Faqja 12 - AKTUALITET Shtator 8, 2005

Pas vendimit të Gjykatës së Apelit, Prokuroria pritet të rinisë sërish hetimet

Rihapet dosja për armët e Zogut

Ekspertët do përcaktojnë kush vlen për koleksion

Gazmend Janku TIRANE Çështja penale mbi koleksionin e armëve të pretendentit të Fronit Mbretëror, Leka Zogu, pritet të rihetohet sërish. Burime pranë Prokurorisë kanë deklaruar për Gazetën se rihapja e hetimeve u kushtëzua pas vendimit të Gjykatës së Apelit, e cila i ka kërkuar organit të akuzës që të marrë një vendim në lidhje me fatin e armëve, duke mos pranuar kërkesën e Prokurorisë që koleskioni i armëve të lihej në ruajtje të strukturtave të policisë. Sipas logjikës së vendimit gjyqësor, armët në fjalë ose duhet t'i kthehen Zogut, ose duhet të sekuestrohen. Hetimi Burime pranë Prokurorisë janë shprehur se rihapja e dosjes për armët e familjes mbretërore nuk ka për objekt hetimi faktin që këto armë janë sjellë në Shqipëri nga oborri mbretëror, por do të përcaktojë cilat armë do të lejohen të mbahen si koleksion. Për këtë arsye pritet që të thirren ekspertët, të cilët do të përcaktojnë, në bazë të ligjit për mbajtjen e armëve, se cilat prej armëve që disponon Leka Zogu do t'i lejohen që t'i mbajë. Ky veprim bëhet për shkak se në koleksionin e armëve të familjes mbretërore ka shumë armë të cilat nuk kanë vlera koleksionuese dhe si të tilla ato duhet të sekuestrohen nga autoritetet kompetente. Odisea Problemi i lindur mbi koleksionin e armëve që familja mbretërore solli në Shqipëri, në qershor të vitit 2002, prej tre vitesh nuk po gjen një zgjidhje përfundimtare. Kjo edhe për shkak që Shqipëria nuk ka një ligj që të përcaktojë saktë mbajtjen e koleksioneve të armëve, llojet e tyre si dhe personat që duhet t'i mbajnë. Aktualisht ligji për koleksionet thotë që familja mbretërore ka të drejtë të mbajë koleksione, por pa përcaktuar llojin e tyre. Në këto kushte, prokuroria dhe gjykata për tre vjet me radhë nuk kanë mundur të gjejnë një zgjidhje për këtë problem, cili gjithashtu nuk mund të trajtohet si një vepër penale mbi poseduesit e këtyre armëve. Ndërkaq, ende nuk dihet nëse familja mbretërore do ta pranojë vendimin e prokurorisë mbi armët që duhet të mbajnë.

http://www.panorama.com.al/ 07/09/2005

Spahia
PLL: Kongresi do zhvillohet në 8 tetor

Legalistët do të zhvillojnë kongresin e tyre të 16 më datën 8 tetor, e cila përkon me 110 vjetorin e lindjes së Mbretit Zog I. Kryetari i PLL-së, Ekrem Spahia, gjatë një deklarate për shtyp tha se gjatë muajit shtator do të zhvillohen konferencat e degëve të partisë në rrethe, nga të cilat do të zgjidhen organet drejtuese lokale dhe delegatët për në kongres. Po dje, Ekrem Spahia uroi Sali Berishën për dekretimin si kryeministër dhe u shpreh se qeveria e re duhet të dekretohet sa më shpejt, që të nisë nga puna. Kryetari i legalistëve, Spahia, shtoi se partia që ai drejton është e hapur për bashkëpunim me Partinë Demokratike, edhe pse PLL-ja ka qenë në grupimin e partive që formuan Lëvizjen për Zhvillim Kombëtar, kjo nuk e pengon atë të bashkëpunojë me demokratët. Në këtë kuadër, kreu i PLL-së ka kujtuar bashkëpunimin e mirë, që sipas tij, ka pasur në katër vjet si opozitë partia e tij me PD-në. Në fund të deklaratës, Spahia i ka uruar në emër të PLL-së shërim të shpejtë Presidentit të Kosovës, Ibrahim Rugova.