PS-PD konkretizuan dje pikën kryesore të marrëveshjes së 30 dhjetorit, sipas së cilës palët do të hyjnë në zgjedhje me një ndarje të re të zonave zgjedhore.

Përfaqësuesit politikë, Sherifi e Bufi nga PS-ja dhe Rusmajli e Gjana nga PD-ja kanë konsistuar ngritjen e grupit të ekspertëve për hartën e re elektorale, në një takim në selinë e Prezencës së OSBE-së në Tiranë. Me ngritjen e këtij grupi nis konkretisht puna për ndarjen e zonave, e cila do të materializohet në një draft që pritet t’i përcillet Parlamentit në fund të muajit shkurt. Baza e ndarjes së re, ashtu si e përmban edhe marrëveshja, e cila i hapi rrugën miratimit të kodit të ri elektoral në Parlament, përfshin pjesëmarrësit në votimet e viteve 2000, 2001 dhe 2003. Grupi i ekspertëve përbëhet nga përfaqësuesit e dy partive të mëdha, Elmaz Sherifi e Ylli Bufi të PS-së, Ilir Rusmajli e Jemin Gjana të PD-së, si dhe nga ekspertët ndërkombëtarë. Në krye të grupit do të jetë një ekspert anglez, ndërsa në përbërje të tij ekspertë francez dhe estonez të cilët kanë nisur punën në prezencë të OSBE-së dhe të Këshillit të Evropës. Drafti do të punohet mbi bazën e ligjit, i cili përcakton kriteret e ndarjes, por edhe detajon probleme eventuale që mund të dalin gjatë procesit. Gjithsesi, përfaqësuesit politikë u shprehën dje, optimistë për realizimin e kësaj ndarjeje, sipas standardeve ndërkombëtare, duke mos përfillur një vendim të Gjykatës Kushtetuese që e shpall ligjin në fjalë, antikushtetues.

Problemet
“Mendoj që nuk ka shkak më për të paragjykuar dhe për të pasur pretendime për këtë çështje”, ka theksuar dje, pas takimit në OSBE, socialisti Sherifi. Por, demokratët duket se do të ndjekin me shumë vëmendje procesin, pasi, sipas Gjanës, debati është shumë i gjerë dhe i gjatë. Sipas tij, për disa nga pikat është rënë dakord, ndërsa për disa të tjera jo. Megjithatë, edhe ai ka qenë optimist kur ka deklaruar se ekspertët do të dinë t’i japin vendin e duhur secilit prej problemeve.

Kriteret
Tre kriteret mbi të cilat do të punojë grupi i ekspertëve janë ato që pranon ligji dhe, në këtë pikë, secila nga palët i referohet rekomandimeve ndërkombëtare për barazinë e numrit të zgjedhësve.

• PD, Jemin Gjana
  “Problemet e zonave zgjedhore, specifikat që do të kenë secili prej kritereve, po shkojnë drejt mesatares. Për disa nga pikat është rënë dakord, ndërsa për disa të tjera jo. Besoj se sipërmarrja nga ana e grupit të ekspertëve ndërkombëtarë për të shkuar drejt një ndarje të zonave është një sipërmarrje, e cila do t’i japë vendin e duhur secilit prej kritereve të përcaktuara, sipas radhës së rëndësisë që i ka përcaktuar ligji”.
• PS, Elmaz Sherifi
  ”Ka filluar puna për ndarjen e zonave zgjedhore, sipas ligjit të ri për këtë qëllim. Grupi i ekspertëve që do të punojnë është një ekip i ri, dhe janë edhe përfaqësuesit politikë. Puna do të realizohet edhe në prezencë të OSBE-së dhe të Këshillit të Evropës. Mendoj se nuk ka më shkak për të paragjykuar dhe për të pasur pretendime për këtë çështje. Palët kanë pranuar parimet ndërkombëtare dhe ekspertët do të bëjnë punën e tyre”.

Kërkohet korrigjimi i marrëveshjes
LSI-ja e LZHK, ankim në Kushtetuese për Kodin

Lëvizja Socialiste për Integrim dhe Lëvizja për Zhvillim Kombëtar, të cilat votuan kundër kodit të ri elektoral në parlament, do t’i drejtohen Gjykatës Kushtetuese. Kërkesa ka të bëjë me kundërshtimin e këtij kodi dhe vjen si një nismë e LSI-së, së cilës i bashkangjitet edhe LZHK-së. Një nga deputetët e LZHK-së, Dashamir Shehi, tha dje, se edhe kjo lëvizje do të dërgojë në Gjykatën Kushtetuese kundërshtimin e saj për mënyrën sesi funksionin kodi elektoral. “Do t’i drejtohemi gjykatës dhe, ndërkohë me këtë lëvizje, edhe komunitetit ndërkombëtar”, ka pohuar Shehi. Sipas tij, kjo kërkesë ka të bëjë me faktin se dy formacione të rëndësishme politike janë përjashtuar nga pjesëmarrja në zgjedhje, ende pa nisur fushata. “Eshtë një shkelje flagrante, pasi nuk ke mundësi të kesh as vëzhgues brenda komisioneve të numërimit dhe shpresojmë të marrim një përgjigje pozitive”, ka theksuar drejtuesi i LZHK-së, Dashamir Shehi. Ai i është bashkuar lëvizjes, duke u bërë edhe përfaqësues i saj në Kuvend. Gjithsesi, Shehi pohon se LZHK-ja, sido që të vijnë punët do të hyjë në zgjedhjet e ardhshme parlamentare. Përsa i takon kësaj pike, LSI-ja ka dhënë si alternativë mbrojtjen e votës dhe numërimin e tyre nga vetë lëvizja. Kodi i ri elektoral u miratua të hënën në Kuvend, në një seancë të jashtëzakonshme, me 92 vota pro, dhjetë vota kundër dhe pesë abstenime.