Leka: Do të rivendos dënimin me vdekje

TIRANE- Kryetari i Lëvizjes për Zhvillim Kombëtar, Leka Zogu I ka thënë dje për “News 24” se do të rivendosë dënimin me vdekje për trafikantët dhe përdhunuesit pasi sipas vlerësimit të tij krimi po kthehet në terrorizëm në Shqipëri. Kreu i LZHK, Leka Zogu I e quajti “mashtrim” të PS-së dhe të PD-se ndarjen e re të zonave zgjedhore dhe Kodin e ri Zgjedhor. Dënimi me vdekje në Shqipëri ka disa vjet që është hequr pas presionit të Këshillit të Evropës dhe organizmave të tjera të Bashkimit Evropian. Megjithëse shkalla e kriminalitetit në vend mbetet shqetësuese dhe një nga më të lartat në Evropë, sërish politikanët e panë me vend që t’u binden sugjerimeve dhe “këshillave” të evropianëve për hir të interesave të tyre të çastit. Republikanët dhe legalistët kanë qenë dy forcat politike që e kanë kundërshtuar fort heqjen e dënimit me vdekje, pasi një masë e tillë do të rriste kriminalitetin. Gjithsesi rivendosja e tij tashmë duket e largët, pasi jo vetëm Këshilli i Evropës është në të njëjtin pozicion, por edhe në mjedisin e brendshëm janë PS e PD ato që llogariten.