Presidenti i Kosovës, Dr.Ibrahim Rugova i ka shpëtuar dje një atentati vdekjeprurës me minë të telekomanduar, ndërsa ai po shkonte në një takim me shefin e politikës së jashtme të BE-së, Havier Solana.

Prishtina është tronditur, kur në orën 08.20, një minë e telekomanduar ka shpërthyer kur eskorta e presidentit ka kaluar fare pranë saj në rrugën prapa Teatrit Kombëtar. Si pasojë e shpërthimit të fuqishëm, që ka dalë nga një kazan plehrash, makina e presidentit është dëmtuar, por vetë zoti Rugova nuk pësoi gjë.

Atentati
Një dorë profesionisti, mesa duket ka përgatitur materialin shpërthyes, me qëllim ekzekutimin e kreut të Kosovës. Zyrtarët e sigurimit thanë se lënda plasëse ishte aktivizuar me telekomandë, ndërkohë që makina e Rugovës i është afruar kazanit të plehrave. Organizatorët e atentatit kanë patur dijeni të plotë për intinerarin, që do të ndiqte presidenti për të shkuar nga zyra e tij për në selinë ku e priste Solana. Njëkohësisht, ata kanë qenë të informauar edhe për axhendën e zotit Rugova dhe kohën kur ai do të kalonte ekzaktësisht në atë vend. Sipas burimeve policore, hetimet paraprake dëshmojnë se lënda plasëse është vendosur në kazanin e plehrave gjatë natës ose në orët e para të mëngjesit, pasi kazanët janë pastruar dhe kishte siguri që ato nuk do të prekeshin deri në kohën kur do të kryhej shpërthimi.

Hetimi
Ekspertët kriminalistë të policisë vendore dhe UNMIK-ut, kanë mbërritur menjëherë në vendngjarje dhe kanë ekspertuar gjithë zonën, që e kanë mbajtur të bllokuar për disa orë. Në vendngjarje janë marrë provat e para materiale, si kazani i plehrave, grimca të materialit shpërthyes dhe thërrime metalike të materialeve të tjera që janë gjendur në zonën e shpërthimit. Po kështu është ekspertuar edhe makina e zotit Rugova dhe makinat e tjera të eskortës dhe ka nisur marrja në pyetje e dëshmitarëve të parë.
Deri në orët e vona të mbrëmjes së djeshme, sipas policisë askush nuk ka marrë përgjegjësinë për shpërthimin. Zëdhënësja e policisë, Sabrije Kamberi, tha se policia ka bllokuar menjëherë vendngjarjen dhe se po heton rastin.

Precedenti
Atentati i djeshëm ndaj presidentit të Kosovës është sulmi i dytë kriminal, që drejtohet kundër jetës së Rugovës brenda pak më shumë se një viti. Sipas disa burimeve zyrtare të institucioneve të Kosovës theksohet se “shpërthimi i sotëm ishte drejtuar hapur ndaj makinës, në të cilën gjendej presidenti Rugova, i shoqëruar nga këshilltari i tij lartë politik, Skënder Hyseni, në rrugë drejt zyrës së tij para takimit me Përfaqësuesin e Lartë të BE-së, Havier Solana. Atentati i sotëm ndaj presidentit Rugova forcon edhe më shumë bindjen se Kosova ka nevojë të ketë strukturë të plotë sigurie, si çdo shtet funksional, që nënkupton forca policie të specializuara, shërbim inteligjence si dhe sistem kontrolli të plotë të kufijve dhe pikës së aeroportit, për të ditur kush hyn e kush del në këtë vend”. Pak ditë më parë, afër selisë së UNMIK-ut, një bombë dore shpërtheu, duke shkaktuar plagosjen e një 15-vjeçari, por policia tha se ky ishte një incident që nuk lidhej me situatën në vend.

Reagimet

Kryeministri Adem Salihaj
“Qeveria e Kosovës dënon sulmin kundër presidentit Rugova dhe thekson se ky akt drejtohej kundër proceseve politike në Kosovë dhe kundër interesave të vendit në dobi të destabilizimit. Ne vlerësojmë se SHPK-ja, KFOR-i dhe të gjithë ata që janë kompetentë, duhet të bëjnë një punë shumë më të madhe dhe shumë më këmbëngulëse, që të zbulohen ata që bënë këtë sulm terrorist”.

Bajram Kosumi
Kandidati i nominuar për kryeministër të ri të Kosovës, Bajram Kosumi, aktualisht ministër i Mjedisit dhe Planifikimit Hapësinor tha: “Përderisa të mos i kemi institucionet e duhura të shtetit të Kosovës, qendrat që janë të interesuara ta destabilizojnë Kosovën mund të ndërmarrin veprime të tilla. Unë këtë e konsideroj një akt të pastër terrorist, një akt me prapavijë shumë të rëndë, me prapavijë për ta destabilizuar Kosovën”.

Ashkalinjtë
Autorët e këtyre veprave kanë për qëllim destabilizimin e situatës në Kosovë dhe nxitjën e dhunës, e cila nuk mund të ndodhë, për shkak që do të dëmtonte proceset pozitive që Kosova ka arritur deri më tani.

Partia AAK
Kryesia e Aleancës për Ardhmërinë e Kosovës e dënon ashpër aktin e shpërthimit të sotëm në Prishtinë, ku u lënduan disa qytetarë, në kohën kur andej po kalonte edhe eskorta e presidentit të Kosovës. AAK konsideron se shpërthimi i sotëm është i adresuar kundër punës dhe angazhimit të insitucioneve të Kosovës, kundër paqes dhe stabilitetit në vend dhe se ka qenë i organizuar nga qarqe që nuk ia duan të mirën Kosovës.

Granatë dore në rezidencën në Prishtinë
Rugova u qëllua edhe një vit më parë

Më datë 12 mars 2004 rreth orës 5.20 persona të panjohur hodhën një mjet shpërthyes në drejtim të residencës së presidentit të Kosovës, Ibrahim Rugova, në lagjen e Velanisë në Prishtinë. Nga shpërthimi i bombës askush nuk u plagos. “Në momentin e sulmit presidenti Rugova ndodhej në shtëpi, por përveç dëmeve materiale nuk ka pasur dëme të tjera. Ky është një sulm ndaj institucioneve të Kosovës, theksoi zëdhënësi Hamiti. Ndërkaq, zëdhënësit i SHPK-së, Refki Morina, pati deklaruar se, “në bazë të informacioneve që kemi marrë, shpërthimi te rezidenca e presidentit Rugova është bërë me një granatë dore. Policia Rajonale dhe Kriminalistike janë në vendin e ngjerjes, duke u marrë me rastin dhe për momentin policia është në veprim prandaj ende është herët që të thuhet se a ka të dyshuar apo të arrestuar”. Nga ky atentat, pavarësisht hetimeve, askush nuk doli përgjegjës, ndërkohë që dje një tjetër sulm më i sofistikuar për pak sa nuk i ka marrë jetën presidentit Rugova.

• Qeveria shqiptare
  Ministria e Punëve të Jashtme të Shqipërisë priti me shqetësim lajmin për sulmin e mëngjesit të sotëm ndaj autokolonës së presidentit të Kosovës, z. Ibrahim Rugova. Këto veprime të dhunshme janë të papranueshme, jo vetëm sepse cënojnë figurën e presidentit dhe institucionin që ai përfaqëson, por edhe sepse synojnë të destabilizojnë gjendjen e sigurisë në Kosovë
• Besnik Mustafaj
  PD e dënon ashpër këtë akt të rëndë kriminal dhe e konsideron atë të qëllimshëm dhe të organizuar nga forca të errëta, që veprojnë brenda dhe jashtë Kosovës, të cilat synojnë shkatërrimin e procesit të nisur nga Kosova në bashkëpunim të ngushtë me komunitetin ndërkombëtar për plotësimin e standardeve të nevojshme për ndërtimin e shtetit ligjor dhe arritjen e pavarësisë në këtë vend.

Pak çaste pas atentatit, presidenti i Kosovës, Ibrahim Rugova, është përpjekur të ruajë gjakftohtësinë, por njëkohësisht e ka dënuar sulmin ndaj tij me gjuhën më të ashpër.

Pa e fshehur tronditjen për sulmin ku për pak sa nuk humbi jetën, presidenti Rugova ka paralajmëruar se sulmi ndaj tij kishte në fakt si objektiv destabilizimin e Kosovës, pas qëndrimit shembullor që ajo mbajti pas vetëdorëzimit në Hagë të ish-kryeministrit Haradinaj. “Falë zotit shpëtova edhe një herë”, - mësohet të jetë shprehur Rugova. Si president i Kosoves, e gjykoj këtë rast dhe kërkoj që të pengohen ata njerëz që kanë për qëllim të bëjnë vepra të tilla. Ata duhet të marrin dënimin e merituar, sepse nuk mund t’i lejojmë që të vënë në rrezik jetën e qytetarëve të Kosovës”,- tha presidenti Rugova. Si president i Kosovës, e gjykoj këtë rast dhe kërkoj që ata njerëz që kanë për qëllim të bëjnë vepra të tilla të pengohen. Ata duhet ta marrin dënimin e merituar, sepse nuk mund t’i lejojmë që të vënë në rrezik jetën e qytetarëve të Kosovës”,- theksoi presidenti Rugova. Presidenti Rugova kërkoi që të merren masa për shtimin e kontrollit të kufijve dhe të aeroportit. Ai tha se policia e Kosovës duhet të specializohet dhe duhet të jetë e pranishme aty ku mund të rrezikohet jeta e qytetarëve, sidmos këto ditë kur qytetarët kanë treguar një pjekuri dhe një maturi shumë të madhe. Po ashtu presidenti Rugova tha se ende ka elementë që dëshirojnë destabilizimin e Kosovës. “Për fat të keq, ende ka elementë, ende ka njerëz që dëshirojnë ta destabilizojnë Kosovën”, tha ai, duke shtuar se situata e sigurisë në Kosovës është përgjithësisht e mirë. “Kosovarët janë të aftë të mbrojnë stabilitetin në vend, stabilitetin në këtë pjesë të Evropës dhe të botës”,- theksoi presidenti Rugova, pas takimit me Havier Solanën. Presidenti i Kosovës, Ibrahim Rugova, në bisedën me Havier Solanën foli për situatën e përgjithshme në Kosovë, si dhe për situatën e krijuar pas dorëheqjes së kryeministrit Ramush Haradinaj. Presidenti Rugova vlerësoi se situata në Kosovë është stabile dhe se institucionet tani janë përqendruar më shumë në gjendjen e sigurisë. “Këto ditë, unë do t’i konsultoj të gjitha përtitë politike dhe me kohë do ta caktoj kryeministrin e ri”,- tha presidenti Rugova dhe shtoi se qeveria aktuale është duke kryer detyrat dhe obligimet e saj.

Solana: Presidenti ka përkrahjen e BE-së

“Aktet e tilla nuk mund t’i tolerojmë dhe nuk do të tolerohen dhe mendoj se ky mesazh do të kuptohet drejt nga të gjithë. Shpresoj se forcat paqeruajtëse dhe organet e rendit do ta menaxhojnë situtatën në mënyrë që akte të tilla të mos ndodhin më. Unë i them presidentit se e ka përkrahjen e BE-së në çështjen që është shumë me rëndësi për ne, që të gjithë kosovarët kanë një ndjenjë bashkëpunimi, një ndjenjë dhe një qëllim të përbashkët drejt orientimit të përbashkët. Presidenti Rugova ka përgjegjësi për të takuar liderët politikë e pastaj ka përgjegjësi që të ndërtohet qeveria e re. Strukturat vendore, përfshirë qeverinë, presidentin dhe institucionet e tjera kanë punuar shumë mirë dhe kjo periudhë kohore është kaluar pa ndonjë vështirësi dhe secili në Kosovë është sjellë në mënyrë konstruktive”.

Partia Ora
”Ky akt qyqar është i drejtuar jo vetëm ndaj figurës së presidentit dhe institucionit të cilin ai përfaqëson, por është edhe një tjetër përpjekje që të destabilizohet situata në Kosovë, pas provimit të madh të pjekurisë që dhanë qytetarët e Kosovës të prirë nga shembulli i respektimit të sundimit të ligjit nga ish-kryeministri z. Ramush Haradinaj”.

Krasniqi, PSHDK
“Ky atentat është edhe një përpjekje e atyre që janë kundër pavarësisë së Kosovës. Ky atentat është drejtuar kundër personalitetit më të shquar, më të lartë dhe më të nderuar të popullit të Kosovës. Presidenti Ibrahim Rugova është simbol i lirisë e i pavarësisë së Kosovës. Ai është zgjedhur me votën e lirë të popullit të Kosovës”.

Presidenti Tadiç
Presidenti i Serbisë, Boris Tadiç, ka dënuar me forcë sulmin e djeshëm ndaj presidentit të Kosovës, Ibrahim Rugova, duke vlerësuar se fjala është për “aktin e dhunës”. Tadiç i ka ftuar të “gjithë qytetarët e Kosovës dhe Metohisë për të qenë të kujdesshëm dhe të përmbajtur, që një situatë e tillë të mos i destabilizojë rrethanat në vendin tonë dhe në rajon”.