Genc Kondi

Asnjë nuk mund ta privatizojë hotel "Dajtin". Kjo është deklarata e papritur e avokatit të Leka Zogut, Shefqet Dizdari, i cili theksoi dje se klienti i tij është pronar i ligjshëm i truallit, mbi të cilin ngrihet hoteli. Në një kohë kur opinioni ishte i interesuar të mësonte emrin e pronarit të ri të hotelit më prestigjioz të Tiranës, ndërtuar në vitin 1943 nga italianët, në seancën e paraqitjes së ofertave, në selinë e Agjencisë Kombëtare të Privatizimit, pretenduesi i fronit mbretëror të Shqipërisë, bëri publike kërkesën që është paraqitur prej tij pranë Ministrisë shqiptare të Ekonomisë. Në bazë të kësaj kërkese, procesi i tenderimit është i paligjshëm, pasi, në vend të tij, pronarit të vjetër të truallit i duhet njohur e drejta e parablerjes.
Në bazë të dokumentave arkivore, të siguruara vetëm një javë më parë, thekson avokati Dizdari, dokumentohet fakti se trualli mbi të cilin është ndërtuar hoteli pas pushtimit të vendit nga Italia ka qenë në pronësi në Ahmet Zogut. Madje, pjesa e terrenit që i përket atij është shumë më e madhe se sa sipërfaqja mbi të cilën është ndërtuar ky objekt. Kufizimet e saj janë bulevardi "Dëshmorët e Kombit", lumi i Lanës, muri i katedrales katolike dhe rruga "Toptani". Këtë truall, sipas përfaqësuesit ligjor të familjes Zogu, ish-mbreti Zogu i Parë e ka blerë nga gjashtë familje të vjetra tiranase në vitet '30-të dhe ajo është e regjistruar rregullisht si pronë e tij private. Ahmet Zogu ka në territitorin e kryeqytetit edhe pronësi të tjera, që iI ka trashëguar nga nëna e tij, që rrjedh nga familja e çifligarëve të mëdhenj e pronarëve të tokave në Shqipërinë e Mesme, Toptani. Por trualli në fjalë është pronë e tij personale.
Në përputhje me Ligjin e Kthimit e Kompensimit të Pronave, Leka Zogut i lind e drejta që të kërkojë të drejtën e tij mbi këtë hotel. Dhe i takon shtetit, nëpërmjet Komisionit të Kthimit e Kompensimit të Pronave, që të përcaktojë në se ai do të dëmshpërblehet apo do t'i kthehet fizikisht pronësia e truallit nën hotel "Dajtin". Në përputhje me ligjin shqiptar për privatizimet, thekson avokati Dizdari, Leka Zogut i lind e drejta e parablerjes e objektit që është ndërtuar mbi pronën e të jatit të tij, trashëgimtar i vetëm i ligjshëm i të cilit është ai. Pyetjes në se Leka Zogu ka mundësi financiare për të zbatuar të drejtën e parablerjes, duke paguar më se 200.000 dollarë, sipas vlerësimit që i ka bërë shteti shqiptar objektit në fjalë, ai iu përgjigj pozitivisht.
Pretenduesi i fronit mbretëror shqiptar, që nga data 8 maj 2003 ka edhe një të drejtë të posaçme mbi pronësitë e familjes së tij. Ligji nr. 9063 i Kuvendit të Shqipërisë sanksionon, në nenin 2, si më poshtë: "Trashëgimtarët e ish-familjes mbretërore kanë të drejtë të disponojnë dhe të përdorin pronat e tyre, sipas ligjit "Për kthimin dhe kompensimin e pronave ish-pronarëve", si dhe të ligjeve të tjera në fuqi. Ky ligj u miratua pas kërkesës së bërë nga 43 deputetë, të të gjitha partive politike, në vitin 2003, për njohjen e një statusi të veçantë për pjesëtarët apo trashëgimtarët e familjes mbretërore Zogu.
Ligji parashikonte edhe klauzola të tjera, njera prej të cilave zgjidhte ligjërisht incidentin e ndodhur me koleksionin e armëve, të cilat Leka Zogu i kishte marrë me vete nga Afrika e Jugut, ku banonte m parë dhe që, nga policia dhe prokuroria e vendit tonë u cilësuan fillimihst si objekte të rrezikshme, por që doli se ishin trofe lufte, që nuk mund të përdoreshin si armë zjarri.
Pas kërij ligji, Këshilli i Ministrave përcaktoi me vendim të posaçëm statusin dhe trajtimin protokollar të trashëgimtarëve të ish-familjes mbretërore. Midis të tjerash, vlen të theksohet se, pas këtij vendimi, Leka Zogu u pajis me pasaportë diplomatike nga Ministra e Jashtme dhe atij iu kthyen me një procedurë të veçantë disa nga pronat e patundshme, që figuronin në pronësi të të jatit, gjatë kohës që ai ishte mbret i shqiptarëve, pra deri në vitin 1939.
Në kushtet e sigurimit të dokumentacionit që vërteton të drejtën e pronësisë së Ahmet Zogut mbi truallin e hotel "Dajtit", ai i ka kërkuar shtetit shqiptar të ndërpresë çdo hap për shitjen e tij, thekson Shefqet Dizdari, i cili, ndërkohë, ve në dukje se ka qenë kjo arsya pse Ministria e Ekonomisë e ndërpreu procedurën e tenderimit dhe jo ndonjë arsye e karakterit politik.

Ndërpritet papritur procedura e privatizimit të hotelit

Tërhiqet ministria e Ekonomisë: Privatizimi ta bëj Qeveria e re
Ministria e Ekonomisë vendosi, në mënyrë të papritur, që zhvillimin e tenderit për privatizimin e hotel "Dajtit" në Tiranë ta zhvendosë në kohë, pas formimit të qeverisë së re. Kjo u bë e ditur nga drejtuesi i Komisionit të Vlerësimit të Ofertave, pranë Agjencisë Kombëtare të Privatizimit, Nuri Sopi, i cili deklaroi dje se, me një shkresë zyrtare, ky dikaster ka njoftuar AKP-në se nuk e gjykon të përshtatshëm momentin paszgjedhor për privatizimin e këtij aseti të rëndësishëm shtetëror. Në fakt, ndërkohë që përfaqësuesit e Ministrisë së Rregullimit të Territorit e Turizmit dhe ata të AKP ishin të pranishëm në seancën e parashikuar për hapjen e ofertave, ata të Ministrisë së Ekonomisë mungonin. Sikurse ishte shpallur më parë, dje duhet të kryhej procedura e hapjes së zarfave dhe më datë 25 korrik do të shpallej vendimi i Komisionit për fituesin e tenderit. Por, burime nga AKP kishin bërë të ditur të enjten se pranë AKP nuk ishte paraqitur asnjë ofertë nga blerës potencialë. Burime zyrtare të kësaj Ministrie bënë të ditur se "shtyrja e datës së zhvillimit të tenderit u bë edhe për arsye të thithjes të sa më shumë ofertave, në mënyrë që të përfitohet një vlerë sa më e lartë për shitjen e këtij hoteli".

Faqja 21 - DOSSIER

HISTORIA/ Ankesat e protestat për parregullsitë e votimeve

Zgjedhjet 1921, Kandidatët: Qeveria po na vjedh votat

Dashnor Kaloçi Historia përsëritet. Zgjedhjet parlamentare që u mbyllën para pak ditësh me votimet e 3 korrikut 2005, nuk ndryshojnë aspak me zgjedhjet e para parlamentare të mbajtura 85 vite të shkuara në pranverën e 1921-t. Asnjë ndryshim: Fushatë e ashpër elektorale me kandidatë të varur dhe të pavarur, politikanë e biznesmenë që duan të bëhen deputetë të cilët premtojnë rrugë e ulje taksash, reformë në administratë e liri shtypi, ndihmë e përkrahje sociale për të varfërit etj. Premtimet e qeverisë se do të zhvillojë zgjedhje të lira e të ndershme dhe ankesa nga kandidatët për deputetë se ajo ua vodhi votat duke ndihmuar ministrat e saj që të dilnin fitues. Analistë që shkruajnë editoriale ku tërheqin vëmëndjen për zgjedhje të lira, që të mos të turpërohemi përpara të huajve dhe Evropës e cila ka fatin tonë në dorë. Gjithshka njësoj. Koli Rrodhe: kujdes votën Pak ditë pasi qeveria e Sulejman Delvinës (e dalë nga Kongresi i Lushnjes) kishte shpallur mbajtjen e zgjedhjeve të para parlamentare në Shqipëri, në të gjitha organet e shtypit të asaj kohe filluan dhe shkrimet me editorialet e para për ato zgjedhje. Në ato shkrime bëhej thirrje për zgjedhje të lira dhe të ndershme, ku të gjithë votuesit të mendoheshin mirë para se të hidhin votën e tyre, duke ua dhënë atë atyre kandidatëve që e kishin treguar veten se kishin luftuar e punuar për të mirën e Shqipërisë. Po kështu në ato editoriale thuhej se ato zgjedhje duhej të bëheshin sa më të lira, pasi në të kundërt Shqipëria do turpërohej në sytë e të huajve dhe Europës. që në një farë mënyre kishin në dorë fatet e saj. Një nga këto editoriale ishte dhe ai i patriotit korçar, Koli Rrodhe, i botuar në "GAZET' E KORÇËS" ku midis të tjerash shkruhej: " "Është e para herë që Populli i Shqipërisë voton për deputetët në Parlamentin e tij. Është e para herë që Populli i Shqipërisë ryn (hyn) në rradhën e jetës politike duke dhënë votën e tij për zgjedhje deputetësh. Është e para herë që Shqipëria po ryn në udhën e Shteteve të qytetëruar: po futet në fushën politike të brendëshme duke dhënë votën secili nga populli pa patur asnjë ndryshim, i madhi nga i vogli, i pasuri nga i vobekti, gruaja nga burri, njëri element nga tjatri. Të gjithë këta do të shkojnë në më një udhë, me një kllasë e pa patur kurrëfarë ndryshimi. Me qenë, pra, kështu duhet të mejtonet (mendohet) fort populli, pa të japë votën e tij te njëri apo te tjatri. Që të mejtonemi mirë le të shohim dhe le të peshojmë jetëshkrimin e cilitdo kandidati, le t'ia kqyrim punërat e shkuara atyre që do të ven kandidaturën për deputet dhe në qoftë se janë të ndershëm nga karakteri, në qoftë se punrat e tyre të shkuara kanë qenë mehlemi i plagëve të këtij Atdheu, të këti Populli, le t'ua japim votën megjithë besimin e plotë, se vetëm dhe vetëm këta, duke qenë përfaqësonjës në Parllamentin tonë- do ta shpien Shqipërinë në shkallën që meriton, dhe vetëm këta do t'i ndërtojnë punrat e brendëshme dhe të jashtëme të Shqipërisë, që kështu mënjanë të mbretëronjë qetësia dhe armonia brenda, e më anën tjatër të nderohet Atdheu ynë përpara botës së qytetëruar. Provimet e shkuara mbi personat, na bëjnë t'u heqim vërejtjen katundarëve ashtu dhe qytetasve që, të mos kandisen në thashë e themet, a me çpifjet e ndocave që mundet të rynë e të dalin nëpër popull me një maskë fetare ose me një t'a tillë interesi vetjak e me të tilla mënyra djallzore të fitojnë votën e popullit; se në qoftë se vëmë veshin të tilla aferave puna është e çkatëruar dhe Shteti do të turpërohet përpara të huajve të cilët gjer më një pikë kanë jetën tonë në dorë. Le të mejtonemi mirë dhe le t'u japim votën atyre që kemi provuar që në kohën e shkuar që në kohën e rrezikut, se vetëm ata do të përmbushin qëllimin e shenjtë" Koli Rrodhe. Po vidhen vota për Ministrin e Brendshëm Por edhe pas premtimeve të shumta qeverisë se ushtria dhe funksionarët e lartë të administratës së saj nuk do të ndërhynin në procesin zgjedhor, përsëri pati shumë ankesa e protesta për vjedhje votash dhe manipulimesh. Shumë prej atyre ankesave u botuan edhe në shtypin e asaj kohe, siç ishte rasti i Kryekatundarit të Peqinit. Adem Gjinishit, i cili ankohej se Prefekti i Elbasanit, Rexhep Jella, ishte implikuar në procesin zgjedhor, duke ndihmuar kandidatët për deputet, Mehdi Frashëri që mbante postin e Ministrit të Brendshëm dhe shokun e tij Shefqet Bej Elbasani. Lidhur me këtë, në "GAZET' E KORÇËS", të datës 26 shkurt 1921, nën titullin "Skandale të turpshme", (Marrë nga Mbrojtja Kombëtare) midis të tjerash shkruhej: "Marrim nga burim i sigurt, se Kryekantundar' i Peqinit telegrafisi Katundaris s'on, kështu: "Prefekt i Elbasanit i famshëm antar' i…që e quajti Vlorën qytet…kundërshtar i rrebt i Kongresit të Lushnjes, aji që e burgosi pa far shkakut Kryetarin e Mbrojtjes Kombëtare t' Elbasanit në kohën e Luftës Italo-Shqiptare, po përdor sot fuqin e Qeveris për me sigurue deputetësin e Ministrit të Brendshëm, z. Mehdi Frashërit e Shefqet Bej Elbasanit me shokë. Peqini po humb të drejtat e veta me zgjedhjet qi po bahen ashtu si ka humbë edhe ma parë mbasi fuqia qeveritare e Prefekturës po mundohet t'i mbledhi votat e elbasanit në nji pikë, sado që nomi (ligji) i ndalon qeveritarët nga anësit. Neve protestuem mbi këtë të paudhë të Prefektit e të Ministrit. Lutemi të na ndihmoni". Kryekatundari Adem Gjinishi. Pas kësaj ankese të Adem Gjinishit, Shoqëria Mbrojtja Kombëtare i drejtoi një protestë qeverisë e cila është botuar po në atë gazetë. Aty thuhet: "Ministrisë së Përmbrëndshme. Të gjtha viset Shqiptare po ankohen nga fuqia e Qeverisë pse shtërngon popullin të votojë kundër ndërgjegjes tij Shembull kini Shqipërin' e mesme, Prefekturat e Shkodrës, Elbasanit e gjetkë. Energjikisht protestojmë kundër pa drejtësisë, duke ua lënë juve responsabilitetin". (Shënim i Mbrojtjes Kombëtare) Po qe kështu më mirë populli pa tjatër të përgatitet dhe të mbledhi Asamblen Kostituenten, pse, le që zgjedhja është çyryk në mënyrën e vet, nga pengimet e nërgjegjes së lir, por e keqja do të na gjej në opinionin e botës që der dje ish për skllavnin t'onë. E dje skllav sot gjoja i lir, e nesër skllav më keq se dje: le të vej dhe kjo zgjedhje kot: por ilaçi i duhet kue në rranjë! Fatëzezët neve që ua paska tru (mallkuar) Perëndia? Kjo zgjedhje merret vesh se është e pa nomshme (e paligjshme) dhe populli medeomos do e hjedh poshtë". Ministri i Brendshëm Frashëri u angazhua për zgjedhje të lira Qeveria: Ushtria dhe administrata do rrinë larg zgjedhjeve Pak ditë pasi qeveria e asaj kohe shpalli mbajtjen e zgjedhjeve parlamentare, me anë të Ministrisë së Punëve të Brendëshme ajo filloi dhe nxjerrjen e urdhëresave e qarkoreve të ndryshme me udhëzimet përkatëse se si duhet të mbaheshin ato zgjedhje. Kështu në datën 2 janar të vitit 1921, ajo nxorri një qarkore ku bënte të ditur se zgjedhjet duhet të bëheshin të lira dhe forcat e armatosura të ushtrisë e xhandarmërisë me nënpunësit e qeverisë duhet të qëndronin sa më larg zgjedhjeve dhe të mos influenconin e përziheshin fare në to. Në këtë qarkore të botuar në gazetën lokale "GAZET' E KORÇËS", shkruhej: "Ushtria, xhandarmëria dhe nëpunësit e qeverisë do të rijnë të paanshëm në çështjen e zgjedhjeve. Ministria e Punëve të Brendëshme. Qarkore, Tiranë më 2 Janar 1921. Zgjedhjet e deputetëve do të jenë fort të lira dyke u varur vetëm në dëshirën e Popullit. Perzjemja e nëpunësvet në këtë çështje është kundër ligjave Konstitucionale: prandaj lutemi të ndaloni me ç'do farë mënyre influencën e gjithë nëpunësve, pa marrë parasysh shkallë a person. Forca e armatosur do të jetë fare e pa-anshme, prandaj do të jini gjithnjë drejt për drejt juve të kujdesur për të penguar entervacionin e tyre. Duhet të na lajmëroni kurdoherë për zgjedhjet dhe veprimet e zgjedhjeve". Zav. Ministri i P. të Brendëshme Xhaferr Ypi. Por kjo urdhërse e qeverisë nuk zgjeti zbatim dhe shumë funksionarë të lartë të saj të pushtetit vendor, si Prefektë apo Nënprefektë u implikuan në fushatën elektorale dhe procesin zgjedhor duke ndihmuar disa kandidatë që mbanin poste të larta ministrore. Nisur nga këto qëndrime të pushtetarëve vendorë dhe funksionarëve të lartë të qeverisë pati shumë ankesa dhe protesta. Pas këtyre ankesave qeveria u detyrua që të nxirrte një qarkore tjetër e cila u botua edhe nga gazeta "Mbrojtja Kombëtare" që dilte në Vlorë, në një nga numrat e saj të datës 20 shkurt 1921. Midis të tjerash aty shkruhej: "Ministria e Përmbrendshme thotë që qeverria nuk trazohet nër zgjedhjet, që do do të mbeten në lirin' e popullit (?) Prefekturës Vlorë. Me nënshkrimin Mbrojtja Kombëtare nga Vlora muarëm një telegram ku protestojnë tue thanë që fuqiata e qeverisë shtërngon popullin për të votuar kundra nërgjegjes, po ja bëjmë të ditur dhe një herë se qeveria as kandidatën e vet ka, as asht perzier dhe as nuk do përzihet. Me gjith anët zgjedhjet po bahen në një liri të plotë, ata që bajn këto çpifje janë ata që nuk fitojnë votën e duhur, prandaj ia hedhin fajin qeveris". Ministri i Punëve të Brendëshme Mehdi Frashëri.

 

 

Faqja 25 - KULTURE

Korrik 16, 2005

Vajza e Armstrongut, flet pas promovimit të librit "Gjashtë muaj mbretëri"

"Babai im në krah të Princ Vidit në Shqipëri"

Nga Londra, Muhamed Veliu Griselda Adam është vajza e ish-sekretarit privat të princ Vidit, Duncan Heaton-Armstrong, i cili rastësisht u ndodh në krah të princit gjerman, që ushtroi në Shqipëri monarkinë më të shkurtër në historinë e Evropës. Libri, që Armstrong shkroi menjëherë pas largimit nga Shqipëria, me titull "Gjashtë muaj mbretëri", u botua më në fund në gjuhën angleze pas shumë tentativash. I promovuar para pak ditësh në Londër, për këtë libër ishin mbledhur shumë studiues, akademikë, diplomatë, e mes tyre e ftuar speciale edhe vajza e kapitenit Armstrong, Grisela Adam. Ajo solli për të pranishmit disa kujtime të veçanta nga babai i saj, i cili u zgjodh për t'i shërbyer princit Vidit në Shqipëri. Griselda flet ngadalë, disi e pamundur prej moshës, por në këtë intervistë për Gazetën Shqiptare ajo jep detajet e jetës së babait të saj mes shqiptarëve dhe një princi të zgjedhur nga Europa për të drejtuar vendin e tyre. Pse babai juaj vendosi të shkonte në Shqipëri në një kohë aspak të përshtatshme? Ishte një kohë pak e vështirë për të. Ai ishte i papunë. Ju ofrua kjo mundësi, të cilën e përqafoi. Ishte koha, kur ai sapo kishte mbaruar studimet në Kembrixh. Ai ishte një linguist, i cili që kur ishte i vogël u rrit duke mësuar gjermanisht dhe italisht. Kësisoj ai nuk e pati aspak problem edhe mësimin e gjuhës shqipe. Duke qënë një person që fliste gjermanisht im atë, ishte mjaft i përshtatshëm për një punë si sekretar i një princi me origjinë gjermane, siç ishte princ Vidi. Këto kujtime, që Amstrong i mblodhi në këtë libër kur u shkruajtën? I shkruajti menjëherë pas luftës. Por nuk u botuan në atë kohë, kur ai sapo i kishte shkruar. Ai nuk mund ta botonte këtë libër, pasi ishte ofendues ndaj grekëve. Dhe në atë kohë, sikurse të gjithë e dinë, grekët ishin aleatë të anglezëve. Atëherë a mund të gjente vend ky libër në Angli në këto kushte. Në ç'vit saktësisht tentoi babai juaj ta botonte këtë libër? Ishte pikërisht, një vit pas Luftës së Parë Botërore. Atëherë nuk ndodhi, e më vonë, ai nuk kishte para. Që nga ajo kohë nuk tentoi ta botonte përsëri. A vazhdoi të mbante kontakte me Princ Vidin edhe pas largimit nga Shqipëria? Po, babai deri sa qe gjallë mbante kontakte me princin Vid. Mbaj mend që në në shtëpi mbante disa fotografi të tijat, dhe fliste me shumë respekt për të. Babai shpesh herë e kujtonte princin si një njeri të drejtë dhe korrekt e kjo lidhej mbase me origjinën e tij, që ishte gjermane. Tashmë pas kaq e kaq vitesh ky libër u botua edhe në Angli. Si ndiheni? Ndjehem e gëzuar, pasi unë kam tentuar edhe një herë tjetër për ta botuar. Ka ndodhur që njërën prej këtyre tentativave, ta pres në mes, unë vetë. Ia kisha besuar librin një profesori, i cili do të punonte me të. Por, ai ndryshoi shumë gjëra dhe unë nuk e lejova që ta botojë. 6 muajt e mbretërimit të Princ Vidit Botohen në Britani dorshkrimet të Armstrongut Kujtime nga një kapiten irlandez për gjashtë muajt e mbretërimit të Princ Vidit në Shqipëri. Është një libër mjaft i lakuar për lexuesin shqiptar me titull "Gjashtë muaj mbretëri". Por mjaft interes ka ngjallur edhe në Britani, ku para pak ditësh është promovuar në prani të shumë studiuesve, akademikëve, dhe shumë të interesuarve për gjithë çka ka ndodhur në këtë kohë të sundimit të shkurtër të princ Vidit në Shqipëri. Duncan Heaton-Armstrong, te "Gjashtë muaj mbretëri", përcjell dëshmi autentike të asaj çka ndodhur në Shqipëri gjatë monarkisë gjashtë mujore të Vidit. Kujtimet e tij përmbledhur në 173 faqe, do ta shikonin dritën e botimit vetëm në vitin 2005, diçka më shumë se 35 vjet nga vdekja e autorit. Megjithëse kujtimet janë hedhur në letër nga Armstrong gjatë kohës, që ishte në shërbim të Vidit dhe tentoi t'i botojë ato disa vite më vonë, nuk u lejua nga autoritet britanike me pretendimin se libri fliste ashpër ndaj grekëve, të cilët që në atë kohë, sipas Armstrongut, trajtonin keq popullsinë shqiptare të atjeshme. Dorëshkrimi origjanal ra para pak kohësh në dorë të studiuesit shqiptar Bejtulla Destani, i cili drejton "Qëndrën e Studimeve Shqiptare" në Londër. Ai ia besoi redaktimin e librit anglezit Gervase Belfield, e më së fundi u botua nga shtëpia e njohur botuese me degë në Londër dhe New York I.B.Tauris. Studiusi Bejtulla Destani ka punuar dy vite rresht për redaktimin e librit. Ai thotë se ka mësuar për herë të parë, mbi dorëshkrimet e Duncan Heaton-Armstrong nga autori i librit "Skënderbeu" Harry-Hockings. Ai, përpara se të vdiste, i tregoi se ruante në bibliotekën e tij dorëshkrimin, të cilin ia besoi Destanit, duke iu lutur që ta ruante. Duke folur për Gazetën, Destani thotë, se më pas arriti të vihet në kontakt me vajzën e autorit Griselda Adams, e cila e autorizoi për ta botuar librin. Por shton se ka patur botime të tij në mënyrë pirate tre herë në Shqipëri, dy herë në Anglisht dhe në Shqip nga disa shtëpi botuese, njëra prej tyre botuese e veprave të Kadaresë, e cila e ka botuar vetëm me mbiemrin e autorit. Historiani Destani e cilëson librin si shumë interesant pasi për këtë periudhë (viti 1914), nuk ka shumë dokumenta, që të hedhin dritë mbi ngjarjet e ndodhura. "Libri mund të cilësohet si një dokument autentik për vitin 1914 pasi janë kujtime të përjetuara nga një person anglez, këshilltar i Vidit, i cili ka marrë pjesë në luftën për mbrojtjen e Durrësit dhë është shpallur sipas gazetave angleze heroi i kësaj lufte" shpjegon Destani, i cili ka patur bashkëudhëtar në redaktimin e këtij libri anglezin Gervase Belfield. Ai shënon në krye të librit në parathënie: "Që nga koha që kam studiuar historinë ballkanike në universitet në vitin 1970 kam patur dëshirë që të shkruaja një libër për Shqipërinë. Kjo mundësi m'u dha kur miku im, studiusi dhe historiani Bejtulla Destani më sygjeroi redaktimin e kujtimeve të kapitenit Duncan Heaton-Armstrong (1886-1968). Kujtimet e Armstrong sjellin detajet e hollësishme të asaj që njihet si "Gjashtë muaj Mbretëri" të princ Vidit, duke sqaruar se për kohën kur i referohet libri, Shqipëria nuk ka qënë mbretëri, por principatë e princit Vid, i cili nuk ishte mbret, por princ. Sipas Belfield mësohet se në periudhën para dhe pas ardhjes së princ Vidit në pushtet, që nga viti 1912 e deri në kohën e Ahmet Zogut në 22 Janar 1925, kur ai shpalli republikën, ka patur 40 kandidatë seriozë për postin e mbretit. Në atë kohë në një gazetë britanike u vendos një reklamë në faqen e vëndeve ku thuhej "Kërkohet një mbret, preferohet një xhentëllmen anglez. Aplikoni pranë Qeverisë së Shqipërisë".

Ftesa zyrtare për bashkëqeverisje e kreut të PD-së, Berisha, drejtuar tri partive aleate të PS-së, ka mbyllur të gjitha debatet e bëra dy javë pas zgjedhjeve për qeverisjen e re.

Berisha ka deklaruar dje se, i ka dërguar ftesë zyrtare për bashkëpunim në qeverisjen e ardhshme PAA-së, PBDNJ-së dhe PDS-së. Berisha e ka cilësuar koalicionin e ri që ai do të drejtojë si një koalicion të bashkimit kombëtar.

Koalicioni
Koalicioni i ri, që do të qeverisë Shqipërinë, do të përbëhet nga PD-ja me aleatët e saj, të cilëve u bashkëngjiten edhe tri parti, të cilat kanë aderuar deri tani në koalicionin e majtë. Kreu i PD-së, Berisha, tha dje se ftesa për tri partitë aleate bëhet me qëllimin që koalicioni të jetë si lokomotivë e reformave, me një mbështetje dhe përfaqësim sa më të gjerë të shqiptarëve. Kreu demokrat u shpreh se bashkëpunimi me forcat e qendrës dhe të qendrës së majtë është vetëm realizimi i asaj që ai ka thënë gjatë fushatës elektorale, që do të bashkojë shqiptarët. Berisha tha se koalicioni i djathtë do të jetë si ai i vitit 1992, i cili do të çojë para reformat, duke qenë se këto forca, sipas tij, kanë qenë dhe janë të përcaktuara në reformë. Duke justifikuar përfshirjen e tri partive aleate të PS-së në koalicionin e djathtë qeverisës, Berisha është shprehur se këto tri parti kanë treguar se kanë pasur vullnet për reforma, por ka qenë PS-ja që ka penguar ecurinë e reformave në vend. “Absolutisht kam besim sepse sot këto forca politike janë totalisht të përcaktuara për reformë. Unë e bazoj këtë ftesë para së gjithash në qëndrimin e tyre ndaj reformave. Kam bindje të plotë se partitë, që unë kam ftuar kanë reformat dhe lehtësimin e tyre si shtylla kryesore të programit dhe përkushtim të lidershipit të tyre. Po të ishte ndryshe nuk do të bëja një ftesë”, tha dje Berisha.

Negociatat
Pas ftesës zyrtare që PD-ja i bëri dje partive të djathta dhe atyre të qendrës së majtë, kreu demokrat shtoi se negociatat në ditët në vijim do të jenë ato që do të përcaktojnë se cilat do të jenë postet që do të zënë këto parti në qeverinë e re. Në këtë kuadër, ai shtoi se nuk mund të thotë nëse PD-ja do të lëshojë shtyllat e programit të saj, por ajo do të bashkëpunojë ngushtë me të gjitha forcat e koalicionit për të arritur një qeverisje solide. “Negociatat janë ato që do të përcaktojnë gjithçka. Mbetem besimplotë, i bindur në këto negociata. Unë nuk shkoj me asnjë lloj mëdyshje në tryezë me të gjithë ata që i ftoj të krijojnë koalicionin përreth qendrës”, tha Berisha. Ai ka deklaruar gjithashtu se nuk do të ketë hatërmbetje nga aleatët e djathtë, nga fakti që do zhvillohen negociata me parti, të cilat nuk kanë qenë më parë në koalicion. Kreu demokrat ka mohuar idenë se përafrimi i aleatëve të PS-së bëhet me qëllim zgjedhjen e presidentit në 2007, duke theksuar se i vetmi qëllim i përafrimit të tyre është mbështetja e gjerë e bërjes së reformave në vend. ”Unë dua që reformat të kenë një mbështetje sa më të gjerë. Ky është qëllimi im”, tha dje Berisha. Ai nuk ka përcaktuar asgjë rreth niveleve të përfaqësimit të PAA-së, PDS-së dhe PBDNJ-së në koalicionin e ardhshëm qeverisës, duke theksuar se do të jenë negociatat ato që do të përcaktojnë gjithçka.

Zgjedhje 2005

Mandatet

PD 55 deputetë
PR 11 deputetë
PDR 4 deputetë
PDK 2 deputetë
PBL 1 deputet

Aleatët e rinj

PAA 4 deputetë
PAD 3 deputetë
PBDNJ 2 deputetë
PDS 2 deputetë

Totali 84 deputetë

Reagime

• Aleksandër Garuli, PR
  Duke gjykuar nga fushata elektorale, e cila ka pasur në thelb idenë se në këto zgjedhje nuk fiton vetëm e djathta, por e gjithë Shqipëria, si dhe nga fakti që për këtë qëllim janë ftuar dhe tri parti të koalicionit të majtë që të bëheshin pjesë e këtij projekti, mua më duket normale një ftesë e tillë, e bërë dje nga Berisha. Pra, them se është një veprim mjaft normal nga ana e PD-së. Por, nga ana tjetër, theksoj se ajo që mbetet për t’u parë është oreksi i këtyre partive në këtë koalicion me të djathtët, pasi gjykoj që nëse ato do të kenë një oreks jashtë realitetit politik, atëherë mendoj se duhet rishikuar qëndrimi i PD-së ndaj tyre.
• Ferdinand Xhaferri, PDR
  Ftesa zyrtare e dërguar nga PD-ja në një spektër të tillë partish, duke përfshirë edhe tri parti të koalicionit të majtë qeverisës, vjen në respekt të një slogani gjithëpërfshirës të fushatës elektorale dhe që synon bashkimin e shqiptarëve. Në këtë kuadër mund të them se objektivi i zgjerimit të bazës së koalicionit, me gjithë kritikat që mund të ketë, pasi PDS dhe PAA ishin kundërshtarë, është shumë më i madh. Pra, në këto kushte, ne nuk jemi xhelozë për këtë, pasi cilësia e qeverisjes së koalicionit që do të krijohet për ne është më e rëndësishme, sesa ideja se kush do të marrë pjesë në këtë koalicion.
• Neritan Ceka, PAD
  Unë mendoj se ftesa e Berishës, drejtuar tri partive të koalicionit të majtë, është një çështje mes Berishës dhe këtyre tri partive. Unë mund të them se jam i kënaqur që PAD nuk përfshihet në këtë ftesë për bashkëpunim në qeverisje. Kjo sepse unë mendoj se rezultati përfundimtar i zgjedhjeve të 3 korrikut në Shqipëri nuk ka dalë ende. Ne duhet të presim certifikimin e plotë të këtyre zgjedhjeve për të arritur në përfundime. Më pas mund të vijnë ftesat për bashkëqeverisje dhe koalicione qeverisëse. Në këto kushte, çdo ftesë për formimin e një qeverie nuk më duket e drejtë. Nga ana tjetër unë mund të them se nxitimi i këtyre partive për t’u futur në këtë koalicion qëndron jashtë moralit politik.
• Skënder Gjinushi, PDS
  Nevoja për krijim aleance midis PD-së dhe tri partive të majta, për mendimi tim është një fakt që tregon krizë morale dhe politike të vetë Berishës. Ka qenë Berisha ai që ka deklaruar se koalicioni i majtë ka qeverisur keq dhe se e majta ka dështuar në qeverisjen e saj. Tani është po ai, Berisha, që kërkon të qeverisë me ata, të cilët ai i ka quajtur se kanë qenë pjesë e keqqeverisjes së koalicionit të majtë. Pra, janë tri parti të “Koalicionit për Integrim”. Nga ana tjetër, tregon dhe mungesën e moralit të këtyre të tjerëve, pra të PAA-së, PBDNJ-së dhe PDS të cilët kërkojnë të qeverisin me Berishën, kundër të cilit kanë bërë fushatë zgjedhore.

Reagimi
Xhuveli:Jemi parti e qendrës

Kreu i PAA-së, Lufter Xhuveli, ka reaguar dje pas ftesës së Berishës për bashkëpunim. Ai tha dje se bashkëpunimi me PD-në është i justifikuar, pasi PAA-ja është parti e qendrës dhe jo parti e majtë. “Kemi qenë dhe vazhdojmë te jemi në bashkëpunim me të majtën, por qysh në dokumentin e parë kur PAA-ja është konstituuar 14 vjet më parë dhe më pas, ne jemi deklaruar një parti e qendrës. Kushdo që të jetë i interesuar nuk mund të gjejë qoftë dhe një herë të vetme që unë të kem deklaruar, gjatë të gjitha fushatave elektorale apo deklarimeve publike, që PAA-ja është një parti e majtë apo e qendrës së majtë, apo të kem thënë ne të majtët”, tha Xhuveli.

Kryeministri në detyrë nis takimet me drejtuesit lokalë të partisë. Drekon në Fier, pritet ftohtë në Vlorë

Turi Nano fillon me sherr në Durrës
Bizhga s’i bindet urdhrit, kreu i PS e “zëvendëson” me celular

Takimet e para të Nanos pas mbarimit të zgjedhjeve parlamentare në bazë kanë startuar me një sherr serioz me drejtues lokal të kasaj partie në Durrës.

Burimet thonë se kryetari i PS-së së Durrësit, Gazmir Bizhga, ka refuzuar dje një takim me Nanon, pasi ky i fundit e kishte ftuar të drekonte me të dhe disa kandidatë të humbur socialistë të Durrësit. Nëpërmjet një telefonate, Nano e Bizhga kanë shkëmbyer batuta kundërshtuese, madje deri në fyerje, gjë e cila ka çuar në reagimin e ashpër të Nanos, i cili ka urdhëruar Gjergji Kojën që të marrë në dorë drejtimin PS-së së këtij qyteti. Urdhrit të Nanos, Bizhga i është përgjigjur me fjalët se, “PS-ja nuk lëshohet apo merret duke dorëzuar apo marrë çelësa zyrash, por duke fituar autoritet dhe vlerësim në bazë, autoritet të cilin Nano e ka humbur”. Sherri me Bizhgën ka bërë të dështojë edhe dreka e planifikuar e Nanos dhe bashkëshortes së tij me kandidatët socialistë në Durrës dhe drejtues të PS-së në këtë qytet.

Dreka në Fier e Vlorë
Kreu i PS-së, i shoqëruar nga deputeti socialist Petro Koçi dhe deputeti Blendi Klosi, kanë shkuar dje në Apolloni të Fierit për të drekuar me deputetët socialistë të këtij rrethi dhe drejtues të bazës socialiste atje. Në drekën e organizuar nga kryeministri dhe bashkëshortja e tij, Xhoana Nano, kanë qenë të ftuar deputetë të PS-së së këtij qarku. Gjatë drekës është folur për arsyet e humbjes së PS-së. Mësohet që Nano ka deklaruar se kandidatët që humbën në këto zgjedhje do të mbajnë përgjegjësi. Ndërsa në Vlorë, Nano nuk ka gjetur gjithçka shtruar, pasi drejtuesit e PS-së së këtij rrethi e kanë pritur atë me reagime të ashpra. Darka në Retorant “Paradiso”, në Radhimë, është shoqëruar me bate mjaft të ashpra mes Nanos e Mezan Malajt dhe socialistëve të tjerë të Vlorës. Ndërsa sot Nano do të shkoj në Sarandë.

Strategjia
Zëra pranë selisë socialiste thonë se kreu socialist do të mbajë premtimin e dhënë sipas të cilit, nëse PS-ja humbet në zgjedhjet e 3 korrikut, ai do të japë dorëheqjen. Gjatë drekës së djeshme me rrethin e tij të ngushtë në Fier, Nano ka zbardhur planin e tij për zhvillimet e reja në PS, ku e ka lënë të hapur mundësinë e dorëheqjes së tij nga kreu i partisë. Burime pranë PS-së thonë se pas dorëheqjes së mundshme të Nanos nga kreu i PS-së, Petro Koçi është njeriu më i mundshëm për të marrë drejtimin partisë. Kjo për faktin se Koçi shihet si më i mundshmi për t’u rrëzuar sërish nga ky post prej Nanos.

 

Nano me mbështetësit
Kryetari i PS-së, Fatos Nano, vazhdon të gëzojë mbështetjen e një grupi të caktuar në PS, të cilët herë pas here kanë bërë oponencë, në dukje kundër Nanos. Duke u pozicionuar si një ndër rrymat më të forta në PS, Nano pritet të bashkojë sërish rreth vetes njerëzit, të cilët e mbështetën periudhën e grupimit për katarsis në PS. Një skemë e përafërt me atë të kohës së katarsisit në PS, pritet të jetë shpëtimi i kryetarit Nano, për të ruajtur pozicionin e tij në krye të PS-së, edhe pas humbjes së kësaj partie në zgjedhjet e 3 korrikut.

Të rinjtë
Një tjetër rrymë brenda PS-së ka filluar të marrë përmasat e saj që në kongresin fundit elektoral të kësaj partie, kur u legalizuan fraksionet. Kryetari i Bashkisë së Tiranës, Edi Rama, i lakuar herë pas here nga shtypi si kundërshtar i Nanos, ka mbledhur rreth tij njerëz të pakënaqur nga kryetari i partisë, për të krijuar një rrymë të re kundërshtare. Nëpërmjet kryebashkiakut Rama, kjo rrymë është identifikuar me idenë e bashkimit të PS-së, duke bërë fajtor, në një farë mënyre, kryetarin Nano për ndarjen e saj, që në kohën kur nga PS u shkëput LSI-ja.

“Xhaketat e vjetra”
Duke u ndjerë të braktisur nga kryetari i partisë, por dhe të sulmuar nga prurjet e reja në PS, disa prej figurave të vjetra të PS-së kanë filluar të organizohen mes tyre, për të krijuar qëndresën ndaj ndryshimeve të pritshme në këtë parti. Ata kanë ende mbështetjen e sekretarit të përgjithshëm, Gramoz Ruçi, i cili e ka demonstruar mbështetjen ndaj tyre edhe gjatë përzgjedhjes së kandidatëve për deputetë të PS-së në zgjedhjet e 3 korrikut. Figura qendrore të PS-së kanë filluar organizimin e bazës kundër lidershipit socialist, për ta konsideruar atë përgjegjës për humbjen më 3 korrik.