Deri tani KQZ-ja ka rrëzuar 70 ankesa nga 320 që kanë mbërritur gjithsej në këtë institucion

KQZ, rezultati më 23 korrik

Kodi Zgjedhor: KQZ merr vendim përfundimtar për kërkesën ankimore brenda 10 ditëve nga data e regjistrimit të saj

A.Rama

TIRANË-Shqyrtimi i ankesave të depozituara nga kandidatët dhe subjektet politike në Komisionin Qendror të Zgjedhjeve pritet të përfundojë brenda datës 23 korrik. Ndonëse deri tani janë regjistruar në KQZ në Regjistrin e Ankimeve Zgjedhore 320 ankesa për kundërshtim të tabelave të rezultateve dhe disa për pavlefshmëri, afati i fundit që përcakton Kodi Zgjedhor për të mbyllur shqyrtimin e tyre është data 23 korrik. Kështu, subjektet zgjedhore dhe kandidatët kanë të drejtë të depozitojnë në KQZ ankesa mbi vendimet e marra nga Komisionet Zonale Zgjedhore deri 10 ditë pas zhvillimit të zgjedhjeve, pra deri në datën 13 korrik. Ndërsa KQZ-ja duhet të shqyrtojë secilën ankesë brenda 10 ditëve nga koha kur ajo është depozituar pranë saj. Ndërkohë ankimimi i fundit lidhur me procesin zgjedhor të 3 korrikut është regjistruar në datën 10. Por duke parë numrin e madh të ankimimeve që janë depozituar për këtë proces zgjedhor, burimet nga KQZ-ja pohuan se mbyllja e shqyrtimit të tyre do të përfundojë deri në fund të javës që vjen. Duke llogaritur se afati i fundit për t’u ankuar në KQËZ është data 13 korrik dhe KQZ është e detyruar të vendosë brenda 10 ditëve nga dorëzimi i ankesës, del që në 23 korrik institucioni kryesor i zgjedhjeve të mbarojë pune me ankesat në 23 korrik. Gjatë kësaj jave pritet të përfundojnë të gjitha ankesat për kundërshtim të tabelave të rezultateve të miratuara nga KZZ-së, si dhe ankesat për mosmarrje vendimi për shpalljen e kandidatit fitues. Ndërsa më pas do të shqyrtohen ankesat e ardhura nga subjektet dhe kandidatët për shpalljen e pavlefshmërisë së zgjedhjeve në zona të caktuara. Deri dje në mbrëmje KQZ-ja ka rrëzuar gati 70 ankesa, të cilat kanë pasur si objekt kundërshtimin e tabelës së rezultateve të proporcionalit në qendra të ndryshme votimi, apo edhe në mjaft zona elektorale. Shumica e ankesave që janë rrëzuar me votat unanime të 7 anëtarëve të KQZ-s. Kanë qenë të partive të vogla, të cilat kanë kontesuar rezultatet e deritanishme të proporcionalit. Konkretisht vetëm dje janë rrëzuar 10 ankesa të LZHK-së që kishin si objekt kontesimin e rezultave të proporcionalit. Ndër kërkesat e rrëzuara nga KQZ-ja me votim unanim, është edhe ajo e kandidates socialiste në zonën 90, Makbule Çeço, e cila kundërshtonte vendimin e KZZ-së për shpalljen të pavlefshme të 2 kutive të votimit. KQZ-ja la në fuqi vendimin e KZZ-së, duke shpallur fitues kandidatin e PD-së, Genc Ruli. Po kështu janë rrëzuar edhe ankesat e kandidatëve Neritan Sejamini i PD-së dhe Mark Nikolli i PS-së, të cilët kundërshtonin rezultatet përkatësisht në KZZ-në 42 në kryeqytet dhe të KZZ-së 15. Ndërkaq shpejtësia në përfundimin e shqyrtimit të ankesave do të jetë në dorë të Kolegjit Zgjedhor, i cili vetëm dje ka filluar shqyrtimin e 3 ankesave të para që kanë ardhur nga subjektet dhe palë të tjera të interesuara, pas vendimeve të shpallura nga KQZ-ja. Pritet që shumica e ankesave që do të shqyrtojë KQZ-ja, me përjashtim të atyre që janë për shpallje vendimi për kandidatët fitues, të apelohen në Kolegjin Zgjedhor.


Neni 146
E drejta e ankimimit
Çdo subjekt zgjedhor ka të drejtë të ankohet në KQZ, kundër vendimeve të KZZ-së që cënojnë interesat e tyre të ligjshme brenda dy ditëve nga data e shpalljes së vendimit.


Neni 161
KQZ-ja merr vendim përfundimtar për kërkesën ankimore brenda 10 ditëve nga data e regjistrimit të saj.

http://www.balkanweb.com/gazeta/gazeta.htm

Faqja 4 - POLITIKE

Korrik 12, 2005

Hidhen poshtë 50 ankesa nga 320 e mbërritura në KQZ

KQZ: Jo rinumërim të votave në proporcional

Blerina Gjoka Rinumërimi i proporcionalit deri më tani nuk ka gjetur mbështetje nga KQZ-ja e cila ka rrëzuar çdo kërkesë të partive që kërkon rikthim numërimit të votave për partitë. Gjithashtu KQZ-ja ka hedhur poshtë 50 kërkesa nga 320 ankesa që kanë mbërritur në zyrën e saj. Tre të katërtat e këtyre ankesave kanë të bëjnë me pakënaqësitë e partive të vogla për proporcionalin. LAJMI Më shumë se 250 ankesa të partive të ndryshme kërkojnë me këmbëngulje rinumërim të votave në proporcional duke pretenduar për vjedhje të votave nga dy partitë e mëdha PS e PD. Por, rinumërimi i votave në proporcional nuk po sheh akoma dritën jeshile nga KQZ-ja, ndërkohë që në dyert e këtij institucioni vazhdon të rritet fluksi i ankesave për këtë çështje. Vetëm ditën e djeshme kanë ardhur 17 ankesa nga LZHK-ja, 5 nga LSI dhe 2 nga PAA për rinumërim të votave në qendra të veçanta numërimi. Burime pranë KQZ-së pranojnë jozyrtarisht se nuk ka shpresa për një rikthim të procesit të numërimit në proporcional. Sipas këtyre burimeve procesi zgjedhor do të futej në kolaps nëse do të rikthehej numërimi i votave në atë masë që kërkohet nga partitë. Deri më tani të gjitha ankesat që bazohen tek kjo kërkesë janë rrëzuar nga KQZ-ja, ndërkohë që mbeten për t'u shqyrtuar dhe dhjetra të tjera. Rrëzimi LZHK-ja dhe LSI-ja janë më këmbëngulëse në këtë proces ankimimi, por asnjë kërkesë e tyre nuk është pranuar deri më tani nga anëtarët e KQZ-së. Në mbledhjet e ditës së djeshme KQZ në mënyrë unanime ka cilësuar si të pabaza kërkesat për rinumërim votash në sistemin proporcional, një sistem ky që ka nxjerrë në krye të klasifikimit Partinë Republikane dhe atë Socialdemokrate duke lënë pas dy partitë e mëdha PS e PD. Për proporcionalin kanë mbetur ende 3 zona pa nxjerrë tabelat e rezultateve, rezultate të cilat mund të ndryshojnë pak përqindjet aktuale të partive. Sipas zëdhënësit të KQZ-së Erton Sinani megjithëse ka një shqyrtim të përshpejtuar të ankesave nga 320 të tilla vetëm 80 ankesa janë shqyrtuar. "KQZ po përpiqet që në një kohë sa më të përshpejtuar të shqyrtohet pjesa e mbetur e ankesave, për të mos vonuar dhënien e rezultatit përfundimtar për zgjedhjet e 3 korrikut", tha Sinani. Megjithëse volumi i punës në këtë komision është rritur ndjeshëm këto ditë sipas Sinanit KQZ-ja pretendon të përfundojë shqyrtimin e të gjitha ankesave paszgjedhore brenda javës së ardhshme për të mundësuar më pas shqyrtimin e kërkesave për pavlefshmëri të zgjedhjeve në zona të caktuara. Të gjitha subjektet dhe kandidatët kanë të drejtë të ankimojnë ankesa për procesin deri më datën më 13 Korrik. Propocionali LZHK-LSI dhe disa parti të tjera të vogla të majta dhe të djathta janë bashkuar në të njëtin qëndrim për të rikthyer numërimin e proporcionalit duke besuar se u janë vjedhur votat në mënyrë masive nga partitë e mëdha PD e PS. Dy ditë më parë krerët e këtyre partive organizuan një tryezë dhe i kërkuan KQZ-së që të rikthente numërimin e votave. LZHK dhe LSI nuk kanë pasur komisionerë në KZZ dhe akuzojnë komisionerët e PD-së e PS-së se në bazhkëpunim kanë vjedhur votat që kanë qënë për subjektin e tyre. Nuk bën pjesë në këtë lobing vetëm PR-ja dhe PSD-ja, të cilat kanë qënë më të përfituarat nga zbatimi i skemës së "Dushkut" duke marrë votat nga simpatizantët e partive të mëdha. Ndërkaq, në rezultatet përfundimtare për 93 zona sipas të dhënave të KQZ-së PR rezulton në krye të listës me 20.08 përqind e ndjekur nga PSD me 12.61 për qind. Renditja për partitë e tjera vijon si më poshtë: LDLNJ 0.6 %, PBK 0.57 %, PAD me 4.9 %, PDR 7.65, PDK 3.22%, PR 20.08%, LZHK 3.43%, LSI 8.12 %, PAA 6.47%, PBNJD, PDS 4.33 %, PD 7.86%, PSD 12.61 % e PS me 8.97%. Meta: S'njoh zgjedhjet nëse s'rinumerohen votat LSI-ja ka akuzuar sërish KQZ-në se nuk po merr parasysh kërkesat dhe provat e dërguara nga kjo parti në KQZ për vjedhjen e votave në propocional. Kjo parti ka mbledhur dje kryesinë për këtë çështje duke e vendosur se nëse nuk i merren parasysh kërkesat nga KQZ-ja atëherë kjo parti nuk do t'i njohë zgjedhjet e 3 korrikut. Këtë e pohoi dhe kryetari i partisë Ilir Meta, i cili mori si shembull provën që vjen nga një qendër votimi, procesverbali i së cilës ka dy shifra të ndryshme për votat e LSI-në. Në fillim të procesverbalit është numri 70 vota për LSI-në ndërsa në fund të tij në rezultatet përfundimtare është nurmi 0 për votat e LSI-së. Ndërkaq LSI-ja ka akuzuar KQZ-së se po përdoret politikisht dhe se nuk merr parasysh asnjë provë që dërgon në komision përfaqësuesi juridik i LSI-së. Meta deklaroi se është i bindur se "KQZ nuk është më institucioni që do të çertifikojë zgjedhjet, por ka marrë për detyrë çertifikimin e vjedhjeve të 3 korrikut". Sipas numrit një të LSI-së provat janë të dukshme dhe të pakundërshtueshme dhe ato tregojnë qartë se në zona të caktuara dhe në qendra të caktuara numri i votave del më i lartë se numri i votuesve. Sipas Metës "reagimi i KQZ-së në bllok 7 me 0 kundër të gjitha ankesave dhe kundër marrjes në shqyrtim edhe të provave që ne kemi ofruar tregon se KQZ po kthehet në një institucion kriminal". Shehi mbledh sot të 100 kandidatët LZHK, gati kundërshtimin e ndarjes së propocionalit Drejtuesi Ekzekutiv i Lëvizjes për Zhvillim Kombëtar Dashamir Shehi do të mbledhë sot 100 kandatët që konkuruan në zgjedhjet parlamentare të 3 korrikut. Qëllimi i kësaj mbledhjeje është paraqitja dhe grumbullimi i të gjitha parregullsive të vërejtura prej tyre në ditën e zgjedhjeve që vërtetojnë manipulimet e bëra ditën e zgjedhjeve për votat e sistemit proporcional. Të dhënat do përdoren kundër vendimit të KQZ për propocionalitn që e lë jashtë Kuvendit LZHK. Burime pranë kësaj lëvizjeje bëjnë të ditur se ankesat të domukentuara me faktet që vërtetojnë shkeljet e kryera do të kalojnë në Komisionin Qendror të Zgjedhjeve, për shqyrtim. Më pas do të jetë edhe Kolegji Zgjedhor që do të merret me këto shkelje të evidentuara. Më pas të gjitha dokumetat që vërtetojnë manipulimet e pretenduara nga kandidatët e për deputetë të LZHK-së do të depozitohen edhe në institucionet ndërkombëtare që kanë monitoruar procesin zgjedhor në 3 korrik. LZHK i qëndorn kërkesës së saj për të bërë të mundur rinumërimin e votave në sistemin proporcional. Në deklarat e bëra vazhdimisht pas ditës së zgjedhjeve drektuesit e kësaj force kanë akuzuar dy forcat e mëdha politike PS dhe PD për vjedhjen e votave dhe manipulimin e tyre në sistemin proporcional. Edhe dje gjatë një konference për shtyp, zëdhënësi i Fushatës elektorale Adi Veliu u shpreh se së bashku me LSI-në dhe forca të tjera është në bashkëveprim të plotë për të mbrojtur votat e shqiptarëve.

 

KZZ numër 2 bllokohet sërish. Vendimi shpejt në dorën e KQZ

KQZ: Mund të rivotohet në zonën 2 në Shkodër

U bllokuan 17 qendra votimi në zgjedhje

Rezarta Delisula Zona Zgjedhore numër 2 në Malsinë e Madhe është "delja e zezë" e zgjedhjeve parlamentare të vitit 2005. Në 17 qendra votimi zgjedhjet nuk u zhvilluan ndërsa edhe te ato qendra ku votimi shkoi normalisht, Komisioni Zonal Zgjedhor krijoi probleme në bllokimin e rezultateve. Vetëm para disa ditësh Komisioni Qendor Zgjedhor kërkoi ndjekje penale për 7 komisionerët, të cilët nën akuzën "Për bllokim të procesit Zgjedhor", rrezikojnë 6 deri në dy vjet burgim. Nga KQZ-ja mësojmë se komisioni zonal zgjedhor i riu është ngritur, por ende nuk është marrë një vendim nga KQZ-ja se çfarë do të ndodhë me këtë zonë. Zgjedhje në 17 qendra apo në të gjithë zonën 2? Të dyja mundësitë nuk përjashtohen nga KQZ-ja ndërsa brenda javës do të merret një vendim për këtë zonë e cila ka bllokuar maxhoritarin dhe propocionalin. Në këtë zonë kandidojnë Astrit Bushati për Partinë Demokratike dhe Pal Leraj për Partinë socialiste. Kodi Zgjedhor i jep mundësi KQZ të që anullojë të gjitha zgjedhjet në këtë zonë në rast se numri i qendrave të votimit që janë ende pa votuar mund të ndikojë në rezultatin e përgjithshëm të zonës dhe të zgjedhjeve. Në këtë zonë, KZZ e vjetër nuk mundi të merrte asnjë vendim duke krijuar problem për shpalljen e vendimit për mazhoritarin por edhe për llogaritjen e propocionalit. Për këtë arsye KZZ vendosi që të padisë për ndjekje penale të 7 komisionerët dhe u kërkoi partive që të emëronin 7 komisionerë të tjerë. Ata kanë disa ditë që po merren me shqyrtimin e çështjeve të mbetura pezull dhe nuk po gjejnë asnjë zgjidhje. KQZ mendohet që të presë edhe sot në marrjen e një vendimi nga ana e KZZ numër 2. Në rast nuk del asnjë rezultat atëherë KQZ do të vendosë përfundimisht se çdo bëjë duke u bazuar në Kodin Zgjedhor. Balancat Zona 2 pritet të bëhet skena e lojrave politike mes të majtës dhe të djathtës. Megjithëse nuk është pranuar flitet se në këtë zonë do të varet dhe hyrja apo jo e LZHK në parlamentin e ardhshëm. Nëse ndonjë nga partitë e mëdha e ndihmon atë që të fitojë votat e nevojshme për të arritur në 4 përqind atëherë skema e shpërndarjes së mandateve në propocional ndryshon. Të majtët dhe të djathtët humbin nga një vend për shkak se LZHK merr minimumi 2 deputetë. Ndërkohë nëse rivotohet e gjithë zona 2 në Shkodër vihet në diskutim edhe rezultati në mazhoritar. Megjithëse Astrit Bushati i PD-së në këtë zonë është në avantazh, ai është në minorancë nëse bashkohen votat e PS dhe të LSI atëherë kandidati i PS del në avantazh të ndjeshëm. PD (në 40 qendra nga 70) ka 45.7% ndërsa PS dhe LSI së bashku kanë 50.4% kjo pa marrë parasysh edhe votat e aleatëve më të vegjël si PAA, apo PSD të cilat edhe pse kanë një numër të vogël votash në mazhoritar nuk janë tërësisht të parëndësishme. Nëse ndodh një bashkim i së majtës në këtë zonë ka shumë gjasa që Pal Lera ti shtohet listës së kandidatëve të PS që vijnë nga Shkodra duke e çuar numrin e tyre në 3 po të kihet parasysh edhe zona 1 në Malësinë e Madhe ku fitoi Paulin Sterkaj dhe zona 7 në Velipojë dhe Bushat ku fitoi kandidati Tom Doshi. Por mund të ndodhë që e majta të vazhdojë të qëndrojë e ndarë dhe në këtë mënyrë kandidati i PD-së Astrit Bushati e ka rrugën e hapur për të fituar në këtë zonë. E gjithë kjo skemë është në dorën e KQZ e cila do të vendosë nëse do të votohet në të gjitha qendrat e votimit të zonës 2 në Shkodër apo vetëm në 17 qendrat e votimit që u bllokuan në datën 3 korrik dhe nuk mundën që të votojnë për shkak të përplasjeve mes komisionerëve. Përplasje në KZZ e zonave për procesverbalet Zgjedhjet, peng të 5 zonave KQZ s'ka nxjerrë ende rezultatet Pesë zona zgjedhore nuk kanë nxjerrë rezultatin përfundimtar të zgjedhjeve të 3 korrikut. Komisionet Zonale Zgjedhore numër 2, 64 dhe 100 nuk kanë firmosur tabelën përfundimtare të kandidatëve, ndërsa KZZ-të nr.2 dhe 92 atë të propocionalit. Komisioni Qendror Zgjedhor brenda kësaj jave duhet të jap verdiktin mbi rezultatet në këto zona. Tabelës përfundimtare të zgjedhjeve për partitë dhe aleancat, pra propocionalit, i mungojnë dy zona. Deri më tani janë përllogaritur 98 zonat me përjashtim të KZZ-së 2 dhe 92 ku komisionerët nuk kanë firmosur tabelën përfundimtare. Mosfirmosja e tabelës përfundimtare për kandidatët është ajo që shkakton më shumë shqetësime. Nërkaq edhe pa pasur një ligjërim të rezultateve kanë ardhur kërkesa për pavlefshmërinë e zgjedhjeve në këto zona. Përveç zonës 2 ku janë Bushati i PD-së dhe Leraj i PS-së, kemi zonën 64 ku kandidojnë Ilir Bano i Partisë Demokratike dhe Ethem Ruka i Partisë Socialiste. Ndërkaq në zonën 100 janë Grigor Pasko i PD-së dhe Stefan Çipa i PS-së. Në zonën 100 një peshë të madhe ka pasur kandidati i pavarur që u mbështet nga PBDNJ-ja Thoma Miço i cili ka depozituar pranë KQZ-së një kërkesë për pavlefshmërinë e zgjedhjeve në këtë zonë. Një tjetër ankesë për pavlefshmërinë e zgjedhjeve është bërë edhe për zonën 92 nga kandidati i Partisë së Bashkimit të të Drejtave të Njeriut Spiro Ksera. Në këtë zonë kandiduan Vangjel Tavo i Partisë Socialiste dhe Artur Roshi i Partisë Demokratike. Deri më tani në KQZ janë depozituar 24 ankesa për pavlefshmërinë e zgjedhjeve në disa zona të vendit.