09012005

Faqja 7 - POLITIKE

Janar 9, 2005

"Mban përgjegjësi për krimet 50-vjeçare"

Kadare: Enver Hoxha veteran? Në asnjë mënyrë

xNë asnjë mënyrë nuk duhet të jepet statusi i veteranit për Enver Hoxhën. Ky është mendimi i shkrimtarit Ismail Kadare. Shkrimtari ndodhet aktualisht në Francë dhe prej andej ka ndjekur debatin që zhvillohet në Tiranë në lidhje me dhënien apo jo të statusit të veteranit të Luftës Antifashiste Enver Hoxhës. Shkrimtari i njohur jep edhe arsyet pse sipas tij Enver Hoxha nuk e meriton që të shpallet veteran i luftës, për të gjitha ato që ai ka bërë mbi këtë vend pas Luftës së Dytë Botërore. "Lufta antifashiste e popullit shqiptar nuk nderohet duke i dhënë Enver Hoxhës statusin e veteranit, përkundrazi", thotë Kadare. Ai është në dijeni të qëndrimeve të mbajtura së fundi në lidhje me këtë çështje. I pyetur nga gazeta se përse ai ishte kundër dhënies së statusit të veteranit të luftës për ish-diktatorin, Kadare thotë se arsyeja duhet kërkuar te krimet, gjenocidi për 50 vjet mbi gjithë popullin shqiptar. "Nuk mund të harrohen ata që u dënuan në këtë diktaturë më të egër", shton ai. Për shkrimtarin, Enver Hoxha është përgjegjës për varfërinë ekstreme të planifikuar për 50 vjet në Shqipëri. Përgjegjës për diktaturën e vendosur në këtë vend", thotë Kadare, duke mbyllur mendimin e tij me fjalët se asgjë nuk mund të harrohet dhe se Lufta Antifashiste nuk nderohet aspak duke shpallur Enver Hoxhën veteran të luftës.
Një tjetër shkrimtar, Dritëro Agolli, i pyetur nga Gazeta dy ditë më parë, shprehu mendimin e tij se Enver Hoxha e meriton statusin e veteranit të luftës. "Atë që ia jep historia, nuk mund t'ia heqë dot askush. Enveri ka luftuar me pushkë në krah për të çliruar vendin dhe kjo nuk mund t'i mohohet për shkak të faktit se më pas u bë një diktator", tha Dritëro Agolli. Ndërsa kryetari i Organizatës së Bashkuar të Veteranëve të Luftës, Rahman Parrllaku, gjeneral leitnant, thotë se "Enver Hoxha duhej të gjykohej me akuzën për gjenocid ndaj popullit të tij, sepse pas Pol Potit Enver Hoxha ishte i vetmi që bëri gjenocid ndaj popullit të tij. As Hitleri s'e bëri një gjë të tillë ndaj popullit të vet, por vetëm ndaj popujve të tjerë", përfundon mendimin Parllaku.

Deklarata e Godos

"Enver Hoxha nuk e meriton statusin"
Politikani, shkrimtari si dhe historiani Sabri Godo gjatë deklarimeve të dhëna prej tij në NEËS 24 është shprehur kundër dhënies së statusit të veteranit të luftës ish-diktatorit Enver Hoxha. Sipas tij ai nuk e meriton të jetë i tillë për shkak të përgjegjësive që mban për vendosjen e diktaturës. Godo shton se shumë ish-komandatë batalioesh e formacionesh ushtarake partizane janë persekutuar pas luftës. Atyre u është hequr statusi e janë burgosur. "Ata që mendojnë për një proces të tillë (dhënien e statusit) duhet të na shpjegojnë, do t'i japin statusin këtij personi dhe t'ua mohojnë gjithë të tjerëve. Sabri Godo e quan të pavend këtë nismë të re për rivlerësimin e figurës së ish-diktatorit Enver Hoxha. Sipas tij kjo nuk është aspak e drejtë dhe duhet që të mos i jepet asnjë status sepse ai (Enver Hoxha) nuk e meriton.

Majko rrëzoi vendimin për statusin

Ministri i Mbrojtjes Pandeli Majko rrëzoi si të parregullt vendimin e marrë nga ana e Komitetit të Statusit të Veteranit të Luftës për dhënien e këtij statusi ish-diktatorit Enver Hoxha. Arsyeja e këtij vendimi, sipas Ministrisë së Mbrojtjes, është mosrespektimi i procedurave për mënyrën e dhënies së këtij statusi për të gjithë veteranët e luftës.

Komiteti i Veteranëve: Enver Hoxha e meriton statusin

Kryesia e Komitetit të Veteranëve të Luftës, në një deklaratë hartuar dje pas mbledhjes së tij, shprehet pro dhënies së statusit të veteranit Enver Hoxhës. "Është fakt i njohur botërisht dhe i gjithëpranuar se Enver Hoxha ka qenë udhëheqësi kryesor i Ushtrisë Nacionalçlirimtare dhe i luftës së popullit shqiptar për çlirim kombëtar e shoqëror, nga fillimi i Luftës Antifashiste Nacionalçlirimtare deri në fund të saj. Kjo luftë e renditi popullin e vendin tonë në krah të forcave të aleancës antifashiste botërore. Këto vërtetohen nga dokumente të pakundërshtueshme të arkivave shtetërore, nga studime e punime të ndryshme të historianëve vendas e të huaj dhe, çka është më e rëndësishme, nga veteranët, dëshmitarët e gjallë të kësaj lufte të lavdishme nacionalçlirimtare". Më tej në deklaratë thuhet se: kryesia e Komitetit Kombëtar të Veteranëve të LANÇL-së e konsideron të bazuar ligjërisht, të drejtë e objektiv vendimin e Komisionit Qendror pranë Ministrisë së Mbrojtjes për dhënien e statusit të veteranit të LANÇL Enver Hoxhës, pavarësisht nga ndonjë mangësi teknike që ka të bëjë me paraqitjen formale të një kërkese nga ana e familjes Hoxha. Kryesia e Komitetit Kombëtar të Veteranëve të LANÇL-së e konsideron të padrejtë e keqdashës çfarëdo polemizimi ekstrem rreth pohimit apo mohimit të pjesëmarrjes aktive të Enver Hoxhës në Luftën Nacionalçlirimtare nga fillimi deri në kurorëzimin e saj me fitoren e plotë mbi pushtuesit nazifashistë dhe veglat e tyre.

LZHK-ja kërkon të shmanget kompromentimi i zgjedhjeve
Spahiu: Rehabilitimi i Enverit, fyerje për shqiptarët

Kreu i PLL-së, Eqrem Spahiu, e konsideroi dje fillimin e vitit 2005 me nota tejet negative. Spahiu konsideroi si të qëllimshëm nga ana e të majtëve hedhjen në treg të emrit të Enverit. “PS-ja, në mënyrë të kamufluar, ka hedhur në tregun politik dhe mediatik, figurën e Enver Hoxhës, për të testuar opinionin se si do të reagojë nëse do të fillojë rehabilitimin zyrtar të diktatorit komunist. Ne theksojmë se kjo aventurë është e rrezikshme për shoqërinë shqiptare”, tha Spahiu, duke rreshtuar përpara publikut edhe disa nga shifrat e viktimave. “Të ekzekutuar – 5577 burra dhe 450 gra; të burgosur – 26768 burra dhe 7367 gra; të vdekur në burgje – 977 burra dhe 7 gra; kanë humbur aftësinë mendore në burgje – 308 persona; të internuar – 48217 burra dhe 10792 gra; të vdekur në internim – 7022. Ky është gjenocidi i Enverit ndaj shqiptarëve”, tha Spahiu, duke u kërkuar autoriteteve të heqin dorë nga ideja për rehabilitimin e ish-diktatorit. Ndërkohë, si të keqen e dytë të vitit, Spahiu ka konsideruar marrëveshjen PS-PD për Kodin Elektoral. “Nëse PS-ja dhe PD-ja ditën e hënë do të vendosin veton e tyre, si në Komisionin e Posaçëm Parlamentar, ashtu edhe në Komisionin e Ligjeve, mund të themi se zgjedhjet janë të kompromentuara qysh tani”, tha Spahiu, duke i bërë thirrje deputetëve të mos votojnë një reformë zgjedhore që mund të rrezikojë paraprakisht gjithë procesin zgjedhor. Ai kërkoi që të hënën deputetët të votojnë amendamentet që ka propozuar LZHK-ja për reformën zgjedhore, si dhe kërkesën e Moisiut për këtë çështje.

----------------

Faqe 7 - Politikë

legalizimi i banesave

intervista

Kreu i Komisionit të Integrimit, Fatmir Mediu, kujton kushtet e BE-së për zbatimin e ligjit

“Legalizimet, kosto në kurriz të pronarëve”

Kryerepublikani kundërshton shifrën e qeverisë për kompensimin

Juli Prifti

Kryetari i Komisionit për Integrimin, kryerepublikani Fatmir Mediu, në intervistën e tij thekson se, ligji i legalizimeve do të ketë një kosto që po bie në kurriz të pronarëve të ligjshëm të tokave.

Sipas tij, “ky proces është më tepër demagogjik, sepse nuk mund të zgjidhen në radhë të parë legalizimet, pa zgjidhur më parë problemin e pronarëve legjitim”.

Z.Mediu, ç’rol ka pasur Komisioni i Integrimit gjatë legjislaturës parlamentare që kaloi?
Komisioni i Integrimit e ka zhvilluar dhe do ta zhvillojë veprimtarinë e saj, në kuadër të angazhimeve që ka marrë Shqipërija drejt anëtarësimit në strukturat euratlantike, duke monitoruar vazhdimisht ligjet. Përmirësimi i ligjeve dhe përafrimi i tyre me legjislacionin evropian është një moment, ndërsa momenti shtesë, përsa i takon implementimit, ka të bëjë me atë që Bashkimi Evropian në mënyrë konkrete i ka përfshirë në task-forcë dhe që kanë të bëjnë me zgjedhjet, korrupsionin, me pronat e kështu me radhë. Dua të theksoj se, funksionimi i komisionit në raport me ekzekutivin dhe Parlamentin është shumë i ndërvarur nga vullneti i mazhorancës për të kuptuar se pavarësia e institucioneve dhe barazia e marrëdhënieve është një domosdoshmëri. Ajo që është pozitive është se ne kemi një marrëdhënie tashmë të vendosur mes pozitës dhe opozitës, përsa i takon çështjes së integrimit, një bashkëpunim si në aspektin zgjedhor, por edhe në aspekte të tjera.

Qeveria duket se është gjendur ngushtë përballë kërkesave të Bashkimit Evropian, përsa i takon çështjes së pronave. Si mendoni ju se do të procedojë kjo çështje?
Që të flas fare qartë, unë mendoj se në dy pika nuk ka për të pasur implementim të ligjit, pasi drafti i miratuar në Parlament është një ligj tërësisht absurd që hap shtigje të reja për abuzime dhe korrupsion të ri. Ai ka legjitimuar vjedhjen që i është bërë pronës private dhe pronës së shtetit në Shqipëri. Është një ligj që nuk ka një faturë financiare dhe nuk ka institucione që e detyrojnë në zbatimin e këtij ligji. Komiteti Shtetëror i Kthimit dhe Kompensimit të Pronave do të jetë jo vetëm një komision, i cili vetëm do të futet në mbledhjen e të dhënave dhe jo në implementimin e ligjit, ky është gjykimi im. Unë gjykoj se është një ligj që nuk përshtatet me realitetin social e ekonomik në vend dhe për më tepër nuk plotëson detyrimet në raport me të drejtën e pronës private.

Si do ta komentoni ju debatin e fundit mbi legalizimet, ku qeveria ka dhënë vetëm 2 milionë dollarë për kompensimin e pronës private për ish-pronarët?
Unë e thashë gjatë diskutimit që bëra në buxhet se problemi është i tillë që, nëse ne realisht do të funksionojmë me ato fonde të parashikuara nga buxheti i shtetit, i bie që kompensimi i pronave të pronarëve të realizohet për rreth 500 vjet, pra që është një absurditet dhe shifra që vendos qeveria është qesharake. Nga ana tjetër, unë mendoj se duhet një diskutim më i thellë për tokat e lira, për mundësinë e kompensimit fizik, për një rishikim të legjislacionit, siç është diskutuar edhe në mbledhjen e fundit të Parlamentit Evropian, me qëllim shmangien e të gjitha abuzimeve dhe korrupsionin të lidhura me këtë çështje.

Ju duket e drejtë ky pozicionim nga ana qeverisë me rastin e legalizimeve që do të bëhen tani për dëmshpërblimin (kompensimin) e pronarëve të truallit?
Unë mendoj se procesi i legalizimeve, është një proces që do ta shtojë akoma më tej koston në kurriz të pronarëve. Është një proces më tepër politik, i cili të paligjshmes synon t’i japë ligjshmëri, ndërsa tokën e ligjshme nuk e respekton. Për mendimin tim edhe ky proces është më tepër demagogjik, sepse nuk ka zgjidhur në radhë të parë problemin e pronës dhe nuk mund të shkojë që të zgjidhë më parë problemin e pronarëve të paligjshëm, pa zgjidhur problemin e pronarëve legjitim.

Pronarët kundërshtojnë vendimin e qeverisë për zonat informale
Toro: Jo legalizime, pa u kthyer prona e ligjshme

Shoqata “Pronësi me Drejtësi” kërkon mosnisjen e procesit të legalizimeve, pa u kryer më parë procesi i kthimit dhe kompensimit të pronave. Sekretari i Përgjithshëm i kësaj shoqate, Agim Toro, tha dje për gazetën “Panorama” se pa përfunduar procesi i kthimit të pronave nuk ka se si të nisë procesi i legalizimit të zonave informale. “Ne si shoqatë nuk jemi kundër procesit të legalizimit, por unë mendoj se do të ishte utopike, nëse bëhen më parë këto legalizime në një kohë kur nuk i është kthyer prona apo nuk i është kompensuar ajo, pronarëve të ligjshëm. Për mua ky proces i legalizimit bie ndesh me ligjin e miratuar në Kuvend, “Për kthimin dhe kompensimin e pronës”. Duhet të kthehet prona më parë dhe më pas të realizohen legalizimet. Pra ka konflikte ligjore midis ligjit të pronave dhe atij të legalizimeve. Kemi të bëjmë me diçka utopike, pasi ligji i legalizimeve ia jep pronën atij që ka ndërtuar në mënyrë të paligjshme, ndërsa nuk ia jep pronarit të ligjshëm. Prandaj kërkohet një zgjidhje e ligjshme”, theksoi Toro. Ai shkon edhe më tej, duke kërkuar që pas vetëdeklarimit të shtëpive në zonat informale, ky proces të ngrijë deri sa të realizohet procesi i kthimit dhe kompensimit të pronës së pronarëve legjitimë. “Kërkesa e dytë e jona si shoqatë, është se ne kërkojmë që tokën, e cila do të na kompensohet, të jetë me vlerën e tregut dhe jo me një çmim që do të përcaktohet nga vendimi i Këshillit të Ministrave”, theksoi Toro. Ndërsa për fondin prej 2 milionë dollarësh amerikanë, i përcaktuar nga qeveria për kompensimin financiar të pronave, sekretari i përgjithshëm i shoqatës shprehet se, ai është i pavlefshëm, përderisa nuk ka një studim të saktë mbi tokat e lira në rang Republike. “Nuk është akoma i vlefshëm, pasi ne duhet të shkojmë në lidhje me mundësitë e kthimit fizik të pronës, pa pasur të dhëna të sakta statistikore dhe mbi nevojat që duhet të ketë për kthimin e pronave”, theksoi Toro. Shoqata “Pronësi me Drejtësi” është në pritje të metodologjisë që do të miratojë Komiteti Shtetëror për Kthimin e Pronave. Në këtë material pritet që të përcaktohet çmimi i tokës për kompensimin financiar, sipas kategorive të ndryshme. B.Hoti

Ç’kërkojnë pronarët

Procesi i legalizimit duhet të fillojë menjëherë pas kthimit dhe kompensimit të pronave
Kompensimi në zonat informale të realizohet mbi vlerën e çmimit të tregut
Të paraqitet studimi për tokat e lira që shteti ka në dispozicion për kompensimin fizik të pronarëve
Fondi prej 2 milionë USD nuk është akoma i vlefshëm nëse bëhet publike studimi për tokat e lira

Vendimi i qeverisë
Procesi i legalizimit, procedurë për 2 vjet

Procesi i legalizimit të zonave informale është parashikuar që të zgjasë rreth 2 vjet. Pas përfundimit të fazës së vetëdeklarimit nga qytetarët për legalizimin e objektit të paligjshëm, qeverisja vendore, brenda 6 muajsh, duhet të përfshijë në urbanistikë legalizimin e ndërtesës së paligjshme. Pas kësaj faze, brenda një periudhe 6-mujore, kërkesa do të merret në shqyrtim nga Këshilli i Rregullimit të Territorit dhe Turizmit. Pas kalimit në këto faza, brenda 1 viti, KRRTRSH-ja do të vendosë kryerjen e rishikimit të studimit. Ndërsa çmimi i tokës do të përcaktohet për secilën zonë në veçanti, pra çmimi është i lidhur me zonën. Kohëzgjatja që banorët duhet të dinë për çmimin është shumë më e largët se koha e miratimit të çmimit. Mënyra sesi do të përcaktohet çmimi i tokës është e vendosur nga metodika e kthimit dhe kompensimit të pronave.