Moisiu i ka të gjitha arsyet të ndihet edhe një herë i fyer nga politikanët. Kodi i Etikës i propozuar nga ai dhe i firmosur nga të gjithë krerët e politikës tashmë është bërë një historie e vjetër.

Janë po këta kryetarë partish që u zotuan me presidentin ata që po e kthejnë fushatën në një fushatë sherresh. Për Moisiun, debatet elektorale po degjeron në një fushatë fyerjesh dhe akuzash që nuk sjellin ndonjë dobi për qytetarët. Këtë Presidenti e deklaroi dje, duke shtuar se fjalori i politikanë, debatet deri në sherre mes tyre, kanë bërë që fushata të kthehet në një betejë të mirëfilltë me pak politkë dhe shumë retorikë. Në apelin e tij publik, kreu i shtetit u ka bërë thirrje faktorëve politikë që të zbatojnë Kodin e Etikës, dokumentin që ata e kanë firmosur bashkërisht.

Deklarata
“Kodi i sjelljes është një hap i ri dhe një përpjekje e mirë për të futur një moral të ri politik në Shqipëri, për të cilin kemi shumë nevojë. Çdo gjë e re, në fillim asimilohet me vështirësi, megjithatë kohët e fundit kam vënë re një ashpërsim të toneve. Do t’u sugjeroja veçanërisht kryetarëve të partive kryesore të kenë më tepër kujdes, si për veten dhe bashkëpunëtorët e tyre”, deklaroi Moisiu. Acarimi politik mes pozitës dhe opozitës në disa zona zgjedhore në mes kandidatëve, si dhe debatet e ashpra të hasura në televizione kanë detyruar Moisiun që t’i kujtojë aktorëve të politikës shqiptare Kodin e Etikës, të nënshkruar në mes tyre. Në këtë dokument palët pjesëmarrëse në votimet e 3 korrikut angazhohen për një fushatë të qetë, pas sharje e fyerje, si dhe pa ashpërsim të situatës në vend.

Për debatin Nano-Berisha
Presidenti i Republikës ka folur dje edhe në lidhje me debatin që pritet të realizohet në mes liderit të PS-së, Fatos Nano dhe liderit të PD-së, Sali Berisha. Sipas tij, në këtë përballje liderësh nuk duhet të ketë konflikte, sepse shqiptarët presin alternativa. “Debatet janë pozitive, por gjithmonë duke u bërë me tone të qeta dhe me alternativa për të ardhmen dhe jo për të kaluarën”, theksoi Moisiu. Në këtë kontekst, presidenti theksoi shmangien e ballafaqimit për ngjarjet e vitit ’97-ës, duke kërkuar vetëm paraqitjen e alternativave që kanë partitë politike për katër vitet e ardhshme, nëse marrin pushtetin pas zgjedhjeve të përgjithshme të 3 korrikut të këtij viti.

Grushtet ndaj Priftit

Eshtë goditur me grushte në qytetin e Fierit kandidati për deputet i LSI-së, Dritan Prifti. Ngjarja ka ndodhur të premten më datë 10 qershor, pas një debati televiziv mes kandidatëve Rajmonda Stefa e PS-së, kandidatit të LSI-së Dritan Prifti, kandidatit të PD-së Leonard Grëmi, si dhe kandidatit të LZHK-së Rexhep Krasniqi. Nga shtabi elektoral i Priftit mësohet se fill pas këtij debati televiziv, disa persona, të afërm të kandidates socialiste, Stefa kanë sulmuar me grushte deputetin Prifti. Pas këtij incidenti, nënkryetari i LSI-së, zoti Prifti ka bërë denoncimin në polici, duke u shprehur se ata që e goditën ishin njerëzit e ish-prefektes Rajmonda Stefa. Lidhur mbi këtë ngjarje nga Prokuroria është mësuar se hetimet kanë nisur në gjendje të lirë për Alket Baren, nipin e Rajmonda Stefës dhe prokurori i kësaj çështjeje është Ndriçim Troplini.

Marko Bello
“Fushata, jo me agresion verbal”

Mendoj se fushata nuk duhet të ashpërsohet. Fushata duhet të vazhdojë me argumente, të mos ketë agresion verbal, të mos ketë ofendime personale dhe kandidatët të përqendrohen në paraqitjen e platformave të tyre. Kam kuptuar një gjë, se votuesit shqiptarë janë maturuar dhe nuk duan të dëgjojnë më sharje midis kandidatëve. Çdo ndërhyrje duke i prerë fjalën njëri-tjetrit ndikon negativisht dhe nuk arrin të përcjellë mesazhin që do të dëshironim të përcillnim në këto zgjedhje. Mendoj se fushata duhet bërë duke respektuar kundërshtarin me logjikën që të gjithë jemi të barabartë, por të ndryshëm.

Ekrem Spahia
“Marrëveshjet nuk zbatohen asnjëherë”

Përfaqësuesi i LZHK-së, si dhe kryetari i PLL-së, Ekrem Spahia në lidhje me deklarimin e presidentit Moisiu se, fushata elektorale po tensionohet duke u shkelur Kodi i Etikës, është shprehur se: “Personalisht kam qenë kundër firmosjes së Kodit të Etikës nga partitë politike te presidenti, ndaj dhe nuk kam marrë pjesë ditën kur u firmos, duke shprehur qëndrimin tim se nuk do të zbatohet asnjëherë”. Spahia ka shtuar më tej se, nuk është hera e parë që partitë politike nënshkruajnë marrëveshje dhe nuk i zbatojnë kurrë ato. “Në Shqipëri nuk ka respektim të marrëveshjeve, të gjitha janë demagogji”, është shprehur ai.

Ridvan Bode
“Nuk po e acaron PD fushatën”

Sekretari i përgjithshëm i Partisë Demokratike, Ridvan Bode shprehet se, opozita shqiptare deri më tani nuk e ka shkelur Kodin e Etikës gjatë fushatës së saj elektorale dhe nuk ka sharë apo ofenduar asnjë individ apo parti politike. Në lidhje me deklaratën që ka bërë presidenti, Alfred Moisiu se fushata elektorale është acaruar Bode thekson se: “Unë nuk mund ta them një gjë të tillë, pasi ne të gjithë jemi lojtarë, janë të tjerë ata që e shohin dhe mund të thonë nëse është acaruar ose jo fushata elektorale”. Për PD-në ata që e shohin tensionimin e fushatës mund ta thonë edhe publikisht.

Spartak Braho
“Nano-Berisha ashpërson fushatën”

Fushata elektorale është e ashpërsuar dhe kjo për shkak të sherreve të dy liderëve Nano e Berisha dhe psikologjisë së tyre. Sipas kësaj psikologjie, njëri kërkon ta marrë me çdo kusht pushtetin dhe tjetri kërkon ta mbajë me çdo kusht atë. Kjo ka shkaktuar daljen nga parametrat demokratikë dhe ligjorë të fushatës elektorale. Eshtë thyer dhe nuk po respektohet Kodi i Etikës dhe mendoj se kjo ashpërsi do të vijë duke u shtuar në ditët e ardhshme. Në këto kushte unë mendoj se është e nevojshme ndërhyrja e institucioneve ndërkombëtare për t’i vënë fre këtij ashpërsimi artificial të fushatës elektorale.