Nën moton “Ne bëjmë shtet”, LZHK-ja ka vazhduar fushatën e saj zgjedhore, duke prezantuar kandidatët për deputetë në mjaft zona elektorale. Drejtuesi i fushatës elektorale, Dashamir Shehi ka qenë në Tepelenë, ku ka prezantuar kandidatin për deputet të LZHK-së, Hysni Kaleci. Ndërsa Leka Zogu ka prezantuar në Laç dhe Fushë-Krujë kandidatët për deputetë, Gjon Kola dhe Eduart Ypi, për të ardhur në Tiranë në zonën 36 ku ka prezantuar kandidatin, Shpëtim Rroqi. Gjithashtu Dashamir Shehi ka qenë dje edhe në Shkodër, ku ka prezantuar kandidatin Virtyt Sokolaj. Në të gjitha këto takime drejtuesit e LZHK-së u kanë bërë thirrje zgjedhësve të këtyre zonave, që të votojnë LZHK-në, pasi është e vetmja alternativë, e cila vendos shtetin ligjor, lufton korrupsionin dhe krimin e organizuar.

 

Faqe 6/7 - Politikë

forum

zgjedhje 2005

Profili i katër kandidatëve të Fierit Çaçi, Gjini, Cërra dhe Dushi

Zona 66, gara per ndryshimin e qendres

Gezim Hajdini/ fier

Zona elektorale nr.66 përfshin tri lagje të qytetit të Fierit dhe është një nga zonat urbane më problematike në të gjitha aspektet, në infrastrukturë, ekonomi, probleme sociale etj. Në zgjedhjet parlamentare të tre korrikut janë përballë njëri-tjetrit kandidati i PS-së, Albert Çaçi, kandidati i PD-së, Viktor Gjini, kandidatja e LSI-së, Vezire Dushi si dhe kandidati i LZHK-së, Thanas Cërra. Kjo zonë ka njohur ndryshime jo të vogla demografike dhe ndërtime të reja, të cilat kanë nevojë për urbanizim. Papunësia është një tipar dallues për këtë zonë si dhe për Fierin në përgjithësi, për arsye se një numër i madh punonjësish janë shkurtuar nga vendet e punës në ish-ndërmarrjet e mëdha si uzina e Ballshit, azotiku etj. Në premtimet e kandidatëve të katër forcave kryesore nuk vihet re ndonjë platformë konkrete për punësimin, ndërkohë që u mëshohet premtimeve për infrastrukturën dhe sigurimin e ujit e dritave. Ajo që vihet re në përballjen e katër kandidatëve, duket se është civilizimi që përcjell gjithë garën. Të katër kandidatët kanë shpallur si prioritet përkushtimin ndaj elektoratit në Parlamentin e ardhshëm. Në zgjedhjet e kaluara, kandidati i përbashkët i PD-PR-së, Mediu pati dalë i dyti me 4 418 vota, kundrejt 6 855 votave që mori Çaçi. Sot, kandidati i PD-së, Gjini mendon se ka ardhur “koha për ndryshim”, ndërsa Çaçi garon për mandatin e dytë.   Me pretendimin se janë “autoktonë” jo vetëm nga fakti se janë lindur dhe rritur në zonën ku kandidojnë, katër kandidatët mendojnë se kanë edhe shumë arsye të tjera që meritojnë votën më 3 korrik. Edhe nga përgjigjet e tyre, vihet re se gara më e fortë mbetet ajo mes kandidatit të PS-së, Çaçi dhe atij të PD-së, Gjini. Të katër kandidatët pretendojnë se i njohin shumë mirë nevojat në zonë dhe se kanë platforma të qarta për zgjidhjen e problemeve. 1-Cilët janë zgjedhësit që do të votojnë për ju? Albert Çaçi (PS). Mund të them se jam lindur e rritur në Fier dhe familjen time e kam këtu. Lidhjet e ngushta me njerëzit përbëjnë një nga cilësitë e mia më të mira. Zgjedhësit që do të votojnë për mua janë banorët e lagjeve të zonës ku kandidoj, qytetarë të thjeshtë, të reja e të rinj, pjesa intelektuale e qytetit dhe gjithë ata që kërkojnë të vazhdojnë punën e nisur. Pa dyshim janë votues, të cilët më kanë besuar votën 4 vjet më parë, kur ende nuk më njihnin mirë, ndërsa sot me përvojën time dhe punën time 4-vjeçare, mendojnë se kam bërë diçka. Të gjithë zgjedhësit që kërkojnë të përqafojnë alternativën dhe vizionin socialist në të ardhmen, do të jenë zgjedhësit e mi, por në Parlamentin e ardhshëm, do t’i konsideroj njësoj të gjithë. Viktor Gjini (PD). Së pari vendosa të kandidoj, sepse jam i bindur se Shqipërisë i duhet një ndryshim i madh si kusht i vetëm për t’u ndarë nga e tashmja, nga izolimi dhe për të hyrë në Evropë, ku ne të gjithë aspirojmë. I bindur se mund të kontribuoj për këtë ndryshim vendosa të kandidoj. Kam zgjedhur këtë zonë elektorale, sepse jam banor i saj, i njoh hallet dhe problemet e banorëve. Falë dhe profesionit tim si mjek mendoj se kontribuoj më mirë këtu se në ndonjë zonë tjetër. Gjithsesi, kandidimi ishte fryt i bashkëpunimit midis meje dhe PD-së. Zgjedhësit që do të votojnë për mua do të jenë të gjithë ata që kërkojnë ndryshim, dhe mendoj se tashmë ka ardhur koha. Vezire Dushi (LSI). Mund të kisha kandiduar në çdo zonë tjetër, por fakti që familja ime banon në lagjen “1 Maj” të qytetit të Fierit, dhe fakti që është zona ku mund të kontribuohet më shumë për shkak të neglizhencës së pushtetit për rrethinat, më shtyu të kandiddoj pikërisht këtu. Zgjedhësit që do të votojnë për mua janë të gjithë ata që kërkojnë ndryshim dhe një forcë të re në politikën shqiptare, janë të rinj e të reja, qytetarë të thjeshtë, punëtorë, të papunë, intelektualë që kanë besim te forca e re e politikës shqiptare, ndaj dhe slogani ynë është “Forcë e re, Shqipëri e re”. Ne jemi alternativa më progresiste që do të sjellë ndryshimin e politikës shqiptare. Thanas Cërra (LZHK). Mendoj se do më votojnë ata zgjedhës, të cilët kanë probleme sociale. Mbi të gjitha mendoj se Shqipëria ka nevojë për një shtysë morale, ku energjitë që ekzistojnë në masivitet të drejtohen nga një forcë që u jep dinjitet shqiptarëve për emrin e tyre, dhe të mos tentojnë më të kërkojnë viza, lotari amerikane e kanadeze, të ikin nga sytë këmbët, por të jetojnë këtu tek ne. Janë ajo pjesë e elektoratit që kërkon ndryshim, i cili duhet të vijë brenda vendit. 2- Ku mbështetet platforma juaj elektorale? Albert Çaçi (PS). Ne kemi një sërë projektesh, që kanë arritur në një pikë të caktuar, të cilat premtoj t’i përfundoj. Të gjitha projektet që kemi nisur do të mbarojnë në këtë 4-vjeçar të një mandati të ri elektoral. Platforma elektorale bazohet në epërsinë që ka politika e jashtme dhe e brendshme e PS-së, alternativat dhe vizioni i qartë që ka ajo për të ardhmen shqiptare. Gjithashtu nuk mund të lë pa përmendur edhe punën time, me përkushtim, 4 vjet si deputet i zonës. Për këtë kam guximin dhe besimin që të jem sërish forca e zërit të këtyre banorëve në Parlament. Vetëm programi i PS-së ka alternativa të qarta zhvillimi për të ardhmen. Viktor Gjini (PD). Kam dëgjuar shumë premtime nga kandidatët e tjerë, të forcave të ndryshme politike, sikur të jenë duke kandiduar për kryetarë bashkie. Brenda këtyre premtimeve unë shoh 2 elementë. E para, shoh elementin butaforik dhe propagandistik të fushatës, dhe e dyta, konstatoj mungesë respekti për qytetarët, pasi ato janë premtime që nuk lidhen fare me fushën e deputetit, alternativave të qarta zhvillimi për të ardhmen e Shqipërisë. Besoj se alternativa e PD-së ka qenë dhe do të jetë më e mira dhe natyrisht, në këto zgjedhje, alternativa e fitores. Unë besoj te platforma elektorale që mbështetet në programin e zhvillimit të vendit, hartuar nga specialistët më të mirë të PD-së. Kjo kohë kërkon angazhim të madh dhe njerëz seriozë, të ndershëm për të marrë përsipër fatet e vendit. Vezire Dushi (LSI). Në radhë të parë mbështetet në nevojën imediate për ndryshim në politikën shqiptare dhe në fytyrën e re të përfaqësuesve të popullit, si domosdoshmëri e momentit, e kuptuar dhe nga populli. Në faktin që përfaqësoj një forcë të re, dalja e së cilës ishte pasojë e kësaj nevoje për ndryshim, në besimin se, nga pikëpamja profesionale, morale dhe qytetare, përbëj një figurë politike të pa konsumuar, dhe të palidhur me “të keqen” që ka zënë politikën shqiptare. Kjo “e keqe” është servilizmi politik, i cili pengon zërin ndryshe nga liderët që janë bërë si Zeus në Shqipëri. Ne jemi një forcë e re, me njerëz të rinj e të përkushtuar, që do të dimë të ndryshojmë Shqipërinë. Thanas Cërra (LZHK). Platforma jonë mbështetet në atë që i krijohet Shqipërisë nëpërmjet një angazhimi intelektual, bashkëpunimit mes forcave më tradicionale të djathta dhe i një përvoje, të cilën Shqipëria e ka kaluar, të paktën në kohën e pushtetit të mbretit Zog, atëherë kur është krijuar shteti i parë shqiptar dhe ka pasur një forcë, nën të cilën shqiptarët kanë pasur dinjitet për emrin shqiptar. Kjo do realizohet nëpërmjet disa pikave të LZHK-së, si krijimi i një platforme ekonomiko-sociale, rivendosja dhe rikthimi i pronave, rikthimi në normalitet i politikës ku shteti të jetë shtet, madje edhe masën e dënimit me vdekje të paktën për 5 vjet, pasi tashmë monopolet dhe mungesa e një kodi fiskal bëjnë që të qarkullojnë para dhe kapitale të tilla, që nuk vlerësojnë punën e ndershme. 3-Cilat janë problemet në zonë dhe cili do të jetë angazhimi juaj në zgjidhjen e tyre? Albert Çaçi (PS). Edhe pse zona elektorale është urbane dhe jo rurale, sërish ka ende shumë probleme. Në mandatin e shkuar kemi realizuar shumë nga projektet e hartuara dhe në në mandatin që vjen premtojmë të vazhdojmë punën e nisur. Ky është edhe slogani im elektoral. Ne kemi një sërë projektesh, të cilat janë në një pikë të caktuar dhe premtoj t’i përfundoj. Fillimisht premtoj ndërtimin e 3 autostradave të reja, mbarimin e rikonstruktimit të gjithë akseve rrugore të Fierit. Do të hapet gjithashtu një universitet, pasi Fieri, një qytet i kategorisë së parë, meriton ngritjen e një shkolle të lartë. Do ketë energji elektrike 24 orë, do të ndërtohen komplekse të reja sportive, pra këtu do të bëhet një transformim i qytetit të Fierit. Të gjitha projektet që ne kemi nisur do të mbarojnë në këtë 4-vjeçar të ri elektoral. Viktor Gjini (PD). Zona ku unë kandidoj ka shumë probleme, si në infrastrukturë, mungesë të energjisë elektrike dhe uji të pijshëm, etj. Ajo që u premtoj qytetarëve dhe zgjedhësve të mi është se do të jem avokati i tyre, zëri i tyre në Parlament dhe në qeveri, pavarësisht se cilës force politike i përkasin ata. Në radhë të parë do të vë interesat e qytetarëve dhe pastaj interesat e PD-së. Ky është premtimi më i madh që u bëj qytetarëve; do të jem gjithnjë në anën e tyre dhe jo në atë të pushtetit, pavarësisht se kujt do t’i përkasë ky pushtet. Për të gjitha këto probleme unë ofroj zgjidhje maksimale në dobi të jetës së komunitetit të zonës sime në veçanti dhe krejt shqiptarëve në përgjithësi. Vezire Dushi (LSI). Premtimet janë të lidhura me programin politik të forcës që përfaqësoj, e cila ka marrë angazhime në fushën e arsimit, punësimit, energjisë, tatimeve, integrimit evropian dhe infrastrukturës. Unë impenjohem në evidentimin e të gjitha familjeve në nevojë, në numrin real të të papunëve në funksion të politikave ndihmuese, ndërmarrjen e iniciativave ligjore për ndryshimin e ligjit “për urbanistikën” dhe në legjislacionin e tenderimeve në investimet publike për vendosjen e klauzolave, që do të bënin të domosdoshëm pëlqimin e komunitetit për marrjen në dorëzim të punimeve të ndërtuara me taksat e tyre. Do angazhohem në ndërhyrjen pranë organeve të pushtetit vendor dhe qendror për ndërmarrjen e iniciativave për rehabilitimin e lumit Gjanica, heqjen e tregjeve nga ky lum dhe vendosjen e tyre në vende të përshtatshme, në ndërhyrjen për ndërtimin e ambienteve sportive pranë stadiumit të lojërave, dhe në verifikimin e mënyrës së përdorimit të fondeve për pastrimin e qytetit. Thanas Cërra (LZHK). Po të kemi parasysh disa spote publicitare të partisë në pushtet, që tregojnë se janë bërë këto ose ato ndërtime, them se të gjitha këto janë demagogji. Shumë rrugë të lagjes “1 Maj” janë kthyer në shtigje për banorët, ka probleme të furnizimit me energji elektrike, ujë të pijshëm dhe duke mos pasur asnjë perspektivë të qartë për të nesërmen e tyre, shumë të rinj, e shohin të ardhmen larg Shqipërisë. Duket sikur këtu nuk ka diell, ndërsa në vende të tjera ka. Nuk e kuptoj gjithë këtë varfëri ekonomike dhe shpirtërore. Të gjitha këto probleme, duke filluar nga ato sociale, kulturore, shpirtërore dhe sportive, gjejnë zgjidhje te platforma e LZHK-së. Në radhë të parë të bëjmë shtet, pastaj vijnë zgjidhjet e problemeve. 4-Vlerësimi për rivalët tuaj? Albert Çaçi (PS). Për të gjithë kandidatët kam mendimin më të mirë, pavarësisht forcave dhe bindjeve politike që kanë. Mendoj se duhet të bëjmë një fushatë të rregullt qytetare brenda të gjitha ligjeve dhe të respektojmë Kodin Zgjedhor, madje për këtë gjë u kam bërë thirrje kandidatëve të zonës për bashkëpunim. Natyrisht, rivali im kryesor është kandidati i PD-së, Viktor Gjini, të cilin e respektoj. Për rivalen e LSI-së, Vezire Dushi, kam mendimin se është një notere e zonja dhe një grua me dinjitet, por mendoj se ka ikur koha e sharjeve dhe fyerjeve në politikën shqiptare. Viktor Gjini (PD). I respektoj si qytetarë të nderuar të qytetit, por nuk kam lidhje me kandidatët e tjerë. Fitoren nuk e bazoj te gara e rivalëve, por te puna me qytetarët, për t’i bindur që jam kandidatura më e mirë, për të cilën duhet të votojnë. Kam shpresa për një fushatë të qytetëruar, civile dhe mendoj se vetë niveli i votuesve kërkon një gjë të tillë. Për sa i përket kandidatit të PS-së, unë ndjej rivalitet, pasi Çaçi është rivali im kryesor. Unë nuk mund ta mohoj këtë gjë, madje është për t’u vlerësuar. Vezire Dushi (LSI). Përballë meje nuk shoh kandidatë, por subjektet që ata përfaqësojnë. Duke i parë zgjedhjet si garë dhe jo si luftë nuk ndjej frikë për asgjë, madje i shikoj si një përvojë që do të fitoj në rrugën që kam nisur. Unë habitem me kandidatin e PS-së, Albert Çaçi që del në çdo inaugurim që bëhet me investimet, duke na i servirur si dhurata të tij personale. Madje do të doja të pyesja kryetarin e bashkisë Fier, se ç’bëhet me taksat që ne paguajmë kur çdo gjë e paskemi dhuratë nga Albert Çaçi? Theksoj se për disa vjet me radhë, nga ky deputet nuk është paraqitur asnjëherë ndonjë kërkesë me shkrim në Këshillin Bashkiak me iniciativën e vet personale dhe në mbështetje të ndonjë nevoje të komunitetit. Megjithatë, mund të them se i respektoj të gjitha kandidaturat e hedhura në zonë. Thanas Cërra (LZHK). Nuk kam asgjë personale me rivalët e mi, madje i konsideroj si njerëz që, sikurse edhe unë, besoj se dëshirojnë që qyteti të ecë në ritme normale. Mendoj që qenia si deputet prej 4 vjetësh i kandidatit të PS-së, Albert Çaçi, nuk përbën ndonjë fakt ku del në pah puna e tij, megjithëse ai trumbeton shumë për investime. Mungesat tona të përditshme janë fakti se ai nuk e ka kryer punën e tij siç duhet. Kandidatin e PD-së, Gjini nuk e njoh politikisht se si vepron, por besoj që ka ide.   Rezultatet e zgjedhjeve të 2001 Albert Çaçi, PS 6 855 vota ose 53.7% Fatmir Mediu, PR 4 418 vota ose 34.6% Engjell Bejtaj, PSD 567 vota ose 4.44% Artan Koçi, AD 288 vota ose 2.25% Stefan Çeku, PDR 226 vota ose 1.77% Viktor Bitri, PKSH 174 vota ose 1.36% Kristaq Qirushi, PBDNJ 102 vota ose 0.80% Zhaneta Zylalaj, PASH 44 vota ose 0.34% Jani Pipa P.KONS 40 vota ose 0.31% Muharrem Memushi, PDK 33 vota ose 0.25% PS 6 876 vota ose 54.2% PD+BF 3 600 vota ose 28.3% PLKSH 606 vota ose 4.78% PDR 436 vota ose 3.43% PAD 247 vota ose 1.94% PSD 247 vota ose 1.94% PBDNJ 233 vota ose 1.83% PAA 138 vota ose 1.08% PKSH 88 vota ose 0.69% PSKSH 38 vota 0.30%   Albert Çaçi Ekonomisti që synon mandatin II Albert Çaçi kandidon për herë të dytë në këto zgjedhje nën siglën e PS-së, pasi ka qenë deputet në legjislaturën e fundit të Parlamentit. Ai ka lindur në Fier në vitin 1957, është i martuar dhe ka një fëmijë. Studimet e larta i ka kryer në universitetin e Tiranës, dega Ekonomik. Çaçi është anëtar i KPD-së socialiste. Karrierën e punës së tij Çaçi e ka nisur si ekonomist në Patos, si specialist për shpimin dhe kërkimin e naftës në vitet 1981-1984. Më pas, ai ka qenë kryetar i degës së planifikimit, SH.K.Naftës, Patos. Me ardhjen e sistemit demokratik, Çaçi ka punuar një vit si këshilltar i ministrit për naftën, ndërsa më pas është marrë me aktivitet privat. Çaçi ka punuar si drejtor i Drejtorisë Ekonomike në Ministrinë e Drejtësisë. Zotëron tri gjuhë të huaja; italisht, anglisht dhe frëngjisht. Viktor Gjini Pedagogu i mjekësisë me siglën e PD Viktor Gjini kandidon për herë të parë në zgjedhjet e tre korrikut si përfaqësues i Partisë Demokratike. Ai ka lindur në Fier në vitin 1964, është i martuar dhe ka një fëmijë. Viktor Gjini është diplomuar në fakultetin e Mjekësisë në universitetin e Tiranës. Pas përfundimit të studimeve të larta, Gjini ka punuar rreth 15 vjet si pedagog në fakultetin e Mjekësisë. Prej tre vjetësh ai punon si mjek kardiolog në spitalin civil të qytetit të Fierit. Përfshirja e tij në Partinë Demokratike ka ardhur i pasojë e hapjes së kësaj të fundit ndaj shoqërisë civile. Si i tillë, Viktor Gjini kandidon nën siglën e PD-së. Ai zotëron tri gjuhë të huaja; anglishten, frëngjishten dhe italishten. Vezire Dushi Ish-prokurorja në garë për LSI Vezire Dushi është kandidate e LSI-së në këto zgjedhje në zonën 66 të qytetit të Fierit. Ajo kandidon për herë të parë në zgjedhje. Ka lindur në qytetin e Fierit në vitin 1966 dhe banon në Fier. Studimet e larta i ka ndjekur në fakultetin Juridik, ku dhe është diplomuar në vitin 1985. Vezire Dushi deri në vitin 1997 ka punuar si prokurore në qytetin e Fierit. Më pas, për rreth një vit Dushi ka punuar si shefe e zyrës juridike në Prefekturën e Fierit. Që nga viti 1998 e deri më sot ajo punon si notere. Në vitet 2000-2003 Dushi ka qenë kryetare e komisionit juridik të Këshillit Bashkiak në Fier. Aktualisht ajo është anëtare e degës së LSI-së në Fier dhe nënkryetare e kësaj dege. Vezire Dushi zotëron dy gjuhë të huaja; italishten dhe anglishten. Thanas Cërra Inxhinieri i LZHK në garë Thanas Cërra është përfaqësuesi i Lëvizjes për Zhvillim Kombëtar në zonën nr.66 në Fier. Ai ka lindur po në qytetin e Fierit në vitin 1964. Në vitet 1980-1984 ka ndjekur shkollën e mesme industriale “Petro Sota” në Fier, ndërsa në vitin 1989 është diplomuar në universitetin e Tiranës në degën Inxhinieri Mekanike. Pas përfundimit të studimeve të larta, Thanas Cërra ka punuar si inxhinier mekanik në TEC-in e Ballshit në vitet 1989-1993. Gjithashtu, Thanas Cërra ka qenë drejtor i NPA-së në Fier për rreth dy vjet. Pasi ka lënë këtë detyrë, kandidati i LZHK-së, që nga viti 1995 e deri në vitin 2004 e ka kaluar jetën e tij jashtë vendit, si emigrant. Cërra është i martuar dhe ka dy fëmijë. Zotëron dy gjuhë të huaja; anglishten dhe greqishten.