Rubrika e sotme “Forum” sjell para lexuesit profilet politike dhe individuale të katër kandidatëve kryesorë të zonës 72 në Fier. Ata janë Dritan Prifti i LSI-së, Raimonda Stefa e PS-së, Leonard Gremi i PD-së dhe Rexhep Krasniqi i LZHK-së. E veçanta e kësaj gare lidhet me faktin se në këtë zonë ndeshen dy gjysmat e së majtës. Ish-deputeti i PS-së, Dritan Prifti pati fituar në këtë zonë 73.9 për qind në zgjedhjet e vitit 2001, kundrejt 18 për qind që pati fituar përfaqësuesi i PD-së, Agron Mile. Kjo zonë, përveç problemeve të shumta infrastrukturore dhe ato që janë evidente për rrethin e Fierit, deri më tani është njohur si bastion i së majtës. Ajo tani ka përballë dy kandidatë të majtë, të cilët pritet t’i përgjysmojnë njëri-tjetrit votat e tyre. Jashtë logjikës matematikore të rezultatit të zgjedhjeve, votuesit e kësaj zone presin premtime realiste për zgjidhjen e problemeve të tyre. Zona 72 përbëhet nga katër komuna, të cilat përfshijnë një rajon me ekonomi kryesisht bujqësore. Nisur nga ky fakt, vihet re se premtimet e kandidatëve janë përqendruar në ringritjen e sistemit të bujqësisë dhe rritjen e tregut për prodhimet vendase. Një ndihmë të madhe presin fermerët e Fierit nga kreditimi bankar dhe ulja e çmimit të shërbimeve të agrobiznesit.

Zona elektorale nr. 72 është një nga zonat më të nxehta në Qarkun e Fierit. Ajo përfshin një zonë rurale, ndoshta më të varfrën ekonomikisht në këtë qark.

Veç kësaj, këtu përballja mes kandidatëve është shumë e fortë, pasi kandidon ish-deputeti i PS-së, Dritan Prifti tashmë si kandidat i LSI-së dhe ish-prefektja e Qarkut Fier, Rajmonda Stefa si kandidate e PS-së. Kjo duket edhe si “dyshja” më e fortë e rivalitetit, ndërsa kandidojnë edhe kandidati i PD-së, Leonard Grëmi dhe Rexhep Krasniqi nga LZHK-ja.

1-Cilët janë zgjedhësit që do të votojnë për ju?
Dritan Prifti (LSI). Do më votojnë të gjithë ata që njohin familjen time dhe rrënjët e saj. Ata, të cilëve u zgjidhur problemet, të cilëve u kam qëndruar pranë tyre kur ka qenë nevoja për një doktor, për një bursë, për një pension apo për një shkollim jashtë shtetit. Besoj se kam një thjeshtësi dhe një qartësi në komunikim me njerëzit si dhe kam marrëdhënie dhe lidhje të zgjeruara në administratën shtetërore, por edhe jashtë shtetit. Rrethi im i gjerë është sërish një avantazh që nuk e kanë kundërshtarët e mi, dhe kjo tregon më së miri faktin se zgjedhësit që do të votojnë për mua janë pothuajse të gjithë banorët e këtyre 4 komunave që unë përfaqësoj.
Rajmonda Stefa (PS). Zgjedhësit e mi do të jenë banorë të Libofshës dhe komunave Mbrostar, Qendër dhe Pojan. Do të jenë banorë të thjeshtë të një zone rurale, ku natyrisht ka edhe shumë probleme. Zgjedhësit e mi do të jetë fermerët e thjeshtë, blegtorët, nëpunësit, intelektualët, të rinjtë, të cilët do të besojnë në sloganin tonë “Mbro të ardhmen”. Ata që do të besojnë në një të ardhme të mirë fare pranë BE-së do të votojnë për alternativën socialiste. Por, veç tyre do të jenë edhe shumë të zhgënjyer nga PD-ja dhe LSI-ja, të cilët shohin se kanë vetëm trumbetime sa për të kaluar radhën.
Leonard Grëmi (PD). Ata që do të votojnë për mua do të jenë miq të mi dhe banorë të Libofshë, Mbrostar, Qendër dhe Pojan. Zgjedhësit nuk janë pronë e imja, të majtë apo të djathtë, ata janë të lirë dhe do të bëjnë zgjedhjen e tyre në bazë të vullnetit, miqësisë, bindjeve të tyre dhe programit të forcës politike. Unë nuk jam këtu për t’i mbushur mendjen elektoratit, që duhet të më votojnë patjetër mua, pavarësisht se jam bir i kësaj zone, por për t’iu paraqitur atyre alternativën më të mirë, dhe kjo do të thotë se do të votojnë për mua të gjithë ata që do të kenë besim tek alternativa e djathtë.
Rexhep Krasniqi (LZHK). Zgjedhësit e mi janë të gjithë shqiptarët që duan të formojnë shtet ligjor, shtet të fuqishëm ekonomikisht, pra ata njerëz që kërkojnë familje me ekonomi të kënaqshme. Të gjithë ata shqiptarë që e ndjejnë simpatinë për Lekën e I dhe për programin elektoral të LZHK-së, pasi përparësitë që ka ky program janë zhvillimi ekonomik i vendit. Do të jenë të gjithë ata persona që duan të formojnë një shtet ligjor, pasi ky është një tjetër prioritet i programit tonë, do të jenë të gjithë ata banorë që duan fuqi dhe ndihmë ekonomike, që kanë lexuar për standardet e larta të jetesës së vendeve monarkiste, siç janë të gjitha vendet mbretërore, që janë të një niveli të lartë ekonomik.

2-Ku bazohet platforma juaj elektorale?
Dritan Prifti (LSI). Platforma ime bazohet në epërsinë e platformës së partisë që unë përfaqësoj. Eshtë një forcë e re, me njerëz të rinj që duan të ndryshojnë gjithçka të vjetër dhe të prapambetur që la pas PS-ja. Bazohet në epërsinë e personit tim në krahasim me kandidatët e tjerë, në besimin që kam në këtë komunitet, në alternativat dhe programin që kam për të sjellë ndryshim dhe përparim në zonën ku kandidoj. Në katër vite si deputet i zonës kam bërë shumë ndryshime. Tani unë do të sjell edhe më shumë mirëqenie, më shumë ujë dhe drita, më shumë biznese. Kam besim absolut te fitorja dhe nëse në zgjedhjet e 2001 dola deputeti i tretë më i votuar në Shqipëri, këtë herë nuk e diskutoj fitoren.
Rajmonda Stefa (PS). Dua të flas jo thjesht si Rajmondë, por si kandidate e alternativës së majtë. Theksoj se duke u bazuar në përvojën time të gjatë si drejtuese, kam shumë besim në aftësitë e mia, ndërgjegjen dhe përvojën time. Kam një karakter të fortë dhe jam e gatshme të përballoj çdo sfidë. Jam element i pastër politikisht dhe bijë e thjeshtë e këtij vendi. Siguria ime më e madhe dhe mbështetja e platformës elektorale qëndron në epërsinë që ka platforma e PS-së si parti e të gjithë popullit, me një sërë projektesh për rritjen e mirëqenies së tyre. Së pari për papunësinë, mbështetjen e fermerit, kreditimin e tyre, etj. Eksperienca e punës sime më jep gjithashtu siguri.
Leonard Grëmi (PD). Ajo ka në thelb platformën që ka elektorati i djathtë, transformimin e zonës rurale nga qendra e varfërisë dhe mjerimit, në qendër të prodhimit dhe mirëqenies. Pika e parë e programit është krijimi i qendrave të prodhimit, menaxhimit të qendrave bujqësore, tregtimit të tyre, rishikimi i marrëveshjes së tregtisë së lirë, për të bërë të mundur mbrojtjen e prodhimit vendas, rishikimi i taksave doganore, të cilat stimulojnë prodhimin e huaj për të depërtuar në vend, që çon në shkatërrimin e prodhimit vendas. Gjithashtu ngritja e shkollave të mesme bujqësore, krijimi i fermave bujqësore, rishikimi i pensioneve dhe barazimi i tyre mes fshatit dhe qytetit.
Rexhep Krasniqi (LZ-HK). Duke u nisur nga ideja dhe mentaliteti që është krijuar me fuqizimin e gjithë shteteve monarkiste, mbi platformën dhe programin e mbretit tonë Leka Zogu, programi ynë bazohet në disa pika si; fuqizimi i fermerëve, biznesi i vogël dhe i mesëm do të marrë “frymë” nëpërmjet kreditimit dhe uljes së taksave, që do të thotë se shteti do t’i përgjigjet prodhimit të fermerit dhe biznesmenit. Si rezultat deputeti kontrollon menaxhimin e fondeve dhe eliminimin e korrupsionit.
Mendoj se platforma e LZHK-së është një platformë e së nesërmes së lumtur të gjithë popullit, pa dallim feje, krahine dhe ideje. Të gjithë para ligjit monarkist do të jenë të barabartë.

3- Cilat janë problemet që ka zona dhe cili do të jetë angazhimi juaj për t’i zgjidhur ato?
Dritan Prifti (LSI). Premtoj se brenda 3 muajve të parë të mandatit prioritet është ndërtimi i një depoje të madhe frigoriferike në Mbrostar, me sipërfaqe ndërtimi 10 mijë metra katror. Pra do të jetë shumë e madhe dhe do të arrijë të magazinojë të gjitha produktet e zonës time elektorale, pse jo madje edhe nga Lushnja. Jam i bindur se ky premtim do të realizohet, sepse kam qenë në Vjenë para 2 javësh, ku kam mbyllur bisedimet me një konsorcium austriako-gjerman për këtë investim prej 3.5 milionë eurosh, i cili do të fillojë shumë shpejt. Me këtë i garantoj një treg të sigurt elektoratit tim, pasi sot sheh gjithandej toka të papunuara, sepse janë shumë larg tregut. Gjithashtu do të përqendrohem në rimëkëmbjen e bujqësisë dhe si forcë politike do të garantojmë që në stinën që vjen të ketë sistem kullimi dhe vaditjeje modern.
Rajmonda Stefa (PS). Kemi një sërë projektesh, të cilat do t’i vëmë në zbatim menjëherë. Zona e Libofshës ku kandidoj, që përfshin 4 komuna është një vend bujqësor, ndaj premtimi më i shpejtë që unë do t’i bëj kësaj zone është ngritja e një kompleksi modern dhe bashkëkohor agrobiznesi, që do të ndërtohet në komunën Tropojë, në ish-kampingun e kosovarëve në Seman. Eshtë 64 ha dhe ka një studim kompleks për serra, për kompleks gjedhi, fabrikë qumështi dhe një treg të madh rural me qark të mbyllur në të gjitha linjat deri te dhomat frigoriferike. Eshtë një projekt i miratuar nga qeveria dhe do të realizohet nga donatorë të huaj dhe biznesi vendas. Premtime të tjera unë mund të përmend atë që kryeministri ka bërë për elektoratit tim, lidhjen e Manastirit të Ardenicës me bregdetin e Ndërnënasit,
Leonard Grëmi (PD). Problemet e zonës janë ato të sigurimit të jetesës, pasi varfëria ka arritur kulmin, ka mungesë të vendeve të punës dhe fuqia më e madhe e aftë për punë është larguar e pashpresë. Njerëzit nuk kanë kushtet më minimale të jetesës si drita, ujë, kanalizime të ujërave të bardha dhe të zeza, ka mungesë të investimeve, ka mungesë tregu të prodhimit vendas. Në thelb kjo zonë është një qendër internimi më e keqe se ato të viteve ‘90. Angazhimi im qëndron në dy plane; përpunimi i politikave dhe i sistemit ligjor, që do të bëjë të mundur tërheqjen e investimeve kolosale për të ndryshuar infrastrukturën e fshatit, futja e kultivarëve dhe drejtimi i specializimit që kërkon tregu i brendshëm dhe tregu i huaj, rishikimi i të gjitha marrëveshjeve të tregtisë së lirë, që sigurojnë mbrojtjen e prodhimit vendas dhe uljen e taksave të karburanteve.
Rexhep Krasniqi (LZHK). Problemi kryesor i zonës është qetësia dhe ndaj ne kemi në sloganin tonë “Paqe, bashkim dhe vëllazërim”. Stabilizim do të thotë që banorët e të gjithë zonës elektorale të jenë vëllezër me njëri-tjetrin, fermeri do të ketë punë dhe s’do jetë e nevojshme të shkojë në emigracion. Kjo do të thotë që sa më shumë të fuqizojmë biznesmenët dhe fermerët, aq më shumë ulim varfërinë dhe standardin e ulët të jetesës. Infrastrukturën e ka në dorë shteti me fondet e tij. Zona ku kandidoj ka papunësi, sëmundje, pavarësisht se është një zonë turistike, dhe ne do të ndërhyjmë nëpërmjet vendeve monarkiste për të ndihmuar zonën.

4-Vlerësimi juaj për rivalët?
Dritan Prifti (LSI). Janë dy kandidatë që mendoj se do të jenë pranë me vota. Eshtë kandidati i PD-së, Leonard Grëmi, të cilin e njoh sepse ka qenë pjesë e shtabit tim elektoral 4 vjet më parë. Ai është djalë i mirë, por pavarësisht se është nga zona, i ka qëndruar larg asaj dhe nuk ka eksperiencë politike. Eshtë një njeri që vjen nga një biznes, ka punuar për të tjerët dhe nuk ndjej rivalitet, pasi PD-ja historikisht ka marrë 18% të votave dhe nuk mendoj se Grëmi do ta rrisë elektoratin opozitar. Ndërsa nga PS-ja është Rajmonda Stefa, e cila nuk ka opinion të mirë në popull, shihet si një person që nuk ka edukatë, si një person që fjalorin e rrugës e përdor kudo, si një njeri që nuk ka mbështetje në nivelet e larta të PS-së. Kështu
as te Stefa nuk shoh rivalitet.
Rajmonda Stefa (PS). Natyrisht çdo fushatë ka rivalët e vet dhe nuk mund të them që s’kam të tillë, aq më shumë që unë kam në zonë ish-deputetin e PS-së, që tashmë është konvertuar te LSI-ja, i cili për 4 vjet rresht nuk bëri gjë tjetër veçse ndau elektoratin dhe PS-në, pa i sjellë asnjë dobi kësaj zone. Ai e shpërdoroi besimin e elektoratit dhe nuk ka të drejtë morale të kërkojë votën. Leonard Grëmi është djalë i mirë, i paprovuar, por mendoj se ai nuk duhet t’ia kërkojë votën elektoratit, për arsyen e thjeshtë se në vitin 1994, kur Libofsha u masakrua nga partia për të cilën i kandidon, duke qenë njeri publik, i angazhuar në media, ai duhej të bënte një prononcim ,qoftë moral, në mbështetje të bashkëfshatarëve të tij, gjë të cilën ai nuk e bëri.
Leonard Grëmi (PD). Jemi përpara fakteve interesante dhe vlerësimi që bën populli për kandidatët është sipërfaqësor, sepse pavarësisht se ne jemi duke kontaktuar me masën e gjerë të njerëzve, ata e kanë shumë të vështirë të njohin në thelb formimin politik që ka secili kandidat, kulturën e tij politike për të bërë shtet dhe për të kontribuar në bërjen e politikave që i shërbejnë zhvillimit të ekonomisë. Njerëzit kanë pamundësi kohore për të njohur vlerat morale dhe intelektuale të secilit kandidat, kështu që fushata zgjedhore nëpërmjet propagandës që bëhet nga partia në pushtet i shërben dezinformimit dhe manipulimit të opinionit publik dhe jo zbulimit të së vërtetës.
Rexhep Krasniqi (LZHK). Të gjithë janë njerëz të respektuar për mua. Rajmonda Stefa, kandidate e PS-së, për mua është një qytetare e rregullt. Dritan Prifti është një deputet i votuar, pavarësisht se jeton në Tiranë dhe nuk e njeh aq sa duhet zonën e tij elektorale. Edhe Leonard Grëmi banon në Tiranë dhe nuk e njeh zonën që kandidon. Gjithsesi, është elektorati ai që do të vendosë për zgjedhjet në 3 korrik, nëse kërkon shtet ligjor, apo një shtet ku sundon varfëria, mjerimi, papunësia, sëmundjet, mungesa e perspektivës, apo edhe korrupsioni.

Rezultatet e zgjedhjeve të 2001

Dritan Prifti 8 670 vota ose 73.9%
Agron Milaj PD+BF 2 111 vota ose 18.0%
Nikollaq Nushi PDR 379 vota ose 3.23%
Rexhep Krasniqi Pl.Mon.D 133 vota ose 1.13%
Nure Lamçellari PKSH 129 vota ose 1.10%
Kozma Koçi PSD 106 vota ose 0.90%
Miti Zabiku PBDNJ 63 vota ose 0.53%
Donika Bushi AD 53 vota ose 0.45%
Lili Sema PASH 34 vota ose 0.29%
Armand Xhemali P.KONS 19 vota ose 0.16%
Bektash Gremi PBKSH 19 vota ose 1.16%
Taip Buzi PDK 8 vota ose 0.06%

PS 7557 vota ose 64.4%
PD+BF 2402 vota ose 20.4%
PDR 369 vota ose 3.14%
PAA 245 vota ose 2.94%
PBDNJ 238 vota ose 2.03%
PSD 198 vota ose 1.68%
PKSH 120 vota ose 1.02%
PBD 81 vota ose 0.69%
PLMDSH 66 vota ose 0.56%
PSKSH 44 vota ose 0.37%
PDK 23 vota ose 0.19%
PBKSH 21 vota ose 0.17%

Dritan Prifti
Ish-ministri në garë për LSI

Dritan Prifti kandidon për herë të dytë në zonën nr.72, por këtë herë nën siglën e PS-së. Ka lindur në vitin 1968 në Fier, ndërsa studimet e larta i ka kryer në fakultetin e Gjuhëve të Huaja. Për rreth një vit Prifti ka qenë drejtor i përgjithshëm i KESH-it. Më pas ministër Shteti për Energjetikën dhe shef i kabinetit të qeverisë Meta në vitin 2000. Ndërsa në vitin 1998 ai ka qenë shef kabineti i Ministrisë së Financave. Prifti ka punuar në INSIG, në departamentin e marrëdhënieve me jashtë, ndërsa në vitin 1993 ka kryer masterin në universitetin e Nju Meksikos, USA. Në Shqipëri është kthyer në vitin 1996, ku për rreth një vit është marrë me aktivitet privat. Angazhimi i tij në administratën e lartë ka vijuar dhe në vitin 1997 kur ka qenë shef i kabinetit të ministrit në Ministrinë e Punës dhe Çështjeve sociale. Eshtë deputet i Kuvendit të Shqipërisë që nga viti 2001.

Rajmonda Stefa
Ish-prefektja në garë elektorale

Rajmonda Stefa ka qenë prefekte e Qarkut Fier në vitin 2004 dhe kandidon për herë të parë si përfaqësuese e PS-së. Ka lindur në Fier në vitin 1957, është e martuar dhe ka dy fëmijë. Në vitet 2000-2004 ka qenë kryefinanciere e PS-së si dhe aktualisht është anëtare e KPD-së. Studimet e larta i ka kryer në fakultetin Ekonomik në Tiranë. Më pas ka qenë anëtare e Komitetit Ekzekutiv të Këshillit Popullor, rrethi Fier, në vitet 1991-1992 ka qenë kryetare e forumit të gruas Fier, ndërsa në vitet 1996-1997 ka punuar në Ministrinë e Financës (dega e shoqërive publike). Gjithashtu, Stefa ka qenë pjesë e kabinetit qeveritar edhe në vitet 1998-2000. Rajmonda Stefa zotëron anglishten dhe italishten.

Leonard Grëmi
Gazetari që përfaqëson PD

Leonard Grëmi kandidon për herë të parë në këto zgjedhje si kandidat i PD-së. Ai ka lindur në vitin 1959 në Libofshë të Fierit dhe është diplomuar në fakultetin e Shkencave Politike e Juridike, më degën Filozofi-Drejtësi. Eshtë i martuar dhe ka dy fëmijë. Në vitet 1983-1986 Grëmi ka qenë drejtues i organizatës së rinisë në Fier, ndërsa në vitet 1986-1989 gazetar te gazeta “Zëri i Popullit”. Për një kohë të gjatë Leonard Grëmi ka punuar si pedagog i Filozofisë dhe Sociologjisë në fakultetin e Shkencave Politike e Juridike. Që nga viti 1993 e ai punon në sektorin e mediave private, në mediat e shkruara dhe elektronike në Tiranë. Aktualisht është drejtor i gazetës “Shekulli”, Radio +2, televizionit A1. Zotëron shumë mirë anglishten dhe italishten.

Rexhep Krasniqi
Studiuesi i vendeve monarkiste

Rexhep Krasniqi kandidon për herë të parë në këto zgjedhje si përfaqësues i LZHK-së. Ai ka lindur vitin 1949 në Fier, ndërsa studimet universitare i ka përfunduar në fakultetin Ekonomik të universitetit të Tiranës. Pas vitit 1990, Rexhep Krasniqi është angazhuar me aktivitet privat, ku është përqendruar në fushën e biznesit. Gjithashtu, Krasniqi vitet e fundit është angazhuar në politikën shqiptare, duke i kushtuar një rëndësi të madhe studimeve të standardeve në vende të ndryshime monarkiste, siç janë Danimarka, Suedia, Norvegjia, Holanda, Belgjika apo Anglia. Eshtë i martuar dhe ka fëmijë. Krasniqi njihet prej kohësh si mbështetës i mbretit.

Ish-kryeministri i Kosovës, Ramush Haradinaj, në ora 9:30 është liruar nga burgu Sheveningenit dhe rreth orës 16:00 ka mbërritur në aeroportin e Prishtinës, ku është pritur nga familjarë dhe qindra mbështetës të tij.

Bashkëshortja e tij Anita Haradinaj, ish-këshilltari Ardian Gjini dhe ish-shefi i kabinetit kanë qenë të parët që e kanë takuar ish-kryeministrin. Me të zbritur nga avioni, Ramush Haradinaj u nis menjëherë me makinë drejt Prishtinës duke iu shmangur gazetarëve dhe operatorëve që prisnin me interesim kthimin e tij. Ai zbatoi kështu kushtin e parë që vendosi Gjykata e Hagës, sipas të cilës ish-kryeministri nuk duhet të bëjë deklarata në media dhe në publik. Ai është përcjellur nga policia holandeze në aeroportin Shipol të Amsterdamt, ku i është dorëzuar zyrtarëve të UNMIK-ut. Haradinaj me linjë të rregullt ajrore, nga ky aeroport përmes atij të Vjenës ka fluturuar për në aeroportin e Prishtinës. Në këtë rrugë e shoqëruan koordinatori i ekipit të mbrojtjes, Majkell O’Relli, zëvendëskryeadministratori Rosin dhe këshilltari për siguri në qeverinë e Kosovës, Hasan Gashi. Ramush Haradinaj do të qëndrojë në Kosovë deri në fillimin e gjykimit të tij. Presidenti i Kosovës, Ibrahim Rugova dhe kryeministri Bajram Kosumi përshëndetën dje vendimin e Tribunalit të Hagës për lirimin e përkohshëm të ish-kryeministrit Ramush Haradinaj. “Përshëndes vendimin e Gjykatës së Hagës që zoti Haradinaj të mbrohet në liri. Eshtë një ngjarje me rëndësi, ndërsa zoti Haradinaj do të veprojë sipas procedurës së Gjykatës së Hagës dhe për mua është kënaqësi që ai ka mundësi të mbrohet në liri dhe të jetë pranë familjes së tij, të jetë një qytetar i lirë që i pranon normat dhe rregullat e drejtësisë kombëtare e ndërkombëtare”. Kryeministri i Kosovës, Bajram Kosumi në një prononcim të tij tha se kthimi i zotit Haradinaj do të ndikojë pozitivisht në proceset politike edhe në forcimin e besimit të popullit të Kosovës, në funksionimin e drejtësisë ndërkombëtare. “Sot është ditë e gëzuar edhe për mua edhe për qeverinë dhe tërë popullin e Kosovës. Kthimi i zotit Haradinaj do të ndikojë pozitivisht edhe në proceset politike, por edhe në forcimin e besimit të popullit të Kosovës në funksionimin e drejtësisë ndërkombëtare”. Vendimi i Tribunalit të Hagës për lirimin e Ramush Haradinajt është i arsyeshëm, sepse ai i nevojitet UNMIK-ut për të stabilizuar gjendjen në Kosovë, shkruan gazeta austriake “Standard”. Në vjeshtë pritet të fillojnë bisedimet për statusin e ardhshëm të Kosovës dhe në këtë fazë Haradinaj mund të ndihmojë, sepse negociatat do të jenë të gjata dhe mund të zgjasin deri në fund të vitit 2006, konstaton “Standard”. Edhe “Jane’s Intelligence Digest” shkruan se kthimi i Haradinajt në Kosovë privatisht është mirëpritur nga administrata e Kombeve të Bashkuara, e cila shpreson që ai të ketë ndikim stabilizues gjatë negociatave për statusin e ardhshëm të Kosovës.