|
Deputetët e pakënaqur të Partisë Demokratike do të
kandidojnë nën siglën e Lëvizjes për Zhvillim Kombëtar.
Drejtuesit e LZHK-së kanë pranuar dje se janë në bisedime me disa
deputetë të papërfshirë në listën e re të kandidatëve të PD-së
dhe shumë shpejt do të deklarohen publikisht emrat e tyre.
Ndërsa vetë deputetët e Partisë Demokratike, të cilët tashmë
e dinë se nuk do të jenë në listën e 100 kandidatëve të opozitës
shprehen me gjysmë zëri se nëse forca politike, ku ata aderojnë
aktualisht nuk do t’i kandidojë më, atëherë mundësia që ata të
largohen për të kandiduar nën siglën e LZHK-së është mjaft e
madhe.
Largohen 18
Partia Demokratik nuk do të kandidojë më për deputetë një pjesë
të mirë të emrave që aktualisht i ka në Parlament. Gati 18
deputetë, që janë në Kuvend nën siglën e PD-së nuk do të
rikandidojnë më në zonat e tyre megjithëse pjesa më e madhe kanë
fituar drejtpërsëdrejti. Disa nga këta deputetë, të cilët tashmë
e kanë mësuar se nuk do të rikandidohen më, kanë hyrë në
bisedime me drejtues të LZHK-së për të kandiduar nën siglën e
tyre. Drejtuesi i LZHK-së, Dashamir Shehi e ka pranuar se janë në
bisedime me disa deputetë të PD-së, të cilët duan të largohen
nga formacioni i tyre politik për të kandiduar nën siglën e LZHK-së.
“LZHK-ja i ka dyert e hapura për çdo njeri, i cili do të
bashkohet me ne për të kontribuar në ndryshimin e madh të Shqipërisë.
Ne jemi gjithmonë të hapur për njerëz të ndershëm dhe që e mbështesin
programin politik të kësaj lëvizjeje. Ne nuk bëjmë dallime nëse
është demokrat, republikan apo ballist, të gjithë që duan të
punojnë me ne, ne i mirëpresim”, kështu është shprehur dje
Dashamir Shehi i pyetur nga gazeta. Gjithashtu ai ka pranuar se
deputeti i PD-së në Durrës në zgjedhjet e 2001-shit Pëllumb
Berisha, në zgjedhjet e 3 korrikut 2005 nuk do të kandidojnë më nën
siglën e PD-së, por nën siglën e LZHK-së. Dashamir Shehi pranoi
gjithashtu se po diskutohet edhe me deputetë të tjerë të PD-së, të
cilët janë të pakënaqur nga PD-ja dhe tha se: “Tani për tani
nuk duam t’i bëjmë publikë emrat e tyre, por shumë shpejt do
t’i njihni edhe ju se kush janë”.
Të papërcaktuara
Partia Demokratike i ka ende të papërcaktuara edhe 20 kandidatura për
deputetë. Shkodra është e papërcaktuar, ashtu sikurse Laçi, Lezha,
Kruja e Fushë-Kruja, dy zona në Tiranë, Kamza dhe Vora, Përrenjasi,
dy zona në Fier, një zonë në Tepelenë dhe Ersekë Këto qytete
ende nuk janë njohur me kandidaturat e PD-së për deputetë. Mësohet
se ka mjaft ndërhyrje për këto zona te kreu demokrat, i cili
megjithëse i ka piketuar emrat që do të kandidojnë sërish nuk po
gjen konsensusin e duhur për t’i shpallur këto kandidaturat në
zonat përkatëse.
Koha është mjaft e shkurtër dhe procesi i përzgjedhjes së emrave
duhet të marrë fund, pasi fushata zyrtare së shpejti do të fillojë
dhe kandidatët nuk janë njohur ende me zonat, në të cilat një
pjesë e mirë kanë gati një muaj që kanë filluar propagandën e
tyre. Berisha u shpreh një ditë më parë se “vërtet jemi pak vonë
për shpalljen e kandidaturave për deputetë, pasi një pjesë e mirë
tashmë e kanë filluar fushatën, por janë aleatët ata të cilët
po e vonojnë punën”. ”Megjithëse të vegjël problemet po na i
nxjerrin të mëdha” është shprehur Berisha gjatë një prononcimi
për shtyp.
Aleancat
PD: S’bëjmë aleancë me LZHK
Në zgjedhjet e 3 korrikut 2005 Partia Demokratike do të bëjë
aleanca me shtatë parti politike, por jo me LZHK-në. Deri më tani
janë zyrtarizuar tri të tilla me PR-në, PDR-në, e PDK-në. Pritet
që marrëveshje bashkëpunimi në këto zgjedhje Berisha të nënshkruajë
edhe me katër parti të tjera. Ato janë PBL e Starovës, Partia e
Blertë e Kokëdhimës, PBKD e Selfos. Bashkëpunim do të ketë edhe
me PBDNJ-në.
Më 20 maj PD shpall deputetët
Më 20 maj Partia Demokratike pritet të mblidhet në një takim të
madh festiv për të shpallur publikisht të 100 kandidaturat e saj për
deputetë. Pas përzgjedhjes së emrave me të cilët PD-ja do të
konkurrojë në zgjedhjet e 3 korrikut 2005, prezantimi publik i tyre
do të bëhet ose në sheshin Skënderbej ose në Pallatin e
Kongreseve.
LZHK shpall kandidaturat më 14 maj
Lëvizja për Zhvillim Kombëtar do t’i prezantojë të 100
kandidaturat e saj për deputetë më 14 maj. Drejtuesit e LZHK-së
shprehen se listës së tyre nuk i mungojnë edhe shumë emra, prandaj
do të jetë fundi i javës që do të mbyllë gjithçka. Më pas
secili kandidat do të vazhdojë punën në zonën e tij dhe për
t’u përgatitur për zgjedhjet e 3 korrikut.
Berisha pret kandidatët e Durrësit, Vlorës e
Elbasanit
Problemet e para në tryezën e kryetarit
Kryetari i PD-së Sali Berisha ka pritur dje në zyrën e tij
kandidatët për deputetë të Vlorës, Durrësit dhe të Elbasanit së
bashku me kryetarët e degëve të PD-së të këtyre qyteteve. Takimi
ka qenë më shumë teknik, me qëllim që kryetari Berisha të njihej
me mbarëvajtjen e punëve të secilës zonë, çfarë problemesh kanë,
si do t’i ndihmojë dega e PD-së në çdo qytet etj, pasi përzgjedhja
e kandidaturave atje ka mbaruar. Në Durrës, PD-ja ka zgjedhur si
kandidat të saj, Sami Gjergjin, Sokol Olldashin, Flori Bajramin,
Ferdinant Xhaferrin, Gazmir Oketën, dhe Genc Jukën. Ndërsa në
Elbasan janë Aurel Bylykbashi, Omer Stringa, Mehmet Ibaj, Nuri Hasa,
Muharrem Kajolli, Hyqmet Lleshi, Bexhet Uruçi. Si kandidat për
deputet në Vlorë janë paraqitur Bujar Leskaj, Moisi Meminaj, Ardian
Kullozi, Xhevahir Rexhepi e Arjan Dhimertika. Këta kanë njohur
kryetarin e PD-së me problemet që kanë zonat e tyre me listat e
zgjedhësve, ku sipas tyre, janë vënë re mjaft mangësi. Gjithashtu
mësohet se çështja e financimeve të tyre ka qenë një tjetër temë
e diskutimit mes kandidatëve për deputetë dhe kryetarit të PD-së.
Meta: LSI do të fitojë kundër PS dhe PD
"Vota për LSI-në është jo vetëm mënyra më e mirë për
ta larguar këtë qeveri, e cila tallet dhe i përbuz shqiptarët e
popullin e vet, por është mënyra më e mirë për të penguar
rikthimin në pushtet të Sali Berishës dhe PD-së". Kështu është
shprehur dje kryetari i LSI-së, Ilir Meta gjatë prezantimit të
Viron Bezhanit si kandidat për deputet i kësaj partie në zonën 37
në Tiranë. Kreu i LSI-së i ka akuzuar pushtetarët aktualë si përgjegjës
për shifrat alarmante të papunësisë në Shqipëri. 'Mos harroni se
janë këta pushtetarë të papërgjegjshëm, të cilët mbajnë përgjegjësi
për papunësinë e jashtëzakonshme me të cilën ndesheni ju, dhe
shqiptarët sot. 140 mijë vende pune më pak se katër vite më parë
ka sot në Shqipëri. Ndërkohë që këta pa u skuqur fare nga turpi
për këtë që kanë bërë, premtojnë 100 mijë vende të reja për
katër vitet e ardhshme", tha Meta. Kjo ndodh se këta njerëz
kanë masakruar biznesin e ndershëm, sepse këta nuk kanë lënë
sektor të tregut pa u futur, pa krijuar kompanitë e tyre, pa u bërë
ortak, pa prishur konkurrencën e ndershme, pa marrë më qafë me mijëra
e mijëra biznese, sidomos ato të voglat e të mesme. Ndersa Bezhani
tha se: "Unë kam bindjen se me fitoren e LSI-së do të fitojë
dashuria mbi urrejtjen, drejtësia mbi padrejtësinë, gëzimi mbi
trishtimin e mungesën e shpresës që po përjetojnë të gjithë
qytetarët. Do të fitojë dinjiteti i nëpërkëmbur nga poshtërimi
që i është bërë qytetarëve këto 15 vjet tranzicion".
 
| 6 0 0 - v j e t o r i i s k e n
d e r b e u t |
|
s e k r e t i i p e r k r e n a r e s
|
| |
Shpjegimet për kurorën që
simbolizon bricjapin
|
| |
Sekreti i brirëve në përkrenaren e Skënderbeut
|
|
|
| |
|
Prof. Mihallaq Xhavo
|
|
Të mos mjaftohemi kurrë me aq sa dimë për të
shkuarën, e për më tepër për figurat mitike si Skënderbeu.
Madhështia e tyre, shtatlartësia e tyre ka plane të
dukshme e të padukshme, nganjëherë misterioze sepse pemët
madhështore i largojnë rrënjët dhe i fshehin aq larg sa
mendësia e një lulelakre nuk mund t’i imagjinojë.
Nuk është meritë e jona asnjë zbulim i ri mbi Skënderbeun,
por e dritës që ai ka rrezatuar e vazhdon të rrezatojë për
të plotësuar madhështinë e tij, zili e shumë fqinjëve
tanë.
Historianët që kanë kontribuar deri tani në njohjen dhe
modelimin e figurës së Skënderbeut vijnë nga fusha të
ndryshme, por me bazë të njëjtë, që është rikrijimi nëpërmjet
fakteve i një realiteti sa më konkret informativ mbi të.
Pra ato mund të rikrijojnë realitetin e Skënderbeut për aq
sa ne kuptojmë për realen, për aq sa ne dimë për këtë
botë ku ne jetojmë.
Por mjafton të mendojmë pak se sot, në erën e
informacionit, opinioni publik di shumë pak për mekanizmat e
vërtetë që lëvizin botën e sotme, për të mos thënë që
ka mekanizma të krijuar me qëllim që ta devijojnë e ta gënjejnë
atë. Sa zhgënjyese është ideja se ajo që manifestohet,
shkruhet haptazi është e vërtetë, aq më tepër e vërteta
historike. Historisë i mbetet vetëm pluhuri i ngjarjeve,
hiri i asaj që ishte dhe t’i besosh ose të mjaftohesh me
historinë zyrtare, pozitiviste do të thotë ta marrësh
hirin për dru të padjegur.
***
Sot ekziston një okultizëm teknologjik, okultizëm bankar
dhe monopolizmi shkencor, ky është misteri i kohës tonë
moderne. Në mesjetë dhe në rilindjen evropiane ekzistonte
një mister tjetër, ai i mistikëve, templarëve, alkimistëve,
dhe i ndërtuesve të katedraleve. Kjo botë u rrezikua nga
dyndjet osmane dhe Gjergj Kastrioti si fisnik i asaj kohe, pra
rrjedhimisht i ndërgjegjshëm për vlerat e saj e mbrojti me
vetëmohim këtë kulturë. Mos vallë ai ishte nga të fundit
templar, ishte pjesë e atij organizimi gjigant evropian i
rozkruasë, i dijes mistike të alkimistëve ku edhe fisnikët
shqiptarë të mesjetës mund kenë pasur eksperiencat e tyre
jo më pak inferiore se ato evropiane.
Kjo fushë është një pjesë e historisë së Evropës,
mjaft e fshehtë me një logjikë të veçantë kërkimi, me
vlera shumë specifike, por edhe e demigruar shumë nga
pozitivizmi dhe materializmi i shekujve të fundit, viktimë e
të cilës janë edhe historianët. Në këtë fushë mund të
futesh nëpërmjet simboleve dhe gjuhës së tyre, aq e dashur
për mendimtarët e asaj kohe. Ata flisnin me gjuhën e
analogjisë së kodeve, stemave që i vendosnin në veshjet e
tyre, në përkrenaret e tyre të cilët tregonin gradën e
caktuar të evoluimit në dijen, artin e madh të asaj shkencë
mistike mbarë evropiane, që ishte edhe faktori i vërtetë i
bashkimit të asaj Evrope.
***
Kudo që shkonte një kalorës, mbret, në rastin tonë Skënderbeu,
paraqiste simbolet e tij të fisnikërisë që kishin një
gjuhë universale e njohur nga ata, por jo nga masat e
popullsisë.
Njohësit ishin mjeshtra të dijes së asaj kohe, të dijes
Arkane (dije sekrete të antikitetit) të shkallëzuar sipas
njohjes në fusha si ajo e astronomisë, astrologjisë,
matematikës, alkimisë. Për kulturën e shumë studiuesve
tanë profesionistë, alkimia është karikatura e kimisë.
Por le ta gëzojnë ata injorancën e tyre, alkimia e asaj
kohe ishte shkenca e evoluimit total të njeriut nëpërmjet
një disipline të caktuar, sekrete, privilegj i kastave
fisnike. Metalet që ata kthenin në arë dhe guri filozofik i
tyre ishte realizimi i vetëdijes totale, rrezatuese dhe
hyjnore. Njohja e këtyre sekreteve është shumë e vështirë
edhe për faktin se ajo dije përdor me qëllim një gjuhë
mundi, për të devijuar kuriozët e sipërfaqshëm, por edhe
dëshira e ndryshimit të vetvetes, transformimit të unit është
premisë e parë që ato sekrete të dorëzohen shkallë-shkallë.
***
Kastriotët mbanin stemën e shqipes me dy kokë, por e veçanta
është se Skënderbeu mbajti veç saj si personale përkrenaren
e famshme të tij. Çfarë do të thotë ai me ato dy brirët
e cjapit? Kujt i drejtohej ai me ato simbole surreale dhe përse
fisnikë të tjerë shqipëtarë pas tij ose njëkohësisht me
të nuk e mbanin atë simbol? Mos ndoshta duheshin merita të
caktuara për të mbajtur një përkrenare me të tilla
simbole?
Përse kjo përkrenare u transportua brez pas brezi dhe u
ruajt në muzeun e Vienës?
Po t’i hedhim një sy mesjetës me respekt për dijet dhe
kulturat e saj, pa arrogancën e të diturit modern dhe po të
pranojmë si të mirëqenë filozofinë e asaj kohe do të
zbulohen rastësi interesante.
Duke përdorur edhe ne analogjinë si metodë studimi (ndërkohë
që antikët e përdornin si metodë njohëse) do të vëmë
re se nga astrologët e asaj kohe shenjat astrologjike kishin
të bënin me një domethënie të caktuar që lidhej me
nivelin e dijes dhe llojit të planetit që e dominon atë. Për
ata, pra për mjeshtra në nivele të larta të alkimisë dhe
astrologjisë dihej se ai që dominonte shenjën e vështirë
të Saturnit është kalorës i dijes në nivel shumë të
lartë dhe për rrjedhojë, mbante simbole në funksionin e
gradës në rastin tonë, bricjapin. Dijetarë dhe alkimistë
të asaj kohe e dinin midis tyre se kapuçi i tejzgjatur dhe i
përkulur që ata mbanin simbolizonte bricjapin dhe i lejohej
ta mbante vetëm ata që në rrugën e njohjes Arcane dhe
Hermetiste njihnin misterin e rimishërimit.
***
Rëndësia e veçantë dhe sekrete njëkohësisht e kësaj
shenje zodiakale vjen nga lidhja e saj me Saturnin. Nga ky
planet, sipas Ermetistëve evropianë, shpirti fillon rrugën
e tij drejt rilindjes, mishërimit dhe duke kaluar sferat
planetare arrin Hënën, ku ndalon për të parë kozmosin në
pritje të momentit dhe horoskopit të përshtatshëm, nëse
mund të shprehemi kështu, për të rilindur në botën e
mishit e të kockës. Simboli i bricjapit ka qenë i përdorur
me këtë kuptim edhe në Orient, por në Perëndim është
reduktuar në figurën e cjapit. Në mesjetë zakonisht ishte
edhe një kombinim cjap-peshk (Saturni-Hëna). Në imazhet më
antike babiloneze prezantohet një cjap me bishtin e një
peshku. Ky kombinim i dyfishtë kishte një domethënie të
thellë Arkane, Bricjapi mbretëron në të vërtetë si mbi
njeriun e brendshëm, ashtu edhe mbi atë të jashtmin, pra
sipas mentalitetit të asaj kohe tek njeriu, Bricjapi
simbolizon bashkimin e strukturës së brendshme me të
jashtmen. Bricjapi udhëhiqet nga Saturni, zoti i kohës,
prandaj në antikitet është i lidhur edhe me shpatën, ajo që
mbron jetën e dominon vdekjen. Ekziston një lidhje midis ndërtuesve
të katedraleve të Bricjapit, strukturave të mëdha
arkitektonike e të numerologjisë Indiane, misteret Arkane të
Bricjapit ato i quajnë makara.
Kjo ishte zgjuarsia Arkane e Templarëve, mbrojtësve të
kristianizmit dhe mund të kujtojmë se Evropa e hershme dhe e
sotme e njeh Gjergj Kastriotin si mbrojtës të kristianizmit,
i vetëdijshëm edhe për vlerat mistike-ezoterike të tij.
Në sistemet Kabalistike, në simbolet e letrave të tarokut
gjejmë përsëri cjapin dhe e gjithë kjo do të mbetej një
lojë koincidencash absurde po të mos përdorim teknologjinë
e të menduarit të asaj kohe, analogjinë që na fton t’i
shikojmë me shumë kuriozitet e vëmendje simbolet e përkrenares
së Skënderbeut.
***
Për përkrenaren e Skënderbeut ka shumë fabula e histori, përsa
i takon dhisë të zgjedhur nga ai si simbol, por për ne
duken jo fort bindëse po të kemi parasysh përgjegjësinë e
simboleve në atë kohë, dhe kotësinë e tregimit të këtyre
përrallëzave popullore në oborret fisnike të Evropës, që
siç e dimë ishte një Evropë kristiane me themele të dijes
mistike ku respekti dhe njohja që Skënderbeu gjente në ato
oborre vinte nga këto vlera të dijes që ai patjeter duhet
t’i zotëronte. Ai mbante simbolin e cjapit për ato motive
të vlefshme okulte që përmendëm, në shenjë grade dhe
respekti, ai përfaqësonte shkollën shqiptare okulte, njohëse
dhe transmetuese e traditës së mistereve po aq antike sa vetë
shqiptarët. Pas tij kjo shkollë ezoterike shkrihet.
Që atëherë ne nuk e gjejmë më të përdorur simbolin e
cjapit ose dhisë dhe që atëherë u çorodit dhe humbi vula
antike e shqiptarëve e kërkuar, e dëshiruar më vonë nga të
gjithë patriotët.
“Libri i luftës” ka vizatime si të Leonardo Da Vinçit.
I përket shekullit XV
Libri i Skënderbeut vjen në Tiranë
Një libër i Skënderbeut vjen në Tiranë. I përket
shekullit të XV dhe i takon bibliotekës së Skënderbeut.
Eshtë një libër në pergamen dhe është me 281 faqe. Sipas
drejtorit të Muzeut Historik Kombëtar libri me titull
“Libri i luftës” ka vizatime në lidhje me luftën.
“Eshtë një libër i cili ka qenë në duart e Skënderbeut,
pasi bën pjesë në bibliotekën e tij. Ndodhet në bibliotekën
e Vaimarit. Nuk e ka parë asnjë studiues deri më sot. Di që
vetëm kanë cituar nëpër shkrime që ekziston një libër i
tillë”, tregon për gazetën drejtori Moikom Zeqo. Sipas
tij libri do të publikohet në Tiranë pak ditë më vonë.
“Unë i bëra një kërkesë Drejtorisë së Bibliotekës së
Vaimarit që ma solli librin të dixhitalizuar, e kemi
stamposur tashmë. Më vonë do të bëjmë publik librin dhe
do të publikojmë në një ekspozitë vizatimet”, tregon më
tej Zeqo. Sipas tij këto vizatime janë të ngjashme me ato të
Leonardo da Vincit. “Këto vizatime kanë një gjë shumë
interesante, se janë të kohës kur përfundoi epoka e armëve
të ftohta, ku bëjnë pjesë shpatat, shigjetat dhe deri në
epokën e armëve kur pushtohen kështjellat, si luftohet në
mënyra të ndryshme”, shton ai.
|
|
