Zona 39 e Laprakës është një Tiranë e dytë, në tërë kuptimin e saj, jo thjesht për shkak të afërsisë gjeografike dhe arterieve rrugore të përbashkëta, por edhe për shkak të problemeve të ngjashme. Megjithatë, katër kandidatët e sotëm të rubrikës “Forum”, premtojnë një dalje nga kriza të kësaj zone, e cila ka një shtrirje të gjerë. Kriza e Laprakës ka traditë të gjatë kohore, por ajo është shumëfishuar me problemet që ka krijuar mbipopullimi dhe informaliteti. Kjo zonë, ku për herë të parë garon një grua (Majlinda Bregu PD), shtrihet deri në godinat e Institutit Bujqësor, ku një grup banorësh kanë zënë disa godina dhe jetojnë atje që nga viti 1997. Ata kërkojnë të jenë pjesë e procesit legalizues, ndonëse kanë zaptuar objekte shtetërore. Por, politika këtë herë premton qartë edhe për pjesën dërrmuese të banesave informale. Për zonjën Bregu, PD do ta mbyllë procesin e legalizimit brenda 6 muajve të qeverisjes së saj, duke u mbështetur te çmimi i ulët dhe tek identifikimi i plotë i banesave dhe trojeve. Nga ana e tij, rivali socialist mendon se ky proces kërkon më shumë kohë dhe duhet bërë më realist. Por, për kë do të votojnë këtë herë banorët e Laprakës? Cili është premtimi që i bind më shumë? Ata kanë përballë katër individualitete serioze që kërkojnë votëbesimin e tyre. A do të jetë legalizimi vota kundër ose pro?

Katër kandidatët që përballen në zonën 39, janë personalitete të njohura në fushat e tyre profesionale dhe individualitete politike të reja, që synojnë një vend në parlamentin e ri.

1-Cilët mendoni se do të jenë zgjedhësit që do t’ju votojnë?
Majlinda Bregu (PD). Mendoj se për mua do të votojnë të gjithë banorët e zonës ku do të kandidoj, duke nisur që nga demokratët e duke vijuar me njerëzit e pakënaqur me kushtet e jetesës së deritanishme. Ata që e vuajnë varfërinë, ata që kanë emrin në listat e pafundme të dyqaneve, që duhet të paguajnë taksa dhe tatime shumë të larta, ata që kanë probleme me energjinë elektrike, ujin e pijshëm. Pra, janë të gjithë ata njerëz të pakënaqur nga mënyra e qeverisjes dhe jetesës.
Petrit Malaj (PS). Unë jam banor i Laprakës dhe si i tillë kam gjetur mirëkuptimin e banorëve, si dhe ndjesinë e tyre për të më votuar mua. Këtu koordinohen dy elementë, individi im si Petrit dhe forca politike që më mbështet. Unë shoh se komuniteti ka kuptuar shumë drejt që nuk duhet t’i rrëmbejë ekstremitetet partiake, por duhet të jetë me këmbë në tokë dhe t’i besojë atij që është më i dobishëm për të.
Sokol Axhemi (LSI). Kam besimin se me punën që është bërë deri tani në zonën elektorale nr. 39, që përfshin Laprakën, Kodër Kamëz e universitetin Bujqësor, pyetje të tilla nuk kanë nevojë për koment. Kjo për faktin e thjeshtë se jemi vetëm 1 – 3 km larg qendrës së Tiranës dhe në mënyre absolute nuk ka asnjë lloj afërsie urbane me metropolin. Nisur nga kjo, besoj se vota e një qytetari të thjeshtë në zonën ku kandidoj unë, nuk do të shkojë e të humbasë kot në forcat e tjera politike, të vjetra në koncepte e bosh në rezultatet për zonën, pavarësisht nga sloganet që përdorin. Por vota do të shkojë tek LSI-ja, që përbën realisht të vetmen shpresë dhe besim për ndryshim real e cilësor të jetës së banorëve.
Henrik Zotaj (LZHK). LZHK-ja është formacioni më i djathtë politik në vend, e djathta reale dhe do të votojnë për ne familjet e mëdha fisnike, gjithë njerëzit fisnikë të këtij vendi, ish të persekutuarit politikë të diktaturës komuniste, intelektualë dhe njerëz të thjeshtë, si dhe demokratët e ndërgjegjësuar që pavarësisht nga ngjyra partiake e duan Shqipërinë, si dhe pronarët, të cilët do t’u kthehet prona ose do të kompensohen plotësisht. Po ashtu të gjithë miqtë dhe ata me të cilët unë kam punuar, jetuar, që punoj dhe jetoj sot me ta në Tiranë. LZHK-ja është një forcë e djathtë që nuk ka lidhje as me te kaluarën, as me të sotmen, prandaj dhe do të na votojnë masivisht nga elektorati i zonës nr. 39.

2-Ku bazohet platforma juaj elektorale?
Majlinga Bregu (PD). Sigurisht që platforma ime elektorale në radhë të parë mbështetet në platformën e PD-së, e cila është hartuar në bashkëpunim me KOP-in. Si pika të tjera dhe më konkrete mund të them se platforma ime mbështetet në procesin e legalizimit në zonat informale.
Ky legalizim, në bazë të programit të PD-së do të realizohet në 6-mujorin e parë të ardhjes në pushtet të forcës për të cilën kandidoj dhe ai do të bëhet me një çmim që varion nga 1-4 milionë lekë të vjetra. Gjithashtu, platforma ime ka si prioritet të saj zgjerimin apo krijimin e tregut të punës, uljen e taksave dhe tatimeve. Gjithashtu një vëmendje të veçantë do t’i kushtohet edhe sistemit arsimor, pasi në zonën ku unë kandidoj ka nevojë për ngritjen e një shkolle të mesme. Një vëmendje të veçantë do të kenë edhe problemet që lidhen me energjinë elektrike dhe furnizimin me ujë të pijshëm.
Petrit Malaj (PS). Kundërshtarja ime është shprehur se unë nuk kam platformë për zonën. Unë këtë platformë e kam bërë të ditur, por siç duket mënyra se si njerëzit po më presin, ka bërë që rivalët të mos jenë në parametrat e qetësisë së duhur. Kam një platformë të prekshme që bazohet në shqetësimet dhe problemet e qytetarëve, pasi këto më dhembin më shumë se çdo kundërshtar tjetër. Askush më mirë se unë nuk i di këto gjëra dhe askush nuk e ka mundësinë për t’i zgjidhur. Këtë që them e mbështes në individin tim, në sigurinë qytetare, në atë çfarë kam bërë në këto 20 vjet punë, si dhe në fuqinë që më jep PS-ja, sepse ajo ka një platformë më se të prekshme, të komunikueshme me elektoratin dhe gëzoj mbështetjen e saj. Një tjetër element është kryebashkiaku i Tiranës, i cili i ka ndërruar fytyrën qytetit, që së bashku me mua do t’i ndërrojë fytyrën edhe Laprakës. I kam takuar banorët vetëm, me kryebashkiakun Rama dhe do t’i takoj edhe me Nanon.
Sokol Axhemi (LSI). Platforma elektorale mbështetet në linjat kryesore që përfaqëson platforma e LSI-së, e cila është gjithmonë në shërbim të qytetarit. Nëpërmjet sloganit tonë politik “Forcë e Re, Shqipëri e Re”, ne i paraqesim elektoratit shqiptar mundësinë për të qenë realisht aty ku i takon një qytetari evropian. Njëkohësisht me ekspertizën profesioniste, të aftë, intelektuale ambicioze që ka zona e Laprakës kemi përgatitur piketat kryesore të programit tonë të detajuar, që përfshin angazhimin për një jetë më të mirë për qytetarët e Laprakës, legalizimin e banesave të tyre, infrastrukturë rrugore e kanalizime, shërbime arsimore e shëndetësore, përfshirje në projekte të ndryshme punësimi, nxitje e biznesit të vogël, frymëmarrje reale për punësimin e rinisë dhe aktivitetet rekreative kulturore e sportive.
Henrik Zotaj (LZHK). Platforma ime bazohet në programin e LZHK-së, por që ka edhe specifikat e saj. Ndër pikat kryesore të programit tonë janë vendosja e rregullit dhe qetësisë publike, pajisja e shqiptarëve me pasaporta si në kohën e mbretit Zog, krijimi i një administrate publike të pacenuar nga grupimet politike, kushdo qofshin ato, shkollimin e detyrueshëm deri në arsimin e mesëm, hapjen e universiteteve plotësisht dhe punësimin për të gjithë shqiptarët. Ndërsa për Laprakën, sigurimi i fondeve për shtrimin dhe asfaltimin e rrugëve, krijimin e hapësirave të gjelbra, ndërtimin e shkollave dhe kreditimin e biznesit, kreditim për të pastrehët dhe së bashku me këto, hapjen e vendeve të reja të punës. Më e rëndësishmja, legalizimin e shtëpive të familjeve të ardhura nga e gjithë Shqipëria.

3-Papunësia, infrastruktura janë të tjera probleme. Cili është angazhimi juaj?
Majlinda Bregu (PD). Ndërhyrjet në infrastrukturë, si një problem mjaft shqetësues për zonën do të ecin paralelisht me procesin e legalizimit të banesave në zonat informale. Do të jetë një proces, i cili do të lidhet me faktorë të tjerë shqetësues për banorët e zonës elektorale ku do të kandidoj. Ka shumë pjesë të zonës që nuk kanë kanalizimet e nevojshme, gjë që përbën një shqetësim të vërtetë për të gjithë banorët. Në programin që ne kemi hartuar parashikohet që nga procesi i legalizimi, i cili do të jetë i shpejtë në kohë, të ketë përfitime porsa i përket edhe infrastrukturës. Kjo do të ndikojë edhe në uljen e papunësisë, pasi për rindërtimin e infrastrukturës do të ketë nevojë për njerëz të aftë për punë, që fare mirë do të jenë nga ky komunitet. Megjithatë, për gjithçka që kemi në program do të punohet me projekte, pasi varfëria është një çështje madhore që sigurisht është e lidhur me papunësinë. Për këtë, sigurisht që do të ketë projekte konkrete, zbatimi i të cilave do të sjellë rritjen e punësimit.
Petrit Malaj (PS). Tirana është çdo ditë në ndryshim dhe Lapraka ka shumë për të bërë. Si banor i saj jam i pakënaqur me zhvillimin që ka, por dua të them se të gjitha problemet do të gjejnë zgjidhjen e tyre në nivele emergjente, të mesme dhe afatgjata. Ka projekte për Laprakën e vjetër, për infrastrukturën, zhvillimin e zonës informale, për energjinë, ujin e pijshëm dhe elementë të tjerë. Do të veçoj një moment tjetër esencial. Si prind kam konsideratë për elementin e shkollave e kopshteve. Pak kohë më parë, aty u inaugurua rikonstruksioni i një kopshti model. Në 6-mujorin e dytë do të bëhet rikonstruktimi i shkollave “Ahmet Gashi” dhe “28 Nëntori” në Laprakën e Vjetër. Eshtë siguruar sheshi i ndërtimit dhe do të ngremë një gjimnaz të ri në Kodër Kamëz, pasi gjithë zona deri te Ura e Kamzës nuk ka një shkollë të mesme. Kjo shkollë do të presë 900 nxënës. Unë do të jap kontributin tim që këto probleme të zgjidhen sa më parë dhe këtë e mbështes te projektet që unë kam iniciuar, ku kam gjetur edhe mbështetjen e Ramës.
Sokol Axhemi (LSI). Realisht janë problemet më shqetësuese të zonës. Po të shohësh nga afër situatën e infrastrukturës rrugore, në mënyrë absolute nuk mund ta mendosh se je vetëm pak km larg qendrës së Tiranës. Mungesa tërësore e kanalizimeve, asfaltimit, po ia bën gjithnjë e më të vështirë jetën banorëve, sidomos të tyre të periferisë së Laprakës. Papunësia dhe të ardhurat e pakta ia shtojnë më tepër hallet dhe mundësitë për mbijetesë familjeve të zonës. Shqetësime të tjera që ndeshen janë mungesat në drejtim të furnizimit me energji elektrike, mungesa shpeshherë e furnizimit me ujë të pijshëm, mungesa e transportit publik në pjesët e brendshme të zonës, shërbimet jo pranë tyre të arsimit e shëndetësisë. Megjithatë ka një shpresë për ndryshimin e jetës së tyre. LSI-ja ua ofron këtë shans me anë të politikave në drejtim të uljes së varfërisë, papunësisë e projekteve të qarta infrastrukturore. Banorët e kësaj zone kanë nevojë për njerëz që zgjidhin problemet e tyre dhe të zonës. Ata kanë nevojë për njerëz që mendojnë për ta, për njerëz që kanë dinjitet dhe dinë t’i respektojnë. LSI-ja ua ofron një gjë të tillë.
Henrik Zotaj (LZHK). Papunësia dhe varfëria janë plagët më të thella në zonë. Edhe infrastruktura, e cila është si në Afganistan. Megjithatë, duke i dhënë përparësi biznesit të vogël dhe të mesëm, duke kredituar shumë të tjerë do të zbusim papunësinë dhe bashkë me të varfërinë e kësaj zone. Legalizimet do të jenë një ndër pikat që do të zbusin varfërinë, pasi banorët do të kenë shtëpinë e tyre të ligjshme, që do të jetë e hipotekuar. Në qeverisjen tonë do të sigurojmë fonde dhe donatorë. Nëpërmjet taksave të bashkisë që do të mblidhen plotësisht, por që do të jenë më të ulëta se sot, do të sigurohet një infrastrukturë moderne.

4-Çfarë parashikohet për legalizimin në platformën tuaj?
Majlinda Bregu (PD). Sigurisht që nga ana e përfaqësuesve të PS-së thuhet se ky proces mund të shkojë 3-5 vjet apo edhe më shumë, duke qenë se kanë miratuar një ligj diskriminues për banorët e zonave informale. Kështu, nuk mund të realizohet në periudhën kohore që mendon të bëjë PD-ja. Por dua të theksoj se është plotësisht e mundur që legalizimi të përfundojë në një periudhë kohore prej 6 muajsh. Këtë e them sepse ekziston dokumentacioni i plotë i numrit të banesave që duhet të legalizohen, sepse ekziston një hartë e zonës ku përcaktohen qartë banesat për legalizim dhe pjesët e veçanta të zonës ku ndodhen ato. Duke u nisur nga kjo nuk është aspak e vështirë që legalizimi të bëhet në periudhën kohore që ka vendosur PD-ja në programin e saj.
Petrit Malaj (PS). Thembra e Akilit të një pjese të madhe të elektoratit tim është procesi i legalizimit, i cili është përdorur për t’i trembur banorët që të mos marrin pjesë në këtë proces. Unë i ftoj ata të mos tremben nga ky “gogol”, por të marrin pjesë me forcë në procesin e legalizimit, sepse më së fundi ata do të bëhen pronarë të mundit, djersës dhe gjakut të tyre. Lidhur me elementin e çmimit them se nuk mund të jetë ai që pretendon opozita. Çmimi do të jetë simbolik dhe i përballueshëm. Gjithmonë kur zapton një tokë, duhet të paguash një çmim. Në këtë rast, banorët aty janë me fat sepse aty nuk ka pronarë dhe është në dobi të tyre, sepse është kosto e shtetit të ndihmojë këta njerëz duke u bëjë sa më parë legalizimin dhe me atë shumë parash që do të paguajnë, do të ndërtohet infrastruktura e zonës. Unë s’mund të them si opozita që ky proces do të bëhet për tre muaj, pasi në tre muaj është e pamundur të shohësh fletët e aplikimit. I bëj thirrje elektoratit të mos gënjehet nga gjëra që në pamje të parë i pëlqejnë, por në pamje të dytë janë të pamundura të realizohen.
Sokol Axhemi (LSI). Eshtë një nga problemet parësore, sepse sot banorët e zonës informale nuk ndjehen të sigurt në banesat dhe objektet e ndërtuara me djersën e tyre. U harruan premtimet e bëra për legalizimin e tyre e madje, dy forcat e vjetra politike miratuan një ligj, i cili shkon ndesh me interesat dhe dëshirat e banorëve. Madje ka edhe me keq, shpesh herë shfaqen gojët e liga që thonë se do të fillojë edhe procesi i urbanizimit. LSI-ja në këtë drejtim është e prerë, legalizim pa kushte i të gjitha ndërtimeve në këtë zonë. Edhe unë do të punoj për këtë drejtim, në mënyrë që çdo banor që ka ndërtuar diçka ta gëzojë atë. Më pas në bazë të të gjitha rregullave, pasi të legalizohet shtëpia apo ndërtesa, le të futen në marrëdhënie kontraktuale me shtetin dhe privatin dhe të bëhet urbanizimi.
Henrik Zotaj (LZHK). Në zonën nr.39, Laprakë mbi dy të tretat janë familje të vendosura rishtas pas viteve ’90. Duke nisur që nga Kodër-Kamza, bregu i lumit e deri në Laprakë përparësia dhe pika e fortë e programit tim do të jenë legalizimet, të cilat do të bëhen duke regjistruar gjithë familjet e zonës nga minibashkia dhe më pas planimetria e vendosjes, përcaktimi i infrastrukturës rrugore, shkollave, kopshteve etj. Të gjitha këto do të bëhen në një periudhë 2-vjeçare dhe së bashku me legalizimin do të krijohet dhe infrastruktura e lagjeve. Kush mund të cenohet nga ndërtimi i infrastrukturës do të kompensohet ose do të kreditohet. Brenda kësaj kohe ato do të jenë qytetarë të dorës së parë dhe jo të dorës së tretë, siç janë sot.

Rezultatet e zgjedhjeve të 2001

Vili Minarolli PD 5831 vota ose 46.4%
Luan Shahollari PS 5534 vota ose 44.0%
Hekuran Braho PSD 273 vota ose 2.17%
Eduart Mullaraj AD 209 vota ose 1.66%
Sotiraq Naka PBDNJ 145 vota ose 1.15%
Dedë Qokaj PDK 139 vota ose 1.10%
Gjelosh Nikolla PBDKSH+P 139 vota ose 1.10%
Korab Ndreu PBDSH 105 vota ose 0.83%
Ferhat Shkurta PASH 87 vota ose 0.69%
Kastriot Harka PKSH 53 vota ose 0.42%

PD+BF 5783 vota ose 45.6%
PS 5334 vota ose 42.0%
PDR 449 vota ose 3.54%
PAA 286 vota ose 2.25%
PSD 175 vota ose 1.38%
PAD 134 vota ose 1.05%
PSKSH 98 vota ose 0.77%
PDK 89 vota ose 0.70%
PBD 82 vota ose 0.64%
PKSH 49 vota ose 0.38%

Majlinda Bregu
Ish-Spikerja që synon parlamentin

Majlinda Bregu kandidon si përfaqësuese e Partisë Demokratike në këto zgjedhje. Angazhimi i saj pranë partisë më të madhe opozitare ka lindur nga fakti se ajo është anëtare e KOP-it. Bregu ka lindur në Tiranë ku jeton aktualisht, është e martuar dhe ka një fëmijë. Majlinda Bregu është pedagoge e Fakultetit të Shkencave Sociale të Universitetit të Tiranës. Gjithashtu ajo është konsulente e mediave për programet sociale. Kandidatja e PD-së, Bregu mban titullin “Master në Punë Sociale” të Universitetit të Tiranës si dhe titullin “PhD në Sociologji dhe Fenomene Kulturore dhe Procese Normative”, të Universitetit “Carlo Bo” në Urbino, Itali. Para disa vitesh Majlinda Bregu ka qenë një nga gazetaret e njohura televizive, pasi për një kohë të gjatë ka punuar spikere në RTSH. Ajo zotëron shumë mirë tri gjuhë të huaja, anglisht, italisht dhe spanjisht.

Petrit Malaj
Dekani në garë për Laprakën

Petrit Malaj, aktualisht Dekan i Fakultetit të Artit Skenik që në vitin 1998, kandidon për herë të parë nën siglën e PS-së edhe pse nuk është anëtar i saj. Ka lindur në vitin 1961 në Vlorë, aktualisht banon në Tiranë, pikërisht në zonën zgjedhore ku kandidon. Eshtë i martuar dhe ka dy fëmijë. Malaj është një nga aktorët e njohur të filmit shqiptar dhe prej 20 vjetësh jep mësim në Akademinë e Arteve. Malaj është anëtar i disa bordeve e jurive me përmasa kombëtare si në këshillin drejtues të RTSH-së, ku është dhe zëvendëskryetar. Petrit Malaj është pjesëmarrës në një sërë aktivitetesh periodike evropiane e rajonale në fushën e artit. Ai ka marrë titullin Profesor në vitin 2004. Si aktor, Malaj ka luajtur role dhe në teatër. Ai është gjithashtu autor i shumë artikujve të botuar në shtypin e shkruar, ku ka trajtuar gjithmonë temën e artit në vendin tonë.

Sokol Axhemi
Nënkryetari i LSI në zonën 39

Sokol Axhemi kandidon si përfaqësues i LSI-së në zgjedhjet parlamentare të 3 korrikut. Ai është një figurë e njohur akademike. Ka lindur në qytetin e Shkodrës në vitin 1996. Eshtë i martuar. Studimet e larta i ka ndjekur në Degën e Gjeografisë. Axhemi ka qenë drejtor i Departamentit të Gjeografisë në Universitetin e Shkodrës, si dhe pedagog i Gjeografisë. Ka qenë lektor në 15 universitete të Evropës dhe Shteteve të Bashkuara të Amerikës. Aktualisht, Sokol Axhemi është senator në Universitetin e Tiranës, si dhe pedagog. Përfaqësuesi i LSI-së në zgjedhjet e 3 korrikut, Sokol Axhemi, ka qenë pjesë e kabinetit qeveritar në vitet 2000 deri në 2003, ku ka mbajtur postin e zv.ministrit të Arsimit dhe Shkencës. Aktualisht ai është nënkryetar i LSI-së.

Henrik Zotaj
Mjeku nën siglën e LZHK

Henrik Zotaj kandidon për herë të parë si përfaqësues i LZHK-së. Ka lindur në vitin 1970 në Mat, aktualisht banon në Tiranë. Ka qenë një nga studentët e lëvizjes studentore të dhjetorit ’90. Studimet e larta i ka kryer për Mjekësi. Në vitet 1996-2000 ka punuar si mjek në Bulqizë, ndërsa në vitet 2000-2003 ka punuar në shërbimin e onkologjisë paliative Tiranë. Që nga viti 2003 ai punon pranë shërbimit onkologjik në Tiranë. Henrik Zotaj ka qenë i angazhuar dhe më parë në politikë, ku nga viti 1995 deri në vitin 1999 ka qenë një nga drejtuesit kryesorë të PD-së në rrethin e Matit dhe Bulqizës. Përmendim faktin se Henrik Zotaj që nga viti 1999 e më tej është një nga drejtuesit e lëvizjes reformatore dhe një ndër drejtuesit e PDR-n, e cila ka qenë një parti e krijuar dhe e udhëhequr nga Dashamir Shehi.