----------------

11 Janar 2005 http://www.kohajone.com/

KUVENDI MIRATON KODIN E RI ZGJEDHOR

Edlira Prenga

Me 92 vota pro, 10 kunder dhe 5 abstenime, dje ne seancen e jashtezakonshme parlamentare i eshte dhene udhe Kodit te ri Zgjedhor qe do te jete i vlefshem per zgjedhjet parlamentare te ketij viti. Edhe pse i kontestuar nga partite e vogla parlamentare, ishin te mjaftueshme votat e maxhorances dhe opozites qe ky kod te kishte shumicen e mjaftueshme te votave per te qene i vlefshem tashme ne funksion te procesit. Duke qene se ky kod ishte nenshkruar paraprakisht mes dy forcave te medha politike, asnjeri nga lideret e partive, Fatos Nano dhe Sali Berisha, nuk ishin ne momentin e votimit. Deputetet e te dy partive nuk kane patur ndonje verejtje per kodin, ku i gjithe kontestimi ka ardhur vetem nga perfaqesuesit e partive te vogla parlamentare, qe ne nene te ndryshme kishin dhe perkrahjen dhe votat e aleateve socialiste. Megjithate amendamentet e paraqitura nga LSI-ja dhe LZHK-ja nuk moren asnjeri votat e mjaftueshme per te marre fuqine ligjore. I gjithe debati parlamentar i paradites ishte tek keto amendamente. Deputetet e LSI-se kerkuan qe te kishte me shume perfaqesues te partive ne procesin e numerimit te votave. Kryetari i kesaj partie, Ilir Meta, u shpreh dje gjate seances se kete kod nuk mund ta pranoje askush si nje hap perpara per zgjedhje te lira dhe te ndershme ne Shqiperi. "Ky proces zgjedhor do te tensionoje klimen politike ne vend kur i kemi te gjitha mundesite te bejme zgjedhje te lira dhe te ndershme. Votat e qytetareve shqiptare qe do te jene te LSI-se, ju siguroj juve dhe te gjitheve qe do t'i numeroje dhe mbroje vete LSI-ja", cilesoi Meta lidhur me propozimet e bera nga partia e tij, qe u rrezuan me shumicen e votave. Perkrahje te ketyre amendimeve kishte dhe nga aleatet e PS-se, sidomos ne piken e pjesemarrjes se emigranteve ne votime. Kryetari i PBDNJ-se, Vangjel Dule, vuri ne dukje se "do te doja te mbeshtesja kerkesen e grupit parlamentar te LSI-se per ceshtjen e emigranteve. PS-ja dhe PD-ja serish marrin persiper pergjegjesine politike te lene mbi 1/3 e popullsise aktive me dinamike dhe krijuese jashte proceseve vendimmarrese ne shoqerine tone". Po i kesaj linje ishte dhe Apostoli i PSD-se, mendim te cilin e shprehu dhe me voten abstenuese te miratimit te ligjit ne teresi. "Nisur nga morali i sotem i politikes dhe nga vullneti i shfaqur per te realizuar zgjedhje te pakundershtuara, nisur dhe nga piramida e demagogjise se dyfishte, shoqeria shqiptare duhet te jete e vemendshme ndaj nje evazioni elektoral teper te mundshem ne zgjedhjet parlamentare, i cili krijon bazen e evazionit te te ardhurave pavaresisht nga drejtimi i ditur apo i paditur nga ata shkojne", cilesoi Apostoli. Ndersa Dashamir Shehi ne emer te grupit parlamentar te LZHK-se kerkoi nga ligjvenesit e Kuvendit qe te mos marrin persiper "kete lloj aventure te kote, keto arnime pa asnje lloj vlere, pa asnje lloj morali dhe qe nga ana praktike do te jene te veshtira per t'u zbatuar. Mos mendoni se ky kod shpeton ndonje cep xhakete te ndonj-_puteti. Kryetaret e partive te juaja e kane bere gati listen, kush do te ike, kush do te qendroje ne kete dava. Dhe ky kod nuk bene gje tjeter, vetem u jep kryetareve te tuaj dhe nje pushtet tjeter". Megjithate keto propozime u rrezuan me 46 vota kunder, 17 pro dhe 19 abstenim. Kurse ne parim Kuvendi miratoi Kodin Zgjedhor me 99 vota pro, 0 kunder dhe vetem 9 abstenime. Kreu i shtetit shqiptar menjehere pas miratimit ne parlament i ka dhene fuqi dekretuese duke hyre keshtu ne fuqi menjehere. Ky kod qe sapo mori miratimin ne parlament eshte i vlefshem vetem per keto zgjedhje, pasi per kete do te ngrihet nje komision i posacem ku do te beje ndryshimet e duhuara ne sistemi elektoral, qofte dhe duke nderruar Kushtetuten.

THANE NE PARLAMENT

Ilir Meta

"Votat e qytetareve shqiptare qe do te jene te LSI-se ,ju siguroj juve dhe te gjitheve qe do t'i numeroje dhe mbroje vete LSI-ja"

Vangjel Dule

"PS-ja dhe PD-ja serish marrin persiper pergjegjesine politike te lene mbi 1/3 e popullsise aktive me dinamike dhe krijuese jashte proceseve vendimmarrese ne shoqerine tone".

Gaqo Apostoli

"Shoqeria shqiptare duhet te jete e vemendshme ndaj nje evazioni elektoral teper te mundshem ne zgjedhjet parlamentare, i cili krijon bazen e evazionit te te ardhurave pavaresisht nga drejtimi i ditur apo i paditur nga ata shkojne"

Dashamir Shehi

"Kryetaret e partive te juaja e kane bere gati listen, kush do te ike, kush do te qendroje ne kete dava. Dhe ky kod nuk ben gje tjeter, vetem u jep kryetareve tuaj dhe nje pushtet tjeter"

Elmaz Sherifi

"Nuk eshte zgjidhur problemi i perfaqesuesve qe do te kontrollojne procesin e numerimit"

Ekrem Spahia

"Do te hyjme ne votime dhe ju nuk keni nxjerre formulen per te nxjerre mandatet shtese te listes proporcionale"

---------------------

11/01/2005 http://www.shekulli.com.al/

Rrëzohen të gjitha amendimet e LSI dhe të LZHK-së

Kuvendi, PS e PD miratojnë ndryshimet në Kodin Zgjedhor

A.Rama

TIRANE- Konsensusi politik mes dy partive më të mëdha PS e PD për çështjet parazgjedhore, është finalizuar dje në Parlament me miratimin e amendimeve të Kodit Zgjedhor. Ndonëse seanca e jashtëzakonshme plenare e thirrur jashtë radhës, ka zgjatur disa orë, debatet dhe polemikat nuk kanë sjellë ndonjë surprizë në rezultatin e votimit, që ishte paravendosur që me nënshkrimin e protokollit dypalësh të 30 dhjetorit. Kështu me 92 vota pro, 10 kundër dhe 5 abstenime, Kuvendi miratoi paketën ligjore më të diskutuar të sesionit të shkuar parlamentar, hartuar nga komisioni i posaçëm parlamentar për reformën zgjedhore. Ndërkaq, në bazë të propozimit të bërë nga kryetari i grupit parlamentar socialist Gramoz Ruçi dhe pëlqimit të dhënë nga presidenti Alfred Moisiu me anë të një dekreti të posaçëm me nr. 4448, në nenin e fundit u përcaktua që ligji i miratuar hyn në fuqi menjëherë. Dekreti i presidentit për hyrjen në fuqi menjëherë të ligjit, shkurtoi procedurat administrative të botimit në fletoren zyrtare, duke kaluar menjëherë për dekretimin përfundimtar të ligjit po tek kreu i shtetit që sot. Deputeti i LSI-së Spartak Braho, kërkoi që Kuvendi të mos votonte pa ardhur dekreti i presidentit, duke i tërhequr vërejtje kreut të seancës Pëllumbi për të zbatuar procedurat parlamentare dhe jo të mjaftohej me komunikim telefonik me kreun e shtetit. Ashtu siç pritej amendamentet kryesore të Kodit Zgjedhor u kundërshtuan nga përfaqësuesit e partive të vogla parlamentare, të cilët akuzuan PS-në dhe PD-në se po bënin pazar me zgjedhjet parlamentare për interesat e tyre. Ndërkohë, siç ndodhi gjatë shqyrtimit në komisionin e Ligjeve, edhe dje gjatë votimit nen për nen u rrëzuan të gjitha amendamentet e paraqitura nga LSI dhe LZHK, që lidheshin me të drejtën e përfaqësimit të tyre në Komisionet e Zgjedhjeve Zonale dhe në KQZ, si dhe në grupet e numërimit. U pranua vetëm amendamenti që u jep të drejtë vëzhguesve të partive parlamentare në KZZ që të marrin kopje të procesverbalit. Një ndër amendamentet kryesore të LSI-së, parashikonte që emigrantëve shqiptarë t’u krijohet mundësia të votojnë në shtetet ku punojnë, kodi aktual dhe ndryshimet që po i bëhen u mohojnë të drejtën e tyre legjitime për të zgjedhur. Kreu i LSI-së Ilir Meta, tha se, amendamentet e LSI-së, shërbenin për marrjen e masave administrative, me qëllim që procesi zgjedhor të mos kompromentohej si gjatë transportimit të kutive të votimit, ashtu edhe gjatë numërimit të votave në KZZ. Ai akuzoi PS dhe PD se me marrëveshjen e nënshkruar mes tyre, jo vetëm që nuk plotësoheshin standardet e kërkuara për përgatitjen zgjedhore, por i gjithë procesi zgjedhor ishte vënë në rrezik. Nga ana tjetër deputeti i PLL-së Ekrem Spahia, tha se amendimet e kodit zgjeronin fenomenin e Dushkut për zgjedhjet e pritshme.

--------

Kreu i Komisionit të Kthimit dhe Kompensimit të Pronave flet për metodikën e vlerësimit të tokave

Sina: Pronat, 75% kompensim fizik

“Po shikohet qëllimi i përdorimit të tokës, forma që ajo ka patur më parë dhe po bazohemi në eksperiencat botërore ”

Darina Tanushi

TIRANË – Kryetari i Komitetit Shtetëror të Kthimit dhe Kompensimit të Pronave Sokrat Sina deklaroi dje, se çmimi i tokave nuk do të jetë larg çmimeve që kemi publikuar, por pa saktësuar se ky çmim do të jetë afër apo shumë larg vlerës së tregut. Ai i është përmbajtur idesë së deklaruar edhe më parë se me atë sipërfaqe të tokës bujqësore të deklaruar si të lirë mund të arrihet rreth 70-75% kompensim fizik për ish-pronarët, ndërsa u shpreh se pritet një rivlerësim tjetër për sipërfaqet e tokave të lira.
Zoti Sina, komiteti është duke diskutuar këto ditë rreth metodikës së vlerësimit të tokave. Mund të na thoni se deri ku kanë arritur këto diskutime dhe a mund të thoni tashmë se në çfarë shifrash do të luhatet vlera e kompensimit për lloje të ndryshme të tokës?
Kini parasysh që metodika u përgatit vitin e kaluar nga grupi i punës i ngritur nga kryeministri nën drejtimin tim. Grupi i punës përgatiti një material që u quajt për atë periudhë final, i cili pasi kaloi në recensa të ndryshme u ripa edhe një herë dhe mori miratimin e komitetit të vjetër. Ideja ishte për të kaluar në Këshillin e Ministrave. Por më pas u gjet mendimi i përbashkët edhe me kryeministrin që të kalonte në Parlament në mënyrë që të merrte forcë më të madhe dhe të kalonte akoma më tej në një fazë tjetër diskutimi, i cili do të ishte Parlamenti dhe të bëhej shtojcë e ligjit. Kështu që u la si detyrë e komitetit të ri, i cili do të diskutojë mbi bazën e kësaj metodike tashmë të hartuar. Edhe në mbledhjen e parë që bëmë me komitetin e ri, diskutuam fazën e vlerësimit të tokave bujqësore. Pati debat konstruktiv. Vërejtjet që dolën nga debatet iu lanë detyrë anëtarëve të grupit të punës që kanë punuar për këtë pjesë të metodikës, në mënyrë që të reflektojnë mbi këto vërejtje dhe në një datë të afërt të diskutojnë përsëri lidhur me variantin pothuajse përfundimtar, për tokat bujqësore gjithmonë. Ndërsa u diskutua edhe për problemin e vlerësimit të trojeve në qytete apo në zona industriale dhe atë të zonave turistike, por u la që të diskutoheshin më në detaje të dyja këto probleme në dy mbledhje veç e veç të komitetit. Nesër, (sot) konkretisht, anëtari i grupit të punës, i cili ka përgatitur kriteret për vlerësimin e trojeve të qyteteve industriale do të diskutojë së bashku me anëtarët e komitetit probleme të ndryshme që mund të kenë dalë, ose që mund të dalin nga diskutimi për këtë fazë dhe pasnesër është i ftuar zv/ministri i Turizmit, i cili ka përgatitur variantin për zonat turistike. Të gjitha këto diskutime bëhen që komiteti të dalë me një mendim të përbashkët. Ideja është që pjesën tonë ta përfundojmë deri në fund të muajit dhe pastaj ta dërgojmë në Parlament, për të ndjekur rrugën klasike nëpër komisione deri në seancë. Eshtë premtuar nga zoti Pëllumbi dhe nga Ylli Bufi që të kalohet me një formulë të përshpejtuar, në mënyrë që metodika të na vijë në ndihmë gjatë procesit të kompensimit, sepse nuk mund të bëhet kompensim pa patur metodikën.
A ka gjë të përafërt mes atyre shifrave që janë publikuar ditët e fundit, toka bujqësore 416 lekë për m2 në Berat apo 525$ në qendër të Tiranës..?
Kriteret bazë kam përshtypjen që nuk do të ndryshojnë. Këto do të jenë kriteret e vlerësimit që një tokë bujqësore, do të vlerësohet për tokë bujqësore, pra do të kihet parasysh qëllimi i përdorimit të saj dhe të kuptohemi drejt kur bëhet fjalë për çmimin e tregut. Mundet që për një arsye apo për një tjetër një copë tokë bujqësore në afërsi të autostradës Tiranë-Durrës për shembull të jetë shitur me çmim të lartë për qëllime të tjera, por kjo është tokë bujqësore, nëse nuk ka ndërruar zërin kadastral, nga tokë bujqësore në tokë truall, atëherë ajo do të vlerësohet si tokë bujqësore dhe çmimi që ai i ka shtitur atij personi është fiktiv në krahasim me vlerën që ajo ka vetë si tokë bujqësore për të prodhuar domate, grurë, misër, etj. Kështu që çmimet që ne kemi dhënë dhe çmimet që do të dalin në përfundim të hartimit të metodikës nuk do të kenë ndonjë ndryshim të madh, nuk do të jenë shumë larg çmimeve që ne kemi publikuar. Do të ketë korrigjime, plus minuse të caktuara, por ai “standard-deviation” siç quhet, nuk është shumë i madh sa mendohet të shumëzohet apo pjesëtohet me 2.
Sa do të jetë ndryshimi me vlerën e tregut. Mendoni se nuk do të krijohen pakënaqësi në shtresën e ish-pronarëve?
Shpresoj të na mirëkuptojnë të gjithë në filozofinë dhe logjikën që po përdorim lidhur me këtë metodikë. Nuk ka absolutisht asnjë qëllim, veçse vlerësimit sa më objektiv të pronës, që është prona bujqësore, truall apo të gjitha.
Cilat janë kriteret kryesore për të përcaktuar edhe vlerën?
Për të përcaktuar kriteret grupit të punës i është dashur një vit punë. Ka shfrytëzuar mijëra dhe mijëra faqe. Janë shfrytëzuar eksperienca ndërkombëtare dhe kombëtare dhe kriteret nuk mund të deklarohen në një bisedë. Ato janë punuar dhe ka një mendim shumë profesional dhe teknik prapa tyre që të jemi të sigurtë, që është vështirë të punohet dhe të bëhen më mirë. Nuk ka kritere subjektive, pasionante. Ka kritere teknike, profesionale dhe shkencore. Kështu që të jeni të sigurtë që janë përzgjedhur eksperienca më e mirë botërore dhe ajo e vendit në përcaktimin e këtyre kritereve. Ato do të dalin në metodikë dhe nuk mund të angazhohem unë t’i them. Por në filozofinë e metodikës është pasur parasysh ajo që u thashë për të vlerësuar një pronë, shikohet qëllimi i përdorimit të saj, formën që ajo ka patur më parë dhe për përcaktimin e kritereve është patur parasysh eksperienca më e mirë botërore dhe e jona.
Aktualisht sa sipërfaqe e tokës bujqësore mund të thuhet se është e lirë?
Aktualisht nuk kemi ndonjë shifër të re. Ka thashetheme që mund të ketë ndryshuar kjo sipërfaqe. Mund të mos jenë 100% të vërteta ato shifra që ne kemi deklaruar, pasi gjatë këtij viti ka patur ndryshime. Ky është edhe një objektiv tjetër i komitetit që të bëjë azhornimin e shifrave që ne kemi deklaruar në përfundim të studimit në muajit mars të vitit të kaluar. Me komisionet e reja vendore që do të krijohen së shpejti do të përpiqemi të krijojmë edhe realitetin e këtyre shifrave.
Te kjo sipërfaqe që konsiderohet e lirë futet edhe ajo tokë në zonat informale që mund të jetë zënë nga pronarë të rinj ende të palegalizuar?
Të gjitha sipërfaqet e tokave, të cilat zyrtarisht kanë qenë të padeklaruara me pronarë privatë apo shtetërorë quhen të lira. Pra ne kemi përdorur dokumentacionin zyrtar. Ato që janë zënë në mënyrë të paligjshme, kuptohet që ne i quajmë të lira. Tani se sa përbëjnë ato dhe se si do të zgjidhet problemi i tyre, kjo është e komplikuar paksa, por do të përpiqemi të sqarojmë mirë se sa është edhe sipërfaqja e tyre.
A është toka e mjaftueshme për kompensim?
Po t‘u referohemi atyre shifrave të para një viti do të thosha që duhet të jemi optimistë për të realizuar një proces korrekt. Kjo sipërfaqe do të përballonte një faturë shumë të rëndësishme të procesit në tërësi, sepse unë e kam deklaruar rreth 70 apo 75% të faturës totale, po të jetë gjithmonë që ato shifra janë ende aktule, jo vetëm për tokën bujqësore, por sidomos për tokën turistike, e cila është bazë e kompensimit të pronarëve që janë në këto zona.
A mund të bëjmë një llogaritje se për sa vjet mund të përfundojë kompensimi financiar dhe fizik?
Po shkojmë shumë larg. Nuk është kollaj që të jap unë një shifër sot dhe të qetësoj gjithë njerëzit. Eshtë e vështirë. Duhet të bëjmë këto gjëra që jemi duke bërë, të saktësojmë metodikën, të saktësojmë përfundimisht shifrat që kemi publikuar vitin e kaluar dhe të bllokojmë këto shifra në atë nivel që janë, në mënyrë që ato t’i përdorim për efekt kompensimi, t’i shikojmë të gjitha burimet e tjera që do të përdorim për efekt kompensimi, të shikojmë disponibilitetin e shtetit shqiptar sa do të ofrojë para kesh për kompensim dhe të gjithë këto pastaj bëjnë numrin e viteve 3, 4 apo 5 vjet. Nëse shteti akordon 1 miliard menjëherë bëhet në një vit apo 2. Këto 2 milionë dollarë që janë dhënë janë si hap i parë, janë një shenjë pozitive që tregon vlerësim serioz të problemit, duke qenë se ne ende nuk i kishim krijuar kushtet mirë. 2 milionë dollarë kuptohet janë pak, por është një hap pozitiv që tregon bonsens.
Një ish-pronar që ka dokumentacion për një pronë të caktuar çfarë hapash duhet të ndjekë për të marrë kompensimin qoftë atë fizik, qoftë atë në para?
Me aktet nënligjore, dokumentacionin ligjor që ne jemi duke përgatitur janë përcaktuar të gjitha kriteret dhe dokumentet e nevojshme që një pronar duhet të prezantojë në Komisionin Vendor të Kthimit dhe Kompensimit të Pronave. Përsa kohë ai do të përcaktojë këto dokumente dhe komisioni do t’i gjejë këto dokumente të vërteta do t’i japë atij titullin e pronarit, do t’i njohë atij të drejtën e pronës dhe pastaj do ta kompensojë, nëse prona është e zënë do ta kompensojë me një nga format që janë të përcaktuara me ligj. Këtu janë qartësuar të gjitha dokumentet që pronarët duhet të paraqesin në komisionin vendor. Komisioni vendor bën verifikimin e këtyre dokumenteve, merr një vendim njohje apo kthim kur sipërfaqja është e lirë, por kur është fjala për kompensim merr vendimin për të njohur pronën dhe pastaj përcakton format e kompensimit.

----------------

 

Faqe 5 - Politikë

Kuvendi miraton Kodin Zgjedhor me 92 vota pro, 10 kundër dhe 5 abstenime

Afati, zgjedhjet e reja deri më 19 qershor

Amendamentet e LSI dhe LZHK votohen edhe nga aleatët e PS

Bledar Hoti

Zgjedhjet e reja parlamentare mund të mbahen në 15 ditëshin e dytë të muajit qershor të këtij viti. Votimi më i fundit në Parlament i Kodit Zgjedhor, i ka vënë si detyrim ligjor Presidentit të Republikës që të caktojë datën e zgjedhjeve deri më 19 qershor, si afati maksimal për mbajtjen e tyre. Në ndryshimet e realizuara theksohet se pika 3 e nenit 7 të Kodit Zgjedhor theksohet se “Presidenti i Republikës cakton datën e zgjedhjeve për Kuvendin jo më vonë se 75 ditë para mbarimit të mandatit të Kuvendit. Me vendim të Kuvendit, mbyllja e legjislaturës dhe shpërndarja e tij bëhen jo më shpejt se 45 ditë para datës së caktuar për zgjedhjet dhe jo më vonë se 3 ditë para kësaj date”. Në bazë të kësaj përllogaritjeje, Kuvendi i dalë nga zgjedhjet e fundit parlamentare është mbledhur më 3 shtator të vitit 2001 dhe 75 ditë i bie që zgjedhjet të mbahen nga 18 qershori. Nisur nga eksperienca që zgjedhjet në Shqipëri zhvillohen ditën e dielë, ato mund të mbahen më 19 qershor. Deputeti i PD-së, nënkryetari i Komisionit të Ligjeve, Fatos Beja, theksoi dje për “Panoramën” se “data e zgjedhjeve i takon Presidentit të Republikës, por limiti i fundit për shpalljen e zgjedhjeve i bie që të jetë 18 qershori”. “Kreu i shtetit mund ta shpallë edhe më herët këtë datë, por ky është afati i fundit ligjor për mbajtjen e tyre”, thekson Beja. Miratimi i kodit Në seancën e jashtëzakonshme gjatë votimit të Kodit Zgjedhor, deputetët e PS-së dhe PD-së kanë rrëzuar amendamentet e paraqitura nga LSI-ja dhe LZHK-ja për të pasur të drejtën e anëtarëve në KQV, KZZ dhe në grupin e numërimit të votave, si dhe që të votojnë emigrantët. E veçanta në këto amendamente është se, pro tyre votuan aleatët e majtë të PS-së, si PSD-ja, PAA-ja, PBDNJ-ja, ndërsa pjesa më e madhe e demokratëve kanë abstenuar. LSI-ja dhe LZHK-ja do të kenë të drejtën e vetëm të një përfaqësuesi si vëzhgues. Dekreti i presidentit Kodi Zgjedhor ka marrë menjëherë fuqi ligjore vetëm falë dekretit që paraqiti presidenti Moisiu. Për realizimin e këtij procesi u desh që seanca të shtyhej deri në pasditen e djeshme, deri sa kreu i shtetit të jepte pëlqimin për nenin 119, duke u hapur rrugë kështu edhe krijimit të komisionit për ndarjen e zonave zgjedhore. Ndërkohë që dekreti i presidentit pritet të firmoset këto ditë. Zonat zgjedhore Kuvendi ka marrë një vendim dje, për krijimin e komisionit të posaçëm parlamentar për ndarjen e re të 100 zonave zgjedhore, në përbërje të të cilit do të jenë deputetët e PS-së dhe të PD-së, si dhe ekspertët e OSBE-së. Me konsensus është miratuar përbërja e këtij komisioni me emrat e Elmaz Sherifit dhe të Ylli Bufit për PS-në, si dhe të Jemin Gjanës dhe të Ilir Rusmajlit për PD-në. Afati i këtij komisioni është deri më 5 shkurt.   Meta: Votat e LSI-së do t’i numërojmë vetë Kreu i LSI-së, Ilir Meta, gjatë diskutimit të tij në Kuvend për çështjen e Kodit Zgjedhor, u ka bërë të ditur dy partive të mëdha PS-së dhe PD-së, të cilat bllokuan amendamentet e kësaj force politike, se “në këto votime parlamentare votat e LSI-së do t’i numërojë vetë LSI-ja”, duke i paralajmëruar dy forcat e mëdha të mos tentojnë të manipulojnë zgjedhjet. Kodi i ri zgjedhor është një hap prapa në krahasim me zgjedhjet e tjera. Ky kod nuk i plotëson standardet e kërkuara, por vetëm interesat e ulëta elektorale të dy partive. Këmbëngulja e dy partive, aktualisht të quajtura të mëdha, ka bërë që qëllimisht janë barazuar disa parti parlamentare me forca që sapo janë regjistruar në gjykatë”, deklaroi Meta. Kreu i LSI-së theksoi se, “janë këto dy forca politike që po tensionojnë klimën politike në vend, duke rrezikuar që zgjedhjet e ardhshme të mos jenë sipas standardeve të kërkuara”. Kuvendi, një minutë heshtje për viktimat e cunamit Seanca e jashtëzakonshme e Kuvendit ka nisur dje, me mbajtjen e një minutë heshtje në nderim të viktimave të shkaktuar nga tërmeti i cunamit. Kryetari i Kuvendit, Servet Pëllumbi, kërkoi mbajtjen e një minute heshtje në nderim të viktimave të tërmetit cunami, që preku disa nga vendet e Azisë Juglindore. Në këtë seancë ishte i pranishëm edhe ambasadori i OSBE-së, Pavel Vaçek.   OSBE mirëpret miratimin e Kodit Vaçek: Sfida kryesore, zbatimi korrekt i ligjit Prezenca e OSBE-së në Shqipëri mirëpret miratimin e amendamenteve në Kodin Zgjedhor nga Kuvendi i Republikës së Shqipërisë, me 92 vota pro dhe 10 kundër. “Miratimi i amendamenteve në Kodin Zgjedhor nga Kuvendi dëshmon vullnetin politik për të përmbushur rekomandimet e OSBE-së/ODIHR dhe Këshillit të Evropës, si dhe vullnetin për të përmbushur standardet demokratike në zgjedhjet e vitit 2005”, tha ambasadori Pavel Vaçek. Kreu i prezencës së OSBE-së theksoi se “gjithsesi, megjithëse miratimi i amendamenteve është një hap pozitiv, sfida më e rëndësishme mbetet zbatimi korrekt dhe i plotë i dispozitave. Nuk ka mjete teknike ose ligjore që të mund të zëvendësojnë vullnetin politik dhe përkushtimin nga ana e të gjitha partive, kandidatëve dhe të gjithë zyrtarëve përgjegjës për mbajtjen e zgjedhjeve e që të jenë të besueshme, të pakundërshtueshme dhe në përputhje me standardet ndërkombëtare”, theksoi Vaçek.   Votimi Kodi Zgjedhor u votua me 92 vota pro, 10 kundër dhe 5 abstenime Kundër Kodit votuan deputetët e LSI-së dhe LZHK-së Abstenuan Ligoraq Karamelo PDNJ, Vangjel Tavo dhe Stefan Çipa të PS-së, Arian Starova dhe Teodor Laço të PBL-së.   Hartohet peticioni që shqiptarët jashtë vendit të votojnë në këto zgjedhje Emigrantët: Duam të votojmë aty ku punojmë Emigrantët kërkojnë që të votojnë në zgjedhjet e ardhshme parlamentare të këtij viti. Me anë të një peticioni të hapur, drejtuar partive politike në Shqipëri, kërkohet që të krijohet mundësia që edhe emigrantët të votojnë në këto zgjedhje parlamentare si një e drejtë legjitime dhe kushtetuese. Një kërkesë e tillë u bë pas mbledhjes që zhvilloi komiteti drejtues i LSI-së për diasporën në Belgjikë. Në këtë mbledhje, sipas njoftimit për shtyp, ky komitet reagoi ndaj marrjes nëpër këmbë të së drejtës për të votuar, e drejtë më se legjitime që gëzon çdo qytetar i një kombi. “Vota është principi bazë nga ku fillojnë themelet e ndërtimit të një demokracie, që në Shqipëri fatkeqësisht për 15 vjet nuk është instaluar kurrë”, u tha në këtë takim. Në këtë peticion që i drejtohet të gjithë emigrantëve nëpër botë, kërkohet që të bashkohen me këtë kërkesë mjaft legjitime. “Ne jemi shtetas të Shqipërisë dhe duam që qeveria e shtetit shqiptar të na mundësojë të drejtën për të thënë fjalën tonë me votë e për këtë ne kërkojmë të na jepet e drejta dhe të na krijohen kushtet për të votuar këtu ku jetojmë. Të gëzosh të drejtën për të votuar nuk do të thotë të kënaqësh dëshirën e dikujt, por të shërbesh në interesin e të gjithëve”, thuhet në këtë peticion drejtuar të gjithë shqiptarëve ku jetojnë nëpër botë. Në këtë theksohet se “janë plot 15 vjet që shqiptarët enden rrugëve të botës me shpresën e një jete më të mirë; 15 vjet ku për çdo ditë shqiptarët lënë vendin e tyre duke e rritur konsiderueshëm numrin e emigrantëve nëpër botë, i cili vetëm në fund të vitit të kaluar është vlerësuar në një milion. Pra, një e katërta e popullit tonë gjendet jashtë territorit të Republikës Shqiptare”.