazhimi im në këtë drejtim është në sinkroni të plotë me mënyrën se si LSI-ja propozon të zgjidhë këtë çështje. Ne jemi për legalizim përpara urbanizimit, sepse vetëm në këtë mënyrë do të ndalojmë që verbëria e fadromave të rrafshojë brenda orës mundin dhe djersën e një jete të tërë të banorëve të zonës. Do të zbatojmë për efekt kompensimi çmime të tokës të vitit 1991-1992 për komunitetin. Unë kam bindje se kjo është e vetmja politikë e arsyeshme e së drejtës shoqërore, e cila ka si pikë referimi vitet dhe rrethanat kur këta banorë u vendosën në këto hapësira. Ndër të tjera çmimet janë plotësisht të përballueshme nga banorët e zonës dhe ne do të pengojmë zbatimin e çmimeve stratosferike, zhvatëse, të cilat synohen të zbatohen mbi banorët e zonës elektorale. Unë i garantoj se LSI-ja me ardhjen në pushtet do të abrogojë ligjin për legalizimet dhe do të pajisë banorët e zonave informale me dokument të plota të legalizimeve.
Rudi Erebara (LZHK). Unë jam sigurt se të gjithë ata shqiptarë që zbritën nga varfëria nuk do ta besojnë këtë radhë gënjeshtrën tip “skemë piramidale” e faljes së fajdeve dhe pasurimit tip “çek i bardhë”. Ata që jetojnë në zona informale duan të jenë pronarë të ligjshëm dhe e kanë shumë të qartë që nuk do të bëhen kurrë më premtimet elektorale të tipit politikë sociale. Ekonomia shqiptare si më 1945, ashtu edhe më 1990, ka nevojë për kreditim në sektorin prodhues. Po a mund të ketë kreditorë që të lëvrojnë kredi në zona të tilla që nuk dihet realisht se kujt i përkasin? I përkasin si tokë për LZHK-në, pronarit të ligjshëm ose të vjetër. LZHK-ja jo pa qëllim ka moton e saj lëvizëse “Ne bëjmë shtet”. Ne nuk premtojmë sahanët e floririt, as se do t’i paguajmë pas luftës. Ne u garantojmë shqiptarëve që janë me tapi, me hipotekë, se do të jenë zotër të vendit ku jetojnë.

Rezultatet e zgjedhjeve të 2001

Anastas Angjeli PS 9474 vota ose 50.8%
Robert Çeku PD+PB 6427 vota ose 34.5%
Kreshnik Çollaku PDR 890 vota ose 4.77%
Preç Zogaj PV 813 vota ose 4.36%
Banush Xhabrahimi PSD 362 vota ose 1.94%
Leka Bezhani AD 271 vota ose 1.45%
Luan Plaku PBDSH 93 vota 0.49%
Vasil Milo PBDNJ 60 vota ose 0.32%
Arben Zenelaj PKSH 47 vota ose 0.25%
Mehill Gecaj PDK 47 vota ose 0.25%

PS 9008 vota ose 47.2%
PD+BF 7402 vota ose 38.8%
PDR 853 vota ose 4.47%
PAD 612 vota ose 3.21%
PSD 370 vota ose 1.94%
PDK 123 vota ose 0.64%
PAA 115 vota ose 0.60%
PBD 87 vota ose 0.45%
PKSH 84 vota 0.44%
PBDNJ 81 vota ose 0.42%

Anastas Angjeli
Profesori i politikave fiskale

Anastas Angjeli kandidon për herë të tretë në këto zgjedhje nën siglën e PS-së. Aktualisht është ministër i Ekonomisë. Ka lindur në 1956 në Sarandë dhe ka kryer studimet e larta për Ekonomi-Financë në Universitetin e Tiranës. Eshtë i martuar dhe ka dy fëmijë. Eshtë doktor i Shkencave Ekonomike që nga viti 1987 dhe ka marrë titullin Profesor në vitin 1998. Angjeli është anëtar i KPD-sw socialiste qysh me themelimin e PS-sw saj dhe deputet në Kuvendin e Shqipërisë që nga viti 1992. Ka qenë anëtar i Këshillit Bashkiak të Tiranës, ndërsa në vitin 1998 ministër i Punës dhe Çështjeve Sociale. Gjithashtu Angjeli në periudhën tetor- shkurt 1998-2002 ka qenë ministër i Financave. Ka dhënë kontributin e tij në përpunimin dhe zbatimin e politikave dhe të reformës fiskale, si dhe për formulimin e Strategji-së Kombëtare të Zhvillimit Ekonomik e Shoqëror të vendit. 

Ylli Pango
Psikologu me diplomën e Klintonit

Ylli Pango kandidon për herë të parë nën siglën e PD-së në këto zgjedhje. Eshtë anëtar i PD-së dhe anëtar i Këshillit Kombëtar të saj. Ai aktualisht është dekan i Fakultetit të Shkencave Sociale në Universitetin e Tiranës. Gjithashtu ka qenë zv.ministër i Arsimit, nënkryetar i Komisionit të Kualifikimit Shkencor të Shqipërisë, kryetar i Këshillit Drejtues të RTSH, drejtues-menaxher i Fondit Shqiptaro-Amerikan të investimeve si dhe drejtues i Seksionit të Psikologjisë e Pedagogjisë në ISP. Pango është diplomuar si matematikan, mban titullin Profesor dhe gradën Doktor në Psikologji. Ai ka fituar bursën Fullbright dhe ka studiuar në “Boston University” prej nga ka marrë diplomë të firmosur nga presidenti Klinton. Ka kryer studime pasuniversitare në universitetin e Barit në Itali, Grenadës në Spanjë, Uashington dhe Seatle në SHBA.

Edmond Panariti
Akademiku i veterinarisë shqiptare

Edmond Panariti kandidon për herë të parë si përfaqësues i LSI-së. Ka lindur në Tiranë në vitin 1960, është i martuar dhe ka dy fëmijë. Aktualisht Panariti është koordinator kombëtar i FAO-s për sëmundjet infektive ndërkufitare dhe ekspert ndërkombëtar i sigurisë ushqimore, si dhe anëtar i Akademisë së Shkencave të Nju Jorkut që prej vitit 1998. Studimet e larta i ka kryer në degën e Mjekësisë Veterinare ku është diplomuar në 1984, ndërsa më pas ka kryer studimet pasuniversitare në universitetin e Zyhriut, Zvicër. Eshtë dy herë fitues i një granti ‘Fulbright’ për dhënie leksionesh dhe kërkime shkencore në universitetet e Kentakit dhe të Misisipit në SHBA. Gjithashtu Panariti është fitues i disa granteve të akorduara nga qendra e kërkimeve bërthamore Julich, fondacionet CDG, DAAD në Gjemani, programi Tempus i BE-së, për dhënie leksionesh dhe kërkime shkencore.

Rudi Erebara
Gazetari me shpresë tek Mbreti

Rudi Erebara kandidon për herë të parë nën siglën e LZHK-së, edhe pse nuk është anëtar i asnjë partie që bën pjesë në këtë koalicion. Ka lindur në Tiranë në vitin 1971. Eshtë i martuar me gazetaren Mimoza Picari. Studimet e larta i ka kryer në Akademinë e Arteve, dega Pikturë dhe më pas ka studiuar në shkollën angleze në High Point, SHBA. Eshtë një nga emrat e njohur të shtypit shqiptar dhe për një kohë të gjatë ka punuar si analist politik në disa gazeta të përditshme. Në vitet 1993-94 ka qenë kryeredaktor i gazetës “Zëri i Rinisë”, ndërsa në vitet 94-96 anëtar i bordit të botimeve të fondacionit Soros, 1994-1996. Në këtë fondacion më pas ka qenë këshilltar i bordit të rinisë së fondacionit Soros. Erebara ka çelur disa ekspozita pikture në Galerinë e Arteve në Tiranë. Eshtë autori i disa librave mbi prozën dhe poezinë.